កាលពីថ្ងៃព្រហស្បតិ៍ សហរដ្ឋអាមេរិកបានស្នើចិនម្តងទៀតឱ្យធ្វើការចរចាអំពីពន្ធខ្ពស់ 145% របស់ប្រធានាធិបតី Trump ស្របគ្នានេះដែរ ចិនក៏បាននិយាយថា អាមេរិកត្រូវតែបង្ហាញការខិតខំប្រឹងប្រែងពិតប្រាកដដោយការដកពន្ធចេញ មិនមែនគ្រាន់តែប្រើការពិភាក្សាជាកលល្បិចដើម្បីបង្ខំចិនឱ្យចុះចាញ់នោះទេ។ នេះបើយោងតាមការចុះផ្សាយរបស់សារព័ត៍មាន Reuters ។
ថែមពីនេះ ចិនក៏បានលើកឡើងថាពន្ធរបស់អាមេរិកគឺអយុត្តិធម៌ និងជាការគំរាមកំហែង ប៉ុន្តែពន្ធទាំងនេះនឹងមិនបញ្ឈប់ចិនពីការកើនឡើងនៃសេដ្ឋកិច្ចបាននោះទេ។
លើសពីនេះ មន្ត្រីសហរដ្ឋអាមេរិក រួមទាំងរដ្ឋមន្ត្រីក្រសួងរតនាគារលោក Scott Bessent សង្ឃឹមថាកិច្ចពិភាក្សានេះនឹងដំណើរការ។ ខណៈ Trump បាននិយាយថាគាត់ជឿថា នេះជាឱកាសដ៏ល្អសម្រាប់កិច្ចព្រមព្រៀងពាណិជ្ជកម្មជាមួយចិន។
រីឯមេដឹកនាំចិនលោក ស៊ី ជីនពីង ក៏បាននិយាយថាចិននឹងសម្របខ្លួនទៅនឹងការផ្លាស់ប្តូរពិភពលោក ប៉ុន្តែលោកមិនបាននិយាយចំៗអំពីសហរដ្ឋអាមេរិកទេ នេះទំនងជាបង្ហាញថា ប្រទេសចិនអាចនឹងបើកចំហរក្នុងការកែសម្រួលសកម្មភាព ឬគោលនយោបាយរបស់ខ្លួន ដើម្បីឆ្លើយតបទៅនឹងការផ្លាស់ប្តូរស្ថានភាពពិភពលោក រួមទាំងទំនាក់ទំនងរបស់ខ្លួនជាមួយសហរដ្ឋអាមេរិក ទោះបីជាចិនធ្លាប់បានបដិសេធជាច្រើនដងក៏ដោយ ដែលនេះបង្ហាញថា ចិនអាចនឹងបើកទ្វាដើម្បីបន្ធូរបន្ថយភាពតានតឹងជាមួយអាមេរិក។
