ធ្វើដូចម្តេចទើបខ្ញុំអាចក្លាយជាមនុស្សពូកែទំនាក់ទំនង?

មិនថាតែក្នុងជីវិតការងារ ឬជីវិតឯកជននោះទេ មនុស្សគ្រប់រូបត្រូវការទំនាក់ទំនងជាមួយមនុស្សជុំវិញខ្លួនជាចាំបាច់។ ការយល់ដឹងពីរបៀបក្នុងការទំនាក់ទំនង គឺពិតជាគន្លឹះដ៏សំខាន់ក្នុងការរក្សាទំនាក់ទំនងឲ្យបានល្អប្រសើរ ក៏ប៉ុន្តែមិនមែនមនុស្សគ្រប់រូបសុទ្ធតែពូកែក្នុងការទំនាក់ទំនងនោះទេ ប៉ុន្តែក៏មិនមែនបានន័យថាពួកគាត់មិនអាចរៀនបាននោះដែរ។

តោះថ្ងៃនេះ គំនិត នឹងធ្វើការចែករំលែកគន្លឹះចំនួន ០៥ ដែលជួយឲ្យអ្នកអាចក្លាយជាមនុស្សដែលពូកែក្នុងការទំនាក់ទំនងមួយរូប។

គន្លឹះទី១៖ ធ្វើជាអ្នកស្តាប់ដ៏ល្អ

ប្រសិនបើអ្នកចង់ក្លាយជាមនុស្សដែលពូកែទំនាក់ទំនង រឿងដំបូងដែលអ្នកត្រូវធ្វើនោះគឺធ្វើខ្លួនឲ្យក្លាយជាអ្នកស្តាប់ដ៏ល្អម្នាក់។​ ការស្តាប់ដោយយកចិត្តទុកដាក់ ជួយអ្នកឲ្យទទួលបាននូវព័ត៌មានពេញលេញ និងគ្រប់ជ្រុងជ្រោយ សម្រាប់ឆ្លើយតបទៅនឹងសំណួរ ឬការសន្ទនារបស់ដៃគូររបស់អ្នក។ លើសពីនេះទៅទៀត ការស្តាប់អាចបង្ហាញថាអ្នកកំពុងតែយកចិត្តទុកដាក់ទៅលើអ្វីដែលដៃគូរសន្ទនារបស់អ្នកកំពុងតែចង់និយាយ និងបង្ហាញមកកាន់អ្នក ហើយវាធ្វើឲ្យដៃគូររបស់អ្នកទទួលបានអារម្មណ៍ថាអ្វីដែលពួកគេកំពុងបង្ហាញ ឬនិយាយត្រូវបានដៃគូរម្ខាងទៀតឲ្យតម្លៃ និងផ្តល់ការយកចិត្តទុកដាក់។

គន្លឹះទី២៖ ប្រើប្រាស់ភាសាកាយវិការដ៏ត្រឹមត្រូវ

ភាសាកាយវិការគឺមានសារៈសំខាន់ណាស់នៅក្នុងការទំនាក់ទំនង។ បើយោងតាមការស្រាវជ្រាវរបស់លោក Albert Mehrabian កាលពីឆ្នាំ១៩៨១ បានបង្ហាញថាភាសាកាយវិការជួយឲ្យការសន្ទនាមានប្រសិទ្ធខ្ពស់រហូតដល់៥៥% ខណៈដែលពាក្យសម្តីមានត្រឹមតែប្រមាណ ៧% តែប៉ុណ្ណោះ។ បើនិយាយឲ្យស្រួលស្តាប់ មនុស្សយើងផ្តោតទៅលើភាសាកាយវិការច្រើនជាងពាក្យសម្តីដែលបាននិយាយទៅទៀត។

ខាងក្រោមនេះគឺជាភាសាកាយវិការមួយចំនួន ដែលអ្នកគួរតែដឹង៖

• មានក្រសែភ្នែកល្អនៅពេលនិយាយគ្នា
• មានជំហរខ្លួន ប្រកដដោយទំនុកចិត្ត
• មានស្នាមញញឹម ប្រកបដោយភាពរួសរាយរ៉ាក់ទាក់
• ចេះងក់ក្បាល បង្ហាញពីការយល់ស្របជាដើម…។

គន្លឹះទី៣៖ ដឹងពីអ្វីដែលត្រូវនិយាយ និងគោលបំណងក្នុងការទំនាក់ទំនង

ជាការពិតណាស់ រាល់ការសន្ទនា ឬទំនាក់ទំនងរបស់មនុស្សទាំងអស់ សុទ្ធតែមានគោលបំណងរបស់ពួកគេរៀងៗខ្លួន។ អ្នកខ្លះសន្ទនាសម្រាប់ការងារ អ្នកខ្លះទំនាក់ទំនងដើម្បីសួរនាំពីព័ត៌មានផ្សេងៗ អ្នកខ្លះទំនាក់ទំនងដើម្បី​ស្វែងរកជំនួយ ឯអ្នកខ្លះវិញទំនាក់ទំនងគ្រាន់តែដើម្បីជជែកគ្នាលេងកម្សាន្តតែប៉ុណ្ណោះ។ ទោះបីអ្នកស្ថិតក្នុងការទំនាក់ទំនងប្រភេទមួយណាក៏ដោយ អ្នកគួរតែដឹងពីគោលបំណងក្នុងការទំនាក់ទំនងរបស់អ្នកឲ្យបានច្បាស់លាស់ ព្រោះថាបើពុំដូច្នោះទេអ្នកនឹងបែកខ្ញែកប្រធានបទរបស់អ្នកកាន់តែធំទៅៗ ហើយវាពុំល្អនោះឡើយនៅក្នុងការទំនាក់ទំនងបែបការងារ ជាពិសេសនៅពេលជួបជាមួយដៃគូរអាជីវកម្ម ព្រោះថាពួកគេប្រហែលជាពុំមានពេលវេលាទំនេរដើម្បីនិយាយជាមួយអ្នកច្រើននោះទេ។ ដូច្នេះអ្នកគួរតែលើកយកនូវអ្វីដែលសំខាន់ដើម្បីយកមកសន្ទនាតែប៉ុណ្ណោះ ហើយព្យាយាមទាញការសន្ទនានោះទៅរកគោលបំណងសំខាន់នៃប្រធានបទដែលអ្នកកំពុងតែលើកមកសន្ទនា។

គន្លឹះទី៤៖ បើកគំនិតឲ្យធំទូលាយ ហើយបើកចិត្តទទួលយកនូវអ្វីដែលថ្មី

អ្នកដែលពូកែក្នុងការទំនាក់ទំនង ជាមនុស្សដែលមានគំនិតធំទូលាយ ហើយបើកចិត្តទទួលយកនូវអ្វីដែលថ្មីៗ។ ពួកគេមិនមែនជាប្រភេទមនុស្សដែលប្រកាន់គំនិតខ្លួនធំជាង ឬខ្ពស់ជាងអ្នកដទៃនោះទេ។ ពួកគេយល់ថាការបើកចិត្តទទួលយោបល់អ្នកដទៃ នឹងជួយឲ្យពួកគេទទួលបាននូវចំណេះដឹង និងគំនិតថ្មីៗដែលពួកគេពុំបានដឹងពីមុន ឬធ្លាប់តែមើលរំលងកន្លងមក។ ប្រសិនបើនៅក្នុងកន្លែងការងារវិញ ការបើកទទួលយកនូវយោបល់អ្នកដទៃ អាចធ្វើឲ្យបុគ្គលម្នាក់នោះ ទោះបីជាស្ថិតក្នុងតំណែងអ្វីក៏ដោយ តែងត្រូវបានការគោរពកោតសរសើរពីមនុស្សជុំវិញខ្លួន ហើយនៅពេលមានបញ្ហាឬត្រូវការ ការសម្រេចចិត្តផ្សេងៗ បុគ្គលម្នាក់នោះគឺនឹងក្លាយទៅជាមនុស្សម្នាក់ដែលអ្នកដទៃស្វែងរកមុនគេជាក់ជាពុំខាន។

គន្លឹះទី៥៖ សួរសំណួរបញ្ជាក់

ប្រសិនបើអ្នកចង់ក្លាយជាមនុស្សម្នាក់ដែលពូកែក្នុងការទំនាក់ទំនង អ្នកពុំគួរខ្មាសអៀនក្នុងការសួរសំណួរបញ្ជាក់ នៅពេលដែលអ្នកស្តាប់មិនទាន់នូវអ្វីដែលដៃគូរសន្ទនារបស់អ្នកបាននិយាយនោះទេ។ ប្រសិនបើអ្នកស្តាប់មិនទាន់ ឬចាប់អត្ថន័យដែលដៃគូររបស់អ្នកចង់បង្ហាញ ហើយព្យាយាមតបទៅវិញទាំងមិនច្បាស់ នោះវាអាចនឹងបណ្តាលឲ្យការឆ្លើយតបរបស់អ្នកអាចនឹងខុសពីប្រធានបទដែលដៃគូរសន្ទនារបស់អ្នកកំពុងនិយាយ។ ដូច្នេះការសួរសំណួរបញ្ជាក់គឺជារឿងមួយដែលសំខាន់ផងដែរ ក្នុងការជម្រុញដល់ការសន្ទនា និងទំនាក់ទំនងរវាងអ្នក និងដៃគូរសន្ទនា៕