ពាក្យពេញនៃ Chat GPT គឺ Generative Pre-trained Transformer ដែលស្ថិតនៅក្នុង Model GPT 3.5។
១. តើអ្នកដឹងទេថានៅពីក្រោយការបង្កើតនូវបច្ចេកវិទ្យា Open AI Chat GPT នេះមាននរណាចូលរួមខ្លះ??
អ្នកដែលបានចូលរួមបង្កើត Open AI Chat GPT នេះរួមមាន៖ ក្រុមហ៊ុន Microsoft, សហស្ថាបនិក Linkedin លោក Reid Hoff man និង Khosla Venture។ ក្នុងនោះផងដែរ Elon musk ក៏ជួយបង្កើតក្រុមហ៊ុននេះឡើងវិញនៅឆ្នាំ 2015 ផងដែរ។ ក្រុមហ៊ុនបានបើកកម្មវិធី ChatGPT នេះសម្រាប់ការធ្វើតេស្តជាសាធារណៈនៅក្នុងខែវិច្ឆិកា ឆ្នាំ 2022។
ដោយយោងតាមនាយកប្រតិបត្តិរបស់ OpenAI លោក Sam Altman បានឲ្យដឹងថា “ ក្នុងរយៈពេលតិចជាងមួយសប្តាហ៍ គំរូបញ្ញាសិប្បនិម្មិតនេះបានប្រមូលផ្តុំអ្នកប្រើប្រាស់ជាងមួយលាននាក់ទៅហើយ” ហើយនៅចុង ខែមករា នេះ ChatGPT មានអ្នកទស្សនាជាមធ្យមប្រហែល 13 លាននាក់ក្នុងមួយថ្ងៃឯណោះ។
២. មែនទែនទៅតើ Chat GPT នេះមានអត្ថប្រយោជន៍យ៉ាងណាខ្លះ?
ChatGPT គឺជាផ្នែកមួយនៃវិស័យដែលកំពុងរីកចម្រើននៃ AI ដែលគេស្គាល់ថាជា AI ជំនាន់ថ្មី ដែលអនុញ្ញាតឱ្យអ្នកប្រើប្រាស់បង្កើតខ្លឹមសារថ្មីរួមមានវីដេអូ តន្ត្រី អត្ថបទ និងអាចជួយស្វែងរកប្រធានបទថ្មីៗសម្រាប់អ្នក ករណីអ្នកជាប់គាំងគំនិតគិតមិនចេញ។ ជាពិសេសនោះគឺមានសមត្ថភាពក្នុងការឆ្លើយតបរាល់សំណួរចម្លើយទាំងប៉ុន្មានដែលយើងសួរបានយ៉ាងល្អ និងរហ័សដែលចំណាយត្រឹមតែប៉ុន្មាននាទីតែប៉ុណ្ណោះ!
តាមប្រសាសន៍របស់លោកស្រី Naomi Baron ដែលជាសាស្ត្រាចារ្យបង្រៀនផ្នែកភាសាវិទ្យានៅសកលវទ្យាល័យ American បានប្រាប់ថា Chat GPT គឺពិតជាពូកែមែនទែន ដែលវាអាចមានសមត្ថភាពសរសេរបានល្អជាអត្ថបទ ដែលគាត់ទទួលបានពីសិស្សៗរបស់គាត់ទៅទៀត។ ដូច្នេះ Chat GPT នឹងក្លាយទៅជាផ្នែកមួយដែលសំខាន់ និងអាចជួយសម្រួលការងារមួយចំនួនផងដែរ។
៣. ប៉ុន្តែតើអ្នកទាំងអស់គ្នាមានឆ្ងល់ដែរឬទេ? ថាតើ Chat GPT អាចផ្ដល់ចម្លើយដែលយើងចង់បាននោះដោយរបៀបណា??តើវាមានចំណេះដឹងទាំងនោះមកពីណា??
ការពិត Chat GPT គឺត្រូវបានគេចងក្រងនូវសំណុំឯកសារ ដាក់បញ្ចូលនូវទិន្នន័យ និងចំណេះដឹងទូទៅជាច្រើនទៀតដើម្បីងាយស្រួលក្នុងការផ្ដល់មកវិញនូវចម្លើយដ៏ត្រឹមត្រូវមកកាន់យើងវិញ។ ប៉ុន្តែ Chat GPT ក៏ពុំអាចឆ្លើយ រាល់សំណួរទាំងអស់ដែលយើងបានសួរដែរ ប្រសិនបើសំណួរនិងចម្លើយទាំងនោះគ្មាននៅក្នុងអង្គចងចាំវាទេនោះ។
៤. តើ Chat GPT ខុសគ្នាពី Chatbot យ៉ាងដូចម្ដេចខ្លះ?
អ្នកទាំងអស់គ្នាបានដឹងបានស្គាល់ហើយអំពី Chatbot ហើយក៏បានប្រើប្រាស់វាជាញឹកញាប់ផងដែរ។ Chatbot ត្រូវបានគេបង្កើតឡើង ដើម្បីជួយសម្រួលដល់ការឆ្លើយតបទៅកាន់ភ្ញៀវជំនួសឲ្យមនុស្សដោយស្វ័យប្រវត្តិ តែប៉ុណ្ណោះ។ ប៉ុន្តែវាខុសពី Chat GPT ដែល Chat GPT នេះគឺគេបង្កើតឡើងដើម្បីជួយការងារជាច្រើនមនុស្សក្នុងការស្វែងរកនូវចំណេះដឹង ហើយវាក៏មានភាពស្មុគស្មាញជាង Chatbot ដែរ ព្រោះត្រូវដាក់បញ្ចូលនូវព័ត៌មានច្រើនទៅក្នុងប្រព័ន្ធ។
៥. បើ Chat GPT អាចឆ្លើយអាចផ្ដល់ចម្លើយបានស្ទើរតែទាំងអស់បែបនេះ តើវាអាចឆ្លើយនូវសំណួរដែលមានហានិភ័យបានដែរឬអត់? ចុះកម្រិតនៃការសិក្សារបស់សិស្សនិស្សិតនឹងទៅជាយ៉ាងណា??
បើទោះបីជា Chat GPT អាចឆ្លើយសំណួរបានច្រើនយ៉ាងណាក៏ដោយ ប៉ុន្តែវា មិនអាចផ្ដល់ជូននូវចម្លើយដែលមិនស្របច្បាប់ ឬមានហានិភ័យបាននោះទេ។ ចំណែកឯងការអប់រំក៏ដូចគ្នាដែរ នេះបើយោងទៅតាម CNBC បានឲ្យដឹងថា សិស្សនិស្សិត គឺនៅតែធ្វើការប្រឡង និងសរសេររបាយការណ៍ ដោយផ្ទាល់ដៃ ជូនដល់លោកគ្រូអ្នកគ្រូ ឬសាស្ត្រាចារ្យដដែល ដោយពុំអនុញ្ញាតិឲ្យប្រើ Chat GPT នេះទេ ដើម្បីងាយស្រួលវាស់ស្ទង់ពីសមត្ថភាពនិងការយល់ដឹងរបស់ពួកគេពិតប្រាកដ ពុំមែនវាស់ស្ទង់ពីសមត្ថភាពរបស់បច្ចេកវិទ្យានោះទេ។
៦. តើអ្នកគិតថា Open AI Chat GPT នឹងដើរតួនាទី និងមានឥទ្ធិពលយ៉ាងដូចម្ដេចខ្លះនាពេលអនាគត?? តើការងាររបស់មនុស្សយើងនឹងជំនួសដោយ Open AI Chat GPT មែនទេ?
ការពិតទៅប្រសិនបើយើងគ្មានសមត្ថភាពទេ បច្ចេកវិទ្យាមួយនេះនឹងមកជំនួសយើងជាក់ជាពុំខាន។ ហើយ ប្រភេទ ការងារដែលអាចប៉ះពាល់នោះរួមមាន៖ ការងារជាអ្នកកាសែត ច្បាប់ អ្នកបកប្រែ ជាដើម។
ប៉ុន្តែដោយយោងទៅតាមលោក Jordon Novel ដែលជាអ្នកយកការណ៍ផ្នែកបច្ចេកវិទ្យានៅ CNBC បាននិយាយថា “បច្ចេកវិទ្យានេះមិនមែនមកជំនួស ឬដណ្ដើមការងាររបស់អ្នកបានទេ តែអាចចាត់ទុកថាជាល្បែងស៊ីសងទៅចុះ!” មានន័យថា ប្រសិនបើអ្នកចេះប្រើប្រាស់វា និងអាចគ្រប់គ្រងវាបាន ទាញយកវាមកជាប្រយោជន៍ នោះអ្នកនឹងឈ្នះ ហើយអ្នកនឹងអាចធ្វើការ់ងារបានកាន់តែងាយស្រួល និងរហ័សជាងមុន។ ប៉ុន្តែបើអ្នកមិនអាច យកឈ្នះវាបានទេ បច្ចេកវិទ្យាទាំងនោះ នឹងមកដណ្ដើមការងារអ្នកជាមិនខាន។
