ការចាប់ផ្ដើមអាជីវកម្មមិនមែនជារឿងងាយស្រួលដែលនរណាៗក៏អាចនឹកឃើញធ្វើក៏ធ្វើនោះទេ គឺវាទាមទារអ្នកឲ្យមានសមត្ថភាពគ្រប់គ្រាន់ក្នុងការគិត ការគ្រប់គ្រងពេលវេលា មានភាពអត់ធ្មត់ ឆ្លាតនិងអាចបត់បែនទៅតាមស្ថានភាព។ ហើយអ្នកក៏ត្រូវមានទំនួលខុសត្រូវច្រើនជាងមុនផងដែរទៅលើការងារមួយចំនួនដូចជា ការប្រកាសជ្រើសរើសបុគ្គលិក ការដឹកនាំក្រុម ចាត់ចែងការងារ ការរៀបចំគម្រោង ការសម្រេចចិត្ត ការគ្រប់គ្រងហិរញ្ញវត្ថុ និងការដោះស្រាយបញ្ហាជូនអតិថិជនជាដើម។
ដូចនេះខាងក្រោមនេះ គឺសុទ្ធសឹងតែជាចំណុចដែលអ្នកត្រូវដឹង ហើយក៏ត្រូវតែចេះដែរ មុនពេលចាប់ផ្ដើមអាជីវកម្មខ្លួនឯងដើម្បីអាចដឹកអាជីវកម្មឆ្ពោះទៅរកភាពជោគជ័យបានៈ
១. ចំណេះដឹងក្នុងការគ្រប់គ្រងហិរញ្ញវត្ថុ (Fiancial Management)
ជាដំបូងអ្នកត្រូវមានការយល់ដឹងឲ្យបានស៊ីជម្រៅពាក់ព័ន្ធជាមួយនឹងមូលដ្ឋានគ្រឹះក្នុងការរៀបចំចាត់ចែងហិរញ្ញវត្ថុរបស់ជាមុនសិន ដូចជាដឹងពីរបៀបក្នុងការចំណាយថវិកាក្នុងគម្រោងនីមួយៗ និងត្រូវចេះអំពីរបៀបគណនាចំណូលចំណាយ ដើម្បីអាចបង្កើនប្រាក់ចំណេញជាអតិបរមា និងកាត់បន្ថុយហានិភ័យដែលអាចនឹងកើតមានឡើងនៅពេលដែលអ្នកចាប់ផ្ដើមចេញរកស៊ីខ្លួនឯង។
២. ជំនាញក្នុងការវិភាគទិន្នន័យ (Data Analytics)
ជំនាញនេះមិនមែនតម្រូវឲ្យអ្នកធ្វើវាដោយខ្លួនឯង(បើចេះរឹតតែល្អ) ឬចេះដូចអ្នកឯកទេសតែម្ដងនោះទេ តែយ៉ាងហោចណាស់ អ្នកក៏គួរតែដឹងអំពីមូលដ្ឋានគ្រឹះនៃការវិភាគទិន្នន័យ ក៏ដូចជាអាចមើលយល់អំពីគំនូសតាង និងក្រាហ្វិចនេះដោយខ្លួនឯង និងអាចធ្វើការសម្រេចចិត្តបានល្អប្រសើរសម្រាប់អាជីវកម្មរបស់អ្នក។ ដូច្នេះអ្នកនឹងមានភាពងាយស្រួលដឹងអំពីស្ថានភាពអាជីវកម្មរបស់ យ៉ាងម៉េចៗខ្លះ នៅពេលដែលបុគ្គលិករបស់អ្នកយកទិន្នន័យដែលពាក់ព័ន្ធទៅនឹងអាជីវកម្មរបស់អ្នកទាំងមូលមកបង្ហាញអ្នក។
៣. ជំនាញក្នុងការធ្វើទីផ្សារ (Marketing)
ប្រសិនបើអ្នកមានចំណេះដឹងច្រើនពាក់ព័ន្ធជាមួយនឹងទីផ្សារច្រើន មានបទពិសោធន៍លើការងារផ្នែកនេះយូរឆ្នាំ និងដឹងអំពីទំនោរនៃអ្នកប្រើប្រាស់ នោះអ្នកប្រាកដជាអាចគិតឃើញនូវយុទ្ធសាស្ត្រថ្មីៗដែលគួរឲ្យចាប់អារម្មណ៍ក្នុងការផ្សព្វផ្សាយ អាចទាក់ទាញអតិថិជនឲ្យមកបេតីជាមួយនឹងផលិតផលរបស់អ្នក ជាពិសេសនោះគឺអាចធ្វើឲ្យកិត្តិនាមនៃម៉ាកយីហោរបស់អ្នកមានវត្តមាននៅលើទីផ្សារបានយូរជាមិនខាន។
៤. ជំនាញក្នុងការចរចារ (Negotiation)
ក្នុងនាមអ្នកជាម្ចាស់អាជីវកម្ម អ្នកត្រូវតែចេះអំពីរបៀបក្នុងការចរចារគ្នា ជាមួយនឹងដៃគូអាជីវកម្មរបស់អ្នក ដើម្បីអាចទទួលបានកញ្ចប់ថវិកាវិនិយោគបន្ថែមទៀត ក្រៅពីនេះជំនាញចរចានេះដែរ នឹងជួយអ្នកដោះស្រាយបញ្ហាពាក្យសម្ដីផ្សេងៗដែលអាចកើតមានឡើងរវាងក្រុមហ៊ុនអ្នកនិងអតិថិជន ឬក្រុមហ៊ុននិងបុគ្គលិកជាដើម។ ប្រសិនបើអ្នកពូកែទៅលើផ្នែកចរចារនេះ អ្នកនឹងទទួលបានលក្ខខណ្ឌដ៏សមប្រកបមួយ និងដំណោះស្រាយដ៏ល្អប្រសើរពីដៃគូអាជីវកម្ម ក៏ដូចជាអតិថិជនរបស់អ្នកផ្ទាល់។
៥. ជំនាញក្នុងការសរសេរ (Writing)
នៅពេលដែលអ្នកចាប់ផ្ដើមអាជីវកម្មដោយខ្លួនឯង អ្នកនឹងត្រូវសរសេរនូវគម្រោងស្នើរសុំ ត្រូវសរសេររបាយការណ៍ ក៏ដូចជាសរសេរអ៊ីម៊ែលជាច្រើន ដើម្បីផ្ញើរទៅកាន់ម្ចាស់ក្រុមហ៊ុនធំៗ ផ្ញើរទៅកាន់ដៃគូសហការ ក៏ដូចជាអតិថិជនរបស់អ្នក។ ដូចនេះប្រសិនបើអ្នកនៅស្ទើរត្រង់ការសរសេរនេះនៅឡើយទេ អ្នកគួរចាប់ផ្ដើមហ្វឹកហាត់សរសេរពីឥលូវនេះឲ្យហើយ។
៦. សមត្ថភាពក្នុងការគ្រប់គ្រងគម្រោង (Project Management)
មិនមែនអ្នកគ្រប់គ្រងគម្រោងទាំងអស់សុទ្ធតែជាសហគ្រិនទាំងអស់នោះទេ ប៉ុន្តែ គ្រប់សហគ្រិនទាំងអស់ត្រូវតែជាអ្នកគ្រប់គ្រងគម្រោង ប្រសិនបើពួកគេចង់ឲ្យអាជីវកម្មមានដំណើរការទៅមុខបានរលូន។
ជំនាញគ្រប់គ្រងគម្រោងនេះ អាចជួយស្ថាបនិក និងម្ចាស់អាជីវកម្មខ្នាតតូច និងមធ្យម ក្នុងការកំណត់គោលដៅ កំណត់យុទ្ធសាស្ត្រ រៀបចំផែនការ និងគូសបញ្ជាក់សកម្មភាពផ្សេងៗទៀតដែលត្រូវធ្វើ ហើយបន្ទាប់មកកំណត់អាទិភាពប្រចាំសប្តាហ៍ និងតាមដានសកម្មភាពរហូតដល់ការគម្រោងទទួលបានជោគជ័យ។
៧. សមត្ថភាពក្នុងការចាត់ចែងពេលវេលា (Time Management)
បញ្ហាចម្បងដែលសហគ្រិនថ្មីៗតែងតែប្រឈមមុខនោះគឺ កង្វះខាតពេលវេលា។ ដោយសារតែនៅពេលដែលអ្នកក្លាយខ្លួនទៅអ្នកម្ចាស់អាជីវកម្ម គឺអ្នកប្រាកដជាមានភាពមមាញឹកខ្លាំងមែនទែនទៅលើការគិតអំពីយុទ្ធសាស្ត្រ ក៏ដូចជាតិចនិកក្នុងការជម្រុញការលក់ឲ្យកាន់តែដាច់ និងមានអ្នកគាំទ្រច្រើន។ ចំណែកការងារនីមួយៗនោះទៀតសោត ក៏ត្រូវឆាប់បញ្ចប់នៅពេលវេលាជាលាក់មួយ ផងដែរ ហើយប្រសិនបើអ្នកមិនចេះចាត់ចែងពេលវេលាទៀតនោះ កិច្ចការរបបស់អ្នកប្រាកដជាចាក់គលើគ្នា និងមិនអាចចេញជាលទ្ធផលបានឡើយ។ដោយសារតែ
៨. សមត្ថភាពក្នុងការនិយាយជាសាធារណៈ (Public Speaking)
មុនពេលអ្នកចង់ក្លាយទៅជាសហគ្រិនវ័យក្មេងដ៏ឆ្នើមម្នាក់ អ្នកត្រូវមានសមត្ថភាពក្នុងការនិយាយជាសាធារណៈ ត្រូវនិយាយពោរពេញទៅដោយភាពជឿជាក់ ភាពច្បាស់លាស់ និងភាពត្រឹមត្រូវ។ ព្រោះតែអ្នកត្រូវឧស្សាហ៍ចេញទៅក្រៅទៅជួបគ្នាជាមួយនឹងអតិថិជន ឬដៃគូសហការរបស់ ដើម្បីធ្វើការបញ្ចុះបញ្ចូល និងធ្វើបទបង្ហាញនូវគម្រោងថ្មី។ ដោយសារតែហេតុនេះហើយទើបក្នុងនាមជាសហគ្រិនម្នាក់ អ្នកចាំបាច់ត្រូវពូកែក្នុងការនិយាយ និងនិយាយប្រកបទៅដោយសីល៌ធម៌។
ប្រសិនបើនិយាយទាក់ទងទៅនឹងក្រុមការងារវិញ អ្នកត្រូវតែជាមនុស្សម្នាក់ដែលមិនត្រឹមតែពូកែនិយាយ ពូកែចរចារតែប៉ុណ្ណោះទេ ប៉ុន្តែអ្នកក៏ត្រូវចេះអំពីវិធីសាស្ត្រនៃការនិយាយលើកទឹកចិត្តកូនក្រុម ឬបុគ្គលិករបស់អ្នក បូករួមនឹងតិចនិកក្នុងការផ្ដល់នូវមតិត្រឡប់ប្រកបទៅដោយប្រសិទ្ធភាព និងការខិតខំប្រឹងប្រែងជាងមុន។
៩. សមត្ថភាពក្នុងការគ្រប់គ្រងស្ត្រេស (Stress Management)
ចំណុចចុងក្រោយគឺសមត្ថភាពក្នុងការគ្រប់គ្រងស្រេ្តស និងសមត្ថភាពដែលអាចបត់បែនបានទៅតាមកាលៈទេសៈ (Be flexible) ពីព្រោះនៅពេលដែលអ្នកចាប់ផ្ដើមអាជីវកម្មដោយខ្លួនឯង អ្នកចាប់ផ្ដើមមានទំនួលខុសត្រូវច្រើនជាងមុន គិតច្រើនជាងមុនទៅលើដំណើរការអាជីវកម្មរបស់អ្នក។ ការបើកអាជីវកម្មដោយខ្លួនឯងនៅដំណាក់កាលដំបូង អាចមានភាពតានតឹងមិនគួរឱ្យជឿ ហើយប្រសិនបើអ្នកមិនប្រុងប្រយ័ត្ន និងមិនបានផ្ដោតខ្លាំងទៅលើអាជីវកម្មរបស់អ្នកទេ អ្នកអាចនឹងមានហានិភ័យខ្ពស់ និងខាតប្រាក់ជាច្រើន។ ដូចនេះអ្នកត្រូវដឹងអំពីវិធីសាស្ត្រក្នុងការកាត់បន្ថុយស្ត្រេសរបស់ តាមរយៈសម្រាក ឬចំណាយពេលធ្វើអ្វីដែលអ្នកស្រលាញ់។
