ការអានសៀវភៅមិនមែនគ្រាន់តែជាការកម្សាន្ត ឬសម្រាប់តែសិស្សសាលានោះទេ។ សម្រាប់បុគ្គលជោគជ័យ «ទម្លាប់អាន» គឺជាការហាត់ប្រាណសម្រាប់ខួរក្បាល និងជាផ្លូវកាត់ដើម្បីទទួលបានបទពិសោធន៍រាប់សិបឆ្នាំពីអ្នកដទៃ ក្នុងរយៈពេលតែប៉ុន្មានម៉ោងប៉ុណ្ណោះ។
១. ហេតុអ្វីអ្នកគួរមានទម្លាប់អាន?
-ទិញពេលវេលា និងបទពិសោធន៍: អ្នកនិពន្ធម្នាក់ចំណាយពេលរាប់ឆ្នាំដើម្បីស្រាវជ្រាវ និងឆ្លងកាត់បទពិសោធន៍ជីវិត មុននឹងសរសេរសៀវភៅមួយក្បាល។ នៅពេលអ្នកអាន អ្នកកំពុងរៀនមេរៀនជីវិតទាំងនោះក្នុងរយៈពេលខ្លី ដោយមិនចាំបាច់ទៅជួបការលំបាកដោយខ្លួនឯង។
-ហ្វឹកហាត់ការផ្តោតអារម្មណ៍: នៅក្នុងយុគសម័យនៃវីដេអូខ្លីៗ (TikTok/Reels) ខួរក្បាលរបស់យើងងាយនឹងបាត់បង់ការផ្តោត។ រីឯការអានសៀវភៅតម្រូវឲ្យមានការផ្ចង់អារម្មណ៍ ដែលជួយហ្វឹកហាត់ខួរក្បាលរបស់អ្នកឲ្យមានភាពស្ងប់ស្ងាត់ និងគិតបានជ្រៅ។
-ពង្រីកវាក្យសព្ទ និងការទំនាក់ទំនង: អ្នកអានច្រើន តែងតែចេះប្រើពាក្យពេចន៍បានល្អ។ នេះជួយឲ្យអ្នកក្លាយជាអ្នកនិយាយ និងអ្នកសរសេរដែលមានឥទ្ធិពល។
២. របៀបចាប់ផ្តើមទម្លាប់អាន (សម្រាប់អ្នករវល់)
-ចាប់ផ្តើមពី “តិច” តែ “ទៀងទាត់”: កុំបង្ខំខ្លួនឯងឲ្យអានមួយម៉ោង។ ចាប់ផ្តើមត្រឹមតែ ១៥ នាទី មុនពេលចូលគេង ឬពេលព្រឹកព្រលឹម។
-អានអ្វីដែលអ្នកចូលចិត្ត: កុំអានតាមគេ។ ប្រសិនបើអ្នកចូលចិត្តរឿងនិទាន អានរឿងនិទាន។ ប្រសិនបើចូលចិត្តជំនួញ អានសៀវភៅជំនួញ។ ការចាប់ផ្តើមពីអ្វីដែលអ្នកចូលចិត្ត ធ្វើឲ្យអ្នកមិនងាយធុញ។
-យកសៀវភៅតាមខ្លួន: ដាក់សៀវភៅមួយក្បាលក្នុងកាបូប ឬដោនឡូត E-book ក្នុងទូរស័ព្ទ។ ហើយប្រើពេលរង់ចាំ (ដូចជាចាំមិត្តភក្តិ ឬពេលទំនេរ) ដើម្បីអានជំនួសឲ្យការលេងបណ្តាញសង្គម។
សរុបមក «អ្នកដឹកនាំ គឺជាអ្នកអាន»។ ការកសាងទម្លាប់អានថ្ងៃនេះ គឺជាការដាក់គ្រឹះសម្រាប់ចំណេះដឹង និងគំនិតដែលនឹងផ្លាស់ប្តូរអនាគតរបស់អ្នក។
