ប្រសិនបើលោកអ្នកមានចំណាប់អារម្មណ៍ ហើយចង់ស្វែងយល់អំពីគំនិតថ្មីៗនៅក្នុងការធ្វើទីផ្សារ នោះក្រុមហ៊ុន កូកា-កូទ្បាពិតជាគម្រូដ៏ល្អបំផុតសម្រាប់លោកអ្នក។ ចាប់តាំងពីឆ្នាំ១៨៨៦រហូតដល់ពេលបច្ចុប្បន្នក្រុមហ៊ុនយក្សមួយនេះនៅតែបន្តរក្សាកេរ្តិ៍ឈ្មោះដ៏ល្បីរបស់ខ្លួននៅក្នុងទីផ្សារភេសជ្ជះរបស់ពិភពលោក។ កត្តាមួយក្នុងចំណោមកត្តាជាច្រើនទៀតដែលជម្រុញអោយក្រុមហ៊ុននេះជោគជ័យទៅបានគឺអាស្រ័យទៅលើការធ្វើយុទ្ធនាការទីផ្សារប្រកបដោយភាពច្នៃប្រឌិតនិងប៉ិនប្រសព្វរបស់ក្រុមហ៊ុននេះផ្ទាល់។
តើយុទ្ធនាការទីផ្សារណាខ្លះដែលធ្វើឲ្យក្រុមហ៊ុនកូកា-កូទ្បាទទួលបាននូវភាពជោគជ័យរហូតដល់សព្វថ្ងៃ?
១ . យុទ្ធនាការ Share A Coke :
កាលពីឆ្នាំ២០១៩កន្លងទៅនេះក្រុមហ៊ុន កូកា-កូទ្បា បានដាក់ចេញនូវយុទ្ធនាការបោះពុម្ពឈ្មោះ ពលរដ្ឋអាមេរិច នៅលើសំបកកំប៉ុងរបស់ខ្លួនដែលយុទ្ធធានាការនេះពិតជាទទួលបាននូវការចាប់អារម្មណ៍យ៉ាងខ្លាំងពីសំណាក់ប្រជាជនអាមេរិច ដោយមានមនុស្សជាច្រើនបានចូលរួមថតរូបកំប៉ុងកូកា-កូទ្បា ដែលមានឈ្មោះរបស់ពួកគេផ្ទាល់ហើយធ្វើការបង្ហោះនិងចែករំលែកនៅក្នុងបណ្តាញសង្គម ។ ជាលទ្ធផលអត្រានៃការលក់របស់ក្រុមហ៊ុន កូកា-កូទ្បា មានការកើនទ្បើងយ៉ាងគំហុកគួរឲ្យកត់សម្គាល់។ ពិសេសជាងនេះទៅទៀត យុទ្ធនាការនេះត្រូវបានធ្វើទ្បើងនៅក្នុងប្រទេសចំនួន២០ទូទាំងពិភពលោក ហើយនៅតែបន្តទទួលបាននូវភាពជោគជ័យផងដែរ។
តើអ្វីដែលអ្នកអាចរៀនបានពីយុទ្ធនាការទីផ្សារមួយនេះ?
មូលហេតុចម្បងដែលធ្វើឱ្យយុទ្ធនាការនេះទទួលបាននូវភាពជោគជ័យខ្លាំងយ៉ាងនេះគឺដោយសារតែការដែលអាចផ្សារភ្ជាប់នូវទំនាក់ទំនងយ៉ាងល្អរវាងអតិថិជននិងផលិតផលរបស់ពួកគេ ។ តើអ្នកគិតថាមានមនុស្សប៉ុន្មានអ្នកដែលនឹងទិញផលិតផលរបស់អ្នកប្រសិនបើពួកគេឃើញឈ្មោះរបស់ពួកគេនៅលើផលិតផលនោះ?ការធ្វើបែបនេះអាចធ្វើឲ្យអតិថិផនរបស់អ្នកមានអារម្មណ៍ថាពិសេស ស្និតស្នាល និង ផ្ទាល់ខ្លួន។ ដូច្នេះមុនពេលដែលអ្នកចាប់ផ្តើមធ្វើយុទ្ធនាការទីផ្សារឬក៏ការផ្សព្វផ្សាយពាណិជ្ជកម្មណាមួយ អ្នកគួរតែគិតជាមុនសិនថាតើអ្នកអាចផ្សារភ្ជាប់នូវទំនាក់ទំនងរវាងអតិថិជននិងផលិតផលរបស់អ្នកបានដោយរបៀបណា?
២ . យុទ្ធនាការ Always Coca-Cola
នៅឆ្នាំ១៩៩៣ ក្រុមហ៊ុន កូកាកូទ្បា បានសាកល្បងនៅក្នុងការចាប់យកបច្ចេកវិទ្យាថ្មីមករួមបញ្ចូលនៅក្នុងការធ្វើយុទ្ធនាការទីផ្សាររបស់ពួកគេ ។ ជំនួសអោយការប្រើប្រាស់គំនូរជីវចលដែលគូរដោយដៃមកធ្វើជាវីដេអូផ្សព្វផ្សាយពាណិជ្ជកម្ម ក្រុមហ៊ុន កូកាកូទ្បា បានវិនិយោគទៅលើគំនូរជីវចលដោយប្រើប្រាស់កុំព្យូរទ័រវិញ។ គំនូរជីវចលនោះគឺបានបង្ហាញអំពីខ្លាឃ្មុំទឹកកកមួយហ្វូងដែលកំពុងតែផឹកនូវភេសជ្ជះ កូកាកូទ្បា នៅពេលដែលពួកគេកំពុងតែមើលភាពយន្ត។ យុទ្ធនាការមួយនេះគឺទទួលបាននូវការចាប់អារម្មណ៍ខ្លាំងណាស់ពីសំណាក់អតិថិជនរបស់ពួកគេដោយសារវាគឺជាអ្វីដែលថ្មី ប្លែក និងមិនមានក្រុមហ៊ុនណាមួយធ្លាប់ធ្វើនៅអំទ្បុងពេលនោះទេ។
តើអ្វីដែលអ្នកអាចរៀនបានពីយុទ្ធនាការទីផ្សារមួយនេះ?
យុទ្ធនាការទីផ្សារមួយនេះ បានបង្ហាញអោយយើងដឹងថាក្នុងនាមជាអ្នកធ្វើទីផ្សារ ការដែលហ៊ាននៅក្នុងការសាកល្បងនូវអ្វីដែលថ្មីៗ ពិតជារឿងដែលសំខាន់ខ្លាំងណាស់សម្រាប់អាជីវកម្ម។ តើអ្នកគិតថា ការផ្សព្វផ្សាយពាណិជ្ជកម្មខាងលើអាចនឹងទទួលបាននូវលទ្ធផលយ៉ាងដូចម្តេច បើសិនជាពួកគេបដិសេធនៅក្នុងការប្រើប្រាស់គំនូរជីវចលកុំព្យូទ័រហើយបែរជាជំនួសដោយគំនូរជីវចលដែលគូរដោយដៃវិញ ? ការសម្រេចចិត្តរបស់ក្រុមហ៊ុន កូកាកូទ្បា ក្នុងការជ្រើសរើសបច្ចេកវិទ្យាថ្មីៗ គឺជាការជំនួសនូវអ្វីដែលសាមញ្ញធម្មតាទៅជាអ្វីដែលប្លែកនិងគួរឲ្យទាក់ទាញសម្រាប់ជួយបង្កើននូវចំណាប់អារម្មណ៍ពីអតិថិជននៅពេលដែលពួកគេបានឃើញការផ្សព្វផ្សាយពាណិជ្ជកម្មនោះ។ ដូច្នេះអ្នកគួរបង្កើននូវការចាប់អារម្មណ៍និងសម្លឹងស្វែងរកនូវបច្ចកវិទ្យាថ្មីៗណាដែលអាចជួយអោយការធ្វើទីផ្សាររបស់អ្នកមានភាពល្អប្រសើរទ្បើងបាន ។
៣. យុទ្ធនាការ The World’s Cup
យុទ្ធនាការទីផ្សារ The World’s Cup ត្រូវបានបង្កើតទ្បើងដើម្បីចូលរួមអបអរសារទរព្រឹត្តិការណ៍នៃការប្រកួតបាល់ទាត់ចម្រុះជាតិសាសន៍ទូទាំងពិភពលោកកាលពីឆ្នាំ ២០១៤។ ក្រុមហ៊ុន កូកា-កូទ្បា បានផ្សព្វផ្សាយនូវវីដេអូពាណិជ្ជកម្មដ៏គួរអោយទាក់ទាញមួយដែលបង្ហាញអំពីការនាំយកនូវសំបុត្រអញ្ជើញសម្រាប់ការចូលរួមប្រកួតក្នុងព្រឹត្តការណ៍នេះរួមជាមួយនឹងភេសជ្ជះកូកា-កូទ្បាទៅជូនក្រុមបាល់ទាត់សញ្ជាតិផ្សេងៗទូទាំងពិភពលោក ។ វាមិនត្រឹមតែជាវីដេអូសាច់រឿងធម្មតាទេ តែជាវីដេអូដែលបង្កប់នូវមនោសញ្ចេតនានិងភាពកក់ក្តៅរួមជាមួយគ្នាផងដែរ។
តើអ្វីដែលអ្នកអាចរៀនបានពីយុទ្ធនាការទីផ្សារមួយនេះ?
បើសិនជាអ្នកចង់បង្កើតនូវការផ្សព្វផ្សាយពាណិជ្ជកម្មមួយដែលទាក់ទាញ អ្នកគួរតែគិតពីអ្វីដែលអាចកើតទ្បើងនៅក្នុងជិវិតពិតជាក់ស្តែងទើប អាចបំផុសនូវគំនិតនិងអារម្មណ៍របស់អតិថិជនអ្នកបាន ។ បើទោះបីជាអ្នកមិនមានកញ្ចប់ថវិកាច្រើនសម្រាប់ចំណាយដូចជាក្រុមហ៊ុនកូកា-កូទ្បា ក៏ដោយប៉ុន្តែអ្នកអាចរៀនពីពួកគេហើយចាប់យកនូវគំនិតថ្មីៗដែលមានប្រយោជន៍យកមកកែច្នៃហើយអនុវត្តន៍បាន ។ ការចំណាយពេលដើម្បីរៀនពីអ្នកដទៃគឺជាគន្លឹះនៃភាពជោគជ័យ។
