គន្លឹះចាប់ផ្ដើមអាជីវកម្មទាំង 5 របស់មហាសេដ្ឋី Joe Gebbia

116
គន្លឹះចាប់ផ្ដើមអាជីវកម្មទាំង 5 របស់មហាសេដ្ឋី Joe Gebbia

ទម្រាំទទួលបានភាពជោគជ័យនៅថ្ងៃនេះ ស្ថាបនិក Airbnb បានឆ្លងកាត់ការលំបាកជាច្រើន។ ថ្មីៗនេះសហស្ថាបនិក Airbnb លោក Joe Gebbia បានចែករំលែកនៅក្នុងគេហេទំព័រ Entrepreneur Mindset ស្ដីអំពីមេរៀនចាប់ផ្តើមអាជីវកម្មរបស់គាត់ ដើម្បីជាគន្លឹះក្នុងការនាំផ្លូវដ៏ល្អដល់អ្នកដែលកំពុងមានគំនិតចង់ចាប់ផ្ដើមអាជីវកម្មផ្ទាល់ខ្លួន។

1. ដំណើរនៃភាពជោគជ័យ

ភាពជោគជ័យ គឺជាដំណើរមួយ ដែលមិនមែនគ្រាន់តែជាគោលដៅនោះទេ មានន័យថា អ្វីគ្រប់យ៉ាងដែលមានភាពជោគជ័យ តែងតែមានដំណាក់កាលរបស់វា។ ចូរកុំមានការភ័ន្តច្រលំថា ការធ្វើអាជីវកម្មមានលក្ខណៈងាយស្រួល ដូច្នេះដើម្បីឈានដល់ទីបញ្ចប់នៃភាពជោគជ័យ គឺទាមទារឱ្យមានការលះបង់ច្រើន។ បន្ទាប់មក ពេលខ្លះក៏ទទួលរងនូវបញ្ហានានា រហូតក្លាយជាមេរៀនសម្រាប់អ្នកនៅក្នុងអាជីពរបស់អ្នកនៅពេលក្រោយ។

សរុបមក ត្រង់ចំណុចនេះ អ្នកត្រូវឈ្វេងយល់ និងទទួលស្គាល់ថា ដើម្បីទទួលបានភាពជោគជ័យលើអាជីវកម្ម គឺទាមទារឱ្យឆ្លងកាត់ទៅតាមដំណាក់កាលរបស់វា។

2. គំនិតល្អ ត្រូវតែចាប់ផ្ដើមធ្វើសកម្មភាព

គំនិតល្អបំផុតនៅពេលកើតមានដំបូង ជារឿយៗត្រូវបានគេចាត់ទុកថាឆ្កួត ប៉ុន្តែអ្នកកុំខ្វល់ខ្វាយពីពាក្យសម្ដីឬការគិតរបស់អ្នកដទៃ តែអ្វីតែអ្នកត្រូវគិតនោះគឹ ការចាប់ផ្ដើមសកម្មភាពពោរពេញដោយឆន្ទៈខ្ពស់ក្នុងការធ្វើវាឱ្យចេញជារូបរាងពិតជាក់ស្ដែង។ ឧទាហរណ៍៖ ការចាប់ផ្ដើមធ្វើ Airbnb របស់លោក Joe ដំបូង គឺមានមនុស្សជាច្រើនបាននិយាយថា វាមិនអាចទៅរួចនោះទេ ប៉ុន្តែបន្ទាប់មកអ្វីៗបានដំណើរការទៅតាមគន្លងរបស់វា។ ក្រោយមក Airbnb បានក្លាយជាក្រុមហ៊ុនដែលមានតម្លៃរាប់ពាន់លានដុល្លារ។

3. មានភាពក្លៀវក្លាក្នុងខ្លួន

ភាពក្លៀវក្លា គឺជាដំណើរឆ្ពោះទៅរកភាពជោគជ័យ ទោះបីជាគំនិតរបស់អ្នកមិនអស្ចារ្យក៏ដោយ ប៉ុន្តែអ្នកនៅតែអាចទាក់ទាញការចាប់អារម្មណ៍ពីអ្នកដទៃ និងអាចបញ្ចុះបញ្ចូលពួកគេដោយការខិតខំដែលអ្នកបានបង្ហាញចេញតាមរយៈភាពក្លៀវក្លារបស់អ្នកជាដើម។

4. រក្សាទំនាក់ទំនងជានិច្ច

ក្នុងនាមជាសហគ្រិនភាព ទាមទារឱ្យបង្កើតបណ្ដាញទំនាក់ទំនងល្អ ពីព្រោះការបង្កើតទំនាក់ទំនងល្អ អាចជួយឱ្យមានគុណភាពការងារកាន់តែល្អនិងមានភាពរីកចម្រើនជាបន្តបន្ទាប់។ លើសពីនេះ អាចជួយផ្ដល់ជាគំនិត និងដំណោះស្រាយលើផ្នែកណាមួយក្នុងការងារឱ្យមានដំណើរការរលូនឡើងវិញ។

5. ធ្វើផែនការត្រៀមទុកការពារហានិភ័យ

ការធ្វើផែនការសម្រាប់ស្ថានភាពហានិភ័យនានា ដែលអាចកើតមានឡើងដោយគ្មានការព្រៀងទុកមុនជាដើម។ ដូច្នេះត្រង់ចំណុចនេះ អ្នកត្រូវព្យាករណ៍អំពីហានិភ័យនានា ដែលអាចនឹងកើតឡើង បន្ទាប់មកត្រៀមដំណោះស្រាយ ដើម្បីការពារទុកមុន។