សិង្ហបុរីបានចេញច្បាប់ថ្មីសម្រាប់ Agentic AI ដំបូងគេ ដើម្បីជៀសវាងការលេចធ្លាយព័ត៌មានសម្ងាត់របស់អតិថិជន

ថ្មីៗនេះ ប្រទេសសិង្ហបុរីបានក្លាយជាប្រទេសដំបូងគេ ដែលដាក់ចេញនូវច្បាប់គ្រប់គ្រង Agentic AI ដែលជាបច្ចេកវិទ្យាឆ្លាតវៃអាចសម្រេចចិត្ត និងធ្វើការងារធំៗបានដោយខ្លួនឯង (ដូចជាការផ្ទេរប្រាក់ ឬគ្រប់គ្រងទិន្នន័យ) ដោយមិនបាច់មានមនុស្សបញ្ជាគ្រប់ជំហាន។ ច្បាប់នេះត្រូវបានបង្កើតឡើងដើម្បីជួយឱ្យក្រុមហ៊ុននានាប្រើប្រាស់ AI ជំនាន់ថ្មីនេះដោយទំនុកចិត្ត និងសុវត្ថិភាពបំផុត។ ទោះបីជា Agentic AI ជួយបង្កើនផលិតភាពការងារបានយ៉ាងលឿន ប៉ុន្តែវាក៏អាចបង្កហានិភ័យធ្ងន់ធ្ងរដែរ ប្រសិនបើគ្មានការគ្រប់គ្រងត្រឹមត្រូវ ដូចជាការច្រឡំលុបទិន្នន័យសំខាន់ ឬធ្វើឱ្យធ្លាយព័ត៌មានសម្ងាត់របស់អតិថិជន។ ហេតុនេះហើយ ទើបច្បាប់សិង្ហបុរីតម្រូវឱ្យក្រុមហ៊ុននានាត្រូវតែមានវិធានការការពារឱ្យបានហ្មត់ចត់បំផុត ដើម្បីធានាថាបច្ចេកវិទ្យានេះនឹងមិនដើរខុសផ្លូវ។

ក្នុងច្បាប់នោះដែរ បានផ្តល់នូវការអនុវត្តល្អៗ ដោយសង្កត់ធ្ងន់ថា “មនុស្សនៅតែជាអ្នកទទួលខុសត្រូវជាចម្បង” ចំពោះសកម្មភាពរបស់ AI។ ដោយការណែនាំសំខាន់ៗរួមមាន៖

• មនុស្សជាអ្នកសម្រេច: ច្បាប់តម្រូវឱ្យក្រុមហ៊ុនរៀបចំប្រព័ន្ធឱ្យ AI ចេះសុំច្បាប់។ ទោះ AI ឆ្លាតប៉ុណ្ណា ក៏វាមិនអាចសម្រេចចិត្តរឿងធំៗដោយចិត្តឯងបានដែរ។ រាល់កិច្ចការសំខាន់ៗ (ដូចជាការផ្ទេរប្រាក់ចំនួនច្រើន ឬការលុបទិន្នន័យ) AI ត្រូវតែសុំការអនុញ្ញាតពីមនុស្សជាមុនសិន។
• កម្រិតសិទ្ធិ: ច្បាប់តម្រូវឱ្យក្រុមហ៊ុនកំណត់ព្រំដែន ដោយក្រុមហ៊ុននឹងផ្តល់សិទ្ធិឱ្យ AI ចូលមើលទិន្នន័យដែលវាមានភារកិច្ចធ្វើប៉ុណ្ណោះ រីឯចំពោះ ទិន្នន័យសំខាន់ៗ ដូចជាលេខសម្ងាត់ ឬព័ត៌មានឯកជនរបស់អតិថិជន មិនឱ្យ AI ឃើញដាច់ខាត បើសិនជាការងាររបស់វាមិនពាក់ព័ន្ធនឹងរឿងទាំងនោះ។ ការធ្វើបែបនេះ គឺដើម្បីការពារកុំឱ្យ AI យកព័ត៌មានសម្ងាត់លេចធ្លាយដោយអចេតនា ឬការពារកុំឱ្យមានការលួចទិន្នន័យក្នុងករណីដែលមានអ្នកផ្សេងលួចចូលបញ្ជា AI នោះបាន។
• ការទទួលខុសត្រូវ: បើ AI ធ្វើខុស ក្រុមហ៊ុនម្ចាស់អាជីវកម្មគឺជាអ្នកទទួលខុសត្រូវចំពោះមុខច្បាប់ ដូច្នេះពួកគេត្រូវតែបណ្តុះបណ្តាលបុគ្គលិកឱ្យចេះតាមដានកំហុស AI ជាប់ជានិច្ច។