Oracle គ្រោងនឹងចំណាយប្រាក់ប្រហែល 40 ពាន់លានដុល្លារ ដើម្បីទិញបន្ទះឈីប Nvidia GB200 ចំនួន 400,000 បន្ទះ សម្រាប់មជ្ឈមណ្ឌលទិន្នន័យថ្មីរបស់ OpenAI នៅ Abilene រដ្ឋ Texas ។ មជ្ឈមណ្ឌលទិន្នន័យនេះគឺជាផ្នែកមួយនៃគម្រោង Stargate ដែលមានតម្លៃ 500 ពាន់លានដុល្លារ ដែលជាកិច្ចសហការរវាង OpenAI, SoftBank, Oracle និង MGX ។ ដោយគម្រោងនេះត្រូវបានគេរំពឹងថានឹងចាប់ផ្តើមដំណើរការនៅពាក់កណ្តាលឆ្នាំ 2026 ជាមួយនឹងថាមពល 1.2 ជីហ្គាវ៉ាត់។
ក្នុងនាមជាដៃគូសហការ ក្រុមហ៊ុន Oracle បានចំណាយដ៏ច្រើនបែបនេះ គឺដើម្បីជួលថាមពលបន្ទះឈីបទាំងនោះទៅឱ្យ OpenAI ក្រោមកិច្ចព្រមព្រៀងរយៈពេល 15 ឆ្នាំ ដោយជួយ OpenAI កាត់បន្ថយការពឹងផ្អែកលើ Microsoft ។ រីឯដៃគូផ្សេងទៀតដូចជាក្រុមហ៊ុន Crusoe និង Blue Owl Capital បានទទួលមូលនិធិចំនួន 15 ពាន់លានដុល្លារ ជាមួយនឹងប្រាក់កម្ចី $9.6 ពាន់លានដុល្លារពី JPMorgan ដើម្បីចូលរួមកសាងមជ្ឈមណ្ឌលទិន្នន័យថ្មីរបស់ OpenAI ។
យ៉ាងណាមិញ ក្នុងដំណើរការកសាងមជ្ឈមណ្ឌលទិន្នន័យនេះ OpenAI ត្រូវការថវិកាបន្ថែមទៀត បើទោះបីដៃគូទាំងនេះបានជួយវិនិយោគសរុបជាង 55 ពាន់លាសដុល្លារក៏ដោយ ប៉ុន្តែ OpenAI និងដៃគូរបស់ខ្លួននៅតែត្រូវការមូលនិធិបន្ថែមទៀតដើម្បីបញ្ចប់គម្រោងនេះ។
