ការសម្រេចគោលដៅធំតម្រូវឲ្យមានការតាំងចិត្ត ប៉ុន្តែកម្លាំងចិត្តតែងតែធ្លាក់ចុះនៅពាក់កណ្តាលផ្លូវ។ អាថ៌កំបាំងនៃការបន្តទៅមុខគឺស្ថិតនៅលើការទទួលស្គាល់និងការអបអរភាពជោគជ័យតូចៗរបស់អ្នក។ ការធ្វើបែបនេះគឺជាឥន្ធនៈផ្លូវចិត្តដែលជួយអ្នកឲ្យបន្តដំណើរទៅមុខជានិច្ច។
ក. 10 វិធីសាស្រ្តអបអរភាពជោគជ័យតូចៗ
1.សរសេរក្នុងកំណត់ហេតុ: ចំណាយពេល ៥ នាទីដើម្បីសរសេររឿងរ៉ាវជោគជ័យនោះ។ ការកត់ត្រាធ្វើឲ្យអារម្មណ៍ជោគជ័យមានភាពជាក់ស្តែង និងជំរុញឱ្យអ្នកកាន់តែមានកម្លាំងចិត្ត។
2. សម្រាកឲ្យបាន ១០ នាទី: ងើបឈរ ចេញទៅខាងក្រៅ ឬដកដង្ហើមវែងៗ។ ការសម្រាកខ្លីៗផ្តល់រង្វាន់ដល់ខួរក្បាលរបស់អ្នក។
3. ទិញកាហ្វេដែលអ្នកចូលចិត្ត: ផ្តល់រង្វាន់តូចមួយដល់ខ្លួនឯងដោយញ៉ាំអាហារ ឬភេសជ្ជៈដែលអ្នកចូលចិត្ត។
4. និយាយប្រាប់នរណាម្នាក់: ទូរស័ព្ទទៅមិត្តភក្តិ ឬក្រុមគ្រួសារដើម្បីចែករំលែកដំណឹងល្អ។ ការទទួលស្គាល់ពីអ្នកដទៃអាចជំរុញទឹកចិត្តអ្នកបន្ថែម។
5. គូសសញ្ញាធីកលើផែនការ: មើលឃើញការងារដែលបានសម្រេចនៅក្នុងបញ្ជីការងារត្រូវធ្វើ គឺជាការលើកទឹកចិត្តដោយមើលឃើញ។
6. ស្តាប់តន្ត្រីលើកទឹកចិត្ត: បើកចម្រៀងដែលអ្នកចូលចិត្តដើម្បីបង្កើនថាមពលនិងអារម្មណ៍វិជ្ជមាន។
7. រៀបចំតុការងារ: ការសម្អាតនិងរៀបចំតុគឺជាសកម្មភាពតូចមួយដែលផ្តល់នូវអារម្មណ៍ថាអ្នកបានសម្រេចនូវរឿងមួយ និងត្រៀមសម្រេចធ្វើកិច្ចការបន្តបន្ទាប់។
8. បន្តរៀនសូត្រ: អនុញ្ញាតឲ្យខ្លួនឯងចំណាយពេលខ្លីៗ (៣០ នាទី) លើការរៀនអ្វីថ្មីដែលមិនទាក់ទងនឹងការងារ តែទាក់ទងនឹងជំនាញ ឬចំណេះដឹង ដើម្បីពង្រឹងសមត្ថភាពបន្ថែម។
9. ផ្តល់រង្វាន់ផ្ទាល់ខ្លួន: ទិញសម្ភារៈណាមួយ ឬវត្ថុដែលអ្នកចង់បានយូរហើយ។
10. ផ្តាច់ខ្លួនពីទូរស័ព្ទមួយម៉ោង: ផ្តល់រង្វាន់ដល់ខ្លួនឯងដោយផ្តាច់ខ្លួនពីបច្ចេកវិទ្យាទាំងស្រុងដើម្បីស្តារសុខភាពផ្លូវចិត្ត។
ខ. ហេតុអ្វីបានជាអ្នកគួរធ្វើវា?
ការអបអរភាពជោគជ័យតូចៗមិនមែនជាការខ្ជះខ្ជាយពេលវេលានោះទេ។ តាមចិត្តសាស្ត្រ វាមានអត្ថប្រយោជន៍សំខាន់ៗ៖
- ជំរុញកម្លាំងចិត្ត (Dopamine Release): នៅពេលអ្នកអបអរជោគជ័យ ខួរក្បាលរបស់អ្នកបញ្ចេញសារធាតុ Dopamine ដែលជាសារធាតុនៃភាពរីករាយ។ សារធាតុនេះជំរុញឲ្យអ្នកចង់ធ្វើសកម្មភាពនោះម្តងទៀត។
- កសាងទម្លាប់រឹងមាំ: ការផ្តល់រង្វាន់ដល់ទម្លាប់ល្អ (ដូចជាការបញ្ចប់ការងារ) ជួយពង្រឹងទម្លាប់នោះឲ្យនៅជាប់លាប់ ដែលធ្វើឲ្យការបន្តដំណើរឆ្ពោះទៅរកគោលដៅធំក្លាយជាការងាយស្រួល។
- ការពារភាពអស់កម្លាំង: ការផ្តោតតែលើគោលដៅចុងក្រោយអាចនាំឲ្យមានភាពអស់សង្ឃឹម។ ដូចនេះការអបអរនូវភាពជោគជ័យតូចៗជួយឲ្យអ្នកមានអារម្មណ៍ថា វឌ្ឍនភាពកំពុងដំណើរការ ដែលការពារអ្នកពីភាពតានតឹងនិងអស់កម្លាំងផ្លូវចិត្ត (Burnout)។
ជារួម ការជោគជ័យធំត្រូវបានកសាងឡើងដោយការរួមបញ្ចូលគ្នានៃជោគជ័យតូចៗជាច្រើន។ ដូចនេះអ្នកត្រូវអបអររាល់ជំហានដែលអ្នកបានធ្វើ!
