ការសម្រេចចិត្តដ៏ត្រឹមត្រូវមិនមែនកើតឡើងដោយចៃដន្យនោះទេ តែវាកើតចេញពីដំណើរការនៃការសួរសំណួរ។ មុននឹងអ្នកបោះជំហានទៅមុខក្នុងអាជីព អាជីវកម្ម ឬជីវិតផ្ទាល់ខ្លួន ដូចនេះសំណួរទាំង ៥ នេះនឹងជួយអ្នកឲ្យវាយតម្លៃពីជម្រើសរបស់អ្នកដោយភាពឆ្លាតវៃ។
១. តើការសម្រេចចិត្តនេះស្របតាមតម្លៃស្នូលរបស់ខ្ញុំដែរឬទេ?
ការសម្រេចចិត្តដែលនាំឲ្យមានភាពជោគជ័យយូរអង្វែង គឺតែងតែជាការសម្រេចចិត្តដែលស្របតាមតម្លៃស្នូលរបស់អ្នក (ដូចជា ភាពស្មោះត្រង់ គ្រួសារ ឬសុខភាព)។ ប្រសិនបើជម្រើសមួយបំពានលើតម្លៃស្នូលរបស់អ្នក អ្នកអាចនឹងទទួលបានផលចំណេញរយៈពេលខ្លី ប៉ុន្តែមានការសោកស្តាយធំធេងនៅពេលក្រោយ។
២. តើលទ្ធផលអាក្រក់បំផុតដែលអាចកើតឡើងមានអ្វីខ្លះ?
ការសួរសំណួរនេះមិនមែនដើម្បីឲ្យអ្នកភ័យខ្លាចនោះទេ ប៉ុន្តែដើម្បីឲ្យអ្នកត្រៀមខ្លួន។ ត្រូវវិភាគពីស្ថានភាពអាក្រក់បំផុតដែលអាចកើតឡើង ហើយកំណត់ថា តើអ្នកអាចទទួលយកហានិភ័យនោះបានដែរឬទេ? ប្រសិនបើអ្នកអាចរស់នៅជាមួយលទ្ធផលអាក្រក់បំផុតនោះ អ្នកអាចបន្តទៅមុខដោយមានទំនុកចិត្ត។
៣. តើខ្ញុំមានទិន្នន័យគ្រប់គ្រាន់ហើយឬនៅ?
ការសម្រេចចិត្តដោយផ្អែកលើអារម្មណ៍ ឬសេចក្តីសង្ឃឹមសុទ្ធសាធ គឺជារឿងគ្រោះថ្នាក់។ អ្នកត្រូវដឹងថាតើអ្នកបានស្រាវជ្រាវគ្រប់គ្រាន់ហើយឬនៅ? តើមានព័ត៌មានសំខាន់អ្វីខ្លះដែលអ្នកមិនទាន់ដឹងច្បាស់?
របៀបអនុវត្ត: កំណត់ចំណុចដែលអ្នកមិនទាន់ច្បាស់ ហើយចំណាយពេលស្វែងរកព័ត៌មានជាក់ស្តែងមុននឹងធ្វើការសម្រេចចិត្ត។
៤. តើខ្ញុំនឹងមានអារម្មណ៍យ៉ាងណាចំពោះរឿងនេះក្នុងរយៈពេល ១ ឆ្នាំទៀត?
សំណួរនេះជួយអ្នកឲ្យងាកចេញពីការផ្តោតលើការពេញចិត្តភ្លាមៗ ហើយចាប់ផ្តើមគិតអំពីផលវិបាករយៈពេលវែង។ ការសម្រេចចិត្តដែលល្អ គឺមិនមែនជាការសម្រេចចិត្តដែលងាយស្រួលបំផុតនៅពេលនេះនោះទេ តែជាការសម្រេចចិត្តដែលនាំមកនូវលទ្ធផលវិជ្ជមាននាពេលអនាគតផងដែរ។
៥. តើខ្ញុំមានមនុស្សដែលអាចឲ្យយោបល់ផ្ទុយពីខ្ញុំដែរឬទេ?
ការពិគ្រោះយោបល់តែជាមួយមនុស្សដែលគាំទ្រគំនិតរបស់អ្នក អាចធ្វើឲ្យអ្នកខ្វះការប្រុងប្រយ័ត្ន។ ដូចនេះអ្នកត្រូវការអ្នកណែនាំ ឬមនុស្សម្នាក់ដែលអាចដើរតួជាអ្នកវិភាគទាំងភាពវិជ្ជមាន និងអវិជ្ជមាន ដើម្បីចង្អុលបង្ហាញពីចំណុចខ្សោយនៅក្នុងផែនការរបស់អ្នក។ ការពិគ្រោះយោបល់បែបនេះ ជួយពង្រឹងការសម្រេចចិត្តរបស់អ្នក។
សរុបមក ការអនុវត្តសំណួរទាំង ៥ នេះ នឹងជួយអ្នកឲ្យមានការគ្រប់គ្រងពេញលេញលើដំណើរជីវិតរបស់អ្នក ហើយធ្វើការសម្រេចចិត្តប្រកបដោយប្រាជ្ញា។
