ហេតុអ្វីបានជាម៉ាកយីហោខ្លះដូចជា Nike, Ralph Lauren ឬ Lululemon អាចលក់ផលិតផលក្នុងតម្លៃខ្ពស់ជាងគេ ១០ ដង ហើយអតិថិជននៅតែពេញចិត្តទិញ? អត្ថបទនេះបកស្រាយពីគោលការណ៍ចិត្តវិទ្យាដែលនៅពីក្រោយ “Premium Branding”។ វាមិនមែនគ្រាន់តែជាការរចនាស្អាតទេ ប៉ុន្តែវាគឺជាការបង្កើត “អារម្មណ៍” ដែលធ្វើឱ្យអតិថិជនចង់ចំណាយលុយ។ គោលការណ៍ ៣ សំខាន់ៗនៃម៉ាកយីហោលំដាប់ខ្ពស់៖
១. ភាពផ្តាច់មុខ៖ ភាពផ្ដាច់មុខមិនមែនសំដៅលើការខ្វះខាតទំនិញសម្រាប់លក់នោះទេ ប៉ុន្តែវាគឺជាការធ្វើឱ្យផលិតផលនោះមានតម្លៃលើសពីមុខងារប្រើប្រាស់ធម្មតា។ ជាក់ស្ដែងដូចជាក្រុមហ៊ុនឡាន Packard កាលពីឆ្នាំ ១៩២៩ ដែលមិនបានប្រកួតប្រជែងរឿងតម្លៃជាមួយ Ford ឡើយ ប៉ុន្តែគេបានកំណត់គោលដៅលក់ជូនតែ “អតិថិជនដែលមានរសនិយមខ្ពស់” ប៉ុណ្ណោះ។ យុទ្ធសាស្ត្រនេះបង្ហាញថា ពួកគេមិនមែនលក់ត្រឹមតែឡានសម្រាប់ជិះទេ តែពួកគេកំពុងលក់ “កិត្យានុភាព និងភាពថ្លៃថ្នូរ”។ មេរៀនសំខាន់គឺ អ្នកត្រូវចេះបង្ហាញផលិតផលរបស់អ្នកឱ្យល្អជាងគូប្រជែង តាមរយៈការរក “មុំប្លែកដែលមានតែមួយ” ដើម្បីឱ្យអតិថិជនមានអារម្មណ៍ថាពួកគេទទួលបានតម្លៃពិសេសខុសពីគេ។
២. អត្តសញ្ញាណ៖ អតិថិជនមិនមែនទិញផលិតផលព្រោះវាប្រេននោះទេ តែពួកគេទិញ “រូបភាពដែលឆ្លុះបញ្ចាំងពីខ្លួនឯង”។ ផលិតផលត្រូវតែធ្វើជាកញ្ចក់ឆ្លុះបង្ហាញពីអ្វីដែលពួកគេចង់ក្លាយជា។ ដូចជាទឹកអប់ Chanel No. 5 ដែលដាក់សារថា “ស្ត្រីគ្រប់រូបតែងស្រឡាញ់ Chanel” វាធ្វើឱ្យស្ត្រីមានអារម្មណ៍ថា បើចង់ក្លាយជាមនុស្សថ្លៃថ្នូរ គឺត្រូវតែប្រើវា។ មេរៀនគឺ ផលិតផលរបស់អ្នកត្រូវតែជា “ស្ពាន” ជួយនាំអតិថិជនទៅរកជីវិត ឬបុគ្គលិកលក្ខណៈដែលពួកគេស្រមៃចង់បាន។
៣. ការនិទានរឿង៖ នេះគឺជាកាវដែលភ្ជាប់ផលិតផលទៅនឹងអារម្មណ៍អតិថិជន និងធ្វើឱ្យរបស់ធម្មតាក្លាយជាបទពិសោធន៍ដ៏ពិសេស។ ជាក់ស្តែងដូចជា Nespresso ដែលប្រើតារា George Clooney ដើម្បីតំណាងឱ្យភាពស៊ីវិល័យ។ ឃ្លាថា “What else?” មិនមែនគ្រាន់តែជាពាក្យស្លោកទេ តែវាបង្កើតអារម្មណ៍ថា នេះគឺជាជម្រើសតែមួយគត់សម្រាប់អ្នកមានរសនិយម។ នេះបង្ហាញឱ្យឃើញថាកុំលក់តែគ្រឿងម៉ាស៊ីនឆុងកាហ្វេ តែត្រូវលក់ “របៀបរស់នៅបែបស៊ីវិល័យ” តាមរយៈការនិទានរឿង។
សរុបមក ដើម្បីកសាងម៉ាកយីហោលំដាប់ខ្ពស់ អ្នកត្រូវចាំថា៖ ភាពផ្តាច់មុខ ទាក់ទាញចំណាប់អារម្មណ៍, អត្តសញ្ញាណ ធ្វើឱ្យគេមើលឃើញខ្លួនឯងក្នុងផលិតផល, និង ការនិទានរឿង ធ្វើឱ្យគេចងចាំអ្នកមិនភ្លេច។ សួរខ្លួនឯងថា “តើពិភពលោកបែបណាដែលខ្ញុំកំពុងបង្កើតសម្រាប់អតិថិជន ហើយហេតុអ្វីបានជាពួកគេចង់ចូលរួមក្នុងពិភពលោកនោះ?”។
