នៅក្នុងទីផ្សារដែលមានការប្រកួតប្រជែងខ្ពស់ សុទ្ធតែមានអាជីវកម្មជាច្រើនកំពុងប្រកួតគ្នាដើម្បីទាក់ទាញអតិថិជន។ ប៉ុន្តែអាជីវកម្មដែលជោគជ័យមិនមែនជាអាជីវកម្មដែលមានចំណាយថវិកាច្រើនលើទីផ្សារនោះទេ តែជាអាជីវកម្មដែលយល់និងផ្តល់តម្លៃដល់អតិថិជន។ ការផ្តោតលើអតិថិជនគឺជាយុទ្ធសាស្ត្រទីផ្សារដ៏ល្អបំផុត។
ខាងក្រោមនេះជា ៤ ចំណុចដែលបង្ហាញពីមូលហេតុ៖
១. បង្កើតផលិតផលដែលអតិថិជនពិតជាត្រូវការ
អាជីវកម្មដែលស្តាប់អតិថិជន តែងតែបង្កើតផលិតផលដែលដោះស្រាយបញ្ហាពិតប្រាកដ។ នៅពេលដែលផលិតផលរបស់អ្នកពិតជាអាចបំពេញតម្រូវការរបស់អតិថិជន វានឹងលក់ដាច់ដោយខ្លួនឯង។ នេះគឺជាការផ្សព្វផ្សាយដ៏ល្អបំផុត ព្រោះអតិថិជននឹងស្វែងរកអ្នកដោយខ្លួនឯង។
២. ទទួលបានភាពស្មោះត្រង់និងការនិយាយតៗគ្នា
បទពិសោធន៍ដ៏ល្អរបស់អតិថិជនគឺមិនអាចបំភ្លេចបាន។ នៅពេលដែលអតិថិជនមានអារម្មណ៍ពេញចិត្តលើសពីការរំពឹងទុក ពួកគេនឹងក្លាយជាអតិថិជនស្មោះត្រង់ និងជួយផ្សព្វផ្សាយអាជីវកម្មរបស់អ្នកទៅអ្នកដែលគេបានស្គាល់ដោយស្ម័គ្រចិត្ត។ ការណែនាំតៗគ្នាពីមាត់មួយទៅមាត់មួយ គឺជាវិធីសាស្ត្រទីផ្សារដ៏មានឥទ្ធិពល និងចំណាយតិចបំផុត។
៣. កសាងទំនុកចិត្តនិងកេរ្តិ៍ឈ្មោះ
អាជីវកម្មដែលផ្តោតលើអតិថិជន តែងតែមានភាពស្មោះត្រង់និងតម្លាភាព។ ការដោះស្រាយបញ្ហាអតិថិជនដោយយកចិត្តទុកដាក់ និងការរក្សាពាក្យសន្យា ជួយកសាងទំនុកចិត្តនិងកេរ្តិ៍ឈ្មោះល្អ។ នៅក្នុងយុគសម័យអនឡាញ កេរ្តិ៍ឈ្មោះល្អគឺជាទ្រព្យសម្បត្តិដ៏មានតម្លៃបំផុតរបស់អាជីវកម្ម។
៤. បង្កើនការលក់និងចំណេញ
នៅពេលដែលអ្នកយកចិត្តទុកដាក់លើអតិថិជន អ្នកនឹងដឹងច្បាស់ពីអ្វីដែលពួកគេត្រូវការ ហើយអាចលក់បានច្រើនជាងមុន។ នៅពេលអតិថិជនមានអារម្មណ៍ពេញចិត្ត ពួកគេនឹងក្លាយជាអតិថិជនស្មោះត្រង់ដែលត្រឡប់មកទិញទំនិញឬសេវាកម្មរបស់អ្នកម្តងហើយម្តងទៀត។ ការធ្វើបែបនេះមិនត្រឹមតែជួយបង្កើនប្រាក់ចំណេញសរុបប៉ុណ្ណោះទេ តែវាក៏ជួយកាត់បន្ថយការចំណាយក្នុងការស្វែងរកអតិថិជនថ្មីផងដែរ ព្រោះអតិថិជនចាស់ៗជាអ្នកណែនាំអ្នកថ្មីដោយខ្លួនឯង។
សរុបមក ការផ្តោតលើអតិថិជនមិនមែនគ្រាន់តែជាយុទ្ធសាស្ត្រទីផ្សារប៉ុណ្ណោះទេ តែជាទស្សនវិជ្ជានៃអាជីវកម្ម។ ការដាក់អតិថិជនជាចំណុចកណ្តាល គឺជាគន្លឹះដើម្បីកសាងអាជីវកម្មមួយដែលមិនត្រឹមតែជោគជ័យនោះទេ តែថែមទាំងមានអត្ថន័យទៀតផង។
