ការសម្ពោធអាវថ្មីរបស់ក្រុមជម្រើសជាតិកម្ពុជាក្នុងឆ្នាំ2022 នៅលើទំព័រផ្លូវការ“សហព័ន្ធកីឡាបាល់ទាត់កម្ពុជា” បានធ្វើឱ្យអ្នកគាំទ្រនៅក្នុងវិស័យបាល់ទាត់មានការពេញចិត្តជាច្រើន និងអាចធ្វើឱ្យការធ្វើទីផ្សារលើអាវមួយនេះ កាន់តែមានកំណើននៃអ្នកចង់បាន ដែលជាកត្តាមួយធ្វើឱ្យមានប្រាក់ចំណូលច្រើនជាងរាល់ឆ្នាំលើវិស័យកីឡា។
ភាពច្នៃប្រឌិតអាវនេះ គឺពឹងផ្អែកលើគោលគំនិត Concept Design អត្ថន័យនិងរូបភាពនៃទង់ជាតិខ្មែរ។ ជាពិសេសក្រាហ្វិកអាវក្នុងទឹកដី ត្រូវបានរចនាដោយដកស្រង់អត្ថន័យរបស់ពាក្យ”ប្រាសាទសីលាកំបាំងកណ្តាលព្រៃ” នៃបទនគររាជ ក្នុងការបង្កើតឡើងមកចំណែកផ្នែកនីមួយៗនៃអាវទាំងមូលដកស្រង់អត្ថន័យពីឃ្លាទីពីរនៃភ្លេងជាតិ។
បន្ថែមពីនេះ ពួកគេក៏មានសារខ្លីមួយ ដែលធ្វើឱ្យមនុស្សចាប់ផ្ដើមមានមោទនភាពលើវិស័យកីឡា និងធ្វើឱ្យអ្នកស្រលាញ់លើវិស័យមួយនេះ ជាពិសេសអ្នកគាំទ្រក្រុមជម្រើសជាតិកម្ពុជាចាប់ផ្ដើមចង់ចំណាយលុយក្នុងការទិញអាវទាំងនោះដោយភាពពេញចិត្ត។ សារនោះ បានសរសេរថា “ទាំងអស់គ្នាដើម្បីកម្ពុជា” ។
ជារួមមក ការរចនាបែប Concept ថ្មីលើអាវជម្រើសជាតិមួយនេះ បានសរបញ្ជាក់ឱ្យយើងឃើញថា កម្ពុជាចាប់ផ្ដើមមានចំណេះដឹងផ្នែកធ្វើយុទ្ធសាស្រ្តទីផ្សារ ដើម្បីទាញចំណាប់អារម្មណ៍មនុស្សដោយផ្ដោតលើគោលបំណងជាក់លាក់ និងកំពុងព្យាយាមដើរឱ្យទាន់សម័យកាលបច្ចុប្បន្នដែលមានភាពរីកចម្រើនលើវិស័យពាណិជ្ជកម្ម។ កត្តាទាំងនេះ នឹងធ្វើឱ្យវិស័យកីឡា កាន់តែមានកេរ្តិ៍ឈ្មោះល្អនៅលើទីផ្សារ និងអាចបង្កើនចំណូលបានច្រើនជាងមុន ព្រមទាំងកាន់តែមានអ្នកគាំទ្រក៏មានច្រើនជាងឆ្នាំមុនៗ។ លើសពីនេះ ក៏ជាកត្តាជំរុញឱ្យវិស័យផ្សេងៗទៀត អាចប្រើយុទ្ធសាស្រ្តទាំងនេះ ដើម្បីធ្វើការផ្សព្វផ្សាយឱ្យមានភាពរីកចម្រើនជាងមុនផងដែរ។
