ការដាក់តម្លៃមិនមែនជារឿងងាយស្រួលឡើយហើយត្រូវធ្វើតាំងពីមិនទាន់បើកអាជីវកម្មមកម្ល៉េះ។ វាពាក់ព័ន្ធជាមួយនឹងថ្លៃដើមនៃការផលិត គូប្រកួតប្រជែង ចំណង់ចំណូលចិត្តរបស់អតិថិជន ការប្រតិបត្តិការ (បុគ្គលិក ទឹកភ្លើង…) ការផ្សព្វផ្សាយ ការជួល និងការវេចខ្ចប់ជាដើម។ យ៉ាងណាមិញការវេចខ្ចប់ដែលមានភាពច្នៃប្រឌិតនឹងមានឥទ្ធិពលទៅលើការដាក់តម្លៃផលិតផលនៃអាជីវកម្មរបស់អ្នក។ ខាងក្រោមនេះគំនិតនឹងលើកយកវិធីសសាស្រ្តដែលការវេចខ្ចប់ពិតជាមានឥទ្ធិពលទៅលើការដាក់តម្លៃផលិតផលនៃអាជីវកម្មរបស់អ្នក៖
ចងជាដុំ
អ្នកអាចបញ្ចូលផលិតផលរបស់អ្នកឲ្យអតិថិជនទិញក្នុងចំនួនច្រើននិងមានការបញ្ចុះតម្លៃឬធ្វើឲ្យគេមានអារម្មណ៍ថាគេចំណេញហើយកាន់តែងាយស្រួល។ យុទ្ធសាស្ត្រឃើញថាមានការពេញនិយមព្រោះវាមិនមានភាពសាំញ៉ាំទាំងអតិថិជននិងអ្នកលក់ឬអ្នកបម្រើសេវាកម្ម។ វិធីនេះឃើញថាចំណេញទាំងសងខាងព្រោះអ្នកលក់ក៏អាចបង្កើនការលក់ឯអ្នកទិញបានផលិតផលទៅទាំងមានការបញ្ចុះតម្លៃ។ ជាក់ស្តែងនៅក្នុងហាងលក់ភីហ្សាពួកគេតែងដាក់ជម្រើសឲ្យអតិថិជនជាវជាឈុតតែម្តងដោយបញ្ចុះតម្លៃបន្តិចបន្តួចពីលើនោះ។ ឧទាហរណ៍មួយទៀតនៅពេលដែលខ្ញុំទៅផ្សារអូឫស្សីដើម្បីទិញសម្លៀកបំពាក់ហើយនៅពេលចូលទៅក្នុងតូបមួយដើម្បីរកទិញអាវយឺត២អាវ(១=១០០០០៛) អ្នកលក់ក៏និយាយថាបើទិញអាវ៥អស់តែ៤៥០០០៛ទេ ខ្ញុំក៏គិតថាបើទោះជាយ៉ាងណាក៏គង់តែទិញដដែលហើយអាចចំណេញបាន៥០០០៛ទៀតហេតុនេះក៏សម្រេចចិត្តយកទាំង៥តែម្តងទៅ។
កំណត់ប្រភេទនៃការវេចខ្ចប់
ការវេចខ្ចប់ឲ្យស័ក្តិសមជាមួយនឹងផលិតផលដូចជាការស្លៀកពាក់របស់មនុស្សគឺពិតជាមានសារៈសំខាន់ណាស់។ សំបកខាងក្រៅនឹងបង្ហាញពីគុណតម្លៃនៃផលិតផលនៅខាងក្នុងបាន។ អ្នកត្រូវធ្វើយ៉ាងណាឲ្យផលិតផលរបស់អ្នកត្រូវបានវេចខ្ចប់ឡើងយ៉ាងពិសេសដូចជាការដូអនុស្សាវរីយ៍ដែលអ្នកចង់ឲ្យទៅនរណាម្នាក់ដែរ។ អ្នកត្រូវគិតថាធ្វើយ៉ាងណាឲ្យសំបកខាងក្រៅមានផាសុកភាព អនាម័យ ស្រស់ស្អាត ទាន់សម័យ មិនងាយខូច ជ្រាបទឹកឬដាច់រហែកជាដើម។ មួយវិញទៀតបើគេបានគិតគូរពីបរិស្ថានគឺកាន់តែប្រសើរ។
ផ្លាស់ប្តូរការប្រើប្រាស់ផលិតផល
អ្នកនឹងអាចលក់បានកាន់តែច្រើនបន្ថែមទៀតបើអ្នកឲ្យជម្រើសនៃការប្រើប្រាស់ផលិតផលនោះបន្ថែមទៀតទៅកាន់អតិថិជន។ វិធីនេះនឹងជួយឲ្យអតិថិជនដែលទិញផលិតផលរបស់អ្នកសម្រាប់តម្រូវការតែម្តងរបស់គេទៅជាទិញច្រើនដង។ ឧទាហរណ៍ដូចជាស្រូវសាលី អ្នកដឹងថាកាលណាគេសួររកស្រូវសាលីគឺដើម្បីតែយកទៅធ្វើនំតែប៉ុណ្ណោះ។ ប៉ុន្តែមិនត្រឹមតែប៉ុណ្ណោះទេព្រោះវានៅមានអត្ថប្រយោជន៍ជាច្រើនទៀតដោយអ្នកអាចផ្សព្វផ្សាយឲ្យអតិថិជនរបស់អ្នកទិញក្នុងគោលបំណងនៃការប្រើប្រាស់ផ្សេងទៀតដូចជាធ្វើស៊ុបសម្រាប់អាហារពេលព្រឹក ភេសជ្ជៈ ផលិតផលសម្រាប់ថែរក្សាមុខនិងស្បែក អាហារសម្រន់ និងបរិភោគប្រចាំថ្ងៃជាដើម។ នៅពេលអតិថិជនជ្រាបច្បាស់ពីអត្ថប្រយោជន៍ផ្សេងទៀតដែលគេអាចយកទៅប្រើប្រាស់បានគេប្រាកដជាអាចទិញអ្នកបានច្រើន។
ផ្លាស់ប្តូរជម្រើសនៃការទូទាត់តម្លៃ
នៅពេលដែលអ្នកផ្តល់ជម្រើសងាយស្រួលជាច្រើនដល់ការបង់ថ្លៃផលិតផលរបស់អ្នកនោះអតិថិជនរបស់អ្នកនឹងងាកមកប្រើប្រាស់ផលិតផលឬសេវាកម្មរបស់យើង។ មិនមែនអតិថិជនគ្រប់គ្នាដែលមកប្រើប្រាស់ផលិតផលឬសេវាកម្មរបស់យើងគឺសុទ្ធតែមានលុយឬពេលវេលាគ្រប់គ្រាន់នោះទេ អ្នកអាចឲ្យគេសងបណ្តាក់ បញ្ចុះថ្លៃចំពោះការទិញ ទិញតាមអនឡាញ ប័ណ្ណតំណាងសាច់ប្រាក់ និងរង្វាន់ឲ្យដល់អតិថិជនដែលតែងតែមកទិញជាប្រចាំ។
សរុបមកវិធីសាស្ត្រខាងលើនឹងមានប្រសិទ្ធភាពអាស្រ័យលើការអនុវត្តរបស់អ្នកបានត្រឹមត្រូវ។ អ្នកត្រូវត្រៀមខ្លួនរួចជាស្រេចក្នុងការអធិប្បាយប្រាប់គេថាហេតុអ្វីបានជាផលិតផលឬសេវាកម្មរបស់អ្នកដាក់តម្លៃបែបនេះហើយតើគេនឹងបានអ្វីខ្លះត្រឡប់ទៅវិញ។ មិនមែនគ្រប់តម្លៃទាបសុទ្ធតែអាចទទួលបានអតិថិជនច្រើននោះទេ។
