ប្រធានធនាគារពិភពលោក៖ វាពិតជាពិបាកនឹងគេចផុតពីវិបត្តិសេដ្ឋកិច្ចពិភពលោក

175

ប្រធានធនាគារពិភពលោកថ្មីៗនេះបានលើកឡើងនូវក្តីព្រួយបារម្ភអំពីការថយចុះកំណើតសេដ្ឋកិច្ចដោយការបន្តបិទខ្ទប់នូវទីក្រុងធំៗនៅប្រទេសចិនដោយសារការរីករាលដាលជម្ងឺកូវីដ១៩ ដែលរួមមានដូចជាទីក្រុងសៀងហៃ ដែលជាបណ្តុំមជ្ឍមណ្ឌលហិរញ្ញវត្ថុ រោងចក្រ និងកំពង់ផែអន្តរជាតិធំជាងគេនៅលើពិភពលោក ដែលបញ្ហានេះ កំពុងតែធ្វើឲ្យកំណើនសេដ្ឋកិច្ចពិភពលោកកំពុងតែថមថយ។

លោក Malpassនិយាយដោយមិនបានបញ្ជាក់តួរលេខជាក់លាក់ថា “បើយើងក្រឡេកទៅមើលGDPរបស់ពិភពលោក វាកំពុងតែរងសម្ពាធ ហើយវាពិតជាពិបាកនឹងចៀសផុតពីការដាំក្បាលចុះណាស់”!

នៅក្នុងឆ្នាំនេះ បញ្ហាកូវីដ១៩នៅប្រទេសចិនបានកម្រើកឡើងវិញ ដែលនាំឲ្យឈានទៅការបិទខ្ទប់ទីក្រុងធំៗដែលជាដង្ហើមសេដ្ឋកិច្ច។ ហើយនៅដើមឆ្នាំ២០២២នេះ បញ្ហាធ្លាក់ចុះនៃវិស័យអចលនវត្ថុនៅក្នុងប្រទេសនេះផងនោះ បានធ្វើឲ្យសេដ្ឋកិច្ចចិនកំពុងតែជួបការលំបាក ហើយបញ្ហានេះក៏បានជះឥទ្ធិពលមកលើការរីកចម្រើននៃសេដ្ឋកិច្ចពិភពលោក។

ក្រៅពីនេះ វិបត្តិសង្គ្រាមនៅអ៊ុយក្រែន ក៏កាន់តែបន្ថែមសម្ពាធដល់សេដ្ឋកិច្ចពិភពលោកផងដែរ ដោយសារតែប្រទេសជាច្រើននៅទ្វីបអ៊ឺរ៉ុបនៅតែពឹងផ្អែកខ្លាំងនឹងឧស្ម័ន និងប្រេងពីរុស្សី ដែលធ្វើឲ្យតម្លៃប្រេងអន្តរជាតិក្នុងពេលបច្ចុប្បន្ននេះកំពុងតែឡើងថ្លៃយ៉ាងខ្លាំង។ ជាក់ស្តែង ប្រទេសអាឡឺម៉ង់ ដែលជាប្រទេសមានសេដ្ឋកិច្ចធំជាងគេនៅអ៊ឺរ៉ុប និងធំលំដាប់ទី៤លើពិភពលោកកំពុងតែជួបបញ្ហាខ្លាំងដោយសារតែកំណើនតម្លៃប្រេង និងឧស្ម័ននេះ ហើយប្រទេសកំពុងអភិវឌ្ឍន៍វិញកំពុងតែមានវិបត្តិខ្វះខាតជីកសិកម្ម អាហារ និងប្រភពថាមពល។

ប្រភព៖ https://www.financial-world.org