អ្នកជំនួញល្បីៗមិនត្រឹមតែចេះគ្រប់គ្រងពេលវេលានោះទេ តែពួកគេចេះគ្រប់គ្រងថាមពលរបស់ពួកគេផងដែរ។ ពួកគេដឹងថាទោះបីជាមានពេលវេលា ២៤ ម៉ោងដូចគ្នាក៏ដោយ ប៉ុន្តែបើគ្មានថាមពលគ្រប់គ្រាន់ ក៏មិនអាចសម្រេចកិច្ចការបានច្រើនដែរ។
ខាងក្រោមនេះជាគន្លឹះសំខាន់ៗដែលអ្នកអាចអនុវត្តបាន៖
១. កំណត់អាទិភាពលើកិច្ចការសំខាន់ៗ
អ្នកជំនួញជោគជ័យផ្តោតលើអ្វីដែល សំខាន់ មិនមែនគ្រាន់តែ បន្ទាន់ នោះទេ។ ពួកគេបែងចែកកិច្ចការទៅជា ៤ ប្រភេទ៖
- សំខាន់ និងបន្ទាន់: ធ្វើវាភ្លាមៗ ព្រោះវាជាបញ្ហាដែលត្រូវដោះស្រាយ។
- សំខាន់ តែមិនបន្ទាន់: រៀបចំផែនការដើម្បីធ្វើវាពេលក្រោយ។
- មិនសំខាន់ តែបន្ទាន់: ទុកឲ្យអ្នកផ្សេងធ្វើជំនួស។
- មិនសំខាន់ និងមិនបន្ទាន់: លុបចោលកិច្ចការទាំងនោះចោល។
២. គ្រប់គ្រងថាមពលរបស់អ្នក
- កំណត់ពេលវេលាដែលមានផលិតភាពខ្ពស់៖ គ្រប់គ្នាមានពេលមួយដែលខ្លួនមានថាមពលខ្លាំងបំផុត (សម្រាប់មនុស្សភាគច្រើនគឺពេលព្រឹក)។ ត្រូវប្រើពេលវេលាដ៏មានតម្លៃនេះដើម្បីធ្វើកិច្ចការដែលសំខាន់បំផុត។
- សម្រាកឲ្យបានទៀងទាត់៖ ការធ្វើការជាប់គ្នាជាច្រើនម៉ោងនឹងធ្វើឲ្យអ្នកអស់កម្លាំង។ ដូចនេះអ្នកត្រូវសម្រាកខ្លីៗរៀងរាល់ ៥០ នាទី ឬ ១ ម៉ោងម្តង ដើម្បីបញ្ចូលថាមពលផ្លូវចិត្តនិងរាងកាយឡើងវិញ។
៣. រៀននិយាយថា “ទេ”
ការនិយាយថា “ទេ” ទៅកាន់ការងារដែលមិនទាក់ទងនឹងគោលដៅរបស់អ្នក គឺជាវិធីដ៏ល្អបំផុតក្នុងការគ្រប់គ្រងពេលវេលា។ អ្នកត្រូវការពារពេលវេលារបស់អ្នកសម្រាប់កិច្ចការដែលពិតជាសំខាន់។
៤. ធ្វើការសម្រេចចិត្តឲ្យបានលឿន
ការស្ទាក់ស្ទើរក្នុងការសម្រេចចិត្តលើកិច្ចការតូចតាច នឹងធ្វើឲ្យខួរក្បាលរបស់អ្នកអស់ថាមពល។ ដូចនេះអ្នកគួរព្យាយាមធ្វើការសម្រេចចិត្តឲ្យបានលឿនលើរឿងតូចតាច ដើម្បីទុកថាមពលសម្រាប់រឿងធំៗ។
សរុបមក គន្លឹះដើម្បីជោគជ័យមិនមែនស្ថិតនៅលើការធ្វើការឲ្យបានច្រើនម៉ោងនោះទេ។ គន្លឹះគឺស្ថិតនៅលើ របៀបដែលអ្នកធ្វើការ។ នៅពេលអ្នកប្រើវិធីសាស្ត្រត្រឹមត្រូវ អ្នកនឹងអាចទទួលបានលទ្ធផលល្អជាងមុនដោយមិនបាច់ចំណាយកម្លាំងច្រើន។
