មហាសេដ្ឋីស្ទើរតែច្រើនជាង៩០%នៅលើពិភពលោកនេះ គឺកើតចេញពីអ្នកវិនិយោគលើវិស័យអចលនវត្ថុ។ នៅប្រទេសកម្ពុជាក៏មិនខុសគ្នាដែរ អ្នកមានភាគច្រើនគឺកើតចេញពីការទិញលក់អចលនទ្រព្យ ឬប្រឡូកនៅក្នុងវិស័យនេះ។ តើធ្វើដូចម្តេចដើម្បីអាចប្រឡូកចូលជាអ្នកវិនិយោគនៅក្នុងវិស័យនេះបាន? លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុន Century 21 Mekongបានប្រាប់វិធី៣យ៉ាងសម្រាប់គ្រប់គ្នាអាចក្លាយជាអ្នកវិនិយោគវិស័យអចលនទ្រព្យបាន។
១. ការវិនិយោគដោយខ្លួនឯង
យើងអាចប្រឡូកក្នុងវិស័យនេះជាលក្ខណៈឯកជនបានដោយធ្វើការទិញលក់អចលនវត្ថុដោយខ្លួនឯង។ ប៉ុន្តែវិធីនេះទាមទារឱ្យយើងមានចំណេះដឹង និងចំណាយពេលច្រើនស្វែងយល់ពីវិស័យនេះជាមុនសិនដើម្បីចៀសវាងហានិភ័យនានា និងបង្កើនអត្រាជោគជ័យលើការវិនិយោគ។
២. ធ្វើការវិនិយោគជាក្រុម
នេះគឺជាវិធីដ៏ពេញនិយមមួយ ដោយយើងធ្វើការស្វែងរកអ្នកដែលយល់ចិត្តគ្នា ទុកចិត្តគ្នា និងស្គាល់ចំណុចខ្លាំងគ្នាច្បាស់ ហើយសហការគ្នាលើការវិនិយោគរួម។ ការធ្វើដូចនេះ គឺយើងអាចប្រមូលទុនបានច្រើនដែលផ្តល់ភាពងាយស្រួលក្នុងការវិនិយោគអចលនវត្ថុបានច្រើនកន្លែងជាងការធ្វើតែម្នាក់ឯង។ ប៉ុន្តែការវិនិយោគរួមនេះ ទាមទារឱ្យមានការចងកិច្ចព្រមព្រៀងឱ្យបានល្អរវាងសមាជិកក្រុម ដើម្បីការពារជម្លោះ ឬ ហានិភ័យនានា។
៣. ការវិនិយោគជាមួយស្ថាប័នធំៗ
ប្រសិនបើអ្នកមិនមានបទពិសោធន៍ ចំណេះដឹង ឬមិនមានស្គាល់អ្នកណាម្នាក់ដែលអាចទុកចិត្តបានក្នុងការវិនិយោគលើអចលនវត្ថុនេះ ជម្រើសមួយទៀតដែលអ្នកអាចជ្រើសរើសបានគឺធ្វើការវិនិយោគ ឬដាក់ទុនជាមួយនឹងស្ថាប័នដែលមានជំនាញលើការវិនិយោគដូចជាក្រុមហ៊ុនគ្រប់គ្រងមូលនិធីវិនិយោគអចលនវត្ថុណាដែលអ្នកទុកចិត្ត ព្រោះថា ក្រុមហ៊ុនទាំងនោះមានជំនាញក្នុងការប្រើប្រាស់មូលនិធិនោះដើម្បីវិនិយោគដើម្បីរកផលចំណេញឱ្យអតិថិជន ដោយគ្រាន់តែកាត់សេវាមួយចំនួន និងកម្រៃជើងសារប៉ុណ្ណោះ។
តើក្នុងចំណោវិធីទាំង៣ខាងលើនេះ អ្នកនឹងចង់សាកល្បងតាមវិធីណា?
