«ការតាំងចិត្ត» និង «ឆន្ទះ» គឺជាកម្លាំងដែលមើលមិនឃើញ ប៉ុន្តែវាមានអនុភាពខ្លាំងជាងសមត្ថភាព ឬទេពកោសល្យទៅទៀត។ មនុស្សដែលមានទេពកោសល្យអាចនឹងបរាជ័យប្រសិនបើពួកគេខ្ជិល ប៉ុន្តែមនុស្សដែលមានការតាំងចិត្ត និងឆន្ទះមោះមុត អាចផ្លាស់ប្តូររឿងដែលមិនអាចទៅរួច ឱ្យក្លាយជាអាចទៅរួចបាន។ នេះគឺជាឥទ្ធិពលដ៏អស្ចារ្យចំនួន ៤ នៃការតាំងចិត្ត និងឆន្ទះមកលើជីវិតរបស់អ្នក៖
១. ជាស្ពានចម្លងពី «ក្តីស្រមៃ» ទៅ «ការពិត»
មនុស្សគ្រប់រូបចេះស្រមៃចង់មាន ចង់បាន និងចង់ជោគជ័យ។ ប៉ុន្តែមានតែមនុស្សដែលមានឆន្ទះទេ ទើបហ៊ានក្រោកពីដេក ហើយចាប់ផ្តើមធ្វើ។ ហើយឆន្ទះគឺជា “ភ្លើង” ដែលដុតឱ្យអ្នកមានសកម្មភាព។ បើគ្មានឆន្ទះទេ ផែនការល្អៗនឹងស្ថិតនៅតែលើក្រដាសជារៀងរហូត។
២. ជួយឱ្យអ្នកឈ្នះលើ «អារម្មណ៍ខ្លួនឯង»
ឧបសគ្គធំបំផុតរបស់មនុស្សមិនមែនជាភ្នំ ឬសមុទ្រទេ គឺ “ភាពខ្ជិល” និង “ភាពភ័យខ្លាច” របស់ខ្លួនឯង។ ដូចនេះការតាំងចិត្តគឺជាសមត្ថភាពក្នុងការបញ្ជាខ្លួនឯងឱ្យធ្វើរឿងដែលចាំបាច់ ទោះបីជាអ្នកមិនចង់ធ្វើវាក៏ដោយ។ (ឧទាហរណ៍៖ ការក្រោកពីព្រលឹមដើម្បីហាត់ប្រាណ ឬការសន្សំលុយជំនួសឱ្យការដើរលេង)។
៣. ធ្វើឱ្យអ្នកក្លាយជា «ទឹកដែលកាត់ផ្តាច់ថ្ម»
ពាក្យចាស់ពោលថា «ទឹកអាចកាត់ថ្មបាន មិនមែនដោយសារទឹកនោះរឹងទេ តែដោយសារទឹកនោះស្រក់មិនឈប់»។ រីឯការតាំងចិត្តឥតឈប់ឈរក៏ដូចគ្នាដែរ វានឹងធ្វើឱ្យអ្នកមិនចុះចាញ់បើទោះបីជាជួបឧបសគ្គច្រើនយ៉ាងណាក៏ដោយ។ ហើយសកម្មភាពនៃការតាំងចិត្តនេះមិនយូរមិនឆាប់វានឹងធ្វើឱ្យអ្នកជន្នះបាននូវឧបសគ្គជាច្រើន ដើម្បីឆ្ពោះទៅដល់អ្វីដែលអ្នកបានកំណត់។
៤. បង្កើត «សំណាង» ដោយខ្លួនឯង
មនុស្សទន់ខ្សោយរង់ចាំសំណាង តែមនុស្សដែលមានឆន្ទះនឹងបង្កើតសំណាងឱ្យខ្លួនឯង។ នៅពេលអ្នកមានការតាំងចិត្តខ្ពស់ អ្នកនឹងមិនរង់ចាំឱកាសទេ អ្នកនឹងដើររកឱកាស។ ហើយនៅពេលអ្នកព្យាយាមកាន់តែខ្លាំង អ្នកនឹងជួបឱកាសកាន់តែច្រើន។ នេះហើយជាមូលហេតុដែលគេនិយាយថា «សំណាង កើតចេញពីការខិតខំ»។
សរុបមក តើអ្នកចង់ដឹងថាឆន្ទះរបស់អ្នកខ្លាំងកម្រិតណាទេ? ចូរសួរខ្លួនឯងថា៖ «នៅពេលដែលខ្ញុំអស់កម្លាំងបំផុត និងចង់បោះបង់បំផុត តើខ្ញុំនៅតែអាចបោះជំហានទៅមុខមួយជំហានទៀតបានទេ?» ប្រសិនបើចម្លើយគឺ “បាន” នោះមានន័យថាអ្នកមានអាវុធដ៏ខ្លាំងបំផុតនៅក្នុងដៃហើយ។ សូមថែរក្សាភ្លើងនៃឆន្ទះនេះឱ្យឆេះជានិច្ច ព្រោះវាជាអ្វីដែលនឹងនាំអ្នកទៅដល់កំពូលភ្នំនៃគោលដៅ។
