ការសម្រេចចិត្តចាប់ផ្តើមអាជីវកម្មមួយ គឺជាដំណើរមួយដ៏គួរឲ្យរំភើប ប៉ុន្តែភាពជោគជ័យមិនមែនកើតចេញពីការមានគំនិតល្អតែមួយមុខនោះទេ។ មុននឹងបោះជំហានចូលទៅក្នុងពិភពជំនួញ អ្នកត្រូវមានគោលការណ៍សំខាន់ៗមួយចំនួនដើម្បីធានាបាននូវភាពរឹងមាំរបស់អាជីវកម្ម។
ខាងក្រោមនេះជាគោលការណ៍ទាំង ៥ ដែលអ្នកគួរពិចារណា៖
១. ស្វែងយល់ពីទីផ្សារ និងអតិថិជន
គោលការណ៍ដំបូងគឺត្រូវដឹងថាគំនិតអាជីវកម្មរបស់អ្នកពិតជាមានតម្រូវការនៅក្នុងទីផ្សារមែនឬអត់។ អ្នកត្រូវដឹងច្បាស់ថា តើអ្នកកំពុងដោះស្រាយបញ្ហាអ្វីសម្រាប់អ្នកណា? អ្នកគួរចំណាយពេលស្រាវជ្រាវពីទីផ្សារ អតិថិជនគោលដៅ និងដៃគូប្រកួតប្រជែង។ ត្រូវប្រាកដថាផលិតផលឬសេវាកម្មរបស់អ្នកពិតជាអាចបំពេញតម្រូវការរបស់អតិថិជនបាន។
២. គ្រប់គ្រងហិរញ្ញវត្ថុផ្ទាល់ខ្លួនឲ្យបានល្អ
មុននឹងចាប់ផ្តើមអាជីវកម្ម អ្នកត្រូវមានស្ថានភាពហិរញ្ញវត្ថុផ្ទាល់ខ្លួនល្អ។ ពីព្រោះថាអាជីវកម្មរបស់អ្នកនឹងមិនអាចដំណើរការបានទេ ប្រសិនបើអ្នកនៅតែមានវិបត្តិហិរញ្ញវត្ថុផ្ទាល់ខ្លួន។ ដូចនេះអ្នកត្រូវមានប្រាក់សន្សំបម្រុងទុកសម្រាប់ទាំងអាជីវកម្ម និងសម្រាប់ការចំណាយផ្ទាល់ខ្លួនក្នុងអំឡុងពេលដំបូង។ ជាមួយគ្នានេះ ត្រូវបំបែកគណនីធនាគាររបស់អាជីវកម្មនិងរបស់ខ្លួនឯងឲ្យបានច្បាស់លាស់។
៣. មានផ្នត់គំនិតត្រៀមខ្លួនសម្រាប់ហានិភ័យ
អ្នកត្រូវត្រៀមខ្លួនរួចជាស្រេចសម្រាប់បញ្ហា ការបរាជ័យ និងការលំបាកដែលអាចកើតឡើង។ ដូចនេះអ្នកត្រូវមានផ្នត់គំនិតដែលចាត់ទុកការបរាជ័យជាមេរៀន មិនមែនជាទីបញ្ចប់នោះទេ។ ត្រូវមានភាពអត់ធ្មត់ និងវិន័យខ្ពស់ដើម្បីបន្តទៅមុខ ទោះបីជាមានឧបសគ្គក៏ដោយ។
៤. កសាងបណ្តាញទំនាក់ទំនង
អាជីវកម្មមិនអាចកសាងបានដោយខ្លួនឯងនោះទេ។ បណ្តាញទំនាក់ទំនងល្អអាចផ្តល់ឲ្យអ្នកនូវការណែនាំ ចំណេះដឹង និងឱកាសអាជីវកម្មថ្មីៗ។ អ្នកត្រូវកសាងទំនាក់ទំនងជាមួយដៃគូអាជីវកម្ម និងអ្នកជំនាញ ថែមពីនេះ អ្នកគួរចូលរួមក្នុងព្រឹត្តិការណ៍អាជីវកម្មផ្សេងៗដើម្បីពង្រីកបណ្តាញរបស់អ្នក។
៥. មានវិន័យនិងការតាំងចិត្ត
ការចាប់ផ្តើមដំបូងអាចនឹងមិនទទួលបានលទ្ធផលភ្លាមៗនោះទេ ដូច្នេះអ្នកត្រូវតែមានវិន័យដើម្បីបន្តធ្វើការងាររបស់អ្នកជាប្រចាំ។ អ្នកត្រូវមានភាពស្មោះត្រង់ចំពោះគោលដៅរបស់អ្នក ហើយមានវិន័យក្នុងការធ្វើការងារ ទោះបីជាអ្នកមិនមានអារម្មណ៍ចង់ធ្វើក៏ដោយ។
សរុបមក ការមានគំនិតអាជីវកម្មល្អគឺសំខាន់ ប៉ុន្តែការមានគោលការណ៍ត្រឹមត្រូវទាំងនេះនឹងផ្តល់ឲ្យអាជីវកម្មរបស់អ្នកនូវគ្រឹះដ៏រឹងមាំសម្រាប់ភាពជោគជ័យ។
