តើអ្នកធ្លាប់ហត់នឿយខ្លាំង តែបែរជាគេងមិនលក់ព្រោះខួរក្បាលគិតរវើរវាយដែរឬទេ? នេះមិនមែនជាជំងឺឡើយ ប៉ុន្តែវាបណ្តាលមកពីកម្រិតអ័រម៉ូនតានតឹង (Cortisol) ក្នុងខ្លួនអ្នកនៅខ្ពស់ពេក។ ជនជាតិជប៉ុនមានវិធីសាស្ត្រដ៏សាមញ្ញ ដើម្បីធ្វើឱ្យអ្នកគេងឱ្យស្កប់។
ខាងក្រោមនេះគឺជាទម្លាប់ពេលយប់ទាំង ៧ យ៉ាង ដើម្បីបញ្ចុះភាពតានតឹង និងជួយឱ្យអ្នកគេងលក់បានស្កប់ស្កល់៖
១. ញ៉ាំអាហារពេលល្ងាចឱ្យបានលឿន: នៅប្រទេសជប៉ុន គេញ៉ាំអាហារពេលល្ងាចនៅម៉ោង ៦ ឬ ៧យប់។ ការញ៉ាំអាហារកៀកម៉ោងគេងពេក ធ្វើឱ្យប្រព័ន្ធរំលាយអាហារនៅបន្តធ្វើការ កម្តៅក្នុងខ្លួនកើនឡើង និងធ្វើឱ្យអ័រម៉ូន Cortisol បន្តកើនឡើង។ ការបញ្ឈប់ការញ៉ាំ ២ ទៅ ៣ ម៉ោងមុនពេលគេង ជួយឱ្យកម្តៅក្នុងខ្លួនធ្លាក់ចុះ ដែលជាសញ្ញាប្រាប់ខួរក្បាលដល់ម៉ោងត្រូវគេង។
២. ងូតទឹកក្តៅឧណ្ហៗ: ការត្រាំ ឬងូតទឹកក្តៅប្រហែល ៦០ ទៅ ៩០ នាទីមុនពេលគេង ជួយដំឡើងកម្តៅរាងកាយ។ ប៉ុន្តែអ្វីដែលធ្វើឱ្យអ្នកងងុយគេង គឺនៅពេលដែលអ្នកចេញពីបន្ទប់ទឹក កម្តៅរាងកាយនឹងធ្លាក់ចុះយ៉ាងលឿន ដែលវាជួយជំរុញការបញ្ចេញអ័រម៉ូនមេឡាតូនីនធ្វើឱ្យអ្នកងងុយគេងដោយស្វ័យប្រវត្តិ។
៣. បន្ថយពន្លឺភ្លើងនៅក្នុងផ្ទះ: ពន្លឺភ្លើងភ្លឺខ្លាំងបញ្ជូនសញ្ញាទៅខួរក្បាលថាវានៅតែជាពេលថ្ងៃ។ ដូច្នេះ ពីរម៉ោងមុនពេលចូលគេង អ្នកគួរតែបន្ថយពន្លឺភ្លើងនៅក្នុងផ្ទះ ប្រើភ្លើងពណ៌លឿងព្រាលៗ ដើម្បីឱ្យខួរក្បាលចាប់ផ្តើមបញ្ចេញអ័រម៉ូនងងុយគេង។
៤. ដើរលេងតិចៗក្រោយអាហារពេលល្ងាច: ជនជាតិជប៉ុនមានទម្លាប់ដើរលេងតិចៗប្រហែល ១០ ទៅ ២០ នាទីក្រោយអាហារពេលល្ងាច។ ការដើរនេះមិនមែនជាការហាត់ប្រាណយកញើសនោះទេ តែវាជួយសម្រួលដល់ការរំលាយអាហារ ស្រូបយកខ្យល់អាកាសបរិសុទ្ធ និងជួយបញ្ចុះអ័រម៉ូនតានតឹងបានយ៉ាងមានប្រសិទ្ធភាព។
៥. កាត់ផ្តាច់ពីគ្រឿងអេឡិចត្រូនិក: ៦០ នាទីមុនពេលគេង អ្នកគួរតែឈប់ប្រើប្រាស់ទូរស័ព្ទ កុំព្យូទ័រ ឬមើលទូរទស្សន៍។ ការមើលរឿង ឬអូសបណ្តាញសង្គម មិនមែនជាការសម្រាកនោះទេ តែវាជាការផ្តល់ភាពតានតឹង និងព័ត៌មានបន្ថែមដល់ខួរក្បាល។ ចូរប្រើប្រាស់ពេលវេលានោះដើម្បីសម្រាកពិតប្រាកដដោយមិនមានអេក្រង់។
៦. អានសៀវភៅ: ការអានសៀវភៅត្រឹមតែ ៦ នាទី អាចជួយកាត់បន្ថយភាពតានតឹងបានដល់ទៅ ៦៨%។ វាជួយបង្វែរអារម្មណ៍ខួរក្បាលពីការគិតខ្វល់ខ្វាយរឿងបញ្ហាប្រចាំថ្ងៃ ឱ្យទៅផ្តោតលើសាច់រឿងក្នុងសៀវភៅវិញ ដែលជួយឱ្យសាច់ដុំសម្រាក និងចង្វាក់បេះដូងលោតយឺត។
៧. ការដឹងគុណ និងគិតពីចំណុចល្អៗ: មុនពេលគេង ជនជាតិជប៉ុនតែងតែចំណាយពេលបន្តិចដើម្បីគិតពីអ្វីដែលពួកគេដឹងគុណ។ ជំនួសឱ្យការគិតពីរឿងអាក្រក់ៗដែលបានកើតឡើង ចូរព្យាយាមគិតរកចំណុចល្អៗ ៣ យ៉ាងដែលអ្នកទទួលបាននៅថ្ងៃនេះ (ឧទាហរណ៍៖ អាហារឆ្ងាញ់ ឬការធ្វើដំណើររលូន)។ ការគិតបែបនេះ ជួយបញ្ចេញអ័រម៉ូនសប្បាយចិត្ត និងបំបាត់ភាពតានតឹងមុនពេលគេង។
