ជីវិតប្រៀបបាននឹងការជិះកង់។ ដើម្បីរក្សាលំនឹងបាន អ្នកត្រូវតែបន្តធ្វើចលនាទៅមុខ ប៉ុន្តែអ្នកក៏ត្រូវចេះកាន់ចង្កូតឲ្យត្រង់ដែរ។ ការ «រក្សាលំនឹងជីវិត» (Work-Life Balance) មិនមែនមានន័យថាអ្នកត្រូវចែកពេលវេលា ៥០-៥០ រវាងការងារ និងគ្រួសារនោះទេ ប៉ុន្តែវាមានន័យថាអ្នកចេះគ្រប់គ្រងថាមពល ដើម្បីកុំឲ្យផ្នែកណាមួយនៃជីវិតទាញអ្នកឲ្យដួល។ ខាងក្រោមនេះជា ៤ គន្លឹះសំខាន់ៗដើម្បីរក្សាលំនឹងនោះ៖
១. អនុវត្តក្បួន ៨-៨-៨
នេះគឺជាក្បួនបែងចែកពេលវេលា ២៤ ម៉ោងដ៏មានប្រសិទ្ធភាពបំផុត៖
- ៨ ម៉ោងសម្រាប់ធ្វើការ: ធ្វើការឲ្យពេញដៃពេញជើង និងមានប្រសិទ្ធភាព។
- ៨ ម៉ោងសម្រាប់គេង: ការគេងគ្រប់គ្រាន់គឺជាមូលដ្ឋានគ្រឹះនៃអារម្មណ៍ល្អ និងសុខភាព។
- ៨ ម៉ោងសម្រាប់ជីវិត: នេះគឺជាពេលសម្រាប់គ្រួសារ មិត្តភក្តិ ហាត់ប្រាណ អានសៀវភៅ ឬធ្វើអ្វីដែលអ្នកស្រឡាញ់។
២. រៀនកំណត់ “ព្រំដែន”
បច្ចេកវិទ្យាធ្វើឲ្យយើងអាចធ្វើការបានគ្រប់ទីកន្លែង ប៉ុន្តែវាក៏ធ្វើឲ្យយើងមិនអាចឈប់ធ្វើការដែរ។ ដូចនេះអ្នកត្រូវកំណត់ម៉ោងបិទការងារ និងម៉ោងផ្សេងៗឲ្យច្បាស់លាស់។
៣. គុណភាពសំខាន់ជាងបរិមាណ
ការនៅផ្ទះជាមួយគ្រួសារ តែដៃកាន់ទូរស័ព្ទ និងចិត្តគិតរឿងការងារ មិនមែនហៅថាមានលំនឹងទេ។ ដូចនេះនៅពេលនៅកន្លែងធ្វើការ ត្រូវផ្តោត ១០០% លើការងារ ហើយនៅពេលនៅជាមួយគ្រួសារ ត្រូវផ្តោត ១០០% លើពួកគាត់។ ពេលវេលា ៣០ នាទីដែលលេងជាមួយកូនដោយយកចិត្តទុកដាក់ មានតម្លៃជាង ៣ ម៉ោងដែលនៅក្បែរកូនតែមិននិយាយរកគ្នា។
៤. ថែរក្សាសុខភាពជាអាទិភាពទីមួយ
ចងចាំថា៖ «ការងារគឺជាកូនបាល់កៅស៊ូ (ធ្លាក់ហើយលោតឡើងវិញ) តែសុខភាពគឺជាកូនបាល់កែវ (ធ្លាក់ហើយគឺបែក)»។ កុំរង់ចាំទាល់តែឈឺទើបសម្រាក អ្នកគួរចាប់ផ្តើមថែទាំសុខភាពចាប់ពីឥឡូវ ជៀសវាសការស្តាយក្រោយនៅបេលក្រោយ។
សរុបមក ការរក្សាលំនឹងជីវិត មិនមែនជាគោលដៅដែលសម្រេចបានម្តងហើយចប់នោះទេ តែវាជាការកែតម្រូវប្រចាំថ្ងៃ។ ថ្ងៃខ្លះអ្នកអាចធ្វើការច្រើនជាង ថ្ងៃខ្លះអ្នកអាចសម្រាកច្រើនជាង។ អ្វីដែលសំខាន់គឺកុំបណ្តោយឲ្យផ្នែកណាមួយគ្រប់គ្រងជីវិតអ្នកទាំងស្រុង។
