អតិថិជនទាំងអស់ តែងតែចង់ទទួលបានការយល់ចិត្តពីទីកន្លែងដែលពួកគេទៅដើម្បីបញ្ជាទិញអ្វីមួយស្របតាមតម្រូវការ និងការចង់បានរបស់ពួកគេ ជាពិសេសនៅពេលពួកគេមានទុក្ខកង្វល់អ្វីមួយហើយចង់ឱ្យក្រុមហ៊ុនជួយដោះស្រាយ មិនថាក្រុមហ៊ុននោះជាប្រភេទភោជនីដ្ឋាន ឬក្រុមហ៊ុនលក់ផលិតផលសេវាកម្មអ្វីនោះឡើយ សំខាន់ពួកគេចង់មានការយល់ចិត្តដែលអាចធ្វើឱ្យពួកគេមានភាពស្រស់ស្រាយ និងទទួលបានអ្វីដែលពួកគេត្រូវការ។
ហេតុនេះហើយក្នុងនាមជាអ្នកលក់ និងអ្នកផ្ដល់សេវាកម្មអតិថិជន ត្រូវតែបង្កើនសមត្ថភាពផ្នែកយល់ចិត្តនេះឱ្យបានខ្លាំង ដើម្បីអាចបង្ហាញនូវភាពយល់ចិត្តទៅកាន់អតិថិជន ព្រមទាំងអាចជួយពួកគេឱ្យទទួលបានអារម្មណ៍ល្អ និងអាចស្វែងរកអ្វីដែលពួកគេត្រូវការ។ បន្ថែមពីនេះ នៅក្នុងខ្លឹមសារខាងក្រោម ក៏បង្ហាញនូវតិចនិកមួយចំនួន ដើម្បីយកអនុវត្តន៍ក្នុងការបង្ហាញពីការយល់ចិត្តអតិថិជនដ៏ល្អបំផុត។
1. ទទួលស្គាល់ពីទុក្ខកង្វល់របស់អតិថិជន
នៅពេលដែលអតិថិជនទាក់ទងជាមួយអ្នកដោយនិយាយអំពីបញ្ហារបស់ពួកគេដែលមានជាមួយនឹងផលិតផលឬសេវាកម្មរបស់អ្នក ដូច្នេះចូរចាប់ផ្ដើមសន្ទនាជាមួយពួកគេដោយទទួលស្គាល់នូវបញ្ហាទាំងនោះ។ ចូរកុំព្យាយាមនិយាយបដិសេធជាមួយអតិថិជនឱ្យសោះ ប៉ុន្តែត្រូវព្យាយាមស្ដាប់ និងឈ្វេងយល់អំពីបញ្ហាដែលអតិថិជនមាន បន្ទាប់យើងត្រូវនិយាយទទួលស្គាល់ និងសុំទោសចំពោះបញ្ហាមួយនោះ បន្ទាប់មកអ្នកត្រូវបង្ហាញជម្រើសនៃដំណោះស្រាយជូនអតិថិជនត្រឡប់ទៅវិញស្របតាមការចង់បានរបស់ពួកគេ។ ធ្វើបែបនេះ ពួកគេនឹងត្រជាក់ចិត្តឡើងវិញ និងសប្បាយចិត្ត ហើយក៏បន្តមកហាងរបស់អ្នកម្ដងទៀតនៅពេលពួកគេមានតម្រូវការផ្សេង។
ឧទាហរណ៍ខ្លះៗនៃការទទួលស្គាល់ពីទុក្ខកង្វល់របស់អតិថិជន
- ខ្ញុំយល់ពីការខកចិត្តរបស់អ្នក ប៉ុន្តែខ្ញុំនឹងព្យាយាមរកដំណោះស្រាយជូនអ្នក សូមអ្នកកុំបារម្ភ។
- ខ្ញុំសោកស្ដាយដែលបានឮថាអ្នកកំពុងជួបប្រទះរឿងនេះ ប៉ុន្តែខ្ញុំនឹងប្រឹងប្រែងឱ្យអស់ពីសមត្ថភាពដើម្បីដោះស្រាយរឿងនេះឱ្យបានឆាប់តាមដែលអាចធ្វើទៅបាន។
- ខ្ញុំយល់ថាហេតុអ្វីបានជាអ្នកខឹង ប្រសិនបើរឿងនេះកើតមកលើខ្ញុំ ក៏ខ្ញុំអាចនឹងមានអារម្មណ៍ដូចអ្នកដែរ ហើយឥលូវនេះខ្ញុំក៏អាចជួយអ្នកបានដែរ។
- អ្នកពិតជានិយាយត្រឹមត្រូវណាស់ ហេតុនេះខ្ញុំអាចមើលពីដំណើរការខុសឆ្គងដែលបានកើតឡើងបន្ដិច ដើម្បីខ្ញុំព្យាយាមដោះស្រាយជូនអ្នកឱ្យបានល្អស្របតាមអ្នកចង់បានវិញ។
- និងមានជាច្រើនទៀតអាស្រ័យលើស្ថានភាពជាក់ស្ដែង។
2. ធ្វើជាអ្នកស្តាប់ដ៏ល្អ
អតិថិជនភាគច្រើនពួកគេមិនមែនសុទ្ធតែជាមនុស្សពូកែនិយាយពន្យល់នូវអ្វីដែលពួកគេត្រូវការទាំងអស់ឡើយ ដែលជាហេតុធ្វើឱ្យអ្នកក៏អាចពិបាកក្នុងការដឹងថា តើពួកគេត្រូវការអ្វីឱ្យពិតប្រាកដដែរ? ហេតុដូចនេះហើយទើបទាមទារឱ្យអ្នកលក់ ក៏ដូចជាអ្នកផ្ដល់សេវាកម្មអតិថិជនទាំងអស់ត្រូវតែពង្រឹងសមត្ថភាពខ្លួនឯងឱ្យក្លាយជាអ្នកស្ដាប់ដ៏ល្អលើសពីការគ្រាន់តែស្ដាប់ដោយគ្មានការទុកចិត្តទុកដាក់។ ការស្ដាប់ដ៏ល្អ គឺជាការស្ដាប់នូវអ្វីដែលអតិថិជនបាននិយាយ ហើយគិតវិភាគក្នុងចិត្តថាអតិថិជនត្រូវការអ្វីឱ្យប្រាកដ ដោយរួមបញ្ចូលនូវការសួរសំនួរ និងការពន្យល់ត្រឡប់ទៅកាន់អតិថិជនវិញដើម្បីបញ្ជាក់ពីភាពត្រូវការរបស់អតិថិជន។ បន្ថែមពីនេះ អ្នកក៏ត្រូវបង្ហាញពីសកម្មភាពនៃការស្ដាប់ដោយយកចិត្តទុកចិត្តទាំងការនិយាយសន្ទនាត្រឡប់ទៅកាន់អតិថិជន និងកាយវិការ។
ឧទាហរណ៍៖ នៅពេលអតិថិជនចូលមកកាន់ហាងរបស់អ្នក ហើយអតិថិជននិយាយប្រាប់អ្នកពីអ្វីដែលគាត់ចង់បាន ដូច្នេះអ្នកត្រូវស្ដាប់ថាគាត់ចង់បានអ្វីខ្លះ? ប្រើប្រាស់សម្រាប់អ្វី (ករណីផលិតផលរបស់អ្នកមានច្រើនជម្រើស ដើម្បីងាយស្រួលណែនាំបន្ថែម)? បន្ទាប់មកអ្នកអាចនិយាយឡើងវិញ ដើម្បីបញ្ជាក់ពីការចង់បាន ហើយស្វែងរកជូនគាត់ និងបើមានអ្វីណែនាំបន្ថែមអាចណែនាំទៅកាន់គាត់។ ហើយនេះជាសកម្មភាពបង្ហាញពីការស្ដាប់មួយ ដើម្បីធ្វើឱ្យអតិថិជនមានអារម្មណ៍ថាសប្បាយចិត្ត ពីព្រោះយើងអាចដឹងពីតម្រូវការរបស់ពួកគេ ហើយថែមទាំងបានផ្ដល់នូវអ្វីដែលយើងចង់បាន ព្រមទាំងបានណែនាំផលិតផលស្រដៀងនោះទៅកាន់គាត់ទៀត ដែលធ្វើឱ្យគាត់កាន់តែពេញចិត្ត ហើយអាចសួរនាំទិញបន្ថែមក៏មាន។
3. រក្សាភាពវិជ្ជមាន និងអត់ធ្មត់
នៅក្នុងចំណុចនេះ ចង់ឱ្យក្រុមអ្នកលក់ និងអ្នកផ្ដល់សេវាកម្មអតិថិជនទាំងអស់ត្រូវតែចេះរក្សាភាពវិជ្ជមាន ក៏ដូចជាមានភាពអត់ធ្មត់ជានិច្ច ទោះបីជាជួបស្ថានភាពជាមួយអតិថិជនបែបណាក៏ដោយ។ ក្នុងនាមជាអ្នកលក់ និងអ្នកផ្ដល់សេវាកម្មអតិថិជន តែងតែជួបជាមួយនឹងបញ្ហាអតិថិជនខកចិត្តអ្វីមួយជាមួយក្រុម ហើយបង្ហាញភាពខឹងមកកាន់អ្នក ដូច្នេះអ្នកត្រូវតែអត់ធ្មត់ និងព្យាយាមប្រើភាសាវិជ្ជមានជានិច្ច ដោយមិនឈ្លោះតបតរជាមួយអតិថិជនវិញឡើយ។ បន្ថែមពីនេះ អ្នកខ្លួនឯងក៏អាចហត់នឿជាមួយនឹងការងារ និងអាចមានភាពស្មុគស្មាញរឿងជីវិតផ្ទាល់ខ្លួន ដូច្នេះអ្នកក៏ត្រូវចេះគ្រប់គ្រងវាផងដែរ ដើម្បីចៀសវាងអ្នកជះកំហឹង ឬបង្ហាញសកម្មភាពណាមួយមិនគប្បីជាមួយអតិថិជន។
ហេតុអ្វីការរក្សាភាពវិជ្ជមាន និងមានភាពអត់ធ្មត់ ជាសកម្មភាពនៃការយល់ចិត្តអតិថិជនដែរ? ពីព្រោះបើអ្នកបង្ហាញភាពអវិជ្ជមាន ឬគ្មានភាពអត់ធ្មត់ជាមួយនឹងស្ថានការណ៍មិនល្អជាមួយអតិថិជនទេ នោះអ្នកនឹងអាចបង្កបញ្ហាជាមួយអតិថិជនកាន់តែខ្លាំង។ ដូច្នេះមានតែអ្នកត្រូវតែចេះរក្សាភាពវិជ្ជមាន និងអត់ធ្មត់ទេ ទើបអ្នកអាចគ្រប់គ្រងស្ថានការណ៍មិនល្អទាំងឡាយបាន និងចេះរបៀបក្នុងការប្រាស្រ័យទាក់ទងជាមួយអតិថិជនបានល្អ ព្រមទាំងព្យាយាមធ្វើអ្វីឱ្យអតិថិជនពេញចិត្ត និងទទួលបានអ្វីដែលពួកគេត្រូវការ។
4. តែងតែផ្ដល់ការគោរពជានិច្ច
ការគោរពជាអ្វីដែលអតិថិជនគ្រប់គ្នាចង់ទទួលបាន មិនថាពួកគេជាអ្នកមាន ឬមានជីវភាពកម្រិតណាក៏ដោយ ដូច្នេះអ្នកត្រូវតែបង្ហាញការយល់ចិត្ត តាមរយៈការផ្ដល់តម្លៃ និងការគោរពអតិថិជន ដូចជាការចេះសួរនាំអំពីឈ្មោះ ស្វាគមន៍អតិថិជនដោយប្រើឈ្មោះរបស់ពួកគេ និងបង្ហាញពីសកម្មភាពយកចិត្តទុកដាក់នានា ដោយមិនបង្ហាញពីសកម្មភាពណាធ្វើឱ្យអតិថិជនមានអារម្មណ៍ពួកគេមិនត្រូវបានបុគ្គលិកនៅទីនោះមិនបានឱ្យតម្លៃ ឬផ្ដល់ការគោរពឡើយ។
ឧទាហរណ៍ពីសកម្មភាពដែលមិនបានគោរពឱ្យតម្លៃអតិថិជន៖ អតិថិជនចូលមកកាន់ហាង បែរជាគ្មាននរណាមកស្វាគមន៍ ឬសួរនាំអ្វីឡើយ បន្ថែមពីនេះឱ្យអតិថិជនឈររងចាំដោយមិនបានបង្ហាញពីសកម្មភាពយកចិត្តទុកដាក់ជាមួយគាត់ឡើយ។ ហើយនេះ ជាសកម្មភាពមិនបានគោរពឱ្យតម្លៃអតិថិជន ហើយវាក៏ជាការបង្ហាញនូវការមិនបានយល់ចិត្តអតិថិជនផងដែរ ដូច្នេះអតិថិជនចាប់ផ្ដើមម៉ួម៉ៅ ឬដើរចេញពីហាងក៏មានដែរ។
