ពាក្យបណ្តឹងទាំងអស់មិនមែនសុទ្ធតែជាការប្រមាថទេតែជួនកាលវាក៏ក្លាយជាឱកាសដែរ។ នៅពេលដែលស្ថានភាពយ៉ាប់យ៉ឺនចូលមកដល់បុគ្គលិកលក្ខណៈរបស់អ្នកបង្ហាញឲ្យគេឃើញច្រើនជាងស្ថានភាពល្អទៅទៀត។ កាលណាអ្នកយកចិត្តទុកដាក់ដោះស្រាយបញ្ហាឲ្យអតិថិជនបានត្រឹមត្រូវមានន័យថាអ្នកគិតគូរពីសុខុមាលភាពរបស់គេប្រាកដណាស់ហើយគេនឹងក្លាយជាអតិថិជនរបស់អ្នកយូរអង្វែង។ ប៉ុន្តែតើអ្នកនឹងធ្វើយ៉ាងណាបើសុខៗអតិថិជនមកប្រាប់អ្នកថាគេមិនពេញចិត្តចំពោះរឿងអ្វីមួយ?
ទទួលស្គាល់ពីកំហុសនិងសុំទោស
ដំបូងអ្នកត្រូវរៀនដកអារម្មណ៍របស់ខ្លួនឯងទុកមួយឡែកសិន។ បន្ទាប់មកទទួលស្គាល់កំហុសសិនបើទោះបីជាអ្នកដឹងថាវាមិនមែនជាកំហុសរបស់អ្នកក៏ដោយហើយស្ដាប់ពីការអធិប្បាយរបស់គេ។ ប្រការសំខាន់អ្នកត្រូវយកចិត្តគេមកដាក់ចិត្តខ្លួនឯង រៀនយល់ពីស្ថានភាពរបស់គេយ៉ាងយកចិត្តទុកដាក់។ ការសុំទោសត្រូវធ្វើចេញពីចិត្តពិតៗដោយបង្ហាញទឹកមុខសោកស្តាយដែលវាបានកើតឡើង។ មួយវិញទៀតបើអតិថិជនស្ដីបន្ទោសឲ្យបុគ្គលិកណាម្នាក់ហើយគេមិនមានអានុភាពគ្រប់គ្រាន់ក្នុងការដោះស្រាយបាន អ្នកត្រូវនាំអតិថិជនទៅរកអ្នកណាផ្សេងដែលអាចដោះស្រាយជូនអតិថិជន។
អង្កេតនិងកត់ត្រា
បន្ទប់ពីស្ដាប់ពីបញ្ហារបស់អតិថិជនហើយអ្នកត្រូវកត់ត្រាឲ្យបានត្រឹមត្រូវរួមនឹងដំណោះស្រាយផ្សេងៗតាមដែលអាចធ្វើបាន។ អ្នកត្រូវអង្កេតស្ថានការណ៍ឲ្យបានច្បាស់មុនសម្រេចចិត្តដោះស្រាយ។ អ្នកត្រូវកំណត់ថាអ្នកណាដែលជាអ្នកពាក់ព័ន្ធខ្លះ។ ម្យ៉ាងទៀត អ្នកត្រូវប្រាកដថាមនុស្សដែលអ្នកចាត់ឲ្យដោះស្រាយកិច្ចការនោះគឺមានឥទ្ធិពលគ្រប់គ្រាន់អាចគ្រប់គ្រងកិច្ចការនោះបាន។
សម្របសម្រួលប្រកបដោយភាពវិជ្ជមាន
ស្ថានភាពកាន់តែតានតឹងនោះភាពមួម៉ៅគឺមានកាន់តែខ្លាំង។ អ្នកត្រូវចេះសម្របសម្រួលឲ្យអតិថិជនអង្គុយចុះដោយស្ងប់ស្ងាត់សិនដើម្បីឲ្យគេបើកចិត្តស្ដាប់អ្នកបាន។ បន្ទាប់ពីនោះអ្នកត្រូវផ្តោតអារម្មណ៍ទៅលើអ្វីដែលអ្នកធ្វើបានជាជាងអ្វីដែលអ្នកធ្វើមិនបាន។
ទាក់ទងទៅពួកគេឲ្យបានទៀងទាត់
ជួនកាលបញ្ហាខ្លះមិនអាចដោះស្រាយភ្លាមៗទេគឺវាត្រូវការចំណាយពេលវេលា។ ប៉ុន្តែមិនមែនមានន័យថាអ្នកយកបញ្ហារបស់គេមកទុកចោលមិនអើពើឬមិនប្រាប់ពួកគេពីដំណើរការនៃការដោះស្រាយបញ្ហានោះទេ អ្នកត្រូវប្រាប់គេជារយៈៗថាអ្នកបានដំណើរការដោះស្រាយដល់ណាហើយ។ ការធ្វើបែបនេះមានន័យថាអ្នកកំពុងតែយកចិត្តទុកដាក់ចំពោះពួកគេ។
ស្វែងរកហេតុផល
អ្នកត្រូវទទួលខុសត្រូវចំពោះបញ្ហាដែលបានកើតឡើងដើម្បីឲ្យអតិថិជនទុកចិត្តសិន។ បន្ទាប់ពីនោះអ្នកត្រូវរកឫសគល់បញ្ហានោះឲ្យបានថាវាកើតឡើងមកពីអ្វី កើតឡើងដូចម្តេច ហេតុអ្វីបានជាវាកើត ហើយនរណាខ្លះដែលជាប់ពាក់ព័ន្ធជាមួយរឿងនេះ។ អ្នកត្រូវបែងចែកទៅឲ្យមនុស្សដែលពាក់ព័ន្ធក្នុងការលុបបំបាត់បញ្ហានេះនិងអនុញ្ញាតឲ្យគេដឹងពីទំនួលខុសត្រូវរបស់គេរៀងៗខ្លួន។
ដោះស្រាយ
អ្នកត្រូវធ្វើឲ្យប្រាកដថាអ្នកបានដោះស្រាយបញ្ហានេះបានត្រឹមត្រូវ ភាគីម្នាក់ៗអាចទទួលយកបានទាំងអស់គ្នា ហើយបញ្ហាបែបនេះនឹងមិនកើតឡើងម្តងទៀតទេ។ ប៉ុន្តែបើបញ្ហានោះជាបញ្ហាដែលដែលធ្ងន់ធ្ងរខ្លាំងលើសពីសមត្ថភាពរបស់មនុស្សនៅក្នុងស្ថាប័នអាចគ្រប់គ្រងបានអ្នកគួរហៅជនទី៣ដូចជា មេធាវី និងអ្នកផ្តល់ប្រឹក្សាតាមផ្លូវច្បាប់មកដោះស្រាយទើបជាការប្រសើរ។ ជាចុងក្រោយអ្នកត្រូវសួរអតិថិជនថាគេមានត្រូវការអ្វីបន្ថែមទៀតអត់ ឬអ្វីផ្សេងទៀតដែលគេគិតថាមិនទាន់គ្រប់ជ្រុងជ្រោយ។
អរគុណ
ជាជាងការគ្រាន់តែញញឹមនិងព្រួយបារម្ភ អ្នកត្រូវសម្តែងទឹកចិត្តត្រេកអរផងដែរចំពោះការចែករំលែកក្តីព្រួយបារម្ភរបស់គេជាជាងឈប់ប្រើប្រាស់ផលិតផលឬសេវាកម្មរបស់អ្នក។ អ្នកអាចប្រាប់ពួកគេថាអ្នកអរគុណពួកគេដែលវាមិនត្រឹមតែអ្នកមិនខាតបង់អ្វីច្រើនទេតែវាថែមទាំងធ្វើឲ្យក្រុមហ៊ុនរបស់គេអាចអភិវឌ្ឍបានកាន់តែល្អថែមទៀតផង។
