នៅថ្ងៃទី២០ ខែកុម្ភៈ ឆ្នាំ២០២៥ លោក សេង រ៉ាវុធ អគ្គនាយករង នៃរដ្ឋលេខាធិការដ្ឋានអាកាសចរស៊ីវិល បានថ្លែងនៅពិធីបើកសមយុទ្ធលើតុ ដោយលើកឡើងថា ការធ្វើសមយុទ្ធនេះ ជាតម្រូវការចាំបាច់ដែលគ្រប់អាកាសយានដ្ឋានអន្តរជាតិទាំងអស់ត្រូវធ្វើ។ គោលបំណងនៃសមយុទ្ធនេះ ដើម្បីឆ្លើយតបឱ្យទាន់ពេលវេលានៅពេលមានគ្រោះថ្នាក់កើតឡើងនៅអាកាសយានដ្ឋាន ឬនៅជិតនោះ។
លំហាត់សមយុទ្ធលើតុ ត្រូវបានរៀបចំឡើងនៅថ្ងៃទី២០ ខែកុម្ភៈ ដើម្បីត្រៀមនៅពេលមានលំហាត់សមយុទ្ធជាផ្លូវការនៅថ្ងៃទី២៧ ខែកុម្ភៈ នាអាកាសយានដ្ឋានអន្តរជាតិសៀមរាប-អង្គរ។
សមយុទ្ធនេះធ្វើឡើងក្រោមការរៀបចំដោយរដ្ឋលេខាធិការដ្ឋានអាកាសចរស៊ីវិល សហការជាមួយអាជ្ញាធរខេត្តសៀមរាប និងអង្គភាពស្ថាប័នពាក់ព័ន្ធជាច្រើនទៀត ដើម្បីសាកល្បងផែនការសង្គ្រោះបន្ទាន់ និងវាយតម្លៃសមត្ថភាពប្រតិបត្តិការរបស់ខ្លួន ក្នុងទំនាក់ទំនងក្នុងពេលកើតហេតុជាក់ស្តែង។
លោក សេង រ៉ាវុធ បញ្ជាក់ថា សមយុទ្ធនេះដែរ ក៏ជាការសាកល្បងនីតិវិធីក្នុងការហៅទំនាក់ទំនងទូរសព្ទ និងហ្វ្រេកង់ប្រើប្រាស់ពេលមានគ្រោះអាសន្ន និងសហការក្នុងការឆ្លើយតបរបស់ភ្នាក់ងារខាងក្នុង និងក្រៅអាកាសយានដ្ឋាន។ រីឯលោក ប៊ុន រដ្ឋា នាយកអាកាសយានដ្ឋានអន្តរជាតិសៀមរាប-អង្គរ ក៏បានបញ្ជាក់ថា ការធ្វើសមយុទ្ធនេះ ជាផែនការគ្រប់គ្រងគ្រោះអាសន្ន វាបានកំណត់យ៉ាងច្បាស់នូវតួនាទីរបស់អ្នកពាក់ព័ន្ធទាំងអស់ ទាំងក្នុង និងក្រៅអាកាសយានដ្ឋាន។
បន្ថែមពីនេះទៀត ផែនការនេះបានធ្វើការទំនាក់ទំនង យល់ដឹង និងរៀបចំជាស្រេច ក្នុងបំណងដើម្បីឆ្លើយតបយ៉ាងមានប្រសិទ្ធភាពក្នុងគ្រោះអាសន្នណាមួយដែលកើតមាន។ សមយុទ្ធនេះក៏ជាការរៀបចំកម្លាំងមនុស្ស សម្ភារៈបរិក្ខារ មធ្យោបាយនានា និងធនធានដទៃទៀតដែលមាន ដើម្បីប្រើប្រាស់ក្នុងអំឡុងពេលធ្វើអន្តរាគមន៍ និងប្រតិបត្តិការស្ដារស្ថានភាពឱ្យប្រសើរឡើងវិញ៕
ប្រភព៖ ខ្មែរថាមស៍
