រដ្ឋមន្ត្រីក្រសួងរតនាគារអាមេរិកលោក Scott Bessent បានប្រកាសថា ប្រទេសម៉ិកស៊ិកបានស្នើរដំឡើងពន្ធលើទំនិញចិនដែលនាំចូលក្នុងទីផ្សារម៉ិកស៊ិក ដែលស្រដៀងនឹងពន្ធដែលអាមេរិកបានដាក់លើទំនិញចិន ដោយលោកថានេះជាសកម្មភាពគួរឱ្យចាប់អារម្មណ៍។
លោកបានស្នើថា ប្រទេសកាណាដាគួរតែចូលរួមផងដែរ ដោយបង្កើតរណសិរ្សរួបរួមប្រឆាំងនឹងការនាំចូលរបស់ចិន និងការពារឧស្សាហកម្មអាមេរិកខាងជើងពីការនាំចូលរបស់ចិន។ ហើយចំពោះពន្ធ25% ដែលអាមេរិកនឹងដាក់ទៅលើទំនិញម៉ិកស៊ិក កាណាដា រួមជាមួយនឹងពន្ធបន្ថែម 10% លើការនាំចូលរបស់ចិននឹងចូលជាធរមាន នៅថ្ងៃទី4 ខែមីនា ខាងមុខនេះ។
ដូចនេះទើបប្រទេសម៉ិកស៊ិកកំពុងពិចារណាដំឡើងពន្ធទៅលើទំនិញចិន ដើម្បីជួយការពារឧស្សាហកម្មរបស់ម៉ិកស៊ិកពីផលប៉ះពាល់នៃពន្ធរបស់សហរដ្ឋអាមេរិក និងកាត់បន្ថយលំហូរទំនិញរបស់ចិនចូលទៅក្នុងទីផ្សារសហរដ្ឋអាមេរិក ដោយការពារឧស្សាហកម្មអាមេរិកខាងជើងទាំងមូល។
ទន្ទឹមនឹងនេះ ស្ថានទូតចិនបានរិះគន់ការដំឡើងពន្ធរបស់អាមេរិកថាបំពានលើច្បាប់របស់អង្គការពាណិជ្ជកម្មពិភពលោក។ ស្របពេលដែល ប្រទេសម៉ិកស៊ិកកំពុងតែពិចារណាលើវិធានកំណត់ពន្ធលើទំនិញរបស់ចិនបន្ថែមទៀត ដែលនេះវាកំពុងតែឆ្លុះបញ្ចាំងពីភាពតានតឹងពាណិជ្ជកម្មដែលកំពុងបន្តរវាងអាមេរិកខាងជើង និងចិន។
