នៅក្នុងទីផ្សារដែលមានការប្រកួតប្រជែង អាជីវកម្មមិនអាចពឹងផ្អែកតែលើផលិតផលដែលមានស្រាប់នោះទេ។ ការវិភាគទីផ្សារគឺជាវិធីសាស្រ្តដ៏សំខាន់មួយដែលជួយឲ្យអ្នកក្លាយជាអ្នកដឹកនាំទីផ្សារ ដោយការកំណត់នូវឱកាសថ្មីៗមុនពេលដៃគូប្រកួតប្រជែងរបស់អ្នក។
ខាងក្រោមនេះជាជំហានសំខាន់ៗដើម្បីវិភាគទីផ្សារនិងស្វែងរកឱកាសថ្មី៖
១. វិភាគពីគម្លាតនៃតម្រូវការអតិថិជន
ដើម្បីរកឱកាសថ្មី អ្នកត្រូវរកឲ្យឃើញពីបញ្ហាដែលគ្មាននរណាម្នាក់ដោះស្រាយបានល្អ។ នេះមានន័យថាអ្នកត្រូវស្តាប់ឲ្យបានស៊ីជម្រៅពីការត្អូញត្អែរនិងតម្រូវការដែលមិនទាន់ត្រូវបានបំពេញ ដូចជាពិនិត្យមើលការវាយតម្លៃអវិជ្ជមានរបស់គូប្រកួតប្រជែងថា តើអតិថិជនត្អូញត្អែរអំពីអ្វី? ចំណុចនេះហើយគឺជាកន្លែងដែលអ្នកអាចបង្កើតផលិតផលប្លែកពីគេ។
២. វិភាគនិន្នាការបច្ចេកវិទ្យា
បច្ចេកវិទ្យាគឺជាកម្លាំងចលករដ៏ធំបំផុតក្នុងការបង្កើតទីផ្សារថ្មី។ ត្រូវតាមដាននូវការអភិវឌ្ឍន៍បច្ចេកវិទ្យាចុងក្រោយបង្អស់ ហើយគិតថាតើអ្នកអាចយកបច្ចេកវិទ្យាទាំងនោះមកអនុវត្តលើវិស័យរបស់អ្នកដោយរបៀបណា។ ដូចជាស្វែងយល់ពីរបៀបដែល AI ឬ Automation អាចជួយកាត់បន្ថយការចំណាយ ឬបង្កើតសេវាកម្មថ្មីៗដែលមិនធ្លាប់មានពីមុន។ល។
៣. វិភាគទីផ្សារដែលនៅជិតគ្នា
ឱកាសថ្មីៗអាចស្ថិតនៅក្នុងតំបន់ដែលនៅជាប់នឹងអាជីវកម្មរបស់អ្នក។ ដូចនេះអ្នកត្រូវគិតពីរបៀបដែលអ្នកអាចពង្រីកផលិតផលរបស់អ្នកទៅកាន់ក្រុមអតិថិជនដែលទាក់ទងនឹងអតិថិជនបច្ចុប្បន្នរបស់អ្នក។
ឧទាហរណ៍: ប្រសិនបើអ្នកលក់កាហ្វេស្រស់ អ្នកអាចពង្រីកទៅលក់គ្រាប់កាហ្វេដែលវេចខ្ចប់តាមអនឡាញ ឬបើកវគ្គបង្រៀនធ្វើកាហ្វេ។ល។
៤. វិភាគកត្តាខាងក្រៅ និងកត្តាសង្គម
ការផ្លាស់ប្តូរសង្គម សេដ្ឋកិច្ច ឬច្បាប់ តែងតែបង្កើតតម្រូវការថ្មីៗ។ ត្រូវតាមដានពីការផ្លាស់ប្តូរទាំងនេះដើម្បីកំណត់ទិសដៅនៃតម្រូវការនាពេលអនាគត។
ឧទាហរណ៍: ការកើនឡើងនៃមនុស្សវ័យចំណាស់បង្កើតតម្រូវការសម្រាប់ផលិតផលសុខភាព។ ការកើនឡើងនៃការងារពីចម្ងាយបង្កើតតម្រូវការសម្រាប់សេវាកម្មដឹកជញ្ជូននិងការរៀបចំការិយាល័យតាមផ្ទះ។ល។
សរុបមក ការវិភាគទីផ្សារគឺជាដំណើរនៃការរកឃើញ។ អាជីវកម្មដែលអនុវត្តការវិភាគនេះជាប់លាប់នឹងអាចរកឃើញឱកាសថ្មីៗ ហើយឈានមុខគេក្នុងទីផ្សារជានិច្ច។
