ក្នុងនាមជាប្រទេសដែលប្រកាន់យកសេដ្ឋកិច្ចទីផ្សារសេរី រាជរដ្ឋាភិបាលផ្តល់សិទ្ធិពេញលេញឲ្យអាជីវកម្មអាចប្រកួតប្រជែងគ្នាដើម្បីដណ្តើមបានអតិថិជនគោលដៅរៀងៗខ្លួន។ តើធ្វើយ៉ាងណាទើបយើងអាចមានលទ្ធភាពប្រកួតប្រជែងជាមួយអាជីវកម្មផ្សេងបាន? ចូរមើលវិធីខាងក្រោម៖
១. ផ្តល់រង្វាន់ដល់អតិថិជនដើម្បីអាចរក្សាទុកអតិថិជនចាស់នៅតែត្រឡប់មកជាវផលិតផលឬប្រើប្រាស់សេវាកម្មយើងសាជាថ្មីជាពិសេសអតិថិជនដែលជាវផលិតផលឬសេវាកម្មតាំងពីយើងចាប់ផ្តើមដាក់លក់។ ម្យ៉ាងទៀតវាគឺជានុយដែលដាក់ដើម្បីទាក់ទាញអតិថិជនថ្មី។
២. ពង្រឹងគុណភាពផលិតផលឬសេវាកម្មរបស់យើង។ អ្នកត្រូវចងចាំថាមិនថាផលិតផលរបស់អ្នកស្រស់ស្អាត ងាយស្រួលប្រើ មានតម្លៃថោក ឬការផ្សព្វផ្សាយល្អប៉ុណ្ណាទេ ប្រសិនបើគុណភាពរបស់អ្នកមិនល្អអតិថិជននឹងមិនរើសយកអ្នកឡើយឬគេអាចប្រើតែពេលដំបូងតែប៉ុណ្ណោះ។ ជួនកាលអ្នកត្រូវដាក់តម្លៃឲ្យស្របនឹងគុណភាពក៏ពិតមែន ប៉ុន្តែបើអ្នកចង់មានភាពលេចធ្លោជាងដៃគូប្រជែង សូមពិចារណាទៅលើចំណុចនេះ។
៣. បង្កើនផលិតផលឬសេវាកម្មរបស់យើង។ ឧទាហរណ៍ដូចជាហាងលក់សម្លៀកបំពាក់អាចបន្ថែមលក់សម្លៀកបំពាក់សម្រាប់កូនក្មេងឬសម្លៀកបំពាក់បុរស។
៤. លើកទឹកចិត្តអតិថិជនឲ្យណែនាំផលិតផលអ្នកទៅកាន់មិត្តភក្តិ គ្រួសារ និងមិត្តរួមការងារដោយផ្តល់ក្រដាសផ្សព្វផ្សាយឬកាតបញ្ចុះតម្លៃ
៥. ត្រូវកំណត់លក្ខណៈពិសេសមួយដែលខុសប្លែកពីផលិតផលឬសេវាកម្មដទៃ។ ប្រសិនបើអ្នកបើកហាងអ៊ុតសក់ អ្នកអាចបន្ថែមសេវាកម្មដូចជាកាត់ក្រចក មាស្សា ឬប្រើប្រាស់តែផលិតផលមានគុណភាពឬម៉ាកល្បីៗដើម្បីផ្តល់ទំនុកចិត្តចំពោះអតិថិជន។
៦. រៀបចំគម្រោងសម្រាប់ពេលអនាគតដូចជាធ្វើគម្រោងសម្រាប់រក្សាការអភិវឌ្ឍន៍ផលិតផលតាមការនិយមរបស់អតិថិជន។ ធ្វើដូច្នេះអ្នកអាចនឹងមានអារម្មណ៍ថាកាន់តែងាយស្រួលក្នុងការអនុវត្តន៍ដើម្បីឈានចូលដល់ការរីកចម្រើន។
