សង្គ្រាមពាណិជ្ជកម្មរបស់លោក Donald Trump បានផ្តោតយ៉ាងខ្លាំងទៅលើការប្រឈមមុខដាក់គ្នាជាមួយប្រទេសចិន។ ខណៈពេលដែលពន្ធសកល 10% នៅតែអនុវត្ត តែប្រទេសចិនប្រឈមនឹងការយកពន្ធដ៏ខ្លាំងគឺ 125% លើការនាំចេញរបស់ខ្លួនទៅកាន់សហរដ្ឋអាមេរិក ដែលពន្ធដ៏ធំសម្បើមនេះជាការឆ្លើយតបរបស់អាមេរិកទៅនឹងពន្ធប្រឆាំង 84% របស់ចិនលើទំនិញអាមេរិក។
ការតបតនេះមិនមែនគ្រាន់តែជាការសងសឹកទេ វាគឺជាសង្រ្គាមពាណិជ្ជកម្មដែលមិនទាន់បានបញ្ចប់វវាងអាមេរិក-ចិន តាំងពីអាណត្តិទី1 របស់លោក Trump ។ ហេតុបានជា Trump យកពន្ធមកគំរាមកំហែងលើទំនិញរបស់ចិន ពីព្រោះគាត់ជឿថាការកើនឡើងរបស់ចិនបានធ្វើឱ្យប៉ះពាល់ដល់សេដ្ឋកិច្ចរបស់សហរដ្ឋអាមេរិក។គោលបំណងក្នុងការគំរាមកំហែងរបស់អាមេរិកលើពាណិជ្ជកម្មចិន គឺដើម្បីបង្អាក់គំរូពាណិជ្ជកម្មសកលដែលបានធ្វើឱ្យប្រទេសចិនក្លាយជាមជ្ឈមណ្ឌលផលិតកម្មរបស់ពិភពលោក។
មិនតែប៉ុណ្ណោះ Trump បាននិយាយថា ទំនិញចិនមានតម្លៃថោកបានធ្វើឲ្យរោងចក្រនៅអាមេរិកត្រូវបិទ ដែលធ្វើឱ្យប្រជាជនអាមេរិកជាច្រើនបាត់បង់ការងារ។ ថែមពីនេះ Trump ក៏គិតផងដែរថា ប្រទេសចិនមានភាពអយុត្តិធម៌ក្នុងពាណិជ្ជកម្មដោយប្រើប្រាស់រដ្ឋាភិបាលរបស់ខ្លួនដើម្បីជួយអាជីវកម្មរបស់ខ្លួនដណ្តើមយកឧស្សាហកម្មពីប្រទេសផ្សេង ដែលចិនមិនអនុញ្ញាតឱ្យក្រុមហ៊ុនដូចជា ក្រុមហ៊ុនអាមេរិកមានប្រតិបត្តិការគ្រប់គ្រាន់នៅក្នុងប្រទេសចិននោះទេ។
លើសពីនេះ Trumpចង់កាត់បន្ថយគម្លាតពាណិជ្ជកម្មរវាងអាមេរិកជាមួយចិន និងនាំយកផលិតកម្មកាន់តែច្រើនត្រឡប់ទៅសហរដ្ឋអាមេរិកវិញ តាមរយៈការដំឡើងពន្ធលើទំនិញចិន លោក Trump ក៏សង្ឃឹមថានឹងដាក់សម្ពាធលើប្រទេសចិនឱ្យធ្វើឱ្យពាណិជ្ជកម្មមានភាពយុត្តិធម៌ ដើម្បីការពារកម្មករ និងអាជីវកម្មរបស់អាមេរិក។
