តើចិនប្រើល្បិចអ្វី? ទោះគ្មានឈីបទំនើប ក៏នៅតែអាចនាំមុខអាមេរិកផ្នែក AI!

អ្នកជំនាញបច្ចេកវិទ្យាល្បីៗជាច្រើន (រួមទាំងអតីត CEO របស់ Google) បានលើកឡើងថា ប្រទេសចិនអាចនឹងឈ្នះក្នុងការប្រណាំងប្រជែង AI រួចទៅហើយ ដោយសារពួកគេមិនបានផ្ដោតលើតែ “បន្ទះឈីប” តែផ្ដោតលើ “ការបណ្ដុះធនធានមនុស្ស” និង “ការកាត់បន្ថយចំណាយ”។ ខណៈដែលលោកខាងលិចព្យាយាមបិទផ្លូវមិនឱ្យចិនទិញឈីប ចិនបែរជាមានប្រៀបជាងវិញ ដោយសារយុទ្ធសាស្ត្របណ្ដុះវិស្វកររាប់លាននាក់ ដែលគ្មាននរណាអាចរារាំងបាន។

ផែនការទេពកោសល្យ និងយុទ្ធសាស្ត្រថ្មី អស់រយៈពេលជាង ៣ ទសវត្សរ៍មកហើយ ប្រទេសចិនបានដំណើរការកម្មវិធីមួយហៅថា “Genius Plan” (ផែនការទេពកោសល្យ) ដែលស្វែងរកសិស្សវិទ្យាល័យឆ្នើមៗប្រហែល ១០០,០០០ នាក់ជារៀងរាល់ឆ្នាំ ដើម្បីបណ្តុះបណ្តាលពួកគេក្នុងផ្នែកគណិតវិទ្យា និងវិទ្យាសាស្ត្រកម្រិតខ្ពស់។ សិស្សទាំងនេះត្រូវបានបញ្ជូនបន្តទៅសាកលវិទ្យាល័យកំពូលៗ ហើយក្រោយមកក្លាយជាវិស្វករស្នូលនៅក្រុមហ៊ុនយក្សដូចជា ByteDance, Alibaba, និង DeepSeek។ លទ្ធផលគឺចិនផលិតបាននិស្សិតជំនាញ STEM (វិទ្យាសាស្ត្រ បច្ចេកវិទ្យា វិស្វកម្ម) ប្រហែល ៥ លាននាក់ក្នុងមួយឆ្នាំ ខណៈសហរដ្ឋអាមេរិកមានត្រឹមតែ ៥ សែននាក់ប៉ុណ្ណោះ។ នេះគឺជា “បំពង់បង្ហូរធនធានមនុស្ស” ដែលអាមេរិកមិនអាចគៀបសង្កត់បាន។

ចំណុចសំខាន់មួយទៀតគឺការផ្លាស់ប្តូរយុទ្ធសាស្ត្រ ដោយអតីត CEO របស់ Google លោក Eric Schmidt បានទទួលស្គាល់ថា ការរឹតត្បិតបន្ទះឈីបរបស់អាមេរិកមិនបានធ្វើឱ្យចិនទាល់ច្រកឡើយ ប៉ុន្តែបែរជាជំរុញឱ្យចិនងាកទៅពង្រឹង AI ក្នុងវិស័យវិស័យជាក់ស្តែង ដូចជា រោងចក្រ គ្រឿងយន្ត និងឡានអគ្គិសនី ជំនួសឱ្យការដេញតាមបង្កើត AI ឆ្លាតដូចមនុស្ស (AGI) ដូចអាមេរិក។