ហេតុអ្វីបានជាមនុស្សត្រូវមានទាំង Hard Skills និង Soft Skills?

ជំនាញរឹង (Hard Skills) និងជំនាញទន់ (Soft Skills) សុទ្ធតែជាជំនាញដែលមនុស្សត្រូវការទាំងពីរ ដោយមិនអាចខ្វះជំនាញណាមួយបានឡើយ ឬមិនអាចមានតែជំនាញរឹង ហើយគ្មានជំនាញទន់ ឬមានតែជំនាញទន់ តែគ្មានជំនាញរឹងបានឡើយ។ ដូច្នេះសំណួរចោទឡើងថា ហេតុអ្វីមនុស្សត្រូវតែមានជំនាញទាំងពីរនេះ?

ដើម្បីឈ្វេងយល់កាន់តែច្បាស់ថា ជំនាញទាំងពីរនេះមានភាពពាក់ព័ន្ធគ្នាដូចម្ដេច យើងអាចឈ្វេងយល់អំពីជំនាញនីមួយៗជាមុនសិន។

ជំនាញរឹង (Hard Skills)

ជំនាញរឹង ជាចំណេះដឹងបច្ចេកទេស ឬការបណ្តុះបណ្តាលដែលអ្នកបានទទួលតាមរយៈបទពិសោធន៍ជីវិតណាមួយ រួមទាំងក្នុងអាជីព ឬការអប់រំរបស់អ្នកនៅក្នុងសាលា។

ជំនាញរឹង រួមមាន៖

• ជំនាញភាសាបរទេស
• សញ្ញាបត្រ ឬវិញ្ញាបនបត្រ
• ការសរសេរកម្មវិធីកុំព្យូទ័រ
• ជំនាញ IT
• គណនេយ្យករ
• ការគ្រប់គ្រងយុទ្ធនាការទីផ្សារ
• ការវិភាគហានិភ័យ
• និងមានជាច្រើនទៀត។

ជំនាញទន់ (Soft Skills)

ជំនាញទន់ ជាទម្លាប់ និងលក្ខណៈផ្ទាល់ខ្លួន ដែលកំណត់ពីរបៀបដែលអ្នកធ្វើការ ដោយខ្លួនឯង និងជាមួយអ្នកដទៃ។

ជំនាញទន់ រួមមាន៖

• ជំនាញទំនាក់ទំនង
• ភាពបត់បែន
• ភាពជាអ្នកដឹកនាំ
• ការលើកទឹកចិត្ត
• ការអត់ធ្មត់
• ការបញ្ចុះបញ្ចូល
• ការងារជាក្រុម
• ចេះបើកចិត្ត
• ភាពច្នៃប្រឌិត
• ការចេះយល់ចិត្តមនុស្សជុំវិញ
• សមត្ថភាពដោះស្រាយបញ្ហា
• ក្រមសីលធម៌ការងារ
• ការគ្រប់គ្រង​ពេលវេលា
• និងមានជាច្រើនទៀត។

ប្រសិនបើមនុស្សមានមួយជំនាញ ខ្វះមួយជំនាញ តើមានអ្វីកើតឡើង?

• ក្នុងករណីថា មនុស្សមានតែជំនាញរឹង តែគ្មានជំនាញទន់ ៖ មនុស្សនោះនឹងមានជំនាញឯកទេសមួយដ៏ខ្លាំងក្លា ប៉ុន្តែខ្វះការធ្វើការជាក្រុម មិនចេះយល់ចិត្តមនុស្សជុំវិញ ហើយពិបាកធ្វើការជាមួយនឹងមិត្តរួមការងារ នោះបុគ្គលនោះគ្មានភាពរីកចម្រើនលឿនឡើយ។
• ក្នុងករណីថា មនុស្សមានតែជំនាញទន់ តែគ្មានជំនាញរឹង ៖ មនុស្សនោះនឹងមានតែការចេះធ្វើការជាមួយអ្នកជុំវិញ ចេះក្រែងចិត្តនិងយល់ពីសុខទុក្ខអ្នកដទៃ ប៉ុន្តែគ្មានជំនាញគោលមួយច្បាស់លាស់ នោះបុគ្គលនោះ ក៏មានភាពរីកចម្រើនយឺតដែរ។

ហើយនេះ គ្រាន់តែជាការលើកឧទាហរណ៍បង្ហាញមួយផ្នែកតូចនោះទេ ដើម្បីជួយបង្ហាញឱ្យអ្នកបានឈ្វេងយល់ និងដឹងថា ជំនាញទាំងពីរនេះ សុទ្ធតែសំខាន់ ហើយមនុស្សចាំបាច់ត្រូវតែមានទាំងពីរ។

អត្ថប្រយោជន៍ នៅពេលមានជំនាញទាំងពីរនេះ

នៅពេលដែលមនុស្សមានទាំងជំនាញរឹង និងជំនាញទន់ ពួកគេនឹង៖

• មានសមត្ថភាពកាន់តែរីកចម្រើនបានលឿន
• មានផលិតភាពការការងារខ្ពស់
• មានឱកាសនៃការជោគជ័យក្នុងជីវិត និងក្នុងការបំពេញការងារណាមួយបានឆាប់រហ័ស
• អាចសម្រេចបានកិច្ចការងារសំខាន់ៗបានច្រើន