ចិនគ្រោងនឹងសាងសង់ស្ថានីយថាមពលព្រះអាទិត្យដ៏ធំនៅក្នុងលំហដោយប្រើគ្រាប់រ៉ុក្កែត។ គម្រោងនេះត្រូវបានដឹកនាំដោយអ្នកវិទ្យាសាស្ត្រ លោក Lehao ដែលជាវិស្វករកំពូលនៅក្នុងប្រទេសចិន ហើយត្រូវបានគេប្រៀបធៀបគម្រោងរបស់គាត់ទៅនឹងទំនប់ទឹក Three Gorges Dam ដ៏ធំ ដែលជាគម្រោងទំនប់ទឹកដ៏ធំបំផុតនៅលើផែនដី ប៉ុន្តែគម្រោងលើកនេះនៅក្នុងលំហ។
យ៉ាងណាមិញ ស្ថានីយ៍ថាមពលព្រះអាទិត្យនេះនឹងដាក់ផ្ទាំងសូឡាឱ្យអណ្តែតក្នុងលំហអាកាសចម្ងាយ 36,000 គីឡូម៉ែត្រ (22,370 ម៉ាយ) ពីលើផែនដីក្នុងទីតាំងថេរមួយមិនផ្លាស់ទី។ ដោយសារតែបន្ទះទាំំងនេះនៅក្នុងលំហ វាអាចទទួលបានពន្លឺព្រះអាទិត្យខ្លាំងគ្រប់ពេលវេលា ព្រោះនៅក្នុងលំហគ្មានពពក គ្មានពេលយប់ ក្នុងការរារាំងពន្លឺព្រះអាទិត្យនោះទេ។ នេះមានន័យថាបន្ទះសូឡាទាំងនេះអាចផលិតថាមពលបានមិនឈប់ឈរ។
គំនិតនេះគឺដើម្បីប្រមូលថាមពលព្រះអាទិត្យនៅក្នុងលំហ ហើយបញ្ជូនវាត្រឡប់ទៅផែនដីវិញតាមរយៈបច្ចេកវិទ្យាពិសេស ដូចជាមីក្រូវ៉េវ ឬកាំរស្មីឡាស៊ែរ។ ហើយប្រសិនបើគម្រោងនេះដំណើរការ វាអាចផ្លាស់ប្តូររបៀបដែលពិភពលោកទទួលបានថាមពល ដោយផ្តល់នូវប្រភពថាមពលស្អាត និងមានស្ថិរភាព មិនថាអាកាសធាតុផ្លាស់ប្តូរយ៉ាងណានោះទេ។
