ការនាំចេញរបស់ចិនបានកើនឡើងសន្ទុះក្នុងខែធ្នូ ឆ្នាំ 2024 ជាមួយនឹងការនាំចូលក៏បង្ហាញពីការងើបឡើងវិញផងដែរ វាជាការជំរុញមួយផ្នែកដោយរោងចក្រដែលប្រញាប់ប្រញាល់ដឹកជញ្ជូនទំនិញមុនពេលមានហានិភ័យពាណិជ្ជកម្មដែលអាចកើតមាននៅក្រោយប្រធានាធិបតីជាប់ឆ្នោតរបស់សហរដ្ឋអាមេរិកលោក Donald Trump ។ ការនាំចេញដែលមានសារៈសំខាន់សម្រាប់សេដ្ឋកិច្ច 18 ពាន់ពាន់លានដុល្លាររបស់ប្រទេសចិនបានកើនឡើង 10.7% ពីមួយឆ្នាំទៅមួយឆ្នាំ ខណៈដែលការនាំចូលកើនឡើង 1.0% ប្រឆាំងនឹងការរំពឹងទុកនៃការធ្លាក់ចុះ។ នេះបណ្តាលឱ្យមានអតិរេកពាណិជ្ជកម្មចំនួន 104.8 ពាន់លានដុល្លារ កើនឡើងពីខែវិច្ឆិកា 97.4 ពាន់លានដុល្លារ។
ទោះជាយ៉ាងណាក៏ដោយ ទស្សនវិស័យសម្រាប់ឆ្នាំ 2025 គឺមិនទាន់មានភាពច្បាស់លាស់នូវឡើយ។ ពីព្រោះថាពន្ធដែលបានស្នើឡើងដោយលោក Trump ទៅលើទំនិញរបស់ចិនបានបង្កើនភាពតានតឹងផ្នែកពាណិជ្ជកម្មសារជាថ្មី ខណៈពេលដែលជម្លោះជាមួយ EU ជុំវិញពន្ធលើរថយន្តអគ្គិសនីរបស់ចិន ក៏បង្កបញ្ហាប្រឈមបន្ថែមទៀត។ កត្តាទាំងនេះគឺបានគំរាមកំហែងដល់កំណើនការនាំចេញរបស់ប្រទេសចិន និងសមត្ថភាពរបស់ខ្លួនក្នុងការដោះស្រាយបញ្ហាលើសចំណុះនៅក្នុងឧស្សាហកម្មដូចជារថយន្តជាដើម។
នៅក្នុងស្រុក សញ្ញានៃការងើបឡើងវិញបានលេចឡើង ដែលគាំទ្រដោយវិធានការជំរុញថ្មីៗ។ សកម្មភាពរោងចក្របានពង្រីកតិចតួចក្នុងរយៈពេលបីខែជាប់ៗគ្នា ហើយវិស័យសំណង់ និងសេវាកម្មបានបង្ហាញពីភាពប្រសើរឡើង។ ការនាំចូលទំនិញដូចជារ៉ែដែកបានឈានដល់កម្រិតកំណត់ត្រាដោយសារតែតម្លៃទាប ខណៈពេលដែលការនាំចូលកសិកម្ម រួមទាំងសណ្តែកសៀងបានឡើងដល់កម្រិតខ្ពស់។
ទោះបីជាមានការកើនឡើងទាំងនេះក៏ដោយ តម្រូវការក្នុងស្រុកខ្សោយ វិបត្តិអចលនទ្រព្យនៅតែអូសបន្លាយ និងការធ្លាក់ចុះនៃការនាំចូលប្រេងឆៅបង្ហាញពីបញ្ហាប្រឈម។ ដើម្បីទប់ទល់នឹងសម្ពាធពីខាងក្រៅ មេដឹកនាំរបស់ប្រទេសចិនគ្រោងនឹងបន្ធូរបន្ថយគោលនយោបាយរូបិយវត្ថុ និងអនុម័តវិធានការសារពើពន្ធសកម្ម ដោយកំណត់គោលដៅកំណើនសេដ្ឋកិច្ចប្រហែល 5% នៅឆ្នាំ 2025 ។
