ស្វីសកំពុងសាកល្បងគំនិតថ្មីមួយ ដោយដាក់បន្ទះស្រូបពន្លឺព្រះអាទិត្យនៅលើផ្លូវរថភ្លើង ដើម្បីបង្កើតអគ្គិសនីស្អាត។ ក្រុមហ៊ុនស្វីសមួយដែលមានឈ្មោះថា Sun-Ways កំពុងដាក់បន្ទះស្រូបពន្លឺព្រះអាទិត្យនៅចន្លោះផ្លូវរថភ្លើង។ បន្ទះស្រូបពន្លឺព្រះអាទិត្យត្រូវបានដាក់នៅលើផ្លូវដែកដោយរថភ្លើងពិសេស វាបានដំឡើងយ៉ាងរហ័ស និងងាយស្រួល ដោយមិនចាំបាច់ដាក់កម្មករម្នាក់ៗដោយដៃឡើយ ពីព្រោះគេប្រើរថភ្លើងពង្រាយបន្ទះតាមផ្លូវដោយស្វ័យប្រវត្តិ។
ដោយបន្ទះស្រូបពន្លឺព្រះអាទិត្យអាចផលិតអគ្គិសនីបាន ហើយថែមទាំងអាចឱ្យរថភ្លើងនៅតែអាចដំណើរការលើផ្លូវដែកបាន ដោយគ្មានការរារាំងឡើយ។ ចំពោះការធ្វើតេស្តដំបូងកំពុងកើតឡើងនៅស្ថានីយ៍រថភ្លើងមួយក្នុងទីក្រុង Neuchâtel ដែលផលិតថាមពលគ្រប់គ្រាន់មិនត្រឹមតែស្ថានីយ៍នៅទីនោះទេ ថែមទាំសម្រាប់ផ្ទះមួយចំនួននៅក្នុងទីក្រុងនោះផងដែរ។
ខណៈពេលដែលគេរំពឹងថានៅពេលអនាគត ប្រព័ន្ធនេះអាចត្រូវបានប្រើប្រាស់ទូទាំងប្រទេសដើម្បីបង្កើតថាមពលកកើតឡើងវិញបន្ថែមទៀតដោយមិនចាំបាច់ត្រូវការទីកន្លែងបន្ថែម។ បើទោះបីបច្ចុប្បន្ន វាជាគម្រោងតូចមួយ ប៉ុន្តែវាបង្ហាញពីវិធីដ៏ឆ្លាតវៃ និងងាយស្រួលសម្រាប់បរិស្ថានក្នុងការប្រើប្រាស់កន្លែងដែលមានស្រាប់នាពេលអនាគត។
