ភាពរីករាយ និងសុភមង្គល​មិន​មែន​ជា​អ្វី​ដែល​អាចយកលុយ​ទិញ​បាន​នោះទេ។ ខណៈពេលដែលលុយគ្រាន់តែអាចធ្វើឱ្យជីវិតមានភាពងាយស្រួលជាងមុនតែប៉ុណ្ណោះ ។ ប៉ុន្តែមនុស្សជាច្រើនធ្លាក់ចូលទៅក្នុងអន្ទាក់នៃការគិតថាទ្រព្យសម្បត្ដិ ឬការមានលុយកាន់តែច្រើននឹងនាំមកនូវសុភមង្គល ប៉ុន្តែការពិតគឺខុសគិត។ដូចនេះដើម្បីដឹងថាតើធ្វើយ៉ាងណាឱ្យជីវិតមានភាពរីករាយ ចូរអ្នកលុបចោលនូវទម្លាប់ទាំង8ខាងក្រោមនេះ៖

1. រស់នៅដោយទាមទារលើសពីអ្វីដែលអ្នកត្រូវការ៖ ការរស់នៅដោយទាមទារលើសពីអ្វីដែលជីវិតត្រូវការ គឺជាទម្លាប់ដែលនាំឱ្យអ្នកមានភាពតានតឹង និងភាពមិនសប្បាយចិត្ត។ វាជាវដ្តនៃការចង់បានហើយចង់បានទៀតកាន់តែច្រើនឥតឈប់ឈរ ដែលធ្វើឱ្យអ្នកមានអារម្មណ៍ថាមិនគ្រប់គ្រាន់ ការមិនស្កប់ស្កល់បែបនេះហើយវានឹងធ្វើឱ្យអ្នកមិនសប្បាយចិត្ត។
2. ប្រៀបធៀបខ្លួនឯងទៅនឹងអ្នកដទៃ៖ ភាពរីករាយនឹងជីវិត​មិន​មែន​មក​ពី​ការ​មានអ្វី​ច្រើន​ជាង​​ ល្អជាងអ្នក​ដទៃ ឬ​ព្យាយាម​ធ្វើ​តាម​ស្តង់ដារ​សង្គម​នោះ​ទេ។ ដោយគេធ្វើសង្កត់ធ្ងន់ទៅលើភាពស្កប់ស្កល់ជាមួយនឹងអ្វីដែលអ្នកមាននៅក្នុងជីវិត។ដូចនេះចូរកុំធ្វើការប្រៀបធៀបខ្លួនឯងទៅនឹងអ្នកដទៃព្រោះមនុស្សម្នាក់ៗមានចំណុចល្អរៀងៗខ្លួន។
3. ការមិនយកចិត្តទុកដាក់ចំពោះសុខភាព៖ នៅពេលដែលអ្នកមិនយកចិត្តទុកដាក់លើសុខភាពទេ នោះសុខភាពអ្នកនឹងអន់ថយម្តងបន្តិចៗ។កាលណារាងកាយមួយដែលមានសុខភាពមិនល្អនោះវានឹងនាំឱ្យសុខភាពផ្លូវចិត្តរបស់អ្នកមិនដូចគ្នាល្អផងដែរ។ ដូច្នោះអ្នកត្រូវមើលថែ និងខ្វល់ខ្វាយពីសុខភាពខ្លួនឡើងវិញ ដូចជាការធ្វើលំហាត់ប្រាណឱ្យបានទៀងទាត់ ដើម្បីទទួលបានសុខភាពល្អ អារម្មណ៍នៃផ្លូវចិត្តប្រសើរឡើង និងកាត់បន្ថយភាពតានតឹង។ បន្ថែមពីនេះទៀតនោះគឺត្រូវបរិភោគអាហារណាដែលមានជីវជាតិគ្រប់គ្រាន់។
4. នៅជាប់ជំពាក់​នឹង​ទ្រព្យ​សម្បត្តិខ្លាំងពេក៖ នេះ​មិន​មាន​ន័យ​ថា អ្នក​ត្រូវ​លះបង់​ទ្រព្យ​សម្បត្តិ​ទាំង​អស់នោះទេ គឺចង់មានន័យថា ទ្រព្យសម្បត្តិគឺគ្រាន់តែជាតរបស់ដែលបណ្តោះអាសន្នប៉ុណ្ណោះ វាមិនកំណត់តម្លៃ ឬសុភមង្គលរបស់អ្នកទេ។ ដូចនេះអ្នកត្រូវរីករាយនូវអ្វីដែលខ្លួនមាន។
5. មិនបង្ហាញពីការដឹងគុណ៖ ការមិនបានបង្ហាញអំពីការដឹងគុណនូវអ្វីដែលអ្នកមាន នោះអ្នកនឹងតែងមានអារម្មណ៍ថាខ្លួនឯងមិនគ្រប់គ្រាន់ និងមិនមានអ្វីដែលជាទីពេញចិត្ត។ ដូចនេះបន្ទាប់ពីអ្នកចំណាយពេលពេញមួយថ្ងៃរួចហើយ នៅរាល់យប់មុនពេលអ្នកចូលគេង ចូរអ្នកនឹកមើល និងសរសេររឿងដែលបានធ្វើឱ្យអ្នករីករាយ។ វា​អាច​ជា​អ្វី​ដែល​សាមញ្ញ​ដូច​ជា​ពេញចិត្តនូវកាហ្វេ​មួយ​ពែង ឬការ​សន្ទនា​ជាមួយ​មិត្ត​ភក្តិនិងរឿងអ្វីផ្សេងៗទៀត ។ការអនុវត្តការដឹងគុណដ៏សាមញ្ញនេះបានផ្លាស់ប្តូរទស្សនៈរបស់អ្នកទាំងស្រុង។ ជំនួសឱ្យការផ្តោតលើអ្វីដែលអ្នកមិនមាន អ្នកនឹងចាប់ផ្តើមឱ្យតម្លៃលើអ្វីដែលខ្លួនមាន។ ប្រសិនបើអ្នកចង់រីករាយនៅក្នុងជីវិតដោយមិនចាំបាច់មានលុយច្រើន ការអនុវត្តការដឹងគុណគឺជារឿងចាំបាច់បំផុត។ វាជួយអ្នកអ្នកដឹងគុណចំពោះអ្វីដែលអ្នកមាន និងជួបនៅក្នុងជីវិតរបស់អ្នក។ អ្នកនឹងមានអារម្មណ៍ថាពេញចិត្តមានសុភមង្គល និងពេញលេញគ្រប់គ្រាន់នៅក្នងជីវិត។
6. ជៀសវាសក្នុងការធ្វើរឿងដែលថ្មី៖ ការគេចវេសក្នុងការចាប់ផ្តើមនូវអ្វីដែលថ្មី ឬបញ្ហាប្រឈម ដែលអ្នកនៅតែស្ថិតនៅក្នុងតំបន់ដែលមានផាសុកភាព និងសុខស្រួល នោះអ្នកនឹងមិនអាចទទួល ឱកាសសម្រាប់ការលូតលាស់ និងកែលម្អខ្លួនឯងបានឡើយ។ បែបនេះហើយអ្នកគួរតែចាប់ផ្តើមធ្វើរឿងដែលថ្មីៗ វាអាចនឹងមិនស្រួលនោះទេនៅពេលដែលអ្នកប្រឈមមុខនូវអ្វីដែលថ្មី។ ប៉ុន្តែវានឹងធ្វើឱ្យអ្នកជួបនូវរឿងល្អៗប្រសើរជាងមុន មិនតែប៉ុណ្ណោះអ្នកនឹងកាន់តែរឹងមាំ ថែមទាំងមានការលូតលាស់រីកចម្រើនផងដែរ។
7. ផ្តល់អាទិភាពលើលុយខាំ្លងពេក ៖ ការរស់នៅក្នុងសង្គមដែលតែងតែឱ្យតម្លៃទ្រព្យសម្បត្តិសម្ភារៈ វាបានធ្វើឱ្យអ្នកតាមផ្តោតតែលើសម្ភារៈទាំងនោះដែលគរាន់តែជារបស់ក្រៅខ្លួន។ ប៉ុន្តែរបស់ទាំងនេះមិនមែនជាអ្វីទាំងស្រុងដែលអាចឱ្យអ្នករីករាយបាននោះទេ។ ដោយ​គន្លឹះ​នៃ​សុភមង្គល​ និងភាពរីករាយពិតប្រាកដ​វាអាចជារឿងសាមញ្ញដូចជាដើរលេងមើលធម្មជាតិនៃព្រៃឈើ ការចំណាយពេលជាមួយមនុស្សជាទីស្រលាញ់ ឬរៀនជំនាញថ្មីៗដែលអ្នកចូលចិត្ត។
8. មានផ្នត់គំនិតថាសុភមង្គលកើតចេញពីលុយ៖ ការគិតបែបនេះគឺមិនត្រូវនោះទេ ទោះបីជាលុយសំខាន់ក៏ប៉ុន្តែវាគ្រាន់តែជាផ្នែកមួយនៃជីវិតប៉ុណ្ណោះ។ អ្វីដែលសំខាន់បំផុតដែលត្រូវយល់នោះគឺថាលុយមិនស្មើនឹងសុភមង្គលទេ ព្រោះថាសុភមង្គលនិងភាពរីករាយមិនអាចយកលុយទៅទិញបាននោះទេ។ ដោយសុភមង្គលកើតចេញពីខាងក្នុងអារម្មណ៍នៃចិត្តរបស់អ្នកផ្ទាល់ មិនកើតចេញពីទ្រព្យសម្បត្តិនោះទេ។

សុភមង្គលពិតកើតចេញពីខាងក្នុងចិត្តនៃអារម្មណ៍។ ដូចនេះអ្នក​មិន​ត្រូវ​ការ​ទ្រព្យ​សម្បត្តិ​ដ៏​ច្រើន​ដើម្បី​រស់​នៅ​ដ៏​មាន​ន័យ​ដែល​ពោរពេញ​ទៅ​ដោយ​ក្ដី​អំណរ និង​គោល​បំណង​នោះ​ទេ។