ជំនឿមិនត្រឹមត្រូវជួនកាលជារឿងប្រឌិតហើយជួនកាលពាក់កណ្តាលពិតពាក់កណ្តាលមិនពិត។ មានជំនឿដែលមិនត្រឹមត្រូវជាច្រើនដែលគេយល់ខុសចំពោះការងារជាអ្នកលក់។ ខាងក្រោមនេះគំនិតនឹងលើកយកជំនឿមិនត្រឹមត្រូវមកបង្ហាញដែលជឿជាក់ថាអ្នកប្រហែលជាធ្លាប់ឮឬគិតបែបហ្នឹងដែរ ៖
ទី១. ការលក់គឺធ្វើយ៉ាងណាដើម្បីឲ្យបានចំនួនអតិថិជនច្រើន
គេគិតថាការលក់គឺត្រូវធ្វើយ៉ាងណាឲ្យគេបានអតិថិជនកាន់តែច្រើនគឺកាន់តែល្អ។ បរិមាណនៃអតិថិជនកាន់តែច្រើននោះភាពជោគជ័យរបស់គេក៏កាន់តែខិតចូលមកដល់។ គេត្រូវប្រើវិធីសាស្រ្តបែបណាក៏ដោយឲ្យតែគេអាចរកបានអតិថិជនច្រើន។
ការពិត ៖ គេមិនត្រូវរំពឹងទុកតែលើចំនួនអតិថិជនទេសំខាន់គេនឹងទិញអ្នកបានប៉ុណ្ណា។ អ្នកដែលដើរចូលមកក្នុងហាងរបស់អ្នកច្រើនក៏មិនប្រាកដថាគេនឹងទិញអ្នកនោះទេ។ កាលណាអ្នករកបានអតិថិជនដែលមានគុណវឌ្ឍិគ្រប់គ្រាន់នោះការលក់របស់អ្នកក៏កើនតាមនោះដែរ។ ផ្ទុយមកវិញបើអ្នកគិតតែពីបរិមាណរបស់អតិថិជនពេកនាំឲ្យតំហែរក្សានិងការយកចិត្តទុកដាក់ចំពោះអតិថិជនគ្រប់គ្នាថយចុះដែលនាំឲ្យបាត់បង់ទាំងអតិថិជនដែលមានបំណងទិញឬប្រើប្រាស់សេវាកម្មរបស់អ្នកពិតប្រាកដដែរ។ វាបណ្តាលឲ្យអ្នកខាតបង់ថវិកា ខាតទាំងពេលវេលាថែមទៀតព្រោះអ្នករវល់តែរត់តាមអតិថិជន។
ទី២. មនុស្សដែលពូកែនិយាយតាំងពីកំណើតគឺជាអ្នកលក់ដ៏ពូកែ
គេគិតថាមនុស្សដែលពូកែនិយាយតាំងពីកំណើតងាយនឹងស្គាល់គេបានច្រើន ពូកែបញ្ចុះបញ្ចូល និងងាយទទួលបានការទិញពីអតិថិជន។
ការពិត ៖ ជំនាញលក់គឺជាជំនាញដែលអ្នកណាៗអាចរៀនសូត្រនិងអភិវឌ្ឍបានវាអាស្រ័យលើមនុស្សម្នាក់ៗ។ មិនប្រាកដថាអ្នកដែលពូកែនិយាយសុទ្ធតែពូកែលក់ទេ។ មនុស្សដែលពូកែនិយាយគឺងាយនឹងធ្វើឲ្យមានកំហុសបំផុត។ ជួនកាលអ្នកដែលពូកែនិយាយគឺងាយធ្វើឲ្យអតិថិជនមិនសូវមានទំនុកចិត្តទៀតផង។
ទី៣. បើអ្នកបង្កើនជំនាញនៃការលក់ អ្នកនឹងបង្កើនលទ្ធផលនៃការលក់
ការពិត ៖ ដើម្បីបង្កើនលទ្ធផលនៃការលក់អ្នកត្រូវផ្តោតអារម្មណ៍លើការការបង្កើនជំនាញលក់ហើយអ្នកត្រូវប្រើគំនិតនិងជំនឿចិត្តខិតខំប្រឹងប្រែង។ កាលណាអ្នកមានជំនាញលក់និងការខំប្រឹងប្រែងហើយនោះលទ្ធផលនៃការលក់របស់អ្នកក៏កើនទៅតាមហ្នឹងដែរ។
ទី៤. ផ្តោតលើការដណ្តើមបានការទិញពីអតិថិជន
អ្នកលក់តែងប្រើវិធីសាស្ត្របញ្ចុះបញ្ចូលបែបណាឲ្យតែគេអាចឲ្យអតិថិជនទិញយកផលិតផលរបស់គេទៅប្រើ។
ការពិត ៖ ផ្តោតលើការជួយអតិថិជនឲ្យបានអ្វីដែលគេចង់បាន។ មនុស្សមិនចូលចិត្តអារម្មណ៍ដែលត្រូវបានគេលក់ឲ្យនោះទេ។ កាលណាគេដឹងថាអ្នកកំពុងបញ្ចុះបញ្ចូលគេឲ្យទិញអ្វីមួយនោះគេនឹងមិនព្រមស្ដាប់អ្នក ស្ដាប់ទាំងមិនយកចិត្តទុកដាក់ ឬមួយក៏គេប្រញាប់បញ្ចប់ការសន្ទនានោះភ្លាម។ ប៉ុន្តែបើអ្នកព្យាយាមជួយគេវិញចង់ឬមិនចង់ក៏គេអាចនៅស្ដាប់អ្នកបន្តិចដែរ។ ឧទាហរណ៍ថាអ្នកលក់ផលិតផលថែរក្សាផ្ទៃមុខហើយអ្នកបានដើរចូលទៅក្នុងចំណោមមនុស្សមួយក្រុមបន្ទាប់មកអ្នកអធិប្បាយពីការបំបាត់បញ្ហានៅលើមុខនោះគេនឹងនៅស្ដាប់អ្នកតែបើអ្នកគិតតែនិយាយផ្សព្វផ្សាយពីផលិតផលរបស់អ្នកនោះគេនឹងមិនសូវចង់ស្ដាប់អ្នកឡើយ។
ទី៥. ការលក់គឺឡើងចុះចៀសមិនផុត
គេជឿថាការលក់តែងមានឡើងមានចុះដោយកត្តាផ្សេងៗដូចជាសេដ្ឋកិច្ច ចំណូលចិត្ត ភាពទាន់សម័យជាដើម។ គេគិតថាការលក់មានតិចមានច្រើនគឺជារឿងធម្មតាទៅហើយ។
ការពិត ៖ ការលក់នឹងមានឡើងមានចុះបើអ្នកមិនបានកំណត់គោលដៅច្បាស់លាស់។ គោលដៅគឺសំខាន់ណាស់សម្រាប់អ្នកលក់។ វានឹងឲ្យផែនទីសម្រាប់អ្នកលក់ថាទីណាដែលគេគួរទៅហើយត្រូវរកវិធីណាខ្លះដើម្បីសម្រេចគោលដៅដែលគេគ្រោងទុក។ បើគេមិនមានគោលដៅទេនោះវាមិនប្លែកឡើយដែលគេជឿថាវាឡើងចុះដោយមិនរកវិធីសាស្ត្រមកដោះស្រាយ។
ទី៦. អាជីពជាអ្នកលក់គឺជាអាជីពដែលមិនរីកចម្រើននិងមិនងាយមានឱកាសឡើងដំណែង
គេគិតថាការធ្វើជាអ្នកលក់គឺមិនងាយនឹងអាចប្តូរដំណែងឡើយនិងជាការងារដែលនឿយហត់និងតូចតាចតែប៉ុណ្ណោះ។
ការពិត ៖ សហគ្រិនល្បីៗជាច្រើនសុទ្ធតែធ្លាប់ជាអ្នកលក់។ ដូចដែលយើងដឹងស្រាប់ថាអតិថិជនគឺជាប្រភពចំណូលរបស់ក្រុមហ៊ុនហេតុនេះបើអ្នកមិនចេះលក់ឲ្យអតិថិជនទេអ្នកនឹងមិនអាចស្វែងរកចំណូលពីអតិថិជនបានឡើយ។
ទី៧. អ្នកលក់គឺជាមនុស្សដែលមិនមានភាពស្មោះត្រង់
គេគិតថាការលក់គឺភាគច្រើននិយាយពន្លើសហួសពីការពិតនិងប្រើវិធីបោកប្រាស់ដើម្បីទទួលបានការទិញពីអតិថិជន។
ការពិត ៖ ប្រយោគខាងលើអាចថាត្រូវពាក់កណ្តាលខុសកណ្តាល។ អ្នកលក់និយាយមិនពិតដើម្បីឲ្យអ្នកទិញជឿប៉ុន្តែសម័យនេះបច្ចេកវិទ្យារីកចម្រើនហើយព័ត៌មានត្រូវបានចែករំលែកយ៉ាងឆាប់រហ័សនិងមានគ្រប់ទីកន្លែង។ ហេតុនេះការនិយាយកុហកគឺមិនងាយស្រួលសម្រាប់អ្នកលក់ទៀតឡើយ។ ដូចនេះពួកគេក៏មិនមែនមានន័យថាសុទ្ធតែប្រើវិធីមិនសមរម្យតាមក្រមសីលធម៌បោកប្រាស់អតិថិជនទៀតទេ។ មួយវិញទៀតវាមិនខុសទេដែលការងារពួកគេត្រូវជម្រុញការលក់ និងធ្វើឲ្យអតិថិជនទិញផលិតផលរបស់គេដោយប្រើទាំងជំនាញលក់ ការធ្វើទីផ្សារ និងBrandingបញ្ចូលគ្នា។
ទី៨. ការលក់ជាការងារដែលស្មុគស្មាញមានសម្ពាធច្រើន
ការពិត ៖ វាជាការពិតប្រសិនបើអ្នកមិនមានកុំព្យូទ័រ ទូរស័ព្ទដើម្បីទំនាក់ទំនងជាមួយអតិថិជនទេ។ កុំព្យូទ័រនឹងជួយបញ្ចៀសបញ្ហាឲ្យអ្នកបានយ៉ាងច្រើនទាក់ទងនឹងឯកសារផ្សេងៗ ទិន្នន័យរបស់អតិថិជន ការតាមដានដំណើរការនៃការទិញរបស់អតិថិជនជាដើម។ មួយវិញទៀតអ្នកអាចទាក់ទងជាមួយអតិថិជនដោយប្រើទូរស័ព្ទដោយវាមិនខាតពេលវេលាទាំងអ្នកលក់និងអតិថិជន។
