ជាទូទៅការចេញរកស៊ី មិនមែនមានតែលុយអាចរកស៊ីបានជោគជ័យនោះទេ ប៉ុន្តែវាតម្រូវឱ្យមានសមត្ថភាព ចំណេះដឹង និងជំនាញ រួមបញ្ចូលគ្នាទើបអាចសម្រេចបានលទ្ធផលល្អ។ តើជំនាញអ្វីចាំបាច់សម្រាប់បើអាជីវកម្មដំបូង?
១. ជំនាញហិរញ្ញវត្ថុ៖ នៅក្នុងជំនាញនេះ វាពិតជាអាចជួយអ្នកបានច្រើនទាក់ទងទៅនឹងការរៀបចំផែនការ តាមដាន និងគ្រប់គ្រងលំហូរសាច់ប្រាក់ ដើម្បីអាចដំណើរបាននៅក្នុងអាជីវកម្ម។ លើសពីនេះទៅទៀត វាជួយឱ្យរក្សាបាននៅចរន្តហិរញ្ញវត្ថុដើម្បីឱ្យអាជីវកម្មមានសមតុល្យគ្នារវាងចំណូល-ចំណាយ។
២. ជំនាញលក់៖ ជាជំនាញមួយដែលចាំបាច់នៅការធ្វើអាជីវកម្ម ព្រោះវាជួយឱ្យអ្នកយល់ដឹងពាក់ព័ន្ធទៅនឹងចំណង់ចិត្តរបស់អ្នកប្រើប្រាស់ ក៏ដូចជាការចរចាជាមួយអតិថិជនប្រកបដោយប្រសិទ្ធភាពជាដើម។ បន្ថែមពីលើនេះទៀត ជំនាញនេះក៏ជួយឱ្យអ្នកអាចគ្រប់គ្រងដំណើរការលក់ និងបិទបញ្ចីនៃការលក់បានយ៉ាងល្អផងដែរ។
៣. ជំនាញទីផ្សារឌីជីថល៖ តាមការរីកចម្រើនលើវិស័យបច្ចេកវិទ្យានាពេលបច្ចុប្បន្ន ការធ្វើទីផ្សារតាមបែបឌីជីថល គឺជាមធ្យមមួយដែលពេញនិយម និងមានសារៈប្រយោជន៍នៅក្នុងការជួយជម្រុញឱ្យការផ្សព្វផ្សាយរបស់អាជីវកម្ម អាចដំណើរការទៅបានល្អ និងមានប្រសិទ្ធភាព។ ហើយមុននឹងឈានជើងចូលទៅក្នុងពិភពនៃទីផ្សារឌីជីថល អ្នកត្រូវប្រាកដថាអ្នកមានការយល់ដឹងអំពីមូលដ្ឋានទីផ្សារផងដែរ។
៤. ជំនាញទំនាក់ទំនងប្រកបដោយប្រសិទ្ធភាព៖ ជាជំនាញមួយដែលមិនត្រូវបានបង្រៀននៅក្នុងសាលានោះទេ ប៉ុន្តែវាគឺជាជំនាញដែលចំាបាច់នៅការប្រកបអាជីវកម្ម។ ដូច្នេះការប្រាស្រ័យទាក់ទងប្រកបដោយប្រសិទ្ធភាពគឺវាជួយកសាងទំនុកចិត្ត ជឿជាក់ពីអតិថិជនផងដែរ។
