Home កសិកម្ម អតីតពលករនៅកូរ៉េម្នាក់ លោក វង់ បុត្រ ចិញ្ចឹមបង្កងអូស្ត្រាលី រកចំណូលបានប្រមាណជាង ១ម៉ឺនដុល្លារក្នុងមួយឆ្នាំ

អតីតពលករនៅកូរ៉េម្នាក់ លោក វង់ បុត្រ ចិញ្ចឹមបង្កងអូស្ត្រាលី រកចំណូលបានប្រមាណជាង ១ម៉ឺនដុល្លារក្នុងមួយឆ្នាំ

4
ធុរៈកិច្ច និងកសិកម្ម

មុខរបរអ្វីក៏ដោយ ឱ្យតែចេះច្បាស់មិនខ្វះទីផ្សារឡើយ បើមើលទៅលើមុខរបរចិញ្ចឹមបង្កងអូស្រ្តាលីវិញ ប្រហែលជាពិបាកចិញ្ចឹមខ្លាំងណាស់ហើយ។ ផ្ទុយមកវិញបែបជា មានការចិញ្ចឹមជាលក្ខណៈគ្រួសារ និងលក្ខណៈអាជីវកម្ម យ៉ាងផុសផុលស្ទើរតែ គ្រប់រាជធានី-ខេត្តទៅហើយមកទល់ពេលនេះ ដោយសារតែបង្កងប្រភេទនេះងាយស្រួលក្នុងការចិញ្ចឹម មានទីផ្សារល្អ និងតម្លៃក៏បានថ្លៃផងដែរ។

កាលពីថ្ងៃទី23 ខែមករា ឆ្នាំ2023 យោងតាមក្រសួងព័ត៌មានបានឱ្យដឹងថា លោក វង់ បុត្រ ដែលជាអតីតពលករនៅប្រទេសកូរ៉េចប់អាណត្តិការងារ ហើយបានវិលត្រឡប់មកនៅស្រុកកំណើតនៅឯខេត្តតាកែវវិញ។ ហើយដោយលោកមើលឃើញឱកាសទីផ្សារទៅលើមុខរបរចិញ្ចឹមបង្កងអូស្រ្តាលី ដែលមានឈ្មោះវិទ្យាសាស្រ្ត (Cherax quadricarinatus)។

ដោយលោក វង់ បុត្រ បានរៀបរាប់ថា “បន្ទាប់ពីបញ្ចប់អាណត្តិការងារដែលមានរយៈពេល ៤ឆ្នាំនៅប្រទេសកូរ៉េមក ខ្ញុំបានត្រឡប់មកស្រុកកំណើតវិញ ហើយនៅពេលនោះ ខ្ញុំមិនមានការងារអ្វីផ្សេងនោះទេ។ ដោយខ្ញុំសង្កេតឃើញមានការចិញ្ចឹមបង្កងអូស្ត្រាលីនេះនៅខេត្តតាកែវខ្លះៗដែរ ហើយក៏ចាប់អារម្មណ៍ប្រកបរបរនេះ ដូច្នេះហើយខ្ញុំក៏សាកល្បងចិញ្ចឹមជាលក្ខណៈគ្រួសារប៉ុណ្ណោះ គឺនៅក្នុងឆ្នាំ2019 ដោយរៀនវិធីនៃការចិញ្ចឹមពីបងៗ ដែលធ្លាប់ចិញ្ចឹមបង្កងប្រភេទនេះ”។

ហើយលោកបានបន្ថែមថា៖ ជាទូទៅ គឺតែងតែមានម៉ូយមកទិញដើម្បីបោះដុំ មិនដែលខាននោះឡើយ ហើយជួនកាលខ្ញុំក៏យកទៅលក់នៅទីផ្សារផងដែរ ប៉ុន្តែកសិដ្ឋានរបស់ខ្ញុំ គឺខ្ញុំផ្តោតទៅលើកការលក់កូនបង្កង ដែលបងប្អូនភាគច្រើនគាត់យកទៅចិញ្ចឹមបន្ត ជាជាងការផ្តោតលក់លើមេបង្កង។

បើតម្លៃដែលគាត់លក់ទៅឱ្យភ្ញៀវវិញ ចំពោះកូនបង្កងគឺ លក់រាប់គិតជាចំនួនក្បាលតែម្ដង ហើយបើក្នុងករណីទិញចាប់ពី 5,000 ក្បាលឡើងទៅ គឺលក់បានក្នុងតម្លៃចន្លោះចាប់ពី 400រៀល ទៅ500រៀលក្នុងមួយក្បាល (មួយកូន) តែបើយកក្នុងចំនួនតិចជាងនេះគឺតម្លៃពី 600រៀល ទៅ700រៀលក្នុងមួយក្បាល។ ហើយនៅក្នុងមួយឆ្នាំៗ គាត់លក់កូនបង្កងអូស្ត្រាលីបានប្រមាណ 100,000ក្បាល។

ហើយទល់នឹងពេលនេះកសិដ្ឋានរបស់លោក បានពង្រីករហូតដល់ 26អាងទៅហើយ ដែលនៅក្នុងមួយអាងៗមានទំហំ 3 × ​6 ម៉ែត្រ ព្រមទាំងមានចំនួន 9ស្រះ ដែលមានទំហំពី 1, 000 ដល់ 2,000 ម៉ែត្រការ៉េ។