ការកុហកខ្លួនឯងគឺជាទម្លាប់មួយដែលអ្នកអាចបង្កើតឡើងដោយមិនដឹងខ្លួន ហើយវាមានឥទ្ធិពលអវិជ្ជមានយ៉ាងខ្លាំងទៅលើជីវិតរបស់អ្នក។ វាធ្វើឱ្យអ្នកមើលរំលងការពិត បាត់បង់ឱកាសរីកចម្រើន និងអាចជាប់គាំងនៅក្នុងស្ថានភាពមិនល្អ រហូតធ្វើឱ្យយើងអស់ជំនឿក្នុងការធ្វើរឿងថ្មីៗ។
ខាងក្រោមនេះជាសកម្មភាពមួយចំនួនដែលបង្ហាញថាអ្នកប្រហែលជាកំពុងកុហកខ្លួនឯងដោយមិនដឹងខ្លួន៖
១. បន្ទោសអ្នកដទៃ ឬកាលៈទេសៈ
នៅពេលមានអ្វីមួយមិនល្អកើតឡើង អ្នកតែងតែបន្ទោសអ្នកដទៃ ឬកាលៈទេសៈខាងក្រៅ ជាជាងទទួលស្គាល់ការទទួលខុសត្រូវរបស់ខ្លួនឯង។ ការធ្វើបែបនេះធ្វើឱ្យអ្នកមិនអាចរៀនពីកំហុស ឬកែលម្អស្ថានការណ៍បានឡើយ ព្រោះអ្នកមិនបានមើលឃើញបញ្ហាពិតប្រាកដ។ នេះធ្វើឱ្យអ្នកគិតថាបញ្ហាទាំងនោះមិនមែនជាកំហុសអ្នក ហើយអ្នកក៏ អស់ជំនឿថាអ្នកអាចធ្វើអ្វីថ្មីឱ្យបានល្អប្រសើរ។
២. និយាយថា “ខ្ញុំគ្មានពេល” ឬ “ខ្ញុំរវល់ពេក”
អ្នកតែងតែប្រើលេសថាគ្មានពេល ឬរវល់ពេក ដើម្បីគេចវេសពីការធ្វើរឿងសំខាន់ៗដែលអ្នកដឹងថាគួរតែធ្វើ។ ការពិតគឺថា យើងគ្រប់គ្នាសុទ្ធតែមានពេល ២៤ ម៉ោងដូចគ្នា។ ការនិយាយបែបនេះ គឺជាការកុហកខ្លួនឯងដើម្បីគេចចេញពីការប្ដេជ្ញាចិត្ត ឬការប្រឈមមុខនឹងការងារពិបាក។ សកម្មភាពនេះវានឹងនាំឱ្យអ្នក បាត់បង់ជំនឿលើសមត្ថភាពគ្រប់គ្រងពេលវេលា និងឱកាសខ្លួនឯង។
៣. ពន្យារពេលឥតឈប់ឈរ
អ្នកតែងតែពន្យារពេលធ្វើការងារសំខាន់ៗរហូតដល់នាទីចុងក្រោយ ឬមិនធ្វើទាល់តែសោះ។ អ្នកអាចរកលេសផ្សេងៗមកបោកបញ្ឆោតខ្លួនឯងថា “ខ្ញុំចាំធ្វើពេលក្រោយ” ឬ “ខ្ញុំនឹងមានអារម្មណ៍ចង់ធ្វើនៅពេលក្រោយ”។ ការពន្យារពេលគឺជាទម្រង់មួយនៃការគេចវេសពីការទទួលខុសត្រូវ និងការភ័យខ្លាច ដែលធ្វើឱ្យអ្នកមិនអាចសម្រេចគោលដៅបាន។
៤. ប្រាប់ខ្លួនឯងថា “ខ្ញុំធ្វើមិនកើតទេ” ឬ “ខ្ញុំគ្មានសមត្ថភាព”
មុននឹងសាកល្បងធ្វើអ្វីមួយថ្មី ឬប្រឈមមុខនឹងបញ្ហា អ្នកតែងតែប្រាប់ខ្លួនឯងថាអ្នកគ្មានសមត្ថភាព ឬមិនអាចធ្វើបាន។ ការធ្វើបែបនេះគឺជាការដាក់កំហិតលើខ្លួនឯងដោយមិនដឹងខ្លួន ដែលធ្វើឱ្យអ្នកបាត់បង់ឱកាសក្នុងការរៀនសូត្រ និងរីកចម្រើន។ នេះក៏ជាទម្រង់មួយនៃការគេចវេសពីការភ័យខ្លាចការបរាជ័យផងដែរ។ ការនិយាយបែបនេះដដែលៗ ធ្វើឱ្យអ្នកអស់ជំនឿលើសក្តានុពល និងសមត្ថភាពរបស់ខ្លួនឯង។
៥. ប្រៀបធៀបខ្លួនឯងជាមួយអ្នកដទៃច្រើនពេក
ការចំណាយពេលច្រើនលើបណ្ដាញសង្គម ហើយឃើញតែភាពជោគជ័យ សម្រស់ល្អឥតខ្ចោះ ឬជីវិតដ៏អស្ចារ្យរបស់អ្នកដទៃ អាចធ្វើឱ្យអ្នកចាប់ផ្ដើមប្រៀបធៀបខ្លួនឯង។ អ្នកអាចគិតថាខ្លួនឯងមិនគ្រប់គ្រាន់ មិនស្អាត ឬមិនជោគជ័យដូចគេ ហើយជឿជាក់លើរឿងដែលមិនមែនជាការពិតអំពីជីវិតអ្នកដទៃ។ ការប្រៀបធៀបខ្លួនឯងបែបនេះ ធ្វើឱ្យអ្នកអស់ជំនឿ ទំនុកចិត្ត និងចំណុចពិសេសរបស់ខ្លួនឯង។
សរុបមក សកម្មភាពទាំងនេះអាចកើតឡើងដោយមិនដឹងខ្លួន ប៉ុន្តែឥទ្ធិពលរបស់វាទៅលើទំនុកចិត្ត និងជំនឿរបស់អ្នកគឺពិតប្រាកដ។ ដូចនេះការយល់ដឹងពីចំណុចទាំងនេះគឺជាជំហានដំបូងដើម្បីផ្លាស់ប្តូរវា ដោយចាប់ផ្ដើមទទួលខុសត្រូវលើទង្វើផ្ទាល់ខ្លួន និយាយការពិតជាមួយខ្លួនឯង និងហ៊ានប្រឈមមុខនឹងបញ្ហាតូចៗ។ ការធ្វើបែបនេះជាប់លាប់ នឹងជួយអ្នកកសាងជំនឿលើខ្លួនឯងឡើងវិញដោយមិនដឹងខ្លួន។
