ការគិតវិជ្ជមាន និងអវិជ្ជមានបានជះឥទ្ធិពលយ៉ាងខ្លាំងដល់ជីវិតរបស់អ្នក។ ការគិតវិជ្ជមានជួយអ្នកឱ្យមានកម្លាំងចិត្ត និងភាពអត់ធ្មត់ក្នុងគ្រាលំបាក។ ការគិតវិជ្ជមានប្រៀបបានដូចជាថាមពលនៃកម្លាំងចិត្ត ឧទាហរណ៍នៅពេលដែលមនុស្សម្នាក់មានការគិតវិជ្ជមាន មានពេលមួយគេបានជួបការបរាជ័យ ហើយការគិតវិជ្ជមានរបស់គេបានធ្វើឱ្យគេយកភាពបរាជ័យនោះមកធ្វើជាមេរៀន និងបពិសោធន៍ដោយមិនមានការបាក់ទឹកចិត្តនោះទេ។ ថែមទាំងជាកម្លាំងចិត្តដែលជំរុញខ្លួនគេឱ្យមានការខិតខំបន្ថែមឡើងទៀត។ ការមានភាពវិជ្ជមាននៅជាប់ខ្លួនពិតជាមានសារៈសំខាន់ខ្លាំងណាស់ ហើយវាបានធ្វើឱ្យអ្នកមានទំនុកចិត្ត និងភាពជឿជាក់លើខ្លួនឯង។ល។
ទោះជាយ៉ាងណាក៏ដោយ ខ្ញុំជឿថាការគិតវិជ្ជមានមិនមែនមានរហូតនោះទេ ប្រាកដជាអ្នកធ្លាប់មានការគិតអវិជ្ជមានខ្លះហើយ។ប៉ុន្តែអ្នកត្រូវគិតវិជ្ជមានឱ្យបានច្រើន និងព្យាយាមកាត់បន្ថយការគិតអវិជ្ជមាន ពីព្រោះថាការគិតអវិជ្ជមានពិតជាជះឥទ្ធិពលមកដល់ជីវិតអ្នកខ្លាំងណាស់។ ជួនកាលវានាំឱ្យអ្នកមានភាពសង្ស័យលើខ្លួនឯង និងមានភាពភ័យខ្លាច ដែលរារាំងឱ្យអ្នកមិនហ៊ានធ្វើរឿងអ្វីថ្មីដែលធ្វើឱ្យអ្នកកើននូវភាពរីកចម្រើន ឬពេលខ្លះថែមទាំងធ្វើឱ្យអ្នកបាត់បង់នូវឱកាសមួយដែលអាចនាំអ្នកទៅរកភាពរីកចម្រើន ពីព្រោះថាការគិតអវិជ្ជមានបានធ្វើឱ្យអ្នកគិតស្រមៃនូវលទ្ធផលមិនល្អ ដូចជាអ្នកបានគិតថាបើសិនអ្នកធ្វើហើយបរាជ័យ ទាំងដែលអ្នកមិនទាន់ចាប់ផ្តើមធ្វើវាផង ហើយថែមទាំងមានភាពភ័យខ្លាច នឹងមិនហ៊ានធ្វើរឿងថ្នីៗដែលអាចនាំឱ្យអ្នករីកចម្រើន ហើយបើសិនអ្នកនៅតែបន្តការគិតអវិជ្ជមានច្រើនជាងការគិតវិជ្ជមាននោះអ្នកនឹងមិនអាចរីកចម្រើនបាននោះទេ។
ដូចនេះអ្នកត្រូវព្យាយាមផ្លាស់ប្តូរការគិតរបស់អ្នកឡើងវិញ ដើម្បីឱ្យជីវិតអ្នកល្អប្រសើរ និងមិនសូវជួបបញ្ហាស្មុគស្មាញ។ ខ្ញុំដឹងថាការគិតវិជ្ជមានមិនបានធ្វើឱ្យអ្នកជៀសផុតពីបញ្ហាបានទេ ប៉ុន្តែវាបានធ្វើឱ្យអ្នកអាចរួចផុតពីបញ្ហាបានច្រើន និងជួយអ្នកឱ្យមានភាពអត់ធ្មត់បានកាន់តែច្រើន។
