នៅកន្លែងធ្វើការ ច្បាស់ណាស់នឹងមានបុគ្គលិកមិនសូវចុះសម្រុងជាមួយគ្នា ហើយពេលខ្លះអាចមិនចុះសម្រុងជាមួយនឹងប្រធានផ្នែក និងអ្នកពាក់ព័ន្ធផ្សេងទៀតដែលពួកគេមិនពេញចិត្តនឹងគ្នា។ ដូច្នេះតើត្រូវធ្វើដូចម្ដេចដើម្បីអាចសហការធ្វើការជាមួយគ្នាបានជាមួយនឹងមនុស្សដែលអ្នកមិនចូលចិត្ត ឬពិបាកចុះសម្រុង?
បើយោងតាមគេហទំព័ររបស់ Harvard Business Review បានបង្ហាញអំពីយុទ្ធសាស្រ្តដ៏មានប្រសិទ្ធភាពមួយចំនួន ដើម្បីអាចជួយអ្នកឱ្យធ្វើការសហការជាមួយគ្នាកាន់តែប្រសើរឡើងជាមួយមនុស្សដែលអ្នកមិនចូលចិត្តឬពិបាកចុះសម្រុង។
ហើយយុទ្ធសាស្រ្តទាំងនោះ រួមមាន៖
1. គិតអំពីមូលហេតុនៃភាពតានតឹង និងរបៀបដែលអ្នកកំពុងឆ្លើយតបចំពោះវា
ជំហានដំបូង អ្នកត្រូវតែហ៊ានទទួលយកនិងធ្វើការឆ្លុះបញ្ចាំង បន្ទាប់មកត្រូវរំលឹកខ្លួនអ្នកថា អ្នកមិនអាចចុះសម្រុងឬពេញចិត្តចំពោះមនុស្សគ្រប់គ្នាបានទេ ប៉ុន្តែរាល់អន្តរកម្មជាមួយនឹងអ្នកដទៃគឺវាមានគុណតម្លៃខ្លាំងណាស់ ដោយអ្នកអាចរៀនពីមនុស្សស្ទើរតែទាំងអស់ដែលអ្នកបានជួប ឬកំពុងធ្វើការជាមួយនឹងអ្នក។
លើសពីនេះ អ្នកក៏ត្រូវពិនិត្យមើលដោយស្មោះត្រង់នូវអ្វីដែលបណ្តាលឱ្យអ្នកមានភាពតានតឹង និងតួនាទីដែលអ្នកកំពុងដើរតួក្នុងការបង្កើតវា ហើយស្វែងរកឫសគល់ដែលធ្វើឱ្យអ្នកគ្មានអារម្មណ៍ និងមិនចូលចិត្តសហការជាមួយបុគ្គលណាម្នាក់ បន្ទាប់មកអ្នកត្រូវរៀនទទួលយកវា និងរៀនមើលអំពីកំហុសឬសកម្មភាពរបស់ខ្លួនឯងផង។
2. ព្យាយាមឈ្វេងយល់ពីទស្សនៈរបស់អ្នកដទៃ
អ្នកត្រូវតែចំណាយពេលគិតដោយចេតនាអំពីទស្សនៈរបស់អ្នកដទៃ ជាពិសេសប្រសិនបើបុគ្គលនោះមានសារៈសំខាន់ចំពោះភាពជោគជ័យរបស់អ្នក។
សួរខ្លួនឯងថា ហេតុអ្វីបានជាបុគ្គលនេះប្រព្រឹត្តបែបនេះ? តើអ្វីអាចជំរុញទឹកចិត្តពួកគេ? តើពួកគេមើលមកខ្ញុំឃើញបែបណា? តើពួកគេអាចចង់បាន និងត្រូវការអ្វីខ្លះពីខ្ញុំ?
3. ធ្វើជាអ្នកដោះស្រាយបញ្ហា ជាជាងការរិះគន់ ឬប្រជែងអ្នកដទៃ
ការដែលអាចធ្វើការជាមួយគ្នាឱ្យកាន់តែប្រសើរឡើង អ្នកត្រូវតែផ្លាស់ប្ដូរផ្នត់គំនិតពីការចង់ប្រកួតប្រជែង ទៅជាការសហការគ្នាវិញ។ លើសពីនេះ ត្រូវតែចូលរួមសកម្មភាពធ្វើការជាមួយពួកគេផ្ទាល់ និងត្រូវរៀនបើកចំហចិត្តក្នុងការធ្វើការជាមួយពួកគេ។ ហើយអ្នកក៏អាចសួរមកខ្លួនឯងថា តើអ្នកគិតអ្វី? តើអ្នកមានគំនិតសម្រាប់របៀបដែលយើងអាចធ្វើការបានល្អជាមួយគ្នាទេ? បន្ទាប់មកធ្វើសកម្មភាពណាដែលអ្នកគិតថាល្អ និងអាចសហការជាមួយពួកគេដើម្បីសម្រេចនូវគោលដៅការងារ។
4. សួរសំណួរបន្ថែម
នៅក្នុងកិច្ចសហការគ្នា អ្នកត្រូវតែសួរសំណួរឱ្យបានច្រើន បន្ទាប់មករៀនស្ដាប់ពីមតិយោបល់របស់អ្នកដទៃ និងបើមានអ្វីកែអាចចូលរួមផ្ដល់ជាមតិយោបល់កែលម្អ ជាជាងនិយាយរិះគន់បន្ថែម ឬការនិយាយខ្វែងគំនិតគ្នានឹងគ្នា។ លើសពីនេះ អ្នកក៏អាចស្នើសុំឱ្យមានជំនួយពីពួកគេ ដើម្បីអាចចាប់ផ្ដើមបង្កើតទំនាក់ទំនងរវាងអ្នកនិងពួកគេឱ្យកាន់តែល្អ ទោះបីជាការចាប់ផ្ដើមដំបូងរៀងពិបាកបន្ដិចក៏ដោយ។
5. យល់អំពីបុគ្គលិកលក្ខណៈរបស់អ្នកដទៃ
មនុស្សម្នាក់ៗតែងតែមានបុគ្គលិកលក្ខណៈផ្សេងៗគ្នា សូម្បីតែចំណង់ចំណូលចិត្ត ស្ទាយផ្ទាល់ខ្លួន និងអត្តចរិតជាដើម ដូច្នេះអ្នកត្រូវតែរៀនយល់អំពីពួកគេឱ្យបានច្រើន ដើម្បីចៀសវាងធ្វើឱ្យអ្នកកាន់តែមានភាពតានតឹងខ្លាំងនៅពេលធ្វើការសហការជាមួយពួកគេ ហើយពួកគេធ្វើសកម្មភាពណាមួយដែលអ្នកមិនពេញចិត្តជាដើម។ បន្ទាប់មក អ្នកត្រូវរៀនសម្របខ្លួន និងចេះយោគយល់គ្នាទៅវិញទៅមក។
