គ្រាលំបាកគឺជាផ្នែកមួយដែលជៀសមិនផុតពីជីវិត។ វាអាចបណ្ដាលមកពីបញ្ហាហិរញ្ញវត្ថុ ទំនាក់ទំនង សុខភាព ឬការបាត់បង់មនុស្សជាទីស្រលាញ់។ ទោះជាយ៉ាងណាក៏ដោយ អ្នកអាចរៀនពីរបៀបឆ្លងកាត់វាដោយភាពរឹងមាំ និងភាពក្លាហាន។
ខាងក្រោមនេះគឺជា ៥ វិធីដែលនឹងជួយអ្នកឱ្យឆ្លងផុតគ្រាលំបាកបំផុតក្នុងជីវិត៖
១. ទទួលយកអារម្មណ៍របស់អ្នក
ពេលជួបគ្រាលំបាក វាជារឿងធម្មតាទេដែលអ្នកមានអារម្មណ៍ខឹង សោកសៅ ឬភ័យខ្លាច។ ប៉ុន្តែកុំព្យាយាមលាក់បាំង ឬបដិសេធអារម្មណ៍ទាំងនោះ ចូរអនុញ្ញាតឱ្យខ្លួនឯងមានអារម្មណ៍ ហើយទទួលស្គាល់ថាវាជាផ្នែកមួយនៃដំណើរការ។ ការធ្វើបែបនេះអាចជួយអ្នកឱ្យយល់ពីស្ថានភាព និងចាប់ផ្តើមដោះស្រាយវាបាន។
២. ផ្តោតលើអ្វីដែលអ្នកអាចគ្រប់គ្រងបាន
នៅពេលមានបញ្ហាធ្ងន់ធ្ងរ យើងច្រើនតែគិតពីអ្វីដែលយើងមិនអាចផ្លាស់ប្ដូរបាន។ ជំនួសមកវិញ សូមផ្តោតលើអ្វីដែលអ្នកអាចធ្វើសកម្មភាពបាន។ ឧទាហរណ៍៖ បើអ្នកបាត់បង់ការងារ កុំគិតច្រើនពេកពីស្ថានភាពសេដ្ឋកិច្ច។ តែត្រូវផ្តោតលើការធ្វើបច្ចុប្បន្នភាពប្រវត្តិរូបសង្ខេប (CV) និងការស្វែងរកការងារថ្មី។
៣. ថែរក្សាសុខភាពកាយ និងចិត្តរបស់អ្នក
នៅពេលមានវិបត្តិ មនុស្សជាច្រើនតែងតែមើលរំលងសុខភាពរបស់ខ្លួន។ កាលណាអ្នកមានសុខភាពផ្លូវកាយ និងផ្លូវចិត្តល្អ នឹងជួយឱ្យចិត្តអ្នករឹងមាំ មិនតានតឹងខ្លាំង ហើយមានថាមពលគ្រប់គ្រាន់ដើម្បីប្រឈមមុខនឹងបញ្ហាទាំងនោះ។
៤. កុំខ្លាចក្នុងការសុំជំនួយ
ការសុំជំនួយ មិនមែនជាសញ្ញានៃភាពទន់ខ្សោយនោះទេ។ ផ្ទុយទៅវិញ វាជាសញ្ញានៃភាពវៃឆ្លាត។ កុំស្ទាក់ស្ទើរក្នុងការសុំជំនួយពីអ្នកដទៃ ដូចជាមិត្តភក្តិ ក្រុមគ្រួសារ ឬអ្នកជំនាញ។ ពួកគេអាចផ្តល់នូវការគាំទ្រ ជំនួយ ឬដំបូន្មានដែលអ្នកត្រូវការដើម្បីឆ្លងផុតពីស្ថានភាពលំបាក។
៥. រក្សាក្តីសង្ឃឹម និងរៀនពីបទពិសោធន៍
គ្រាលំបាកមិនស្ថិតស្ថេរជារៀងរហូតនោះទេ។ ត្រូវ រក្សាក្តីសង្ឃឹម និងជឿជាក់ថាអ្វីៗនឹងល្អប្រសើរឡើងវិញ។ រាល់ការលំបាកសុទ្ធតែជាមេរៀនដែលតម្រូវឱ្យអ្នកស្វែងយល់ និងប្រើប្រាស់បទពិសោធន៍នោះដើម្បីធ្វើឱ្យខ្លួនអ្នកកាន់តែរឹងមាំ និងមានភាពឆ្លាតវៃជាងមុន។
សរុបមក ការឆ្លងផុតគ្រាលំបាកទាមទារភាពអត់ធ្មត់ និងការប្តេជ្ញាចិត្ត។ ការអនុវត្តវិធីសាស្រ្តទាំងនេះអាចជួយអ្នកឱ្យមានថាមពល និងកម្លាំងចិត្តដើម្បីបន្តដំណើរទៅមុខទៀត។
