កត្តាដែលធ្វើឱ្យភោជនីយដ្ឋានសក្កបាន្ត មានការគាំទ្រខ្លាំង

លោកសោម សិរីវឌ្ឍន៍ ស្ថាបនិកនៃភោជនីយដ្ឋានសក្កបាន្ត បានផ្ដល់កិច្ចសម្ភាសន៍ជាមួយក្រុមការងារគំនិត ដោយលោកបានបង្ហាញពីភាពលេចធ្លោសំខាន់ចំនួន 4 ដែលធ្វើឱ្យសក្កបាន្តអាចឈរជើងនៅលើទីផ្សារ និងអាចទាក់ទាញចិត្តមនុស្សជាច្រើននាក់ឱ្យចូលមកកាន់ភោជនីយដ្ឋានរបស់លោក ទោះបីជាភោជនីយដ្ឋាននោះទើបតែបង្កើតកាលពីឆ្នាំ 2021ក៏ដោយ។

Sakaban Restaurant — បរិយាកាសពេលថ្ងៃ

បរិយាកាសនៅពេលយប់

1. បង្វឹកក្រុមការងារឱ្យខ្លាំង

លោកសោម សិរីវឌ្ឍន៍ មានប្រសាសន៍ថា ក្រុមការងារគឺជាកត្តាសំខាន់ណាស់ ពីព្រោះពួកគាត់ជាកម្លាំងចលករដ៏សំខាន់ដែលអាចធ្វើឱ្យភោជនីយដ្ឋានអាចដំណើរការបានល្អរហូតមកទល់ពេលនេះ។ លោកបានបញ្ជាក់ថា គ្រប់សមាជិកក្រុមការងារទាំងអស់ សុទ្ធតែត្រូវបានបណ្ដុះបណ្ដាលចាប់តាំងពីដំណាក់កាលជ្រើសរើសលើកដំបូងដើម្បីធានាថា ពួកគាត់អាចធ្វើការងារប្រកបដោយផលិតភាព ព្រមទាំងអាចផ្ដល់ជូននូវសេវាកម្មដ៏ល្អសម្រាប់អតិថិជនដែលបានចូលមកកាន់ភោជនីយដ្ឋាន។

2. ពង្រឹងលើការផ្ដល់សេវាកម្មឱ្យល្អ

ក្រោយពីក្រុមការងារទទួលបានការបណ្ដុះបណ្ដាលបានយ៉ាងល្អ គឺក្រុមការងារទាំងអស់សុទ្ធតែដឹងអំពីតួនាទី និងភារកិច្ចសំខាន់របស់ខ្លួនក្នុងការទទួលខុសត្រូវ ព្រមទាំងព្យាយាមធ្វើយ៉ាងណាឱ្យអតិថិជនទាំងអស់ដែលបានចូលមកកាន់ភោជនីយដ្ឋានទទួលបាននូវបទពិសោធន៍ល្អៗ និងមានអាចស្រស់ស្រាយ រួមផ្សំជាមួយនឹងការពេញចិត្តជាមួយនឹងសេវាកម្មដែលផ្ដល់ជូន និងមានម្ហូបអាហារដ៏ឆ្ងាញ់នៅលើតុ។

3. ផ្ដល់នូវបរិយាកាសដ៏ល្អ

បរិយាកាសនៅភោជនីយដ្ឋានសក្កបាន្ត ជាទីតាំងដ៏ល្អ សម្រាប់ការជួបជុំក្រុមគ្រួសារ ក្រុមការងារ និងមនុស្សជាទីស្រលាញ់ ដើម្បីទទួលយកភាពស្រស់ស្រាយ និងធូរស្បើយអារម្មណ៍ដោយបំបាត់នូវរាល់ទុកកង្វល់។ បរិយាកាសនៅពេលថ្ងៃ ជាពេលវេលាដែលអាចជជែកពិភាក្សាការងារ និងធ្វើកិច្ចការអ្វីផ្សេងទៀតនៅទីនោះ ហើយនៅពេលយប់មានពន្លឺភ្លើងដែលទាក់ទាញអារម្មណ៍ ដោយអមជាមួយក្រុមតារា Cover Original Song ច្រៀងកំដរអារម្មណ៍ទៀតផង។ លើសពីនេះ ការរៀបចំភោជនីយដ្ឋានក៏មិនចាញ់នៅភោជនីយដ្ឋានផ្សេងៗឡើយ។

4. ធ្វើឱ្យម្ហូបអាហារមានរសជាតិឆ្ញាញ់ និងមានអត្ថន័យ

លោកសិរិវឌ្ឍន៍ បានបន្តថា គ្រប់មុខម្ហូបទាំងអស់ គឺរក្សានូវអនាម័យខ្ពស់ និងធានានូវរសជាតិឆ្ងាញ់ប្លែកអារម្មណ៍។ បន្ថែមពីនេះ មុខម្ហូបទាំងអស់ សុទ្ធតែមានអត្ថន័យ និងមានរឿងរ៉ាវរបស់វា ដែលធ្វើឱ្យយើងបរិភោជអាហារដោយឆ្ញាញ់ផង និងដឹងពីអត្ថន័យរបស់វាផង។

ទីតាំងភោជនីយដ្ឋាន៖ https://maps.app.goo.gl/7oT3oJP9VZd2gfTH9

ពាណិជ្ជកម្ម

កំហុសឆ្គងនៃការថតវីដេអូ ដែលអ្នកគួរយល់ដឹងបន្ថែម

Sann Thaven

កាលពីថ្ងៃទី4 ខែមីនាថ្មីៗនេះ លោក Dennis Yu ជាអ្នកជំនាញទីផ្សារឌីជីថល នៅសហរដ្ឋអាមេរិក បានបង្ហាញវីដេអូឃ្លីបចំនួន 8 របស់លោក Gavin Lira ដែលគាត់ព្យាយាមថតវីដេអូឱ្យមានភាពល្អឥតខ្ចោះ ប៉ុន្តែទម្រាំថតចប់ គាត់ត្រូវចំណាយពេលថតឡើងវិញចំនួន 8 ដង ស្មើនឹង 8 វីដេអូ។

ហេតុនេះហើយ លោក Dennis Yu បានលើកយកបទពិសោធន៍នៃការថតវីដេអូបែបនេះ ដើម្បីបង្ហាញដល់យើងអំពីកំហុសឆ្គងដែលគួរឈ្វេងយល់បន្ថែម និងកែតម្រូវ។

កំហុសឆ្គងទាំងនោះរួមមាន៖

មិនបានណែនាំខ្លួនឯងឱ្យគេស្គាល់ថាខ្លួនជានរណា ដូច្នេះ “រាល់ពេលដែលអ្នកចាប់ផ្ដើមថតវីដេអូលើកដំបូង អ្នកត្រូវតែព្យាយាមណែនាំខ្លួនឯងឱ្យអ្នកទស្សនាបានដឹងថា អ្នកជានរណាជាមុនសិន មុនពេលនិយាយខ្លឹមសារសំខាន់ៗដើម្បីឱ្យមនុស្សចាប់ផ្ដើមយកចិត្តទុកដាក់ជាមួយ។
ថតបង្ហាញទេសភាពជុំវិញច្រើនជាងថតឃើញរូប គឺវាមើលទៅមិនសូវមានភាពទាក់ទាញ ដូច្នេះនៅពេលថត សូមព្យាយាមថតផ្ដោតលើរូបរបស់អ្នកឱ្យបានច្រើន។
ព្យាយាមនិយាយលក់ មុនពេលផ្ដល់ការកំសាន្ត និងការចែករំលែកចំណេះដឹង
ប្រើមីក្រូហ្វូនរបស់ទូរស័ព្ទដៃ ជំនួសឱ្យការប្រើឧបករណ៍ខាងក្រៅ
ព្យាយាមអានស្រ្គីបមួយពាក្យៗដែលធ្វើឱ្យអ្នកស្ដាប់មានអារម្មណ៍ថាមិនគួរឱ្យចាប់អារម្មណ៍
សម្លឹងមើលខ្លួនឯង ដោយមិនព្យាយាមសម្លឹងមើលកាំមេរ៉ា ដែលសកម្មភាពនេះនឹងធ្វើឱ្យអ្នកផ្ទាល់ និងអ្នកទស្សនាពិបាកមានទំនាក់ទំនងគ្នា
យកដៃដាក់ក្នុងហោប៉ៅ ឬធ្វើសកម្មភាពនានាដែលមើលទៅមិនសមរម្យ ហើយមិនស៊ីសង្វាក់គ្នាជាមួយនឹងកម្រិតនៃការបញ្ចេញសម្លេង
គិតថា នឹងថតវីដេអូមួយឱ្យមានភាពល្អឥតខ្ចោះ ដែលនឹងធ្វើឱ្យអ្នកខាតពេលច្រើន ពីព្រោះចង់បានល្អឥតខ្ចោះ នៅពេលថតខុស ក៏ព្យាយាមនិយាយនិងថតឡើងវិញ

ហេតុដូចនេះហើយ រាល់កំហុសឆ្គងទាំង 8 ខាងលើ លោក Dennis Yu ចង់ឱ្យអ្នកទាំងអស់គ្នាព្យាយាមឈ្វេងយល់ហើយសិក្សាបន្ថែម និងកែតម្រូវកំហុសឆ្គងខ្លួនឯង បន្ទាប់មកធ្វើយ៉ាងណាព្យាយាមថតវីដេអូដែលមើលទៅដូចជាអ្នកកំពុងនិយាយបែបធម្មជាតិរបស់អ្នក ដោយមិនសម្ដែងខ្លាំងពេក ឬព្យាយាមចង់ថតម្ដងឱ្យល្អឥតខ្ចោះនោះទេ។ ប្រសិនបើជាលើកដំបូងនៃការថតវីដេអូរបស់អ្នក ចូរព្យាយាមថតបន្តរហូតដល់ចប់ ប៉ុន្តែប្រសិនបើនិយាយខុស ឈប់បន្ដិចហើយនិយាយបន្ត ដោយកុំព្យាយាមនិយាយខុសហើយ ក៏ចាប់ផ្ដើមថតឡើងវិញឱ្យសោះ។

Credit: Dennis Yu

ពាណិជ្ជកម្ម

ការចាប់ផ្ដើម និងលក្ខណៈពិសេសរបស់ក្រុមហ៊ុនវីរៈប៊ុនថាំ

Sann Thaven

លោកឧកញ៉ា សួរ វីរៈ អគ្គនាយកក្រុមហ៊ុន វីរៈ ប៊ុនថាំ អេចប្រេសដែលជាក្រុមហ៊ុនដឹកជញ្ជូនអ្នកដំណើរ និងបញ្ញើរឥវ៉ាន់ដែលកំពុងមានការនិយមខ្លាំងនៅប្រទេសកម្ពុជា។ នៅឆ្នាំ2021 ក្រុមហ៊ុនវីរៈប៊ុនថាំមានសាខារហូតជាង 300 ព្រមទាំងមានសាខានៅប្រទេសថៃ វៀតណាម និងចិន ហើយនេះបើយោងតាមប្រសាសន៍របស់លោកឧកញ៉ា វីរៈ នៅលើឆានែលផ្លូវការរបស់ក្រុមហ៊ុនវីរៈប៊ុនថាំ។

ការចាប់ផ្ដើមអាជីវកម្មវីរៈប៊ុនថាំអាចដំណើរការទៅបាន គឺពឹងផ្អែកស្ទើរទាំងស្រុងលើបច្ចេកវិទ្យា ដើម្បីធ្វើយ៉ាងណាផ្ដល់សេវាកម្មដ៏ល្អដល់អតិថិជន ព្រមទាំងធ្វើឱ្យអតិថិជនមានភាពងាយស្រួលតាមរយៈការប្រើប្រាស់បច្ចេកវិទ្យាដើម្បីភ្ជាប់ទំនាក់ទំនងរវាងអតិថិជនជាមួយក្រុមហ៊ុន។ សូម្បីតែនៅគ្រប់ឡានដឹកអ្នកដំណើរទាំងអស់សុទ្ធតែបំពាក់នូវ GPS ដើម្បីតាមដានល្បឿនថាការបើកបរលើសល្បឿនដែរឬទេ និងអាចគ្រប់គ្រងការឈប់របស់អ្នកបើកបរថាគាត់ឈប់ប៉ុន្មានដងផងដែរ។

ប៉ុន្តែ! ទម្រាំទទួលបានភាពជោគជ័យលើវិស័យដឹកជញ្ជូននេះ ក៏មិនមែនទទួលបានដោយភាពងាយស្រួលដែរ គឺវាកើតចេញពីការខិតខំ និងកើតចេញពីក្ដីស្រលាញ់ ព្រមទាំងការចេះចាប់យកឱកាសបង្កើតថ្មីរបស់លោកឧកញ៉ាផ្ទាល់។ ជាក់ស្ដែងដំបូងឡើយកាលពីអាយុ14 ឆ្នាំលោកគ្រាន់តែជាអ្នកលក់ការ៉េមកី បន្ទាប់មកក៏ជាអ្នកលក់ផ្លែឈើ ជាអ្នកណែនាំភ្ញៀវទេសចរណ៍ដើរកំសាន្ត ជាអ្នកជួលកន្លែងស្នាក់នៅឱ្យភ្ញៀវទេសចរណ៍ រហូតក្នុងឆ្នាំ 2004 លោកក៏សម្រេចចិត្តបង្កើតក្រុមហ៊ុនវីរៈប៊ុនថាំនេះឡើង ដោយទិញរថយន្តសម្រាប់ដឹកភ្ញៀវទេសចរណ៍ ដោយអំឡុងពេលនោះ លោកមានដើមទុនត្រឹមតែ 4000$ ប៉ុណ្ណោះក្នុងការទិញរថយន្តដឹកអ្នកដំណើរ។

ជារួមមក ការចាប់ផ្ដើមបង្កើតក្រុមហ៊ុនវីរៈប៊ុនថាំនេះឡើង គឺជាដំណាក់កាលនៅពេលលោកឧកញ៉ាធ្វើការជាអ្នកណែនាំភ្ញៀវទេសចរណ៍ដើរកំសាន្ត និងជួលកន្លែងស្នាក់នៅ បន្ទាប់មកក៏ចាប់ផ្ដើមមានគំនិតបើកក្រុមហ៊ុនដឹកអ្នកដំណើរ រហូតនាពេលបច្ចុប្បន្ន និងផ្ដល់សេវាកម្មដាក់បញ្ជើឥវ៉ាន់ទាំងក្នុងស្រុក និងក្រៅស្រុកផងដែរ។

លក្ខណៈពិសេសរបស់ក្រុមហ៊ុនវីរៈប៊ុនថាំ

1. មាន App ផ្ទាល់របស់ក្រុមហ៊ុន

អ្នកដំណើរអាចកក់សំបុត្រធ្វើដំណើរ ដោយអាចកំណត់ទាំងទិសដៅចេញដំណើរ គោលដៅដែលត្រូវទៅដល់ ថ្ងៃចេញដំណើរ និងអាចជ្រើសរើសលេខកៅអីបានទៀត។ លើសពីនេះ អតិថិជនក៏អាចប្រើប្រាស់កម្មវិធីវីរៈប៊ុនថាំ ដើម្បីតាមដានគ្រប់ទំនិញដែលបានដាក់ផ្ញើអំពីស្ថានភាពថាបានទៅដល់ណាហើយ។

2. ធ្វើការដោយមានគោលដៅរួម

លោកឧកញ៉ាវីរៈបានមានប្រសាសន៍ថា អ្វីដែលជាមោទនភាព និងភាពជោគជ័យរបស់ក្រុមហ៊ុនវីរៈប៊ុននោះគឺការធ្វើការដោយមានគោលដៅរួម ដោយមានរចនាសម្ព័ន្ធធ្វើការច្បាស់លាស់ និងក្រុមការងារទាំងអស់គឺធ្វើការរួមគ្នាជាចង្កោមតែមួយ។ លើសពីនេះ ក្រុមហ៊ុនវីរៈប៊ុនថាំតែងតែផ្ដល់សេវាកម្មដល់អតិថិជនចេញពីចិត្ត និងបេះដូង ព្រមទាំងមានភាពស្មោះត្រង់ជាមួយនឹងអតិថិជនជានិច្ច។

3. ផ្ដោតលើគុណភាព

ក្រុមហ៊ុនវីរៈប៊ុនថាំមានការផ្ដោតនិងយកចិត្តទុកដាក់លើសុខភាព សុវត្ថិភាព អនាម័យ និងទៀងទាត់ពេលវេលាជូនដល់អតិថិជន។

4. ទំនួលខុសត្រូវ

ក្រុមហ៊ុនវីរៈប៊ុនថាំនឹងមានការធានានូវការទទួលខុសត្រូវរាល់ការបាត់បង់ឥវ៉ាន់ទាំងឡាយរបស់អតិថិជន និងមានការផ្ដល់ជាដំណោះស្រាយប្រសិនបើមានការដឹកទំនិញមានភាពយឺតយ៉ាវ ឬជួបបញ្ហារាំងស្ទះផ្សេងៗ។

ពាណិជ្ជកម្ម

ឈ្វេងយល់អំពី Business Plan

Sann Thaven

Business Plan បកជាភាសាខ្មែរថា “ផែនការអាជីវកម្ម” ហើយវាសំដៅលើឯកសារជាលាយលក្ខណ៍អក្សរដែលពិពណ៌នាអំពីលក្ខណៈនៃអាជីវកម្ម របៀបចាប់ផ្ដើមអាជីវកម្ម យុទ្ធសាស្ត្រលក់ យុទ្ធសាស្រ្តទីផ្សារ និងប្រវត្តិហិរញ្ញវត្ថុ ព្រមទាំងមានរបាយការណ៍ប្រាក់ចំណេញនិងខាតដែលបានព្យាករណ៍រួច ព្រមទាំងសរសេរបង្ហាញពីអ្វីដែលអាចសម្រេចបានស្របតាមគោលដៅរបស់ក្រុមហ៊ុន។

គោលគំនិតចម្បងមុននឹងអាចបង្កើតផែនការអាជីវកម្មបាន

នៅពេលដែលអ្នកចង់ចាប់ផ្ដើមសរសេរផែនការអាជីវកម្មមួយសម្រាប់ខ្លួនឯងឱ្យបានល្អ អ្វីដែលអ្នកត្រូវតែដឹងនោះគឺថា មុននឹងអាចសរសេរផែនការអាជីវកម្មមួយបានល្អបាន លុះត្រូវតែអ្នកមាន “គំនិតអាជីវកម្មដ៏ល្អមួយសិន”។

គំនិតអាជីវកម្ម សំដៅលើគំនិតដែលអាចប្រើបានដើម្បីបង្កើតប្រាក់ចំណេញ ជាការបង្កើតថ្មីលើអ្វីមួយស្របជាមួយនឹងក្ដីស្រមៃរបស់អ្នកដោយអាចផ្តោតលើផលិតផល ឬសេវាកម្មដែលអ្នកនឹងផ្ដល់ជូនក្រុមមនុស្សគោលដៅក្នុងគោលបំណងណាមួយ។ ដូច្នេះអ្នកត្រូវតែស្វែងរកគំនិតអាជីវកម្មមួយសម្រាប់ខ្លួនឯង ហើយវាជាអ្វីដែលអ្នកចង់ចាប់ផ្ដើមពិតប្រាកដ និងចង់បង្កើតវាឡើងដោយក្ដីស្រលាញ់។ បន្ទាប់ពីអ្នកអាចមានគំនិតអាជីវកម្មហើយ នោះអ្នកអាចចាប់ផ្ដើមសរសេរផែនការអាជីវកម្មបានហើយ។

ផ្នែកសំខាន់ៗក្នុងផែនការអាជីវកម្ម

នៅពេលដែលអ្នកចាប់ផ្ដើមសរសេរផែនការអាជីវកម្ម ចូរកុំរំលងនូវផ្នែកសំខាន់ៗដូចខាងក្រោមដើម្បីដាក់បញ្ចូលក្នុងផែនការរបស់អ្នក។ នេះបើយោងតាមគេហទំព័រ Forbes ។

1. ការសង្ខេបនៃការប្រតិបត្តិនៅក្នុងក្រុមហ៊ុន

ផ្នែកនេះជាការសរសេររៀបរាប់អំពីក្រុមហ៊ុនជាលក្ខណៈសង្ខេប ហើយក៏ទាមទារឱ្យអ្នកសរសេរដោយមានការប្រុងប្រយ័ត្នផងដែរ។ ការសរសេរសង្ខេបនេះ អ្នកត្រូវតែសរសេរបង្ហាញអំពី៖

ពិពណ៌នាថាក្រុមហ៊ុនរបស់អ្នកជាអ្វី
ទស្សនវិស័យ និងបេសកកម្មក្រុមហ៊ុន
ផ្ដោតលើផលិតផល ឬសេវាកម្មអ្វី
អ្វីដែលក្រុមហ៊ុនរបស់អ្នកនឹងផ្ដល់ជាដំណោះស្រាយដល់អតិថិជន
អ្វីដែលអ្នកវិនិយោគចង់ដឹង និងចង់បាន
អ្វីដែលទាក់ទាញអ្នកអានឱ្យចាប់អារម្មណ៍លើក្រុមហ៊ុន

ជារួមមក អ្នកត្រូវតែសរសេរពិពណ៌នាអំពីក្រុមហ៊ុនរបស់អ្នកលើចំណុចដែលលេចធ្លោនិងគួរទីទាក់ទាញរបស់ក្រុមហ៊ុនដែលជាអ្វីដែលអ្នកចង់បង្ហាញ។ ផ្នែកនេះ គឺស្ថិតនៅក្នុងសេចក្តីថ្លែងការណ៍នៃការចំណុចចាប់ផ្ដើមបន្ទាត់ ដោយពន្យល់អំពីអាជីវកម្មក្នុងប្រយោគមួយ ឬពីរ បន្ទាប់មកទើបបង្ហាញពីទិដ្ឋភាពទូទៅរបស់ក្រុមហ៊ុន។

2. ទិដ្ឋភាពទូទៅរបស់ក្រុមហ៊ុន

សំដៅលើការរាយបញ្ជីទំនិញ និងសេវាកម្មដែលក្រុមហ៊ុននឹងផ្តល់ ទីផ្សារដែលវានឹងបម្រើ គោលដៅរយៈពេលខ្លី និងវែងសម្រាប់កំណើន និងប្រវត្តិសង្ខេបនៃការបង្កើតក្រុមហ៊ុន និងការអនុវត្តកន្លងមក។ ជារួមមក ត្រង់ចំណុចនេះ ជាការពន្យល់ពីសន្ទុះណាមួយដែលក្រុមហ៊ុនបានធ្វើរហូតមកដល់បច្ចុប្បន្ន និងផែនការអនាគត។

3. ផលិតផល និងសេវាកម្ម

ផ្នែកនេះអនុញ្ញាតឱ្យអ្នកមានការពន្យល់ពេញលេញបន្ថែមទៀតអំពីប្រភេទទំនិញ ឬសេវាកម្មដែលអាជីវកម្មនឹងលក់ ឬផ្តល់ ដោយពិពណ៌នាលម្អិតពីផលិតផល ឬសេវាកម្មរបស់អ្នក និងគុណសម្បត្តិប្រកួតប្រជែងរបស់អ្នកលើទីផ្សារប្រកួតប្រជែង។ បន្ទាប់មកត្រូវតែធ្វើឱ្យការពិពណ៌នាគួរឱ្យទាក់ទាញបំផុត។

4. ការវិភាគទីផ្សារ

សំដៅលើការបង្ហាញព័ត៌មានលម្អិតអំពីអតិថិជនសក្តានុពលរបស់អ្នក និងបង្ហាញពីការស្រាវជ្រាវ និងចំណេះដឹងដែលក្នុងនាមជាម្ចាស់ក្រុមហ៊ុនបានសិក្សាអំពីទីផ្សារ ដោយពន្យល់ពីរបៀបដែលទីផ្សាររបស់អ្នកកំពុងរីកចម្រើនតាមពេលវេលាកំណត់ជាក់លាក់ និងពន្យល់ពីរបៀបដែលអាជីវកម្មរបស់អ្នកមានទីតាំងដើម្បីទាញយកអត្ថប្រយោជន៍ពីការផ្លាស់ប្តូរដែលរំពឹងទុកនៅក្នុងឧស្សាហកម្មរបស់អ្នក។

5. យុទ្ធសាស្ត្រទីផ្សារ

ផ្នែកនេះ អ្នកអាចបង្ហាញពីផែនការសម្រាប់បណ្តាញទីផ្សារដែលបានរំពឹងទុកទាំងអស់ រាប់ពីការផ្សាយពាណិជ្ជកម្មបែបប្រពៃណី រហូតដល់ការផ្សព្វផ្សាយតាមប្រព័ន្ធផ្សព្វផ្សាយសង្គម។ លើសពីនេះ អ្នកក៏ត្រូវបង្ហាញបន្ថែមទៀតអំពីការប្រើប្រាស់កញ្ចប់ថវិកា និងយុទ្ធសាស្រ្តទីផ្សារដែលអ្នកនឹងប្រើប្រាស់ ដើម្បីជំរុញការលក់ឱ្យខ្លាំង។

6. ការរៀបចំនិងការគ្រប់គ្រង

សំដៅលើការពន្យល់ពីមូលហេតុដែលអ្នក និងក្រុមរបស់អ្នកមានសមត្ថភាពក្នុងការប្រតិបត្តិគោលដៅ និងគោលបំណងអាជីវកម្ម។ លើសពីនេះ ក៏ត្រូវបង្ហាញពីរចនាសម្ព័ន្ធរបស់ក្រុមហ៊ុនដើម្បីឱ្យអ្នកមើល ឬជាពិសេសអ្នកវិនិយោគបានដឹងថា របៀបនៃការដឹកនាំចាត់ចែងក្នុងក្រុមហ៊ុនរបស់អ្នកបែបណាដែរ។

7. ការព្យាករណ៍ហិរញ្ញវត្ថុ

អ្នកត្រូវចងចាំថា រាល់ផែនការទាំងអស់ដែលអ្នកបានរៀបចំឡើង ត្រូវតែបង្ហាញពីទិន្នន័យហិរញ្ញវត្ថុ ដោយក្នុងនោះមានការព្យាករណ៍នៃការចំណាយបានត្រឹមត្រូវ និងព្យាករណ៍ដែលនឹងអាចទទួលបានប្រាក់ចំណូលប៉ុន្មាន។ លើសពីនេះ ក៏ត្រូវបង្ហាញពីទិដ្ឋភាពទូទៅនៃស្ថានភាពហិរញ្ញវត្ថុបច្ចុប្បន្នរបស់ក្រុមហ៊ុនផងដែរ។

ការព្យាករណ៍ហិរញ្ញវត្ថុសំខាន់ៗរួមមាន៖

ការព្យាករណ៍ពីការលក់និងប្រាក់ចំណូល
របាយការណ៍ប្រាក់ចំណេញនិងខាត
របាយការណ៍លំហូរសាច់ប្រាក់
តារាងតុល្យការ
ផ្នែកដែលត្រូវការការវិនិយោគបន្ថែម

ពាណិជ្ជកម្ម

ឈ្វេងយល់ពី Market Research

Sann Thaven

Market Research បកជាភាសាខ្មែរថា “ការស្រាវជ្រាវទីផ្សារ” ដោយវាសំដៅលើដំណើរការដែលក្រុមហ៊ុនប្រមូលព័ត៌មានអំពីទីផ្សារគោលដៅ និងអតិថិជនសក្ដានុពលដើម្បីវាយតម្លៃលទ្ធភាពនៃផលិតផល ឬសេវាកម្មថ្មីដែលអាចបំពេញតម្រូវការទីផ្សារ និងផ្ដល់នូវអ្វីដែលអតិថិជនចង់បាន ព្រមទាំងអាចដំណើរការអាជីវកម្មបានប្រកបដោយប្រសិទ្ធភាព។ បន្ថែមពីនេះ ការស្រាវជ្រាវទីផ្សារ ក៏ជាវិធីដ៏ល្អមួយដើម្បីឈ្វេងយល់បន្ថែមអំពីឧស្សាហកម្មរបស់អ្នក ស្វែងរកអ្វីដែលអ្នកមិនបានពិចារណាអំពីអាជីវកម្មផ្ទាល់ខ្លួន ហើយអាចបញ្ចូលអាជីវកម្មទៅក្នុងនិន្នាការនៃតម្រូវការទីផ្សារនាពេលបច្ចុប្បន្ន និងទទួលបានគំនិតអំពីអ្វីដែលអនាគតអាចនឹងកើតឡើង។

ឈ្វេងយល់ពីគោលបំណងនិងប្រភេទនៃការស្រាវជ្រាវទីផ្សារបន្ថែមទៀតតាមតំណភ្ជាប់នេះ៖ https://kumnit.com/%E1%9E%8F%E1%9E%BE%E1%9E%A2%E1%9F%92%E1%9E%9C%E1%9E%B8%E1%9E%87%E1%9E%B6-market-research/

ហេតុអ្វីត្រូវធ្វើ Market Research មុនចាប់ផ្ដើមអាជីវកម្ម?

ការដែលមានគំនិតក្នុងការចាប់ផ្ដើមអាជីវកម្ម វាជារឿងល្អ ហើយបើអ្នកមានលទ្ធភាពក្នុងការដំណើរការអាជីវកម្មទៀត វាកាន់តែជារឿងល្អ ប៉ុន្តែអ្វីដែលអ្នកមិនអាចមើលរំលងមុននឹងចាប់ផ្ដើមអាជីវកម្ម អ្នកត្រូវតែស្រាវជ្រាវទីផ្សារជាមុនសិន ពីព្រោះមិនប្រាកដថា មានគំនិតអាជីវកម្ម និងមានលទ្ធភាពក្នុងការដំណើរការអាជីវកម្ម ដឹងតែជោគជ័យនោះទេ ប៉ុន្តែវាទាមទារឱ្យអ្នកមានចំណេះដឹងផ្សេងៗទៀតដើម្បីរួមផ្សំគ្នា ហើយក្នុងនោះក៏មានការធ្វើ Market Research ផងដែរ។ ដូច្នេះសំណួរសួរថា ហេតុអ្វីត្រូវធ្វើការស្រាវជ្រាវទីផ្សារមុនចាប់ផ្ដើមអាជីវកម្ម? ខាងក្រោមនេះ ជាហេតុផលមួយចំនួនដែលឆ្លើយតបនឹងសំណួរនេះ ហើយក៏ជាអ្វីដែលអ្នកចាំបាច់ត្រូវតែដឹងផងដែរ។

1. អាចកំណត់អត្តសញ្ញាណអតិថិជនសក្ដានុពល

នៅពេលចាប់ផ្ដើមអាជីវកម្ម គឺទាមទារឱ្យអ្នកស្គាល់ច្បាស់ថាអតិថិជនសក្ដានុពលរបស់អ្នកគឺជានរណា? នៅទីណា? ដូច្នេះដើម្បីដឹង អ្នកត្រូវតែបង្កើតសំណួរសួរមកកាន់ខ្លួនឯង ហើយចាប់ផ្ដើមធ្វើការស្រាវជ្រាវបន្ថែម។ សំណួរទាំងនោះ រួមមាន៖

តើអ្នកណានឹងប្រើប្រាស់ផលិតផលឬសេវាកម្មរបស់អ្នក?
តើអ្នកនឹងផ្ដោតលើអតិថិជនជាមនុស្សស្រី ឬមនុស្សប្រុស?
តើអតិថិជនរបស់អ្នកមានអាយុចាប់ពីប៉ុន្មានឆ្នាំ?
តើអតិថិជនរបស់អ្នកភាគច្រើនរស់នៅទីណា?
តើកម្រិតប្រាក់ចំណូលរបស់អតិថិជនរបស់អ្នកបែបណា (ប្រាក់ចំណូលខ្ពស់ ឬមធ្យម ឬទាប)?
តើអតិថិជនរបស់អ្នកមានស្ថានភាពគ្រួសារបែបណា (នៅលីវ ឬរៀបការរួច)?
តើអតិថិជនរបស់អ្នកមានចំណង់ចំណូលចិត្តបែបណា?
តើអតិថិជនគោលដៅរបស់អ្នកចង់បានអ្វី ឬមានតម្រូវការអ្វី?
និងសំណួរផ្សេងៗទៀតដែលអ្នកអាចបង្កើតឡើង ហើយចាប់ផ្ដើមប្រមូលព័ត៌មានអំពីអតិថិជនរបស់អ្នក។

ធ្វើបែបនេះ អ្នកនឹងកាន់តែមានព័ត៌មានគ្រប់ជ្រុងជ្រោយអំពីអតិថិជនសក្ដានុពលរបស់អ្នក ហើយអ្នកអាចកំណត់បានយ៉ាងជាក់លាក់ថា តើអតិជនគោលដៅរបស់អ្នកគឺជានរណា?

2. បានស្គាល់អតិថិជនដែលមានស្រាប់

ចំណុចនេះ វាស្រដៀងនឹងចំណុចទីមួយដែរ គ្រាន់តែនៅក្នុងចំណុចនេះ ចង់ឱ្យអ្នកបានដឹងបន្ថែមទៀតថា ប្រភេទអាជីវកម្មរបស់អ្នកក៏កំពុងតែមានអ្នកត្រូវការមួយចំនួនដែរ ឬអាចនិយាយបានថា ផលិតផលឬសេវាកម្មរបស់អ្នកគឺមានទីផ្សារស្រាប់ក្រោយពីបានធ្វើ Market Research ដូច្នេះអ្នកត្រូវតែគិតពិចារណានិងស្រាវជ្រាវបន្ថែមទៀត ដោយអមជាមួយនឹងសំណួរខាងក្រោម៖

ហេតុអ្វីអតិថិជនដែលមានស្រាប់នោះ គួរតែជ្រើសរើសផលិតផលរបស់អ្នក?
តើអតិថិជនរបស់អ្នក អាចប្រើផលិតផលរបស់អ្នកដោយរបៀបណា?
តើផលិតផលរបស់អ្នក អាចដោះស្រាយបញ្ហាប្រឈមដោយរបៀបណា?
តើអ្នកណា ឬអ្វីមានឥទ្ធិពលលើការសម្រេចចិត្តទិញរបស់ពួកគេ?
តើអតិថិជនរបស់អ្នកចូលចិត្តធ្វើអ្វីក្នុងពេលទំនេរ មើលអ្វី និងអានអ្វី?
និងអាចបង្កើតសំណួរផ្សេងទៀត ដើម្បីឆ្លើយតបនឹងការបំពេញចិត្ត ឬទាក់ទាញអតិថិជនដែលមានស្រាប់នោះ មកជឿជាក់ និងសម្រេចចិត្តប្រើប្រាស់ផលិតផលឬសេវាកម្មរបស់អ្នក។

ចូរឈ្វេងយល់ពីរបៀបដែលអតិថិជនដែលមានស្រាប់ប្រើប្រាស់ផលិតផលរបស់អ្នក ក៏ដូចជាបញ្ហាប្រឈមអ្វីខ្លះដែលផលិតផលឬសេវាកម្មរបស់អ្នកអាចដោះស្រាយបាន។ ធ្វើបែបនេះ នឹងជួយឱ្យអ្នកអាចកែលម្អផលិតផលឬសេវាកម្មឱ្យមានភាពល្អប្រសើរ និងអាចកំណត់ឱកាសក្នុងការលក់បន្តជាមួយអតិថិជនដែលមានស្រាប់។

3. កំណត់គោលដៅជាក់ស្តែងសម្រាប់អាជីវកម្មរបស់អ្នក

ក្រោយពីបានប្រមូលព័ត៌មានអំពីអតិថិជនសក្ដានុពល និងអតិថិជនដែលមានស្រាប់រួចហើយ នោះអ្នកនឹងអាចប្រើទិន្នន័យនោះដើម្បីកំណត់គោលដៅដែលអាចសម្រេចបាន និងគោលដៅដែលអាចកំណត់បានតាមភាពជាក់ស្តែងក្នុងការកែលម្អជាបន្តបន្ទាប់នៅក្នុងអាជីវកម្ម និងធ្វើឱ្យអាជីវកម្មរបស់អ្នកកាន់តែមានសន្ទុះនៅក្នុងទីផ្សារជាក់ជាមិនខាន។

4. អាចបង្កើតឱកាសពង្រីកអាជីវកម្មរបស់អ្នក

ការស្រាវជ្រាវទីផ្សារ នឹងជួយអ្នកដើម្បីកំណត់តំបន់ណាមួយជាក់លាក់សម្រាប់ការពង្រីកអាជីវកម្មរបស់អ្នក ព្រមទាំងអាចផ្តល់ឱកាសដើម្បីសាកល្បងទីផ្សារក្នុងការកំណត់ថាតើមានកន្លែងសម្រាប់ផលិតផលឬសេវាកម្មថ្មីឬទេ? លើសពីនេះ អ្នកក៏អាចធ្វើការស្រាវជ្រាវទីផ្សារដើម្បីស្វែងរកទីតាំងល្អបំផុតដើម្បីបើកហាងថ្មី ឬក្រុមហ៊ុនថ្មីរបស់អ្នក។

5. កាត់បន្ថយហានិភ័យនៃភាពបរាជ័យ

នៅពេលធ្វើការស្រាវជ្រាវទីផ្សារ វានឹងជួយអ្នកឱ្យដឹងថាការអនុវត្តន៍សកម្មភាពអ្វីខ្លះដែលនឹងនាំឱ្យអ្នកទទួលរងនូវផលប៉ះពាល់ ឬអាចប្រឈមមុខនឹងភាពបរាជ័យ ដូច្នេះវានឹងធ្វើឱ្យអ្នកកាន់តែងាយស្រួលក្នុងការសម្រេចចិត្តថា នឹងត្រូវធ្វើសកម្មភាពអ្វីខ្លះសម្រាប់ការចាប់ផ្ដើមអាជីវកម្មថ្មីរបស់អ្នក។ លើសពីនេះ ការស្រាវជ្រាវទីផ្សារ ក៏អាចធ្វើឱ្យអ្នកដឹងពីវិធីឬបង្ហាញពីភស្តុតាងសំខាន់ៗមួយចំនួនក្នុងការធ្វើសកម្មភាពឆ្ពោះទៅកាន់ភាពជោគជ័យក្នុងការចាប់ផ្ដើមអាជីវកម្មរបស់អ្នកផងដែរ។

6. យល់ដឹងពីការប្រកួតប្រជែងរបស់អ្នក

ការស្រាវជ្រាវទីផ្សារ នឹងជួយបង្ហាញអ្នកឱ្យស្គាល់ថានរណាជាដៃគូប្រកួតប្រជែងរបស់អ្នក ហើយពួកគេភាគច្រើនស្ថិតនៅទីតាំងកន្លែងណា។ លើសពីនេះ វាក៏ជួយឱ្យអ្នកបានដឹងទៀតថា ការរចនាផលិតផល សេវាកម្ម ការកំណត់តម្លៃ និងទីផ្សារប្រកួតប្រជែងរបស់អ្នកនឹងអាចជះឥទ្ធិពលដែលធ្វើឱ្យអ្នករងនូវផលប៉ះពាល់កម្រិតណា។ ម្យ៉ាងទៀត តើអាជីវកម្មរបស់អ្នកនឹងអាចទទួលបានចំណែកទីផ្សារឬទេ? ហើយអាជីវកម្មរបស់អ្នកអាចទាញយកការប្រកួតប្រជែងនៅលើទីផ្សារនោះ មកកែច្នៃដើម្បីធ្វើឱ្យមានភាពខុសប្លែកពីដៃគូប្រកួតប្រជែង និងបំពេញតម្រូវការមនុស្សបែបណា។ល។

ជារួមមក ការធ្វើការស្រាវជ្រាវទីផ្សារមុនពេលចាប់ផ្ដើមអាជីវកម្ម នឹងជួយឱ្យអ្នកទទួលបាននូវព័ត៌មានជាក់លាក់ជាច្រើនលើសពី6ចំណុចដែលបានលើកឡើងខាងលើ ព្រោះវាមានសារៈសំខាន់ខ្លាំងណាស់សម្រាប់ម្ចាស់អាជីវកម្មគ្រប់រូប។ ហើយការស្រាវជ្រាវទីផ្សារនេះដែរ នឹងធ្វើឱ្យអ្នកកាន់តែមានភាពច្បាស់លាស់ក្នុងការចាប់ផ្ដើម ព្រមទាំងចាប់ផ្ដើមអាជីវកម្មប្រកបដោយទំនុកចិត្តខ្ពស់ ដោយមិនបារម្ភថា នៅពេលបើកអាជីវកម្មគ្មាននរណាគាំទ្រ គ្មានទីផ្សារ ជ្រើសរើសទីតាំងខុស ធ្វើយុទ្ធសាស្រ្តទីផ្សារខុសគោលដៅ មិនដឹងលក់ឱ្យនរណា ។ល។

មុនពេលស្រាវជ្រាវទីផ្សារ តើយើងត្រូវធ្វើអ្វីខ្លះ?

ដើម្បីអាចធ្វើឱ្យការស្រាវជ្រាវទីផ្សាររបស់អ្នកមានដំណើរល្អ និងមានប្រសិទ្ធភាពខ្ពស់ មុននឹងចាប់ផ្ដើមស្រាវជ្រាវទីផ្សារអ្នកត្រូវតែអនុវត្តន៍តាមវិធីខាងក្រោម៖

1. កំណត់គោលបំណងនៃការស្រាវជ្រាវទីផ្សាររបស់អ្នក

អ្នកត្រូវដឹងឱ្យបានច្បាស់ថា តើអ្នកចង់ដឹងអ្វីខ្លះ? បន្ទាប់មកកត់ត្រានូវរាល់គោលបំណងសំខាន់ៗដែលអ្នកចង់ធ្វើការស្រាវជ្រាវ។ អ្នកត្រូវចងចាំថា ប្រសិនបើអ្នកគញមានគោលបំណងច្បាស់លាស់នោះទេ នោះការស្រាវជ្រាវរបស់អ្នកក៏មិនមានភាពច្បាស់លាស់ដូចគ្នា។

គោលបំណងនៃការស្រាវជ្រាវទីផ្សារ អាចជា៖

ចង់ទាក់ទាញវិនិយោគិន
ចង់ស្វែងរកគំនិតល្អមួយដើម្បីកែលម្អអាជីវកម្ម
ចង់ស្គាល់ការប្រកួតប្រជែងក្នុងអាជីវកម្មរបស់អ្នកឮ
ចង់ដឹងពីអ្វីដែលអតិថិជនចង់បាន ឬជាតម្រូវការចាំបាច់របស់ពួកគេ
ចង់ដឹងពីផលិតផលឬសេវាកម្មរបស់អ្នក អាចនឹងបំពេញតម្រូវការទីផ្សារបានឬទេ ។ល។

2. សិក្សាពីប្រភេទនៃការស្រាវជ្រាវទីផ្សារ

មុននឹងចាប់ផ្ដើមស្រាវជ្រាវទីផ្សារ អ្នកក៏ត្រូវយល់ដឹងអំពីប្រភេទនីមួយៗនៃការស្រាវជ្រាវទីផ្សារដែរ ហើយអ្នកអាចសិក្សាបន្ថែមបានតាមតំណរភ្ជាប់ ដែលបានបង្ហាញនៅផ្នែកខាងលើនៃអត្ថបទមួយនេះបាន។ ហេតុអ្វីត្រូវសិក្សាប្រភេទរបស់វា? គឺដើម្បីធ្វើឱ្យអ្នកកាន់តែមានគំនិតបន្ថែម ថាត្រូវស្រាវជ្រាវទីផ្សារតាមរបៀបណា? ហើយអ្នកនឹងអាចដឹងថា ត្រូវជ្រើសរើសយុទ្ធសាស្រ្តណាខ្លះក្នុងចំណោមប្រភេទទាំងអស់នៃការស្រាវជ្រាវទីផ្សារ ដើម្បីអនុវត្តន៍។

3. បង្កើតសំណួរដែលអ្នកចង់ដឹងបន្ថែមក្នុងវិស័យរបស់អ្នក

ជាឧទាហរណ៍នៃសំណួរដែលអ្នកអាចបង្កើតបានរួមមាន៖

តើទីផ្សារសក្តានុពលរបស់អ្នកមានទំហំប៉ុនណា?
តើទីផ្សារនេះអាចរីកចម្រើនបានទេ?
តើអ្វីជាលក្ខណៈស្រដៀងនៃផលិតផលសេវាកម្មរបស់អ្នក?
តើនរណាជាគូប្រជែងសំខាន់របស់អ្នក?
តើចំណែកទីផ្សារនៃដៃគូប្រកួតប្រជែងរបស់អ្នកម្នាក់ៗមានអ្វីខ្លះ?
តើមានទីផ្សារពិសេសដែលអ្នកអាចបំពេញបានទេ?
តើអ្វីដែលអ្នកអាចបង្កើតឱ្យមានភាពលេធធ្លោដែលអ្នកផ្សេងទៀតមិនទាន់បានបង្កើត?
។ល។

ពាណិជ្ជកម្ម

តើគួរធ្វើការបណ្ដើរ និងចាប់ផ្ដើមរកស៊ីបណ្ដើរឬទេ?

Sann Thaven

យុវជនជាច្រើន តែងតែមានបំណងប្រាថ្នាចង់ចាប់ផ្ដើមអាជីវកម្មផ្ទាល់ខ្លួន ដោយពេលខ្លះមិននឹងទាន់ដឹងថា ចង់រកស៊ីអ្វីផង ហើយពេលខ្លះកំពុងតែនៅរៀន នៅធ្វើការនៅឡើយ។ ដូច្នេះសំណួរសួរថា ប្រសិនបើកំពុងធ្វើការ តើអាចធ្វើការបណ្ដើរ និងរកស៊ីបណ្ដើរបានដែរឬទេ? ចម្លើយនោះគឺ អាចផង និងមិនអាចផង ហេតុអ្វី? ខាងក្រោមនេះ នឹងពន្យល់ដល់អ្នក។

មិនអាច

អ្នកមិនអាចធ្វើការផង និងរកស៊ីផងនោះទេ ប្រសិនបើអ្នកមានចំណុចមួយចំនួនដូចខាងក្រោម៖

មិនដឹងថារកស៊ីលើផ្នែកអ្វីពិតប្រាកដ ប៉ុន្តែនឹងចាប់ផ្ដើមរកស៊ីចាប់គេតាមឯង ដោយមានហេតុផលថាចង់បង្កើនប្រាក់ចំណូលខ្លួនឯង
មិនទាន់ត្រៀមខ្លួនរួចរាល់ក្នុងការរកស៊ី
មិនទាន់យល់ច្បាស់ ឬមានចំណេះដឹងដែលអាចរកស៊ីបាន
គ្មានពេលវេលាគ្រប់គ្រាន់ក្នុងការបែងចែកថា ពេលណាផ្ដោតធ្វើការ និងពេលណាផ្ដោតលើការរកស៊ីផ្ទាល់ខ្លួនផង
កំពុងវង្វេងគោលដៅខ្លួនឯង
គ្មានដើមទុនគ្រប់គ្រាន់ក្នុងការចាប់ផ្ដើមរកស៊ីលើវិស័យដែលខ្លួនឯងចង់ធ្វើ
គ្មានអ្នកជួយជ្រោមជ្រែង ឬក្រុមការងារដើម្បីចាប់ផ្ដើមបានត្រឹមត្រូវ
មិនយល់ថា អ្វីជាការរកស៊ីផង
មិនដឹងពីរបៀបចាប់ផ្ដើម និងអាចដំណើរការអាជីវកម្មបានល្អផង ហើយកំពុងច្របូកច្របល់រឿងការងារ

អាច

អ្នកអាចចាប់ផ្ដើមបាន ប្រសិនបើអ្នកមានចំណុចដូចខាងក្រោម៖

ដឹងយ៉ាងច្បាស់ថា ខ្លួនឯងចង់រកស៊ីអ្វី
ខិតខំព្យាយាមធ្វើការងារដែលអ្នកចង់រកស៊ី ហើយកសាងកេរ្តិ៍ឈ្មោះខ្លួនឯង
ចាប់ផ្ដើមយកចំណេះជំនាញដែលខ្លួនឯង ដើម្បីលក់សេវាកម្មដល់អ្នកពាក់ព័ន្ធ ដោយជ្រើសរើសពេលវេលាបានត្រឹមត្រូវ ដោយមិនប៉ះពាល់ដល់ការងារ ឧទាហរណ៍ផ្ដល់ប្រឹក្សាយោបល់លើការធ្វើទីផ្សារ ការបង្កើតមាតិកា ។ល។
អ្នកអាចចាប់ផ្ដើមលក់អនឡាញលើផលិតផលដែលល្អ និងមានទីផ្សារស្រាប់ ដោយត្រូវមានអ្នកជួយជ្រោមជ្រែងពីក្រោយ ដូចជាបងប្អូន និងគ្រួសារជាដើម

ជារួមមក ទោះបីជាអ្នកកំពុងធ្វើការក៏ដោយ អ្នកក៏អាចចាប់ផ្ដើមរកស៊ីបានដែរ ប៉ុន្តែត្រូវរកស៊ីលើប្រភេទអាជីវកម្មតូចៗ ហើយមានហានិភ័យទាប ដោយយកចំណេះជំនាញរបស់អ្នកមករកស៊ីតាមរយៈការលក់សេវាកម្ម ឬជាប្រភេទ Freelancer ហើយជ្រើសរើសពេលវេលាមួយដ៏ល្អក្នុងការធ្វើវាដែលមិនប៉ះពាល់ដល់ការងារ។ ធ្វើបែបនេះ ទើបធ្វើឱ្យអ្នកមានពេលវេលាគ្រប់គ្រាន់ដើម្បីផ្ដោតលើការងារផង និងការរកស៊ីរបស់អ្នកផង។

ពាណិជ្ជកម្ម

របៀបគ្រប់គ្រងលំហូរសាច់ប្រាក់ក្នុងក្រុមហ៊ុន

Sann Thaven

ម្ចាស់អាជីវកម្ម និងសហគ្រិនជាច្រើនគឺមានការយល់ច្បាស់ពីសារៈសំខាន់នៃការលក់ និងប្រាក់ចំណេញ ប៉ុន្តែពួកគេមិនយល់ពីមូលហេតុដើម្បីរក្សាលំហូរសាច់ប្រាក់នោះទេ។ ការយល់ដឹងអំពីលំហូរសាច់ប្រាក់ប្រតិបត្តិការ គឺចាំបាច់សម្រាប់អាជីវកម្មដើម្បីដំណើរការប្រកបដោយប្រសិទ្ធភាព និងកាត់បន្ថយបំណុលដែលនៅសេសសល់។

ហេតុដូចនេះ ដើម្បីជួយម្ចាស់អាជីវកម្មគ្រប់រូបឱ្យមានការគ្រប់គ្រងលំហូរសាច់ប្រាក់ប្រតិបត្តិការអាជីវកម្មឱ្យបានល្អ ចូរអនុវត្តន៍តាមក្បួនខាងក្រោមនេះ។

1. ចាប់ផ្ដើមសិក្សាពីលំហូរសាច់ប្រាក់ និងផលប៉ះពាល់របស់វា

លំហូរសាច់ប្រាក់ ជាអ្វីដែលម្ចាស់អាជីវកម្មគួរតែតាមដាន ទាំងលំហូរសាច់ប្រាក់ចូល និងចេញ ពីព្រោះវាមានឥទ្ធិពលរាល់ការសម្រេចចិត្តក្នុងការធ្វើអ្វីមួយរបស់អ្នក។ ហើយអ្នកក៏ត្រូវចងចាំដែរថា ប្រសិនបើក្រុមហ៊ុនរបស់អ្នកអស់សាច់ប្រាក់ នោះអាជីវកម្មរបស់អ្នកក៏ត្រូវចប់ដែរ ដូច្នេះចូរកុំមើលរំលងអំពីចំណេះដឹងនៃការគ្រប់គ្រងលំហូរសាច់ប្រាក់ឱ្យបានល្អ។ ម្យ៉ាងទៀត លំហូរសាច់ប្រាក់នឹងមានផលប៉ះពាល់ដល់តម្លៃផលិតផល ការទូទាត់របស់អតិថិជន សំណងដល់បុគ្គលិក និងជាច្រើនទៀត។ ប៉ុន្តែ! ប្រសិនបើអ្នកយល់ច្បាស់អំពីរឿងទាំងនេះ ហើយពង្រឹងវាឱ្យបានរឹងមាំ នោះដំណើរការអាជីវកម្មក៏រីកចម្រើនតាមនោះដែរ។

2. ប្រៀបធៀបរវាងការលក់ និងលំហូរសាច់ប្រាក់

លំហូរសាច់ប្រាក់ ជាសាច់ប្រាក់ដែលចូលមកក្នុងក្រុមហ៊ុនតាមរយៈការលក់ និងប្រាក់ដែលចេញដើម្បីទូទាត់ការចំណាយ។ ត្រង់ចំណុចនេះ ក៏ចង់បញ្ជាក់ដល់ម្ចាស់អាជីវកម្មថ្មីៗឱ្យបានដឹងថា ប្រសិនបើការលក់បានច្រើន កុំទាន់គិតថាលំហូរសាច់ប្រាក់ល្អប្រសើរជាងមុនឱ្យសោះ ពីព្រោះការលក់កើនឡើង ចំណាយក៏កើនឡើងដូចគ្នា។ ហើយពេលខ្លះ ទោះបីជាការលក់កើនខ្លាំងក៏ដោយ ក៏អាចនាំឱ្យអាជីវកម្មមានការជាប់គាំងសម្រាប់សាច់ប្រាក់ផងដែរ ឧទាទាហរណ៍ លក់ទំនិញអស់ តែសាច់ប្រាក់ដែលទទួលបានគឺតិច ដោយសារមានអ្នកជំពាក់ខ្លះ ។ល។ ដូច្នេះនេះជាអ្វីដែលអ្នកត្រូវដឹង ហើយត្រូវធ្វើការប្រៀបធៀបរវាងការលក់ និងលំហូរសាច់ប្រាក់ដែលទទួលបាន ហើយគិតវិភាគដើម្បីកុំឱ្យមានការជាប់គាំងសាច់ប្រាក់។

3. ធ្វើការព្យាករណ៍សាច់ប្រាក់ប្រចាំសប្តាហ៍

ម្ចាស់អាជីវកម្ម គួរតែបង្កើតទម្លាប់ធ្វើការព្យាករណ៍សាច់ប្រាក់ប្រចាំសប្តាហ៍ រយៈពេល 13 សប្តាហ៍ នោះអ្នកនឹងមានការគ្រប់គ្រងសាច់ប្រាក់កាន់តែប្រសើរឡើង ហើយអាចកំណត់អាទិភាពដើម្បីបង្កើតលំហូរសាច់ប្រាក់នាំចូលមកកាន់ក្រុមហ៊ុន និងដឹងយ៉ាងច្បាស់ថាលំហូរសាច់ប្រាក់ចេញយ៉ាងមិចដែរ។

4. បន្តធ្វើបច្ចុប្បន្នភាពការព្យាករណ៍ 13 សប្តាហ៍

ម្ចាស់អាជីវកម្មត្រូវតែបន្តធ្វើការព្យាករណ៍សាច់ប្រាក់ក្នុងក្រុមហ៊ុនឱ្យបាន 13សប្ដាហ៍ ហើយរាល់សប្ដាហ៍ ត្រូវតែធ្វើបច្ចុប្បន្នភាពនៃការព្យាករណ៍ដោយផ្អែកលើអ្វីដែលបានកើតឡើងពីសប្ដាហ៍មុន និងបន្ថែមការព្យាករណ៍សម្រាប់សប្ដាហ៍បន្ទាប់ទៀត។ ធ្វើបែបនេះ អ្នកនឹងអាចតាមដានបានជាប់លាប់ពីស្ថានភាពនៃសាច់ប្រាក់ចូលក្នុងក្រុមហ៊ុន និងសាច់ប្រាក់ចេញពីក្រុមហ៊ុន។ ហើយអ្នកនឹងអាចមានវិធានការថ្មីៗ ដើម្បីធ្វើឱ្យមានភាពសកម្មជាងមុនក្នុងការដោះស្រាយរាល់វិបត្តិសាច់ប្រាក់នានាក្នុងក្រុមហ៊ុន។

5. កាត់បន្ថយថ្លៃដើមអថេរ

ដើម្បីអាចរក្សាប្រាក់ចំណូលឱ្យបានល្អ និងកាត់បន្ថយបញ្ហាសាច់ប្រាក់ គឺអ្នកត្រូវតែកាត់បន្ថយថ្លៃដើមអថេរ (Variable Costs) ។ ថ្លៃដើមអថេរនោះ អាចជាការចំណាយលើការផ្សព្វផ្សាយច្រើនលើសលប់ ថ្លៃដើមនៃទំនិញដែលបានលក់ វត្ថុធាតុដើម ធាតុចូលផលិតកម្ម ការវេចខ្ចប់ ប្រាក់ឈ្នួល កម្រៃជើងសារ និងឧបករណ៍ប្រើប្រាស់មួយចំនួន។ល។ ហេតុនេះ ក្នុងនាមជាម្ចាស់អាជីវកម្មត្រូវតែពិនិត្យមើលថាតើចំណាយលើអ្វីទើបសំខាន់ ហើយគួរកាត់បន្ថយចំណាយណាខ្លះដែលមិនចាំបាច់។

6. ស្វែងរកហិរញ្ញប្បទាន

ការដែលធ្វើឱ្យលំហូរសាច់ប្រាក់មានភាពល្អ ជារឿងសំខាន់ណាស់ដើម្បីអាចទទួលបានហិរញ្ញប្បទាន និងការពង្រីកអាជីវកម្មរបស់អ្នក។ ដូច្នេះម្ចាស់អាជីវកម្ម ត្រូវតែប្រើការព្យាករណ៍សាច់ប្រាក់របស់ខ្លួនដើម្បីកំណត់ពេលវេលាត្រឹមត្រូវក្នុងការស្វែងរកហិរញ្ញប្បទាន។

7. បង្កើតឧបករណ៍ព្យាករណ៍ផ្ទាល់ខ្លួន

ពិចារណាលើការបង្កើតឧបករណ៍ព្យាករណ៍លំហូរសាច់ប្រាក់ ដោយមុនពេលអ្នកភ្ជាប់វាទៅក្នុងសារពើភ័ណ្ឌបន្ថែម ឬការទូទាត់បំណុលដែលមិនចាំបាច់ ឬការចំណាយលើអ្វីផ្សេងទៀត សូមប្រើឧបករណ៍ព្យាករណ៍របស់អ្នកដើម្បីបង្ហាញសាច់ប្រាក់បច្ចុប្បន្នរបស់អ្នកនៅក្នុងដៃ ដូច្នេះអ្នកអាចធ្វើការសម្រេចចិត្តបានល្អ និងសម្រេចចិត្តថាតើអ្នកអាចបង្កើតដើមទុនថ្មីបានឬអត់។

ពាណិជ្ជកម្ម

របៀបសន្សំប្រាក់ នៅពេលដែលប្រាក់ចំណូលរបស់អ្នកទាប និងគ្រប់គ្រាន់សម្រាប់តែការចំណាយរបស់អ្នក

Rin Hanavy

តើខ្ញុំគួរសន្សំលុយដោយរបៀបណា បើសិនជាប្រាក់ខែដែលខ្ញុំទទួលបានមកហ្នឹងគ្រប់តែការចាយវាយ?

ស្ទើរតែគ្រប់ពេលទាំងអស់ ខ្ញុំតែងតែឮមនុស្សជុំវិញខ្លួនខ្ញុំនិយាយថា ពួកគាត់ពិតជាចង់ចាប់ផ្ដើមសន្សំលុយខ្លាំងណាស់ទុកគ្រាន់ទិញរបស់របសខ្លះពេលដែលមានការចាំបាច់ ប៉ុន្តែគាត់នៅតែមិនអាចសន្សំបាន ដោយសារតែប្រាក់ខែដែលបើកបានមកហ្នឹង គឺបានមួយគ្រប់ៗសម្រាប់ការចាយវាយប្រចាំថ្ងៃតែប៉ុណ្ណោះ ពោលគឺគ្រាន់តែថ្លៃទឹក ថ្លៃភ្លើង ថ្លៃបន្ទប់ជួល និងថ្លៃសាំងហ្នឹង បូកសរុបទៅ អស់ប្រហែលជាលើស50% នៃប្រាក់ខែដើមទៅហើយ។ ហើយជារៀងរាល់ខែក៏ពុំដែលឃើញលុយសល់អ្វីដែរ អ្នកខ្លះចុងខែសល់តែបំណុលជុំទិសក៏មាន ដោយសារតែចំណាយចាយត្រឹមឬលើសចំណូលដែលខ្លួនរកបាន។

មែនទែនទៅតើយើងគួរធ្វើបែបណាទើបអាចដកលុយមួយចំនួនសម្រាប់សន្សំបានទៅ?

ខាងក្រោមនេះគឺជាគន្លឺះមួយចំនួនដែលអាចជួយអ្នកអាចសន្សំលុយបានខ្លះ បើទោះបីជាប្រាក់ខែរបស់អ្នកតិចក៏ដោយ៖

1. កាត់បន្ថយការចំណាយដ៏ច្រើនលើសលប់របស់អ្នក

ការព្យាយាមសន្សំលុយ ខណៈពេលដែលអ្នកទទួលបានប្រាក់ខែតិចឬល្មមសម្រាប់តែការចាយវាយប្រចាំថ្ងៃនេះ វាអាចជារឿងមួយដែលពិបាកសម្រាប់អ្នក ហើយពេលខ្លះទៀតនោះសូម្បីតែដកលុយសន្សំមួយដុល្លារឬពីរក្នុងមួយខែហ្នឹង ក៏សឹងតែមិនអាចផង។ ប៉ុន្តែអ្នកក៏នៅតែអាចសន្សំលុយបានមួយចំណែកដែរ ដោយកាត់បន្ថយការញ៉ាំបាយ ឬការទិញទឹកសុទ្ធនៅខាងក្រៅ ជំនួសឲ្យការញ៉ាំបាយនៅឯផ្ទះ ឬវេចបាយដាក់ទឹក យកមកញ៉ាំនៅកន្លែងធ្វើការ ហើយប្រសិនបើមានមិត្តភក្តិចង់បបួលអ្នកទៅដើរលេងឬទៅញ៉ាំអីនៅខាងក្រៅ ពេលខ្លះអ្នកក៏គួរតែរៀននិយាយបដិសេធខ្លះប្រសិនបើអ្នកចង់សល់លុយ ប៉ុន្តែមិនមែនមានន័យថាគ្រប់ពេលដែលគេបបួលអ្នកបដិសេធរហូតនោះទេ។

អ្នកឃើញទេ ប្រសិនបើអ្នកអាចធ្វើបែបនេះជារៀងរាល់ថ្ងៃ អ្នកក៏អាចសល់លុយខ្លះៗទុកសន្សំដែរ ពីព្រោះប្រសិនបើយើងគិតជាទឹកលុយដែលយើងត្រូវចំណាយតែទៅលើការញ៉ាំអាហារពេលព្រឹក និងពេលថ្ងៃនៅខាងក្រៅ ក៏អស់ប្រហែលជា 3$ ទៅ 4$ ដែរ។ ហើយ ប្រសិនជារបស់ណាដែលមិនចាំបាច់ក្នុងការចាយវាយទេ កុំទិញវានាំតែជាប់បំណុលច្រើនពេកអី អ្នកត្រូវប្រាប់ខ្លួនឯងថា “ទប់អារម្មណ៍ៗ កុំទិញ អស់លុយ”។

2. កំណត់គោលដៅសន្សំ

តើចំនួនទឹកប្រាក់ប៉ុន្មានដែលអ្នកចង់សន្សំឲ្យបាន? ហើយដើម្បីឲ្យការសន្សំរបស់អ្នកឆាប់ដល់ចំនួនទឹកប្រាក់ដែលអ្នកចង់បាននោះ អ្នកគួរតែរៀបចំចាត់ចែងដោយរបៀបណាខ្លះ?

ជាឧទាហរណ៍បញ្ជាក់៖ ប្រសិនបើ គោលដៅរបស់អ្នកគឺចង់សន្សំលុយឲ្យបាន$2,000 ក្នុងរយៈពេល១ឆ្នាំ។ ដូចនេះប្រាក់ខែរបស់អ្នកគួរតែ ស្ថិតនៅក្នុងចន្លោះ $300-$400 ព្រោះប្រសិនបើអ្នកចង់សន្សំលុយឲ្យបានខ្ទង់$2,000ក្នុង១ឆ្នាំ អ្នកត្រូវដកលុយប្រហែលជា $166.66 ក្នុងមួយខែសម្រាប់ការសន្សំ តែបើសិនជាគិតជាថ្ងៃវិញ គឺអ្នកត្រូវដកលុយ $6 ($5.965ដើម្បីសន្សំជារៀងរាល់ថ្ងៃ ហើយនៅសល់ប៉ុន្មានទៀត អ្នកអាចយកទៅចំណាយទៅលើការរស់នៅប្រចាំថ្ងៃរបស់អ្នក។

មួយឆ្នាំ : $2,000

មួយខែ : $166.66 ($167)

មួយសប្ដាហ៍ : $41.66

មួយថ្ងៃ : $5.95 = $6

ដូចនេះប្រសិនបើអ្នកចង់សល់លុយខ្លះ អ្នកត្រូវដឹងអំពីចំនួនលុយដែលអ្នកត្រូវចាយជារៀងរាល់ខែ ដើម្បីអាចដឹងពីចំនួនលុយដែលនៅសល់ និងអាចដកសន្សំបានខ្លះ។

ពាណិជ្ជកម្ម

តើធ្វើដូចម្ដេចទើបខ្ញុំអាចដណ្ដើមយកចំណែកទីផ្សារបានច្រើនជាងដៃគូប្រកួតប្រជែង?

Rin Hanavy

តើលោកអ្នកធ្លាប់ឆ្ងល់ទេ ថាហេតុអ្វីបានជាប្រកបអាជីវកម្មដូគ្នា ប៉ុន្តែហេតុអ្វីបានជាដៃគូប្រកួតប្រជែងខ្ញុំទទួលបានជោគជ័យ ខណៈពេលអាជីវកម្មរបស់ខ្ញុំធ្លាក់ចុះចំនួននៃការលក់បែបនេះទៅវិញ?

តោះ! មកឈ្វេងយល់អំពីមូលហេតុដែលធ្វើឲ្យដៃគូប្រកួតប្រជែងជាមួយនឹងយើងទាំងអស់គ្នា! ដៃគូប្រកួតប្រជែងរបស់អ្នកទទួលបានជោគជ័យជាងក៏ព្រោះតែគេ៖

១. ប្រើយុទ្ធសាស្ត្រឲ្យបានត្រឹមត្រូវ

ប្រសិនបើអាជីវកម្មរបស់អ្នកកំពុងតែស្ថិតនៅក្នុងស្ថានភាពមួយដែលលក់ពុំសូវដាច់ខណៈពេលដែលដៃគូប្រជែងរបស់អ្នកអាចរកចំណូលបានច្រើនពីការលក់ អ្នកគួរតែងាកមកមើលពីយុទ្ធសាស្ត្រដែលអ្នកបានដាក់ចេញហ្នឹងម្ដងទៀត ថាតើរបៀបដែលអ្នករចនារូបភាព ក៏ដូចជាមាតិកាដែលអ្នកផ្សព្វផ្សាយចេញទៅនេះស្ថិតនៅក្នុងកម្រិតណា? មានភាពទាក់ទាញដែលឬទេ? មានការចូលរួមពីសំណាក់អតិថិជនដែរឬទេ? ហើយប្រភេទអតិថិជនគោលដៅរបស់អ្នកជាអ្នកណា? ជាយុវវ័យ ឬក៏មនុស្សចាស់? ស្រ្តីឬក៏បុរស? និងពិនិត្យមើលឡើងវិញទាក់ទងទៅនឹងច្រកផ្សព្វផ្សាយរបស់អ្នក ថាតើវេទិកាដែលអ្នកកំពុងផ្សព្វផ្សាយនេះមានប្រសិទ្ធភាពឬអត់ជាដើម?

មែនទែនទៅដៃគូប្រជែងរបស់អ្នក លក់ដាច់ជាងអ្នក គឺដោយសារតែពួកគេ បានកំណត់យ៉ាងច្បាស់ថានរណាជាអតិថិជនគោលដៅរបស់ពួកគេ រួចចាប់ផ្ដើមរៀបចំយុទ្ធសាស្ត្រក៏ដូចជាធ្វើយុទ្ធនាការបែបណាដើម្បីទាក់ទាញអតិថិជនឲ្យមកចាប់អារម្មណ៍ជាមួយនឹងផលិតផលរបស់ខ្លួន តាមរយៈការបង្កើតមាតិកាដ៏គួរឲ្យចាប់អារម្មណ៍ជាច្រើន ទាក់ទងទៅនឹងផលិតផលរបស់ខ្លួន ដូចជាការហៅ Influencer ឲ្យមកជួយផ្សព្វផ្សាយ ដោយផ្ដោតទៅលើគុណភាពនៃការឌីហ្សាញរូបភាព វីដេអូណែនាំ បូករួមនឹងការសរសេរព័ត៌មានខ្លីខ្លឹមរបស់ផលិតផល ដើម្បីជាសារចែកជូនទៅឲ្យអតិថិជនបានដឹង បានស្គាល់ និងចង់សាកល្បងប្រើប្រាស់កាន់តែច្រើន។ អ្វីដែលសំខាន់មួយទៀតនៃភាពជោគជ័យរបស់ដៃគូប្រកួតប្រជែងរបស់អ្នកនោះគឺ ការចេះស្វែងរកអ្នកដែលមានឥទ្ធិពលដែលមានប្រជាប្រិយភាព មានជំនាញដើម្បីហៅមកជួយផ្សព្វផ្សាយផលិតផលរបស់ខ្លួនឲ្យកាន់តែផ្ទុះជាងមុន។

២. សេវាកម្មល្អ

ចំណុចមួយទៀតដែលធ្វើឲ្យផលិតផលរបស់អ្នកលក់ពុំសូវដាច់ដូចគេ គឺវាអាចមកពីការផ្ដល់នូវសេវាកម្មរបស់អ្នកនៅខ្សោយនៅឡើយ ទាំងផ្នែកដឹកជញ្ជូន និងសេវាកម្មក្នុងហាង។

ដូចនេះអ្នកគួរតែត្រឡប់ទៅពិនិត្យមើលការផ្ដល់សេវាកម្មរបស់ក្រុមហ៊ុនអ្នកឡើងវិញ ថាតើអតិថិជនមិនមករកអ្នកដោយសារតែចំណុចនេះឬយ៉ាងណា ប្រសិនបើនៅមានចន្លោះខ្វះខាតពិតមែន អ្នកត្រូវតែកែតម្រូវវាឲ្យបានរហ័ស មិនថាសេវាកម្មក្នុងការទទួលរាក់ទាក់ភ្ញៀវ ឬសេវាជួសជុល សេវាថែទាំ និងសេវាកម្មដឹកជញ្ជូននោះទេ។

៣. ការបំពេញចិត្តអតិថិជន

តើអ្នកគួរយកចិត្តអតិថិជនដោយរបៀបណា? ហើយអាជីវកម្មរបស់អ្នកមានបានបង្ហាញពីការយកចិត្តទុកដាក់ និងការព្រួយបារម្ភទៅលើអតិថិជនដែរឬទេ?

ដៃគូប្រកួតប្រជែងរបស់អ្នកអាចយកឈ្នះអ្នកបានគឺស្ថិតនៅត្រង់ចំណុចនេះឯង ប្រសិនបើអ្នកមិនចាប់អារម្មណ៍ទៅលើការបំពេញចិត្តអតិថិជនទេ នោះអ្នកនឹងបាត់បង់ឱកាសក្នុងការទទួលបានអតិថិជនថ្មីៗជាមិនខាន។

៤. បុគ្គលិកលក់យល់ច្បាស់ពីព័ត៌មានរបស់ផលិតផល

ការណ៍ដែលបុគ្គលិកលក់ មិនដឹងច្បាស់អំពីផលិតផល មិនដឹងថាផលិតផលដែលខ្លួនកំពុងតែលក់នោះនាំចូលមកពីណា មិនដឹងថាវាមានអត្ថប្រយោជន៍បែបណាខ្លះ និងរឹតតែមិនដឹងអំពីរបៀបនៃការនិយាយណែនាំ និយាយបញ្ចុះបញ្ចូលអតិថិជនទៀតនោះ ការលក់របស់អ្នកប្រាកដជាធ្លាក់ចុះជាមិនខាន។

កត្តាដែលធ្វើឲ្យអាជីវកម្មរបស់ដៃគូប្រកួតប្រជែងរបស់អ្នកលេចធ្លោជាងអ្នក និងមានអ្នកគាំទ្រជាងអ្នក គឺដោយសារតែបុគ្គលិករបស់គេ ម្នាក់ៗត្រូវបានបណ្ដុះបណ្ដាលឲ្យបានដឹងយ៉ាងច្បាស់អំពីផលិតផលនីមួយៗ ថាវាមកនាំចូលមកពីប្រទេសណា មានអត្ថប្រយោជន៍បែបណាខ្លះ និងដឹងអំពីរបៀបប្រាស្រ័យទាក់ទងជាមួយនឹងអតិថិជន ដូចនេះនៅពេលដែលអតិថិជនគេមកទិញ គឺអតិថិជនមានអារម្មណ៍ល្អ ព្រោះបានដឹងនូវព័ត៌មានលម្អិតអំពីផលិតផលនីមួយៗ។

ពាណិជ្ជកម្ម

រឿងរ៉ាវនៃភាពជោគជ័យរបស់លោក Tim Cook នាយកប្រតិបត្តិ Apple

Sann Thaven

Tim Cook គឺជានាយកប្រតិបត្តិនៃក្រុមហ៊ុន Apple នាបច្ចុប្បន្ន និងជាសហគ្រិនដ៏ល្អម្នាក់នៅក្នុងពិភពលោក។ កាលពីអាជីពរយៈពេល 12 ឆ្នាំនៅ IBM លោក Cook បានបន្តបម្រើការងារនៅក្រុមហ៊ុន Intelligent Electronics និង Compaq ។ ក្រោយមកក្នុងឆ្នាំ 1998 លោក Cook បានចូលបម្រើការងារជាមួយក្រុមហ៊ុន Apple ហើយបន្ទាប់ពី10 ឆ្នាំនៅក្នុងក្រុមហ៊ុន គាត់ត្រូវបានគេតែងតាំងជា CEO របស់ក្រុមហ៊ុន Apple។

រឿងរ៉ាវជីវិតរបស់ Tim Cook

រឿងរ៉ាវជីវិតរបស់ Cook បានចាប់ផ្តើមនៅពេលដែលគាត់កើតនៅទីក្រុង Robertsdale រដ្ឋ Alabama នៅថ្ងៃទី 1 វិច្ឆិកា 1960។ គាត់បានចូលរៀននៅវិទ្យាល័យ Robertsdale ហើយបានបញ្ចប់ការសិក្សា នៅឆ្នាំ 1978 ។ ក្រោយមកទៀត គាត់ក៏បានចុះឈ្មោះចូលរៀននៅសាកលវិទ្យាល័យ Auburn ក្នុងរដ្ឋ Alabama។ Cook បានបញ្ចប់ការសិក្សានៅឆ្នាំ 1982 ជាមួយនឹងបរិញ្ញាបត្រផ្នែកវិស្វកម្មឧស្សាហកម្ម។ ការអប់រំ Tim Cook ត្រូវបានបញ្ចប់នៅពេលទទួលបាន MBA ពីសាលាពាណិជ្ជកម្ម Fuqua នៃសាកលវិទ្យាល័យ Duke ក្នុងឆ្នាំ 1988 ។

ក្នុងអំឡុងពេលកុមារភាព Tim Cook នៅសាលា Fuqua School of Business គាត់បានទទួលងារជា Fuqua Scholar ដែលជាឈ្មោះត្រូវបានផ្តល់ឱ្យតែសិស្សនៅសាលាធុរកិច្ចដែលបានបញ្ចប់ការសិក្សានៅក្នុងលំដាប់ពិន្ទុខ្ពស់ 10% នៃថ្នាក់របស់ពួកគេ។ ក្រោយពីបានបញ្ចប់ការសិក្សា MBA លោក Cook បានចាប់អាជីពក្នុងវិស័យបច្ចេកវិទ្យាកុំព្យូទ័រ។ បន្ទាប់មក Cook ត្រូវបានជួលដោយ IBM មកធ្វើការងារដែលគាត់ពូកែ រហូតបានក្លាយជានាយកប្រតិបត្តិនៃក្រុមហ៊ុន North American ។

Tim Cook មានអាជីពរយៈពេល 12 ឆ្នាំនៅ IBM ហើយគាត់បានក្លាយជាប្រធានផ្នែកប្រតិបត្តិការនៃផ្នែកលក់បន្តនៅ Intelligent Electronics។ បន្ទាប់ពីធ្វើការនៅ Intelligent Electronics គាត់បានប្តូរទៅក្រុមហ៊ុន Compaq Computer Corporation ជាអនុប្រធានផ្នែកសម្ភារៈសាជីវកម្ម។ ទោះជាយ៉ាងណាក៏ដោយ ការកាន់កាប់របស់ Cook នៅ Compaq គឺមានរយៈពេលខ្លី។ បន្ទាប់ពីនោះមក ជីវិតរបស់ Tim Cook បានផ្លាស់ប្តូរនៅពេលចូលបម្រើការងារនៅក្រុមហ៊ុន Apple។

ជីវិតធ្វើការនៅក្រុមហ៊ុន Apple

រឿងរ៉ាវរបស់ Tim Cook ជាមួយក្រុមហ៊ុន Apple បានចាប់ផ្តើមនៅដើមឆ្នាំ 1998 មុនពេលក្រុមហ៊ុនបានបង្កើត iMac, iPod, iPhone ឬ iPad។

នៅពេលថ្លែងក្នុងកម្មវិធីពិធីមួយ Tim Cook បាននិយាយថា ខណៈពេលដែល Apple ផលិត Macs ក្រុមហ៊ុនបានបាត់បង់ការលក់អស់ជាច្រើនឆ្នាំ ហើយស្ទើតែបាត់បង់ប្រាក់ចំណូលទាំងស្រុង។ បន្ទាប់មក Tim Cook ក៏ចាប់ផ្ដើមកាន់តែតំណែងជាអនុប្រធាន ដោយកាន់មិនបានមួយឆ្នាំផង សាជីវកម្មកំពុងរាយការណ៍ពីប្រាក់ចំណេញ និងមានការផ្លាស់ប្តូរមិនធម្មតាពីរបាយការណ៍ថ្មីៗនេះដែលបង្ហាញពីការខាតបង់សុទ្ធជាង 1 ពាន់លានដុល្លារពីឆ្នាំសារពើពន្ធមុន។

កិត្តិនាមរបស់ប្រធាន Tim Cook បានធ្វើឱ្យមនុស្សកាន់តែជឿជាក់នៅពេលគាត់បានឡើងឋានន្តរស័ក្តិ ហើយបានបំពេញកាតព្វកិច្ចសម្រាប់ការគ្រប់គ្រងការលក់ ការផ្សាយពាណិជ្ជកម្ម និងប្រតិបត្តិការអន្តរជាតិ។ រយៈពេល 12 ខែ 2011 Tim Cook ត្រូវបានតែងតាំងជា CEO ថ្មីរបស់ក្រុមហ៊ុន Apple ។ គាត់បានទទួលយកការផ្ទេរតំណែងពី Steve Jobs ដែលបានស្លាប់ក្នុងរយៈពេល 12 ខែដូចគ្នា។

ក្រៅពីបម្រើការជានាយកប្រតិបត្តិ Apple លោក Tim ក៏ជាផ្នែកមួយនៃក្រុមប្រឹក្សាភិបាលរបស់សាជីវកម្ម។ ហើយក្រោមការដឹកនាំរបស់ Tim Cook ក្នុងឆ្នាំ 2014 ក្រុមហ៊ុន Apple បានណែនាំការទិញយកដ៏ធំបំផុតរបស់ខ្លួន ខណៈដែលខ្លួនបានលក់ Beats Music និង Beats Electronics ក្នុងតម្លៃ 3 ពាន់លានដុល្លារ។ យោងតាមកិច្ចព្រមព្រៀងនេះ សហស្ថាបនិក Beats អាចជាផ្នែកមួយនៃក្រុមហ៊ុន Apple ក្នុងតួនាទីរដ្ឋាភិបាល។

ហេតុអ្វី Tim Cook ជោគជ័យ?

ប្រវត្តិរបស់ Tim Cook ជាការបំផុសគំនិតនិងជំរុញចិត្តមនុស្សបានយ៉ាងខ្លាំង ដោយសារគាត់ជាបុគ្គលដែលមានឥទ្ធិពល ហេតុដូច្នេះហើយតួនាទីរបស់គាត់គឺមានសារៈសំខាន់ខ្លាំងណាស់ក្នុងការអភិវឌ្ឍន៍សង្គម និងបច្ចេកវិទ្យា។ ក្នុងឆ្នាំ 2011 Tim ត្រូវបានគេដាក់ឈ្មោះនៅក្នុងទស្សនាវដ្តី Forbes ថាជាមនុស្សមានឥទ្ធិពលបំផុតរបស់ពិភពលោក។ លើសពីនេះ Tim Cook ក៏ធ្លាប់ត្រូវបានគេដាក់ឈ្មោះថាជា CEO ដែលទទួលបានប្រាក់ខែខ្ពស់បំផុតក្នុងចំណោមក្រុមហ៊ុនធំៗផងដែរ។

ដូច្នេះហេតុអ្វី Tim Cook ជោគជ័យ? វាគឺដោយសារយុទ្ធសាស្ត្រគ្រប់គ្រងដ៏ល្អដែលបានជួយក្រុមហ៊ុនកើនឡើងយ៉ាងឆាប់រហ័ស ជាមួយនឹងប្រាក់បៀវត្សរ៍របស់គាត់គឺប្រហែល $900,00 លោក Tim ឈរជា CEO ដែលមានជាងគេបំផុតនៅលើពិភពលោក។

Tim ក៏សកម្មក្នុងការងារសប្បុរសធម៌ដែរ! ក្នុងឆ្នាំ 2015 លោកបានប្រកាសថាបន្ទាប់ពីចំណាយលើការសិក្សារបស់ក្មួយប្រុស គាត់នឹងបរិច្ចាគប្រាក់ចំណូលដែលនៅសល់ទៅគម្រោងសប្បុរសធម៌។

ពាណិជ្ជកម្ម

តើ Content Writing អាចជួយអ្វីខ្លះក្នុងអាជីវកម្មខ្នាតតូច និងមធ្យម?

Sann Thaven

Content Writing (ការសរសេរមាតិកា) គឺពាក់ព័ន្ធនឹងការបង្កើតខ្លឹមសារអត្ថបទ ដើម្បីអប់រំ ឬកម្សាន្តចិត្តអ្នកអាន ដោយខ្លឹមសារទាំងនោះត្រូវតែមានគុណភាពខ្ពស់និងមានគុណតម្លៃ។ ហើយវាក៏ជាផ្នែកមួយដែលអាចជំរុញការលក់ផងដែរ ប៉ុន្តែនេះមិនមែនជាគោលបំណងចម្បងរបស់វានោះទេ។

ម្ចាស់អាជីវកម្ម ភាគច្រើននៅពេលពួកគេជួលផ្នែក Content Writer ឱ្យមកធ្វើការនៅក្រុមហ៊ុនរបស់ពួកគេ គឺចង់បង្កើនចរាចរណ៍ទៅកាន់គេហទំព័រ ឬដើម្បីជូនដំណឹងដល់អតិថិជនរបស់ពួកគេអំពីផលិតផល ឬសេវាកម្មថ្មី និងដើម្បីផលិតសារដែលមានគុណភាពខ្ពស់សម្រាប់ការលក់ បង្កើតប្លុក អត្ថបទ និងការបង្ហោះតាមប្រព័ន្ធផ្សព្វផ្សាយសង្គម។

តើ Content Writer ធ្វើអ្វីខ្លះ?

អ្វីដែល Content Writer ធ្វើ និងមានទំនួលខុសត្រូវជាប្រចាំ រួមមាន៖

ស្រាវជ្រាវលើប្រធានបទណាមួយ ដើម្បីឈ្វេងយល់កាន់តែលម្អិត
ធ្វើការជាមួយម្ចាស់អាជីវកម្មដើម្បីកំណត់តម្រូវការមាតិកា
ការបង្កើតរចនាប័ទ្ម និងការណែនាំអំពីទម្រង់ ដើម្បីធានាបាននូវភាពស៊ីសង្វាក់គ្នារវាងគម្រោងនានា ហើយធានាថាខ្លឹមសារមានភាពស៊ីសង្វាក់គ្នា និងច្បាស់លាស់
បង្កើត SEO ដើម្បីធានាថា អតិថិជនគោលដៅ ងាយស្រួលស្វែងរកនៅលើប្រព័ន្ធអនឡាញ
កែប្រែខ្លឹមសារដោយផ្អែកលើសំណើរបស់អតិថិជន និងម្ចាស់អាជីវកម្មផ្ទាល់
បញ្ចប់ការសរសេរគម្រោងតាមកាលកំណត់

ប្រភេទនៃ Content Writing

Blog Posts

Articles
Blog posts
Interviews
Research

Copywriting

Website copy
Infographics
Traditional print media
Product descriptions

Ghostwriting

Articles
Ebooks
White papers
Thought leadership
Off-page content
Website copy

Technical Writing

How-Tos
Guides
FAQs
Instructions
Manuals
UX (User Experience) Messaging

Social Media Posts

Social media posts
Quizzes
Interactive content
Platform-specific content
PR outreach

Brand journalist

Brand stories
Interviews
Customer stories
Press releases
Internal communications
Boilerplates
Company bios

Email Writing

Newsletters
Drip campaigns
Transactional emails
Sales nurture
Customer nurture

Scriptwriting

Video scripts
Explainer video scripts
Podcast scripts
Radio/audio advertising
Motion graphics scripts
Chatbots

Long-form content writing

Ebooks
Data studies
White papers
Case studies

Ad and promo writing

Advertising copy
Direct mail copy
Landing pages
Promo blurbs onsite
Product descriptions

គុណប្រយោជន៍របស់ Content Writer ដែលជួយនៅក្នុងអាជីវកម្ម

1. បង្កើនការយល់ដឹងអំពីម៉ាកយីហោរបស់អ្នក

Content Writing ជាផ្នែកសំខាន់មួយនៃទីផ្សារអនឡាញ និងការបង្កើនប្រសិទ្ធភាពម៉ាស៊ីនស្វែងរកព្រមទាំងជួយដល់អាជីវកម្មខ្នាតតូច និងមធ្យមផងដែរ ពីព្រោះវាអាចធ្វើឱ្យអាជីវកម្មរបស់អ្នកបង្ហាញកាន់តែខ្លាំងនៅលើលទ្ធផលម៉ាស៊ីនស្វែងរក និងវេទិកាប្រព័ន្ធផ្សព្វផ្សាយសង្គម។ ដូច្នេះតាមរយៈការបង្កើតមាតិកាមានភាពទាក់ទាញច្រើន នោះអតិថិជនសក្ដានុពលរបស់អ្នកនឹងចូលទៅកាន់គេហទំព័រ ឬBlog របស់អ្នក ហើយឈ្វេងយល់បន្ថែមទៀតអំពីម៉ាកយីហោរបស់អ្នក។

2. បំប្លែងអ្នកប្រើប្រាស់ឱ្យទិញផលិតផល ឬចុះឈ្មោះ

តាមរយៈការសរសេរមាតិកា គឺវាជាផ្នែកមួយដ៏សំខាន់ដើម្បីសរសេរដោះស្រាយបញ្ហារបស់អ្នកអាន ឆ្លើយតបសំណួររបស់អ្នកអាន ឬផ្ដល់ព័ត៌មានផ្សេងៗដែលអ្នកអានត្រូវការ ព្រមទាំងអាចអូសទាញចិត្តរបស់អ្នកអានឱ្យធ្វើសកម្មភាពណាមួយជាក់លាក់ (Call-To-Action) ដូចជាចុចតាម Link នេះដើម្បីកម្ម៉ង់អីវ៉ាន់ជាដើម។

ការធ្វើបែបនេះហើយ មិនយូរទេ យើងនឹងអាចបំប្លែងអ្នកអានទាំងឡាយបន្ដិចម្ដងៗឱ្យក្លាយជាអតិថិជនដ៏ស្មោះត្រង់នៅក្នុងអាជីវកម្មរបស់អ្នក។

3. ធ្វើឱ្យអតិថិជនមានបទពិសោធន៍កាន់តែប្រសើរ

ការសរសេរមាតិកា អាចធ្វើឱ្យអ្នកលក់មិនសូវដាច់ខ្លាំងនោះទេ ប៉ុន្តែវាផ្ដល់ត្រឡប់សម្រាប់អាជីវកម្មខ្នាតតូច និងមធ្យមនូវការផ្ដោតលើការផ្ដល់ព័ត៌មានដ៏មានគុណតម្លៃ និងមានអត្ថន័យដល់អ្នកអាន ព្រមទាំងអាចផ្ដល់នូវបទពិសោធន៍ល្អៗជាមួយនឹងអាជីវកម្មរបស់អ្នក។ នៅពេលដែលអ្នកអានពេញចិត្តជាមួយនឹងមាតិកាដែលបានសរសេរ នោះអ្នកអានក៏ទំនងជាកំពុងគាំទ្រចំពោះម៉ាកយីហោរបស់អ្នកផងដែរ។

4. យល់ពីអតិថិជនគោលដៅបានកាន់តែច្បាស់

អំឡុងពេលដែលអ្នកសរសេរមាតិកានៅតែបន្តធ្វើសកម្មភាពដើម្បីទាក់ទាញចិត្តអ្នកអាន នោះវានឹងផ្ដល់ឱ្យម្ចាស់អាជីវកម្មខ្នាតតូច និងមធ្យម កាន់តែយល់និងស្គាល់អំពីអតិថិជនរបស់ខ្លួនឯងកាន់តែប្រសើរជាងមុន ដើម្បីកែលម្អលើការខិតខំប្រឹងប្រែងលើការធ្វើទីផ្សារ និងរបៀបផ្ដល់នូវផលិតផលសេវាកម្មដល់ពួកគេកាន់តែល្អបំផុត។ លើសពីនេះ វាក៏ជាវិធីដ៏ល្អមួយ ដើម្បីភ្ជាប់ទំនាក់ទំនងជាមួយអតិថិជនសក្ដានុពលរបស់អ្នកនៅលើវេទិកាប្រព័ន្ធផ្សព្វផ្សាយសង្គម និងធ្វើឱ្យដំណើរក្រុមហ៊ុនរបស់អ្នកមានភាពល្អប្រសើរជាងមុន។

5. បង្កើនចំណេះដឹងដល់អ្នក

ការបង្កើតមាតិកាផ្តល់អត្ថប្រយោជន៍ដល់ម្ចាស់អាជីវកម្មខ្នាតតូច និងមធ្យមទាំងអស់នូវវិធីមួយដើម្បីឈ្វេងយល់បន្ថែមអំពីឧស្សាហកម្មនិងកែលម្អសេវាកម្មរបស់ខ្លួនឱ្យកាន់តែល្អប្រសើរ។ ហើយការសរសេរខ្លឹមសារមាតិកាក៏អាចជួយម្ចាស់អាជីវកម្មឱ្យទទួលបាននូវធនធានទាំងអស់ដែលពួកគេត្រូវការ។

ពាណិជ្ជកម្ម

តើត្រូវធ្វើដូចម្ដេច នៅពេល Boost Post មិនសូវបានផល?

Sann Thaven

លោកយីម សំណាង (ឈ្មោះក្រៅហៅថា Zell) ជាអ្នកគ្រប់គ្រងទីផ្សារជាន់ខ្ពស់ បានចែករំលែកនូវគន្លឹះពីរយ៉ាងប្រសិនបើអ្នក Boost post មិនសូវបានផល នៅលើគណនី TikTok ផ្ទាល់ខ្លួន។ ហើយខាងក្រោមនេះ ជាគន្លឹះដែលគាត់បានបង្ហាញ រួមមាន៖

1. ផ្លាស់ប្ដូរ Content និង Ads របស់អ្នក

អ្នកអាចគិតពិចារណាលើរូបភាព វីដេអូ អតិថិជនគោលដៅ និងទីតាំងផ្សព្វផ្សាយរបស់អ្នក ពីព្រោះវាអាចមានភាពដដែលៗពេក ជាហេតុធ្វើឱ្យ Content និងAdSense របស់អ្នក បង្ហាញទៅកាន់អតិថិជនដដែលៗនៅទីតាំងផ្សព្វផ្សាយដូចគ្នា។ ជាដំណោះស្រាយដ៏ល្អនៅក្នុងចំណុចនេះ ចូរសាកល្បងផ្សព្វផ្សាយនូវ Poster ថ្មី, វីដេអូថ្មី, អតិថិជនគោលដៅថ្មី និងសាកល្បងទីតាំងដែលត្រូវការផ្សព្វផ្សាយថ្មីៗជាដើម។

2. សាកល្បងគន្លឹះថ្មី ដោយកុំរំពឹងលើការ Boost រហូតពេក

បង្កើនប្រសិទ្ធភាពនៃការផ្សព្វផ្សាយតាមរបៀបផ្សេងៗទៀត ដែលអាចទទួលបានលទ្ធផលល្អ ជាជាងព្យាយាមតែ Boost តែមួយផ្នែក។ ត្រង់ចំណុចនេះ សំដៅលើ Share group មានន័យថា នៅពេលដែលអ្នកបាន Live លក់ ឬធ្វើ Content ជាវីដេអូចែករំលែកល្អៗជាញឹកញាប់ ហើយចង់ទទួលបានអ្នកចូលទស្សនាច្រើន ដូច្នេះអ្នកអាចស្វែងរកក្រុមការងារណាដែលមាន Group ច្រើន ហើយមានសមាជិកចូលរួមច្រើន ព្រមទាំងមានវិជ្ជាជីវៈច្បាស់លាស់ ហើយអាចទុកចិត្តបាន ដើម្បីអាចសហការជាមួយ។ ដើម្បីបង្កើនភាពជឿជាក់ និងមិនចំណាយលុយខុស លោក Zell បានណែនាំឱ្យយើងប្រើប្រាស់សេវាកម្ម Share Group របស់ MOHA Group។

ចង់សិក្សាបន្ថែមទៀតពាក់ព័ន្ធនឹងចំណេះដឹងធ្វើទីផ្សារ អាចចូលទៅកាន់ Account TikTok របស់គាត់ផ្ទាល់ តាមរយៈLink មួយនេះ៖ https://www.tiktok.com/@khmerfreelancer

ពាណិជ្ជកម្ម

តើយើងគួរតែវិនិយោគអ្វីខ្លះមកកាន់ខ្លួនឯង?

Rin Hanavy

ហេតុអ្វីបានជាមនុស្សចូលចិត្តនិយាយថា “អ្នកគួរតែវិនិយោគលើខ្លួនឯងៗម្ល៉េះ?” តើការវិនិយោគលើខ្លួនឯងនេះ គេចង់សំដៅទៅលើអ្វីខ្លះទៅ?

ជាទូទៅការវិនិយោគត្រូវបានគេបែងចែកជា២ធំៗ គឺការវិនិយោគខាងក្រៅ និងការវិនិយោគខាងក្នុង។ ដែលភាគច្រើនការវិនិយោគខាងក្រៅនេះគឺគេផ្ដោតសំខាន់ ទៅលើការវិនិយោគទៅលើលុយ ភាគហ៊ុន អាជីវកម្ម ដីធ្លី អគារ និងផ្សេងៗទៀត ចំណែកឯការវិនិយោគខាងក្នុងវិញ គឺជាការវិនិយោគមកលើខ្លួនឯង តាមរយៈការសិក្សារៀនសូត្រ ការអានសៀវភៅ ការមើលថែទាំសុខភាព ការរៀនបង្កើតទំនាក់ទំនងជាមួយនឹងមនុស្សជុំវិញខ្លួន ឬមួយក៏ការងារធ្វើដំណើរកំសាន្តជាដើម ដើម្បីធ្វើឲ្យខ្លួនឯងមានភាពខ្លាំង បូករួមនិងភាពរីករាយពីខាងក្នុងមក។

ដូចនេះហើយប្រសិនបើអ្នកទើបតែមានអាយុទើបតែ២០ ឬក្រោម២០តិចតួច ភាគច្រើនអ្នកអាចនៅពុំទាន់យល់ច្បាស់អំពីរបៀបនៃការវិនិយោគរបស់អ្នកធ្វើអាជីវកម្មធំៗប៉ុន្មានទេ ប៉ុន្តែមិនប្រាកដថាអ្នកមិនអាចចេះនោះទេ តែមុននឹងអាចរៀនចេះវិនិយោគទៅលើរបស់ធំៗបែបនេះបាន គឺអ្នកត្រូវវិនិយោគមកលើខ្លួនឯងជាមុនសិន។

១. វិនិយោគលើការសិក្សា

ការវិនិយោគទៅលើការសិក្សា មិនត្រឹមតែជួយបង្កើនចំណេះដឹង ចំណេះធ្វើ និងការគិតច្នៃប្រឌិតរបស់អ្នកប៉ុណ្ណេះទេ តែវាក៏ជួយធ្វើឲ្យអ្នកទទួលបានឱកាសល្អៗក្នុងជីវិត និងអាចធ្វើឲ្យក្ដីស្រមៃរបស់អ្នកក្លាយជាការពិតផងដែរ។ អ្នកកាន់តែវិនិយោគខ្លួនឯងជាមួយនឹងការសិក្សា អ្នកនឹងកាន់តែមានការយល់ដឹងជ្រៅជ្រះ និងមានអនាគតភ្លឺថា្ល។ ដូចនេះ ប្រសិនបើអ្នកមានពេលទំនេរច្រើន កុំភ្លេចអនុញ្ញាតឲ្យខ្លួនឯង វិនិយោគទៅលើការរៀនជំនាញថ្មីៗ ដើម្បីអាចមានអាទិភាពការងារខ្ពស់ជាងអ្នកដទៃ។

២. វិនិយោគលើការអាន និងការស្ដាប់ឲ្យបានច្រើន

អ្នកដឹងទេថា ហេតុអ្វីបានជាលោក Elon Musk Mark Zuckerberg Bill Gates Warren Buffet និងអ្នកល្បីល្បាញជាច្រើនរូបទៀត គាត់នៅតែបន្តការអានសៀវភៅបែបនេះ?

គឺដោយសារតែពួកគាត់ចង់បន្តអភិវឌ្ឍន៍ចំណេះដឹងរបស់ពួកគាត់ឲ្យកាន់តែខ្លាំងជាមុនបន្ថែមទៀត ជាពិសេសនោះគឺពួកគាត់ពុំចង់ចំណាយពេលវេលាដ៏មានតម្លៃទៅលើរឿងដែលមិនបានការ ហើយណាមួយ ការអានសៀវភៅគឺជាការលំហែខួរក្បាលរបស់ពួកគាត់។

ដូចនេះប្រសិនបើអ្នកចង់ឲ្យខ្លួនអ្នកកាន់តែប្រសើរឡើងពីមួយថ្ងៃទៅមួយថ្ងៃ អ្នកគប្បីចំណាយពេលខ្លះទៅលើការអាន មិនថាអាននៅក្នុងសៀវភៅ ឬនៅលើក្នុងបណ្ដាញសង្គមនោះទេ សំខាន់ឲ្យតែវាជាចំណេះដឹងដែលមានប្រយោជន៍។

២. វិនិយោគលើសុខភាព

ចូលអាយុខ្ទង់២០ មនុស្សភាគច្រើនចាប់ផ្ដើមផ្ដោតសំខាន់តែទៅលើការរកលុយ ការធ្វើការងារខ្លាំងជាង ការមើលថែទាំសុខភាពទៅទៀត មិនថាខ្ញុំឬអ្នកនោះទេ ដែលវាជាហេតុធ្វើឲ្យសុខភាពរបស់យើងពេលខ្លះងាយនឹងចុះខ្សោយ ឧស្សាហ៍ឈឺ ឆាប់បាក់កម្លាំង ឬអាចមានជម្ងឺផ្សេងៗទៀតជាដើម។

ទទួលស្គាល់ថា នរណាក៏ចង់សម្រេចកិច្ចការដែលខ្លួនចង់ធ្វើដែរ ប៉ុន្តែចូរកុំធ្វើកិច្ចការទាំងនោះ កុំដើរតាមចាប់លុយ ឬដើរតាមក្ដីស្រមៃខ្លាំងពេករហូតដល់ភ្លេចមើលថែសុខភាព និងធ្វើឲ្យខ្លួនឯងធ្លាក់ខ្លួនឈឺ វាមិនមែនជារឿងមួយដែល្អសម្រាប់អ្នកនោះទេ។ ដូចនេះ អ្នកគប្បីរក្សាតុល្យភាពរវាងការងារ និងសុខភាពរបស់អ្នកឲ្យបានល្អ ពោលគឺសម្រេចបានទាំងក្ដីស្រមៃ បានទាំងសុខភាពល្អ។

៣. វិនិយោគលើទំនាក់ទំនង

ប្រសិនបើអ្នកចាប់ផ្ដើមវិនិយោគទៅលើការទំនាក់ទំនង នោះឱកាសក្នុងការស្គាល់មនុស្ស ឱកាសក្នុងការទទួលបាននូវចំណេះដឹងថ្មីៗ ឱកាសក្នុងការទទួលបានការងារល្អៗ និងឱកាសក្នុងការអភិវឌ្ឍខ្លួនអ្នក ក៏មានកាន់តែច្រើនជាងមុន។

មិនថាការវិនិយោគទៅលើទំនាក់ទំនងគ្រួសារ ស្នេហា ឬក្នុងសង្គមនោះទេ គឺសុទ្ធតែអាចជួយអ្នកឲ្យកាន់តែល្អប្រសើរឡើង និងអាចជួយអ្នកឲ្យឆ្ពោះទៅរកចំណុចមួយដែលអ្នកចង់បានយ៉ាងពិតប្រាកដ។

៤. វិនិយោគលើការធ្វើដំណើរកំសាន្ត

ខ្ញុំដឹងថាបច្ចុប្បន្ននេះ អ្នកកំពុងតែមមាញឹកជាមួយនឹងការសិក្សា និងការងាររបស់អ្នក ប៉ុន្តែកុំភ្លេចអនុញ្ញាតឲ្យខ្លួនឯងបានដើរកំសាន្តខ្លះផងណា៎ដើម្បីលំហែខួរក្បាល និងកាត់បន្ថយភាពតានតឹងក្នុងចិត្តខ្លះ កុំនៅស្មុគតែមួយកន្លែងពេក ព្រោះអារម្មណ៍ល្អនឹងធ្វើឲ្យការសិក្សា ក៏ដូចជាផលិតភាពការងាររបស់អ្នកកាន់តែល្អប្រសើរឡើងជាងមុន។

ដូចនេះបន្ទាប់ពីអ្នកបានវិនិយោគចំណុចខាងលើនេះអស់ហើយ កុំភ្លេចវិនិយោគលើការដើរកំសាន្តមួយទៀតណា៎ រៀនផង ធ្វើការផង ដើរលេងខ្លះផង ទើបជីវិតមានន័យ។

ពាណិជ្ជកម្ម

មូលហេតុសំខាន់ទាំង៥ ដែលអ្នកចាំបាច់ត្រូវតែពង្រឹងសមត្ថភាពខ្លួនឲ្យខ្លាំង

Rin Hanavy

មូលហេតុសំខាន់ទាំង៥ ដែលអ្នកចាំបាច់ត្រូវតែពង្រឹងសមត្ថភាពខ្លួនឯងឲ្យខ្លាំង

១. គ្មាននរណាម្នាក់មកទទួលខុសត្រូវលើអនាគតនិងជីវិតរបស់អ្នកនោះទេ

ជីវិតរបស់អ្នក គឺអ្នកត្រូវមើលការខុសត្រូវ ត្រូវរៀបចំ និងត្រូវខិតខំកែច្នៃវាដោយខ្លួនឯង ព្រោះពុំនរណាម្នាក់មកចាត់ចែងជូនអ្នក ហើយក៏គ្មាននរណាម្នាក់ដែលអាចធ្វើកិច្ចការងារទាំងនោះជំនួសអ្នក ក្រៅពីអ្នកដែរ គឺអ្នកជាម្ចាស់របស់ខ្លួនឯង ។

ប្រសិនបើអ្នកបានត្រឹមតែគិត គិតថា ខ្ញុំចង់ស្អាតដូចគេ ចង់ចេះដូចគេ ចង់មានការគិត មានសមត្ថភាពខ្លាំង និងចង់មានលុយចាយច្រើនដូចគេ តែអ្នកពុំដែលសូម្បីតែធ្វើ ពុំដែលសូម្បីតែធ្វើការស្វ័យសិក្សា តើអ្នកអាចក្លាយទៅជាមនុស្សដែលមានចំណេះដឹងជ្រៅជ្រះ និងអាចមានលុយចាយច្រើនបានយ៉ាងដូចម្ដេចទៅ?

ករណីប្រសិនបើអ្នកចង់រៀនយកនិទ្ទេស A ឲ្យបាននៅក្នុងឆ្នាំនេះ តើអ្នកគិតថានរណាដែលអាចជួយអ្នកបាន? ក្រុមគ្រួសារអ្នក? មិត្តភក្តិអ្នក?លោកគ្រូអ្នកគ្រូរបស់អ្នក? ឬមួយក៏អ្នកខ្លួនឯង?? ចម្លើយគឺប្រាកដជាអ្នកខ្លួនឯងហើយ ដោយសារតែក្រុមគ្រួសារ និងលោកគ្រូអ្នកគ្រូរបស់អ្នក ពួកគាត់បានត្រឹមតែជួយជាថវិកាក្នុងការរៀនសូត្រ និងជួយផ្ដល់នូវចំណេះដឹងដល់អ្នកតែប៉ុណ្ណោះ អ្នកចេះឬមិនចេះ អ្នកជាប់ឬមិនជាប់ គឺអាស្រ័យទៅលើកិច្ចខិតខំប្រឹងប្រែងរបស់អ្នកតែប៉ុណ្ណោះ។ ដូចនេះប្រសិនបើអ្នកចង់ប្រឡងយកនិទ្ទេស A គឺអ្នកត្រូវប្ដេជា្ញចិត្តត្រូវខិតខំរៀនសូត្រ ស្វះស្វែងក្នុងការប្រមូលយកនូវឯកសារប្រឡង និងត្រូវធ្វើស្វ័យសិក្សាដោយខ្លួនឯង។

ចុះបើករណីដែលអ្នកចង់បានរាងស្អាត សម្រស់ស្រស់ផូផង់ តើអ្នកគិតថានរណាដែលជួយអ្នកបាន? អ្នកខ្លួនឯងឬមួយក៏អ្នកណាផ្សេង? ប្រាកដជាអ្នកខ្លួនឯងហើយ ដែលត្រូវក្រោកឡើងហាត់ប្រាណ ឬទៅ Gymជាប្រចាំ ត្រូវញ៉ាំអាហារដែលគ្មានជាតិខ្លាញ់ និងត្រូវចាយលុយច្រើនទៅលើ Skincare ។

ដូចនេះ មិនថាសុខភាព សម្រស់ អនាគត ឬជីវិតទាំងមូលរបស់អ្នកនោះទេ គឺគ្មាននរណាម្នាក់អាចមកជួយអ្នកបានក្រៅពីអ្នកខ្លួនឯងបានឡើយ។

២. អភិវឌ្ឍន៍ខ្លួនឯងគឺជាជម្រើសដ៏ល្អសម្រាប់អ្នក

វិធីតែមួយគត់ដើម្បីអាចឲ្យអ្នកឆ្លាត មានចំណេះដឹងជ្រៅជ្រះ បូករួមទាំងមានសីលធម៌ល្អទៀតនោះ គឺអ្នកត្រូវតែរៀនដុះខាត់សមត្ថភាពអ្នក រៀនធ្វើ រៀនអាន និងរៀនស្រាវជ្រាវឲ្យបានច្រើន ដើម្បីឲ្យអ្នកកាន់តែពូកែឡើងបានមួយកម្រិតទៀត។

ប្រសិនបើអ្នកចង់ផ្លាស់ប្ដូរជីវិតរបស់អ្នក ពោលគឺផ្លាស់ពីជីវិតដែលអាប់អួរ ពីជីវិតដែលគេតែងតែទិតៀន ពីជីវិតដែលគេមិនឲ្យតម្លៃដោយសារតែអ្នកគ្មានសមត្ថភាព គឺអ្នកត្រូវតែកែកម្អ និងអភិវឌ្ឍខ្លួនអ្នកឲ្យកាន់តែប្រសើរឡើងពីមួយថ្ងៃទៅមួយថ្ងៃ។

៣. ដើម្បីរកឃើញពីសក្ដានុពលរបស់អ្នក

អ្នកនឹងមិនអាចដឹងពីសក្ដានុពលរបស់អ្នកថា អ្នកខ្លាំងឬពូកែប៉ុណ្ណានោះទេ ប្រសិនបើអ្នកមិនធ្វើ និងមិនបង្ហាញវាចេញមកខាងក្រៅទេនោះ។

មានមនុស្សមួយចំនួនតូចៗ ពួកគេនៅតែរស់ជាមួយនឹងភាពដដែលៗ និងបន្តរស់នៅក្នុងតំបន់សុវត្ថិភាពរបស់ពួកគេ មិនព្រមបើកចិត្តឲ្យទូលាយរៀននិងសាកល្បងធ្វើនូវអ្វីថ្មីៗទេ មូលហេតុនោះ គឺដោយសារតែពួកគេខ្លាចក្នុងការចាប់ផ្ដើម ស្ទាក់ស្ទើរក្នុងការសម្រេចចិត្ត និងខ្លាចពាក្យថាបរាជ័យ ព្រោះពួកគេនៅតែមានមន្ទិលសង្ស័យទៅលើសមត្ថភាពរបស់ខ្លួនឯង និងចេះតែចំអន់លើសមត្ថភាពរបស់ខ្លួនជាដើម។

បើអ្នកកាន់តែអភិវឌ្ឍន៍ខ្លួនឯង ស្វែងរកចំណេះដឹងល្អឲ្យខ្លួនឯង នោះអ្នកនឹងមានលិទ្ធភាពខ្ពស់ក្នុងការទទួលបាននូវឱកាសល្អជាច្រើននៅកន្លែងការងារ និងអាចរស់នៅក្នុងជីវិតពោរពេញទៅដោយភាពរីករាយនិងជំនឿជាក់លើខ្លួនឯង។

មនុស្សរាល់គ្នាសុទ្ធតែមានក្ដីស្រមៃ ប៉ុន្តែមិនមែនមនុស្សរាល់គ្នាហ៊ានធ្វើតាមក្ដីស្រមៃ និងអាចធ្វើឲ្យក្ដីស្រមៃទាំងនោះក្លាយជាការពិតបានទាំងអស់នោះទេ។ អ្វីគ្រប់យ៉ាងគឺស្ថិតនៅលើអ្នកជាអ្នកកំណត់ និងប្រឹងប្រែង។

៤. ប្រសិនបើអ្នកចង់ទទួលបានជោគជ័យ

“ បើអ្នកចង់រស់នៅក្នុងជីវិតមួយដែលអ្នកចង់បាន បើអ្នកក្លាយទៅជាមនុស្សម្នាក់ដែលខ្លាំងនិងអស្ចារ្យ បើអ្នកចង់មានលុយចាយច្រើន បើអ្នកចង់មានអ្នកគោរពស្រលាញ់ច្រើន ” គឺអ្នកចាំបាច់ត្រូវតែអភិវឌ្ឍខ្លួនឯងជាប្រចាំ តាមរយៈការអាន ការហាត់ប្រាណ ការស្រាវជ្រាវ ការសួរនាំ ការស្ដាប់ និងការសាកល្បងធ្វើអ្វីដែលថ្មីៗជាដើម។

៥. ដើម្បីដើរឲ្យទាន់សម័យកាល

អ្នកមិនអាចឈរនៅតែមួយកន្លែង មិនអាចគិតតែមួយជ្រុង និងមិនអាចប្រកាន់ខ្ជាប់នូវផ្នត់គំនិតចាស់ៗដែលអ្នកធ្លាប់គិត និងធ្វើនោះទេ ពីព្រោះពីមួយឆ្នាំទៅមួយឆ្នាំ ពីមួយសម័យកាលទៅមួយសម័យកាល អ្វីៗគ្រប់យ៉ាងតែងតែមានការប្រែប្រួល ដូចនេះអ្នកគួរតែរៀនសម្របខ្លួនជាមួយនឹងការផ្លាស់ប្ដូរទាំងនោះ ព្រមទាំងអភិវឌ្ឍខ្លួនឯងឲ្យស៊ីគ្នាជាមួយនឹងតម្រូវការសង្គមបច្ចុប្បន្នផងដែរ ដូចជាព្យាយាមឲ្យខ្លួនឯងបានយល់ដឹងអំពីការប្រើប្រាស់បច្ចេកវិទ្យា អនាគតនៃបច្ចេកវិទ្យា និងផលវិជ្ជមាន នៃការប្រើប្រាស់ដើម្បីអាចជាប្រយោជន៍ដល់ការរកស៊ី ឬការងារប្រចាំថ្ងៃរបស់អ្នកជាដើម ។

https://bit.ly/3JzdTPI

ពាណិជ្ជកម្ម

ឈ្វេងយល់អំពី Blockchain

Sann Thaven

នាពេលបច្ចុប្បន្ននេះ មនុស្សកំពុងតែពេញនិយមកាន់តែខ្លាំងអំពីការប្រើប្រាស់ Blockchain ដូច្នេះតើអ្នកមានឆ្ងល់ដែរអត់ ថា Blockchain ជាអ្វី? ហើយវាដំណើរការបែបណា? តើប្រើប្រាស់របៀបម្ដេច? ដូច្នេះដើម្បីសម្រាយចម្ងល់របស់អ្នកទាំងអស់គ្នា ចូរឈ្វេងយល់បន្ថែមនៅចំណុចខាងក្រោម។

ដើមហេតុនៃការកកើត Blockchain

ការបង្កើតឡើងដំបូងគេរបស់ blockchain គឺចេញពី bitcoin ដែលជាការពិសោធន៍រូបិយប័ណ្ណឌីជីថល
ការបង្កើតឡើងលើកទី2 ទើបគេហៅថា blockchain ដែលជាការសម្រេចបានថាបច្ចេកវិទ្យាដំបូងដែលដំណើរការ bitcoin អាចត្រូវបានបំបែកចេញពីរូបិយប័ណ្ណ និងប្រើប្រាស់សម្រាប់គ្រប់ប្រភេទនៃកិច្ចសហប្រតិបត្តិការជាមួយក្រុមហ៊ុនជាច្រើនផ្សេងទៀត
ដំណាក់កាលបង្កើតថ្មីលើកទី3 ហៅថា “កិច្ចសន្យាឆ្លាតវៃ” រួមបញ្ចូលនៅក្នុងប្រព័ន្ធ blockchain ជំនាន់ទីពីរដែលហៅថា ethereum ដែលបានបង្កើតកម្មវិធីកុំព្យូទ័រមួយចំនួនដោយផ្ទាល់ទៅក្នុង blockchain ដោយអនុញ្ញាតឱ្យឧបករណ៍ហិរញ្ញវត្ថុ ដូចជាប្រាក់កម្ចី ឬសញ្ញាប័ណ្ណត្រូវបានតំណាងជាជាងសាច់ប្រាក់តែប៉ុណ្ណោះ។
ការបង្កើតថ្មីដំណាក់កាលទី4 ត្រូវបានគេហៅថា “ភស្តុតាងនៃភាគហ៊ុន （proof of stake）”
ដំណាក់កាលចុងក្រោយ ហៅថា “ការធ្វើមាត្រដ្ឋានblockchain (Blockchain scaling)” ក្នុងគោលបំណងបង្កើនល្បឿនដំណើរការ ដោយមិនបាត់បង់សុវត្ថិភាព ដោយរកមើលថាតើមានកុំព្យូទ័រប៉ុន្មានដែលចាំបាច់ដើម្បីធ្វើសុពលភាពប្រតិបត្តិការនីមួយៗ និងបែងចែកការងារប្រកបដោយប្រសិទ្ធភាព។

តើ Blockchain ជាអ្វី?

Blockchain គឺជាបច្ចេកវិទ្យាដែលមានទិន្នន័យប្រកបដោយភាពច្នៃប្រឌិតដែលជាបេះដូងនៃរូបិយប័ណ្ណគ្រីបតូស្ទើរទាំងអស់។ លើសពីនេះ blockchain ក៏ជាសៀវភៅកត់ត្រាឌីជីថលដែលមិនអាចផ្លាស់ប្តូរបានដើម្បីចែកចាយ និងរក្សាទុកទិន្នន័យគ្រប់ប្រភេទ ដោយអាចកត់ត្រាព័ត៌មានអំពីប្រតិបត្តិការរូបិយប័ណ្ណកម្មសិទ្ធិ NFT ឬកិច្ចសន្យាឆ្លាតវៃDeFi ព្រមទាំងជួយសម្រួលដល់ដំណើរការនៃការកត់ត្រាប្រតិបត្តិការ និងតាមដានទ្រព្យសម្បត្តិនៅក្នុងបណ្តាញអាជីវកម្ម។ ទ្រព្យសម្បត្តិអាចជារូបី (ផ្ទះ ឡាន សាច់ប្រាក់ ដី) ឬអរូបី (កម្មសិទ្ធិបញ្ញា ប៉ាតង់ កម្មសិទ្ធិបញ្ញា យីហោ)។ ហើយការចែកចាយមានច្បាប់ចម្លងដូចគ្នាបេះបិទនៃទិន្នន័យនៅទូទាំងបណ្តាញទាំងមូលរបស់ Blockchain ដែលធ្វើឱ្យមានការលំបាកខ្លាំងក្នុងការ hack ឬបន្លំប្រព័ន្ធនានា ព្រមទាំងមានការតាមដាន និងជួញដូរនៅលើបណ្តាញ blockchain ដោយកាត់បន្ថយហានិភ័យ និងកាត់បន្ថយការចំណាយសម្រាប់អ្នកពាក់ព័ន្ធទាំងអស់។

ហេតុអ្វីបានជា blockchain មានសារៈសំខាន់?

Blockchain គឺល្អសម្រាប់ការចែកចាយព័ត៌មាន ព្រោះវាផ្តល់នូវព័ត៌មានភ្លាមៗ ចែកចាយលឿន និងមានតម្លាភាពទាំងស្រុងដោយរក្សាទុកនៅលើសៀវភៅកត់ត្រាដែលមិនអាចផ្លាស់ប្តូរបាន ហើយអាចចូលប្រើបាន ទាល់តែជាសមាជិកបណ្តាញដែលមានការអនុញ្ញាតប៉ុណ្ណោះ។ បណ្តាញ blockchain អាចតាមដានការបញ្ជាទិញ ការទូទាត់ គណនី ផលិតកម្ម និងជាច្រើនទៀត។ ហើយសមាជិកអាចចែកចាយទិដ្ឋភាពតែមួយគត់ ដូច្នេះអ្នកអាចឃើញព័ត៌មានលម្អិតនៃប្រតិបត្តិការបញ្ចប់ទៅដោយផ្តល់ឱ្យអ្នកនូវទំនុកចិត្តកាន់តែច្រើន ក៏ដូចជាប្រសិទ្ធភាព និងឱកាសថ្មីៗផងដែរ។

តើ Blockchain ដំណើរការយ៉ាងដូចម្តេច?

នៅពេលដែលប្រតិបត្តិការនីមួយៗកើតឡើង វាត្រូវបានកត់ត្រាជា “ប្លុក” នៃទិន្នន័យ ដោយប្រតិបត្តិការទាំងនោះបង្ហាញពីចលនានៃទ្រព្យសកម្មដែលអាចជារូបី (ផលិតផល) ឬអរូបី (បញ្ញា)។ ប្លុកទិន្នន័យ (data block) អាចកត់ត្រាព័ត៌មាននៃជម្រើសរបស់អ្នក៖ អ្នកណា(Who) តើអ្វី(What) ពេលណា(When) កន្លែងណា(Where) តម្លៃប៉ុន្មាន(How much) និងសូម្បីតែលក្ខខណ្ឌ ដូចជាល្បឿននៃការដឹកជញ្ជូនអាហារ។
ប្លុកនីមួយៗបង្កើតជាខ្សែសង្វាក់ទិន្នន័យ នៅពេលដែលទ្រព្យសកម្មផ្លាស់ទីពីកន្លែងមួយទៅកន្លែងមួយ ឬកម្មសិទ្ធិផ្លាស់ប្តូរដៃ។ ប្លុកបញ្ជាក់ពីពេលវេលា និងលំដាប់នៃប្រតិបត្តិការពិតប្រាកដ ហើយប្លុកភ្ជាប់គ្នាយ៉ាងមានសុវត្ថិភាព ដើម្បីការពារប្លុកណាមួយពីការកែប្រែ ឬប្លុកត្រូវបានបញ្ចូលរវាងប្លុកពីរដែលមានស្រាប់។
ប្រតិបត្តិការនៃប្លុកទាំងអស់នៅក្នុងខ្សែសង្វាក់គឺមិនអាចត្រឡប់វិញបាន ដោយប្លុកដែលបានបន្ថែមថ្មីត្រូវបានពង្រឹងការផ្ទៀងផ្ទាត់ជាមួយនឹងប្លុកមុន និង blockchain ទាំងមូល។ ដូច្នេះហើយទើបអ្វីគ្រប់យ៉ាងរបស់ Blockchain នីមួយៗមិនអាចផ្លាស់ប្ដូរបាន។ ហេតុនេះហើយ គ្មាននរណាម្នាក់អាចកែងបន្លំបានឡើយ ព្រមទាំងមានការបង្កើតបញ្ជីរាយនាមនៃប្រតិបត្តិការរបស់អ្នក និងសមាជិកបណ្ដាញផ្សេងទៀតដែលអាចទុកចិត្តបាន។

លើសពីនេះ ក៏មានការបែងចែកនៃការប្រើប្រាស់ Blockchain ចំនួន 2 ផងដែរ រួមមាន៖

Public Blockchains៖ នរណាម្នាក់ដែលចូលជាសមាជិកលើប្រភេទនេះ មានន័យថា ពួកគេអាចអាន អាចសរសេរ ឬសវនកម្មទិន្នន័យនៅលើ blockchain។ គួរបញ្ជាក់ផងដែរថា វាពិបាកក្នុងការផ្លាស់ប្តូរប្រតិបត្តិការដែលបានចូលនៅក្នុងPublic blockchains ព្រោះការគ្រប់គ្រងមិនមែនមានតែម្នាក់នោះទេ។
Private Blockchain៖ ត្រូវបានគ្រប់គ្រងដោយអង្គការ ឬក្រុម។ ហើយមានតែវាទេដែលអាចសម្រេចចិត្តថាអ្នកណាដែលត្រូវបានអញ្ជើញឱ្យចូលរួម និងមានការរក្សាសៀវភៅបញ្ជីរួម។

តើ Blockchain ត្រូវបានប្រើប្រាស់យ៉ាងដូចម្តេច?

បច្ចេកវិទ្យា Blockchain ត្រូវបានប្រើប្រាស់សម្រាប់គោលបំណងផ្សេងៗគ្នាជាច្រើន ចាប់ពីការផ្តល់សេវាហិរញ្ញវត្ថុ រហូតដល់ការគ្រប់គ្រងប្រព័ន្ធបោះឆ្នោត។

រូបិយប័ណ្ណគ្រីបតូ (Cryptocurrency)៖ ការប្រើប្រាស់ទូទៅបំផុតនៃ blockchain សព្វថ្ងៃនេះ គឺ រូបិយប័ណ្ណគ្រីបតូ ដូចជា Bitcoin ឬ Ethereum។ នៅពេលដែលមនុស្សទិញ ផ្លាស់ប្តូរ ឬចំណាយ cryptocurrency ប្រតិបត្តិការត្រូវបានកត់ត្រានៅលើ blockchain។ មនុស្សកាន់តែច្រើនប្រើ cryptocurrency កាន់តែច្រើន blockchain កាន់តែរីករាលដាល។
ធនាគារ៖ blockchain ត្រូវបានប្រើដើម្បីដំណើរការប្រតិបត្តិការជារូបិយប័ណ្ណ fiat ដូចជាលុយដុល្លារ និងអឺរ៉ូ។ ហើយវាអាចមានលឿនជាងការផ្ញើប្រាក់តាមរយៈធនាគារ ឬស្ថាប័នហិរញ្ញវត្ថុផ្សេងទៀត ដោយសារតែប្រតិបត្តិការអាចត្រូវបានផ្ទៀងផ្ទាត់កាន់តែលឿន និងដំណើរការនៅក្រៅម៉ោងធ្វើការធម្មតា។
ការផ្ទេរទ្រព្យសម្បត្តិ៖ Blockchain ក៏អាចត្រូវបានប្រើដើម្បីកត់ត្រា និងផ្ទេរកម្មសិទ្ធិនៃទ្រព្យសកម្មផ្សេងៗ។ បច្ចុប្បន្ននេះមានការពេញនិយមយ៉ាងខ្លាំងជាមួយនឹងទ្រព្យសម្បត្តិឌីជីថលដូចជា NFTs ដែលជាតំណាងនៃភាពជាម្ចាស់នៃសិល្បៈឌីជីថល និងវីដេអូ។ ទោះជាយ៉ាងណា blockchain ក៏អាចត្រូវបានគេប្រើដើម្បីដំណើរការកម្មសិទ្ធិនៃទ្រព្យសកម្មក្នុងជីវិតពិត ដូចជាប័ណ្ណកម្មសិទ្ធិលើអចលនទ្រព្យ និងយានជំនិះជាដើម។ ភាគីទាំងពីរនៃភាគីមួយនឹងប្រើ blockchain ដំបូងដើម្បីផ្ទៀងផ្ទាត់ថាម្នាក់ជាម្ចាស់អចលនទ្រព្យហើយភាគីម្ខាងទៀតមានលុយដើម្បីទិញ។ បន្ទាប់មកពួកគេអាចបញ្ចប់និងកត់ត្រាការលក់នៅលើ blockchain ។
កិច្ចសន្យាឆ្លាតវៃ៖ កិច្ចសន្យាប្រតិបត្តិដោយខ្លួនឯង ហើយកិច្ចសន្យាឌីជីថលទាំងនេះត្រូវបានអនុម័តដោយស្វ័យប្រវត្តិនៅពេលដែលលក្ខខណ្ឌត្រូវបានបំពេញ។
ការត្រួតពិនិត្យខ្សែសង្វាក់ផ្គត់ផ្គង់៖ ខ្សែសង្វាក់ផ្គត់ផ្គង់ពាក់ព័ន្ធនឹងចំនួនព័ត៌មានយ៉ាងច្រើន ជាពិសេសនៅពេលដែលទំនិញឆ្លងកាត់ពីផ្នែកមួយនៃពិភពលោកទៅផ្នែកមួយទៀត។ ហើយវានឹងធ្វើឱ្យអ្នកទិញទាំងអស់មានភាពជឿជាក់ ដោយមិនបារម្ភថា ប៉ះចំផលិតផលឬសេវាកម្មមិនល្អ ឬរបស់ក្លែងក្លាយ។
ការបោះឆ្នោត៖ អ្នកជំនាញកំពុងស្វែងរកវិធីដើម្បីអនុវត្ត blockchain ដើម្បីការពារការក្លែងបន្លំក្នុងការបោះឆ្នោត។ យោងតាមទ្រឹស្តីមួយ ការបោះឆ្នោតតាម blockchain នឹងអនុញ្ញាតឱ្យមនុស្សដាក់សន្លឹកឆ្នោតដែលមិនអាចត្រូវបានគាបសង្កត់ពីបុគ្គលណាឡើយ ក៏ដូចជានឹងដកចេញនូវតម្រូវការដើម្បីឱ្យមនុស្សប្រមូល និងផ្ទៀងផ្ទាត់សន្លឹកឆ្នោតដោយដៃ។

ប្រភព៖ Forbes, IBM & HBR

ពាណិជ្ជកម្ម

តើខ្ញុំត្រូវអភិវឌ្ឍន៍ខ្លួនឯងតាមរបៀបណា?

Rin Hanavy

នៅពេលដែលអ្នកសម្លឹងមើលទៅកាន់នរណាម្នាក់ដែលក្មេងជាងអ្នក ឬអាយុស្របាលៗនឹងអ្នក ដែលពួកគេគឺជាមនុស្សដែលមានសមត្ថភាពខ្លាំង មានជំនាញច្បាស់លាស់ ឆ្លាត ស្អាត រវៀសរវៃ និងមានភាពប៉ិនប្រសប់នឹងការងារ តើអ្នកធ្លាប់លួចសរសើរ ឬចង់ធ្វើឲ្យខ្លួនឯងដូចជាពួកគេនៅថ្ងៃណាមួយដែឬទេ? ហេតុអ្វីបានជាគេឆ្លាតម្ល៉េះណ៎? ម៉េចបានជាគេពូកែអីក៏ពូកែម៉េស? ហើយពេលនោះអ្នកក៏ចាប់ផ្ដើមទទួលបានឥទ្ធិពលវិជ្ជមានពីពួកគេ និងប្រាប់ខ្លួនឯងខ្សឹបៗថា “ បើគាត់ខ្លាំង គាត់ឆ្លាត ហើយពូកែបែបហ្នឹង ថ្ងៃណាមួយខ្ញុំនឹងធ្វើឲ្យដូចគាត់ នឹងល្អជាងគាត់ទៅទៀត គាត់ធ្វើបាន ខ្ញុំក៏អាចធ្វើបានដែរ”

មិនខ្វល់ថាអ្នកចង់សម្រេចអ្វីនៅក្នុងជីវិតនោះទេ ជម្រើសមានតែមួយគត់ គឺ ប្រសិនបើអ្នកចង់ធ្វើឲ្យខ្លួនជាមនុស្សម្នាក់ដែលមានសមត្ថភាពខ្ពស់ ជាមនុស្សដែលពូកែនិងមានបុគ្គលិកលក្ខណៈល្អ អ្នកចាំបាច់ត្រូវតែធ្វើនូវរឿងមួយ គឺ ព្យាយាមអភិវឌ្ឍខ្លួនឯងឲ្យបានជាប្រចាំ។

តើខ្ញុំត្រូវអភិវឌ្ឍខ្លួនឯងតាមរបៀបណា? គួរចាប់ផ្ដើមពីណាទៅណាទៅ?

ផ្លាស់ប្ដូររបៀបគិត បើអ្នកចង់ឲ្យខ្លួនឯងរីកចម្រើនជាងមុនបាន អ្នកត្រូវផ្លាស់ប្ដូរផ្នត់គំនិតរបស់អ្នកសិន។

បើពីមុនអ្នកតែងប្រកាន់ខ្ជាប់នូវផ្នត់គំនិតថា មិនហ៊ានធ្វើព្រោះខ្លួនគ្មានសមត្ថភាព មិនហ៊ានធ្វើព្រោះខ្លាចបរាជ័យឬត្រូវគេស្ដីបន្ទោស មិនហ៊ានធ្វើព្រោះតែខ្លួនមិនធ្លាប់ធ្វើ និងផ្នត់គំនិតអវិជ្ជមានផ្សេងៗទៀតដែលអ្នកតែងតែនិយាយ គឺអ្នកគួរតែលុបបំបាត់ការគិតបែបនោះបន្តិចម្ដងៗ កុំទុកឲ្យវាដុះស្នឹមនៅក្នុងខួរក្បាលរបស់អ្នកយូរពេក ព្រោះវាអាចប៉ះពាល់ដល់សមត្ថភាពនៃការគិត និងភាពរីកចម្រើនរបស់អ្នក។

អានឲ្យបានច្រើន អានកាន់តែច្រើន ចំណេះដឹងនិងការគិតរបស់អ្នកក៏កាន់តែរីកធំទៅតាមហ្នឹងដែរ។ មិនថាអ្នកអានសៀវភៅ ឬអានអត្ថបទនៅលើបណ្ដាញសង្គមនោះទេ គឺសុទ្ធតែមានប្រយោជន៍ និងអាចជួយអ្នកឲ្យយល់ដឹងកាន់តែច្រើនអំពីព័ត៌មានសំខាន់ៗរបស់សង្គមជាតិ ព្រមទាំងអនុញ្ញាតិឲ្យអ្នកយល់ដឹងអំពីផ្នត់គំនិតក៏ដូចជាទស្សនៈសំខាន់ៗជាច្រើនទៀតដែលអាចជួយឲ្យជីវិតរបស់អ្នកកាន់តែប្រសើរឡើងជាងមុន។
ស្ដាប់ឲ្យបានច្រើន ពេលខ្លះការនិយាយបូរបាច់ និយាយរៀបរាប់ច្រើនពេកគឺគ្មានផលប្រយោជន៍សម្រាប់អ្នកនោះទេ ហើយវាក៏មិនបានបង្ហាញថាអ្នកជាមនុស្សពូកែ ជាមនុស្សដែលដឹងគ្រប់រឿង ឬចេះគ្រប់សព្វនោះដែរ។ ដូចនេះរៀនស្ដាប់ពីមនុស្សជុំវិញខ្លួនឲ្យបានច្រើន និងសម្រាំងយកតែគំនិតណាដែលល្អ ដើម្បីយកចំណុចទាំងនោះមកបំពេញបន្ថែមនូវចំណុចខ្វះខាតរបស់អ្នក ព្រោះមនុស្សម្នាក់ៗមានការគិត ការយល់ឃើញនិង មានទស្សនៈផ្សេងៗគ្នា។
សួរឲ្យបានច្រើន រៀនឆ្ងល់ទៅលើរឿងដែលមានប្រយោជន៍ឲ្យបានច្រើន រៀនសួរសំណួរមកកាន់ខ្លួនឯងដើម្បីស្វែងរកទេព្យកោសល្យរបស់អ្នក និងសួរទៅកាន់អ្នកនៅជុំវិញខ្លួនអ្នកឲ្យបានច្រើនចំពោះអ្វីដែលអ្នកនៅតែមានមន្ទិលសង្ស័យ ឬនៅមានភាពស្រពិចស្រពិល តែអ្នកត្រូវតែប្រាកដថារឿងទាំងអស់នោះគឺជារឿងដែលមានប្រយោជន៍។
ស្រាវជ្រាវឲ្យបានច្រើន ការសួរច្រើនគឺជារឿងល្អ នៅពេលដែលអ្នកដទៃមានពេលទំនេរឆ្លើយមកកាន់អ្នក ប៉ុន្តែអ្នកត្រូវចាំថា ពុំមាននរណាម្នាក់ដែលមានពេលទំនេរ 24h ចាំប្រាប់អ្នក ចាំឆ្លើយតបនឹងអ្នករហូតនោះទេ ពីព្រោះអ្នកដទៃនៅមានកិច្ចការងារច្រើនដែលត្រូវធ្វើ ហើយពេលខ្លះពួកគាត់ក៏មិនមានចម្លើយសម្រាប់សំណួររបស់អ្នកដែរ។ ដូច្នេះហើយ អ្នកគប្បីរៀនស្រាវជ្រាវឲ្យបានច្រើន រៀនរកចម្លើយទាំងអស់នោះដោយខ្លួនឯង តែបើករណីដែលអ្នកទាល់ហើយ អ្នកនៅតែមិនអាចរកចម្លើយនៃសំណួរទាំងនោះបានទេ ស៊ឹមសួរទៅកាន់អ្នកជុំវិញខ្លួនអ្នក។

អ្នកកាន់តែស្រាវជ្រាវ អ្នកនឹងទទួលបាននូវព័ត៌មាន និងមានចំណេះដឹងច្រើន

រៀនជំនាញថ្មីៗ ចំណុចមួយទៀតដែលអ្នកអាចអភិវឌ្ឍន៍ខ្លួនឯងបាននោះគឺ ចាប់ផ្ដើមរៀនជំនាញថ្មីៗ ជាជំនាញដែលគេកំពុងតែមានតម្រូវការ ដូចជាការឈ្វេងយល់អំពីជំនាញទីផ្សារឌីជីថល តាមដានអំពីការវិវត្តន៍នៃបច្ចេកវិទ្យា ឬការរៀនភាសាអន្តរជាតិជាដើម ដើម្បីធ្វើឲ្យខ្លួនអ្នកមានសមត្ថភាពលេចធ្លោជាងគេ ។

ហើយចំណុចចុងក្រោយនោះគឺ អ្នកត្រូវតែហ៊ានបោះជំហានចេញពីតំបន់សុវត្ថិភាពដែលអ្នកកំពុងតែរស់នៅនេះ កាត់បន្ថយការត្អូញត្អែរ ឈប់ពន្យាពេលទៀត ព្យាយាមធ្វើរឿងណាដែលជួយពង្រឹងសមត្ថភាពការគិត ការនិយាយ ជួយអ្នកឲ្យមានការយល់ដឹងជាងមុន និងថ្កុំថ្កើនជាងមុន។

ពាណិជ្ជកម្ម

អាថ៌កំបាំងក្នុងការកសាងម៉ាកយីហោអាជីវកម្មដ៏រឹងមាំ

Sann Thaven

ការកសាងម៉ាកយីហោឱ្យរឹងមាំ ទាមទារឱ្យមានការកែលម្អ និងកែតម្រូវជាប្រចាំ។ ទោះជាយ៉ាងណាក៏ដោយ ដើម្បីឱ្យម៉ាកយីហោរបស់អ្នកទទួលបានជោគជ័យ និងឈានដល់អតិថិជនសក្ដានុពលរបស់អ្នកក្នុងរយៈពេលវែង អ្នកត្រូវមានយល់ដឹង និងបញ្ចូលនូវសមាធាតុនៃម៉ាកយីហោចំនួន 5 ដែលរៀបរាប់នៅខាងក្រោម៖

សមាសធាតុនៃម៉ាកយីហោដ៏រឹងមាំ

អត្តសញ្ញាណម៉ាក (Brand Identity)៖ គឺជាអ្វីដែលអ្នកតែងតែគិតនៅពេលដែលអ្នកគិតពីម៉ាកយីហោ ដោយមានរូបភាពនៅក្រៅ និងមានសមាសធាតុផ្សេងទៀតរួមបញ្ចូលគ្នា ឧទាហរណ៍ ជាឡូហ្គោ ពណ៌ម៉ាក និងគេហទំព័ររបស់អ្នក។ ម្យ៉ាងវិញទៀត អត្តសញ្ញាណម៉ាកយីហោរបស់អ្នកគឺជា “រូបរាង និងអារម្មណ៍” នៃម៉ាកយីហោរបស់អ្នក។
គោលបំណង បេសកកម្ម និងគុណតម្លៃម៉ាកយីហោ៖ ជាអ្វីដែលនឹងបង្ហាញទៅកាន់មនុស្សគ្រប់គ្នាថាអ្នកជានរណា និងបង្ហាញពីអ្វីដែលអ្នកកំពុងធ្វើ។ ចំពោះគោលបំណងរបស់អ្នក គឺជាអ្វីដែលអ្នកធ្វើ និងអ្វីដែលអ្នកអាចសន្យាជាមួយអតិថិជនរបស់អ្នក រីឯបេសកកម្មរបស់អ្នក គឺជាគោលដៅធំជាងដែលអ្នកសង្ឃឹមថានឹងសម្រេចបានតាមរយៈការធ្វើអាជីវកម្ម ហើយគុណតម្លៃរបស់អ្នកគឺជាអ្វីដែលម៉ាកយីហោរបស់អ្នកតំណាងឱ្យ។
សាររបស់ម៉ាកយីហោ (Brand Messaging)៖ ជាភាសាដែលអ្នកប្រើនៅលើគេហទំព័ររបស់អ្នក នៅក្នុងការបង្ហោះតាមប្រព័ន្ធផ្សព្វផ្សាយសង្គម និងការសន្ទនាជាមួយអតិថិជនរបស់អ្នក។ លើសពីនេះ អ្នកក៏គួរតែបណ្តុះបណ្តាលក្រុមលក់របស់អ្នក អ្នកតំណាងផ្នែកសេវាកម្មអតិថិជន និងនរណាម្នាក់ផ្សេងទៀតដែលមានតួនាទីជួបជាមួយនឹងអតិថិជន ដើម្បីប្រើភាសានិងសម្លេងដូចគ្នានៅពេលសន្ទនាជាមួយអតិថិជន។ ធ្វើបែបនេះ ដើម្បីឱ្យអតិថិជនកាន់តែចងចាំអំពីម៉ាកយីហោរបស់អ្នក។
ភាពខុសគ្នានៃម៉ាក៖ គឺជាអ្វីដែលធ្វើឱ្យអាជីវកម្មរបស់អ្នកខុសពីដៃគូប្រកួតប្រជែង និងជាអ្វីដែលអ្នកអាចផ្ដល់ជូនដល់អតិថិជនបាន ដោយនៅកន្លែងផ្សេងទៀតគឺគ្មានការផ្ដល់ជូនដូចអ្នកឡើយ។ ចំពោះភាពខុសគ្នានៃម៉ាកនេះ អាចជាការផ្ដល់នូវតម្លៃពិសេស ការផ្ដល់សេវាកម្មល្អ និងផ្សេងៗទៀតដែលអ្នកអាចស្វែងរកពីភាពខុសគ្នាពិតប្រាកដ ដើម្បីភាពជោគជ័យលើម៉ាកយីហោរបស់អ្នកក្នុងរយៈពេលវែង។
បទពិសោធន៍ម៉ាក៖ ជាវិធីដែលអតិថិជនមានទំនាក់ទំនងជាមួយផលិតផល សេវាកម្ម ក្រុមការងារ និងចំណុចតភ្ជាប់ផ្សេងៗរបស់អ្នក ដូចជាប្រព័ន្ធផ្សព្វផ្សាយសង្គមរបស់អ្នក។ អ្វីគ្រប់យ៉ាងចាប់ពីពេលដែលអតិថិជនចូលរួមជាមួយអ្នកលក់ រហូតដល់ពេលដែលពួកគេប្រើប្រាស់ផលិតផលរបស់អ្នក ហើយនេះជាបទពិសោធន៍ម៉ាកយីហោ។ លើសពីនេះ បើអតិថិជនដែលមានបទពិសោធន៍ដ៏អស្ចារ្យជាមួយម៉ាករបស់អ្នក នោះពួកគេនឹងប្រាប់មិត្តភក្តិ និងក្រុមគ្រួសាររបស់ពួកគេបន្ត និងបង្កើនអតិថិជនថ្មីៗសម្រាប់អ្នកផងដែរ។

លើសពីនេះ ក្រៅពីសមាធាតុទាំង5 ខាងលើ អ្នកក៏ត្រូវអនុវត្តន៍តាមវិធីខាងក្រោមបន្ថែម ដើម្បីកាន់តែធ្វើឱ្យម៉ាកយីហោរបស់អ្នកមានភាពរឹងមាំបាន។

ការស្រាវជ្រាវនិងការតម្រឹម៖ ប្រសិនបើអ្នកចង់ធ្វើឱ្យម៉ាកយីហោរបស់អ្នករីកចម្រើន អ្នកត្រូវតែមានមូលដ្ឋាននៅក្នុងការស្រាវជ្រាវ និងតម្រឹមជាមួយយុទ្ធសាស្រ្តអាជីវកម្ម។ មធ្យោបាយដ៏ល្អបំផុតក្នុងការកសាង និងរក្សាម៉ាកយីហោដ៏រឹងមាំ គឺចេញពីខាងក្នុង ដូចជាធ្វើឱ្យប្រតិបត្តិការដំណើរបានត្រឹមត្រូវ ហើយល្អ ព្រមទាំងស្គាល់ច្បាស់ពីអតិថិជនគោលដៅ និងបុគ្គលិកដែលអាជីវកម្មអាចប្រើប្រាស់ដើម្បីបង្កើតទំនាក់ទំនងដ៏មានអត្ថន័យជាមួយអ្នកប្រើប្រាស់ ដោយចាប់ផ្តើមអនុវត្តន៍ជាមួយនឹងការស្រាវជ្រាវទីផ្សារ។
បង្វែរការស្រាវជ្រាវម៉ាកយីហោទៅជាយុទ្ធសាស្រ្តម៉ាកយីហោ៖ ប្រសិនបើការយល់ដឹងដែលទទួលបានក្នុងដំណាក់កាលស្រាវជ្រាវមិនត្រូវបានអនុវត្តន៍ចំពោះយុទ្ធសាស្រ្តម៉ាកយីហោទេ នោះវាមិនទាន់គ្រប់គ្រាន់ដើម្បីធ្វើការស្រាវជ្រាវម៉ាកនោះទេ ហើយការវិនិយោគលើការខិតខំប្រឹងប្រែងម៉ាកយីហោនឹងមានការធ្លាក់ចុះ។ ដូច្នេះបន្ទាប់ពីទិន្នន័យស្រាវជ្រាវម៉ាកយីហោត្រូវបានវិភាគ គឺត្រូវតែបង្កើតយុទ្ធសាស្រ្តទីផ្សារ និងទំនាក់ទំនងពីទិន្នន័យនោះ។ និយាយជារួម ត្រូវតែធ្វើសកម្មភាពជាមួយនឹងយុទ្ធនាការ និងផែនការទៅកាន់ទីផ្សារ ដើម្បីធ្វើយ៉ាងណាឱ្យការផ្ញើសារអំពីម៉ាកយីហោរបស់អ្នកមានភាពទាក់ទាញចំណាប់អារម្មណ៍ និងការគិតរបស់អតិថិជនសក្ដានុពលរបស់អ្នក។

ពង្រីករឿងរ៉ាវរបស់ម៉ាកយីហោ៖ ការបង្កើតម៉ាកយីហោមួយតែងតែមានរឿងរ៉ាវរបស់វា ជាពិសេសវាអាចតភ្ជាប់ជាមួយនឹងរឿងរ៉ាវរបស់អតិថិជនផងដែរ។ ដូច្នេះចូរចាប់ផ្ដើមធ្វើសកម្មភាពជាមួយនឹងយុទ្ធនាការទីផ្សារដែលបង្ហាញពីអត្តសញ្ញាណម៉ាកយីហោរបស់អ្នក ទៅកាន់អតិថិជនតាមរបៀបពិតប្រាកដ និងពោរពេញដោយអត្ថន័យ។

ដើម្បីយល់បន្ថែមទៀតលើចំណុចនេះ អ្នកអាចមើលចំណុចសំខាន់ៗនៅខាងក្រោម៖

របៀបដែលម៉ាកយីហោប្រព្រឹត្តចំពោះមនុស្សនិងវប្បធម៌របស់ខ្លួន
របៀបដែលម៉ាកយីហោប្រព្រឹត្តចំពោះពិភពលោក
របៀបដែលម៉ាកយីហោជួយអតិថិជនរបស់ខ្លួន និងជួយលើការសម្រេចចិត្តរបស់ពួកគេ
បង្ហាញពីការលើកទឹកចិត្ត ឬគោលបំណងនៅពីក្រោយម៉ាក និងអ្វីដែលអ្នកជឿជាក់

ប្រភពខ្លឹមសារ៖ Forbes

ពាណិជ្ជកម្ម

របៀបសរសេរលិខិតសំណើរដើមទុនពីវិនិយោគិន

Sann Thaven

ការចាប់ផ្ដើមអាជីវកម្ម តែងតែត្រូវការដើមទុន និងមានលំហូសាច់ប្រាក់ល្អ ហើយដើម្បីទទួលបានដើមទុនឱ្យបានគ្រប់គ្រាន់ទៅតាមតម្រូវការជាក់ស្ដែង គឺមានច្រើនប្រភព។ ប៉ុន្តែប្រសិនបើអ្នកមានគោលបំណងចង់សរសេរលិខិតស្នើសុំដើមទុនបន្ថែមពីវិនិយោគិនម្នាក់ ឬច្រើននាក់ ដូច្នេះត្រូវតែចេះពីរបៀបសរសេរធ្វើយ៉ាងណាឱ្យពួកគេមានការពេញចិត្ត ក៏ដូចជាហ៊ានផ្ដល់ដើមទុនដល់អ្នក។

បើយោងតាមគេហទំព័រ Forbes បានបង្ហាញពីគន្លឹះ 5 យ៉ាងដើម្បីជាគំនិតបន្ថែមក្នុងការធ្វើយ៉ាងណាឱ្យការសរសេរសំណើររបស់អ្នកមានភាពល្អ និងពោរពេញដោយភាពទាក់ទាញការវិនិយោគ។

1. ធ្វើឱ្យដូចជាអ្នកមានវិជ្ជាជីវៈខ្ពស់ (Be Professional)

ការដែលធ្វើឱ្យដូចជាអ្នកមានវិជ្ជាជីវៈខ្ពស់ មានសារៈសំខាន់ណាស់ក្នុងការប្រាស្រ័យទាក់ទងជាមួយនឹងអ្នកវិនិយោគិន ហើយអ្នកក៏ត្រូវតែចងចាំដែលថា ការធ្វើឱ្យខ្លួនមានវិជ្ជាជីវៈ វាមិនត្រឹមតែគិតលើរូបរាង និងការជ្រើសរើសពាក្យពេចន៍ក្នុងការនិយាយឬសរសេរនោះទេ ប៉ុន្តែវាមានជាច្រើនទៀតដែលអ្នកត្រូវគិតពិចារណាបន្ថែម ដូចជា៖

ការដាក់វណ្ណយុត្តិ ដើម្បីធ្វើឱ្យងាយស្រួលមើលនិងអាន (punctuation)
វេយ្យាករណ៍
រៀបចំរបៀបសរសេរ ការដាក់រូបភាពឱ្យបានល្អ (formatting)
ក្បាលចំណងជើងដំបូង (Headers)
ការចុះហត្ថលេខា
ភាពច្បាស់លាស់នៃឯកសារ
ការលើកដាក់សម្លេង (Tone)
ការសង្ខេប

ហេតុនេះបើអ្នកពិតជាមានគម្រោងចាប់ផ្ដើមសរសេរសំណើរស្នើសុំដើមទុន ដូច្នេះអ្នកត្រូវប្រាកដថាអ្នកបានបំពេញអ្វីៗគ្រប់យ៉ាងជាឌីជីថលជំនួសដោយការសរសេរដៃ។ លើសពីនេះ ទម្រង់ដែលបានវាយបញ្ចូលត្រូវតែមានលក្ខណៈវិជ្ជាជីវៈល្អប្រសើរ ដោយអាចធ្វើឱ្យអ្នកដទៃអាចមើលយល់បានច្រើន ចៀសវាងសរសេរយល់តែម្នាក់ឯង។ បន្ថែមពីនេះ អ្នកក៏អាចបញ្ចូលនូវក្បាលសំបុត្រសម្រាប់អាជីវកម្មរបស់អ្នក ធ្វើជាលិខិតគម្របណាមួយដែលអ្នកបានដាក់ស្នើជាមួយនឹងសំណើរ។

គួរបញ្ជាក់ផងដែរថា ប្រសិនបើអ្នកមានគម្រោងក្នុងការបញ្ជូនលិខិតសំណើរនោះតាមមធ្យោបាយអ៊ីនធឺណែត ឬផ្ទាល់ អ្នកក៏ត្រូវពិនិត្យឡើងវិញ ដើម្បីការពារកុំឱ្យមានកំហុសណាមួយកើតឡើងអចេតនាឱ្យសោះ។

2. ធ្វើការស្រាវជ្រាវរបស់អ្នក

ប្រសិនបើអ្នកចង់ទទួលបានការវិនិយោគដ៏ល្អ គឺទាមទារឱ្យអ្នកធ្វើការស្រាវជ្រាវបន្ថែមទៀត ដើម្បីស្វែងរកវិនិយោគិនណាដែលអ្នកជួយដល់អ្នក ព្រមទាំងអាចជំរុញដំណើរអាជីវកម្មរបស់អ្នកកាន់តែល្អ។ លើសពីនេះ ក៏ត្រូវសិក្សាអំពីវិនិយោគិនដែលអ្នកចង់ស្នើសុំដើមទុនផងដែរ ដើម្បីធ្វើយ៉ាងណាឱ្យការរៀបចំសំណើរនោះសមស្របនឹងអ្វីដែលពួកគេចូលចិត្ត និងរីករាយក្នុងការវិនិយោគមកកាន់អ្នក។

ចូរស្វែងរកអ្នកវិនិយោគដ៏មានសក្តានុពល ដែលអាចអនុញ្ញាតឱ្យអ្នកកំណត់ថាតើការស្នើសុំមូលនិធិអាជីវកម្មរបស់អ្នក គឺអាចទៅរួច និងល្អ មុនពេលអ្នកចាប់ផ្ដើមសរសេរសំណើរនោះ។

3. ផ្ដល់ជូននូវឯកសារហិរញ្ញវត្ថុជាក់លាក់

ជាទូទៅ នៅពេលដែលអ្នកចង់ស្នើសុំអ្វីមួយពីនរណាម្នាក់ ច្បាស់ណាស់ម្នាក់នោះក៏ចង់ទទួលបានគុណប្រយោជន៍ត្រឡប់មកវិញដែរ។ ដូចគ្នានេះដែរ ចំពោះការស្នើសុំដើមទុនពីវិនិយោគិន ក៏អ្នកត្រូវតែមានអ្វីជាអំណះអំណាង ដើម្បិធ្វើយ៉ាងណាឱ្យវិនិយោគិនគិតថា ការផ្ដល់ដើមទុននោះជារឿងត្រឹមត្រូវ ជារឿងដែលផ្ដល់ផលចំណេញ និងរីករាយក្នុងការផ្ដល់ឱ្យ ដូច្នេះអ្នកត្រូវរៀបចំរបាយការណ៍ហិរញ្ញវត្ថុអាជីវកម្មមួយចំនួនដូចខាងក្រោម៖

របាយការណ៍ប្រាក់ចំណូល (Income statement)
របាយការណ៍លំហូរសាច់ប្រាក់ (Cash flow statement)
តារាងតុល្យការ (Balance sheet)
សេចក្តីថ្លែងការណ៍នៃប្រាក់ចំណូលដែលបានរក្សាទុក (Statement of retained earnings)

លើសពីនេះ អ្នកក៏អាចសិក្សាបន្ថែមទៀតថា តើវិនិយោគិនដែលអ្នកនឹងស្នើសុំដើមទុននោះ ពួកគេនឹងត្រូវការព័ត៌មានអ្វីបន្ថែមទៀតពាក់ព័ន្ធនឹងហិរញ្ញវត្ថុ? បន្ទាប់មកត្រូវត្រៀមលក្ខណៈក្នុងការរៀបចំឱ្យបានរួចរាល់ដើម្បីបង្ហាញជូនពួកគេ។

4. ផ្តល់ព័ត៌មានលម្អិត

ការផ្តល់ព័ត៌មានលម្អិតឱ្យបានច្រើនតាមតែអាចធ្វើទៅបាន វាមានសារៈសំខាន់ណាស់ក្នុងការស្នើសុំដើមទុនពីអ្នកវិនិយោគ។ ដូច្នេះដើម្បីផ្ដល់ព័ត៌មានឱ្យបានល្អ អ្នកអាចអនុវត្តន៍តាមវិធីខាងក្រោម៖

ព័ត៌មានអាជីវកម្ម (ឧ. ទីតាំង កាលបរិច្ឆេទបើក គោលដៅអាជីវកម្ម ផលិតផលឬសេវាកម្ម។ល។
ស្ថានភាពហិរញ្ញវត្ថុបច្ចុប្បន្ន
ចំនួនទឹកប្រាក់ដែលនឹងស្នើសុំ
ពន្យល់ពីមូលហេតុដែលអ្នកត្រូវការចំនួនទឹកប្រាក់ដែលអ្នកកំពុងស្នើសុំ
បង្ហាញពីរបៀបដែលអ្នកនឹងប្រើប្រាស់ដើមទុនដែលស្នើសុំនោះ
ពន្យល់អំពីផែនការហិរញ្ញវត្ថុបច្ចុប្បន្ន និងអនាគត (ឧ. បើទទួលបានផលចំណេញ អ្នកនឹងធ្វើបែបណាបន្ត ឬបែងចែកភាគលាភខ្លះឱ្យអ្នកវិនិយោគ ឬធ្វើឱ្យបានល្អលើការវិនិយោគនោះជាដើម…)

5. សន្មត់លើអ្វីដែលនឹងអាចកើតមាន

ជាធម្មតា គម្រោង ក៏ដូចជាការរំពឹងទុក វាតែងតែអាចខុសពីស្ថានភាពពិតជាក់ស្ដែង ដូច្នេះអ្នកក៏ត្រូវមានការត្រៀមទុកមុនផងដែរ ដើម្បីធ្វើយ៉ាងណាឱ្យការស្នើសុំរបស់អ្នកទទួលបានភាពជោគជ័យ ដោយមានការពេញចិត្តទាំងសងខាង។ ឧទាហរណ៍៖ ប្រសិនបើវិនិយោគិនយល់ព្រមតាមសំណើផ្តល់ជូនដើមទុនតាមការស្នើសុំរបស់អ្នក ប៉ុន្តែគាត់មានលក្ខខ័ណ្ឌដោយចង់បានការគ្រប់គ្រង 50% តើអ្នកសុខចិត្តទទួលយកការផ្តល់ជូននោះទេ? ហើយអ្នកនឹងមានអ្វីដើម្បីឆ្លើយតប?

ពាណិជ្ជកម្ម

តើធ្វើយ៉ាងណាដើម្បីបង្កើតគោលដៅក្នុងការសន្សំលុយឲ្យមានប្រសិទ្ធភាព?

Rin Hanavy

ដើម្បីគ្រប់គ្រងហិរញ្ញវត្ថុរបស់អ្នកឲ្យបានល្អ ជាដំបូងគឺអ្នកគួរតែបង្កើតទម្លាប់មួយក្នុងការសន្សំលុយដែលអ្នកមាន និងបង្កើតផែនការក្នុងការចាយវាយប្រចាំថ្ងៃ ដើម្បីតាមដានថាតើរាល់ថ្ងៃនេះ អ្នកបានចំណាយទៅលើអ្វីខ្លះ ហើយតែងតែចាយអស់ប៉ុន្មានក្នុងមួយថ្ងៃជាដើម។ ដូចនេះអ្នកនឹងមានភាពងាយស្រួលក្នុងការដកលុយមួយចំណែក សម្រាប់ធ្វើការសន្សំទុក ទោះបីតិចក៏ដោយច្រើនក៏ដោយ។

១. វាយតម្លៃផ្នែកហិរញ្ញវត្ថុរបស់អ្នក

មុនពេលដែលអ្នកចាប់ផ្ដើមកំណត់គោលដៅនៃការសន្សំ អ្នកត្រូវដឹងអំពីស្ថានភាពហិរញ្ញវត្ថុរបស់អ្នកបច្ចុប្បន្នជាមុនសិនថាតើចំណូល និងចំណាយរបស់អ្នកស្ថិតនៅកម្រិតណា? អាចយិតយោងគ្នាបានដែរឬទេ? និងគិតទៅលើ៖

ចំណូលប្រចាំខែ: តើអ្នកទទួលបានប្រាក់ខែប៉ុន្មាន បន្ទាប់ពីកាត់ថ្លៃពន្ធហើយ?
ការចំណាយជាប្រចាំ: តើក្នុងមួយខែអ្នកត្រូវចំណាយអស់ប៉ុន្មានទៅលើថ្លៃទឹក ថ្លៃភ្លើង ថ្លៃសាំង និងគ្រឿងទេសផ្សេងៗ?
ការចំណាយផ្សេងទៀត: តើនៅត្រូវចំណាយទៅលើសម្ភារៈអ្វីផ្សេងទៀតដែរឬទេ? សាកងាកទៅមើលខែចាស់ៗទៅមើលថាតើអ្នកបានចាយទៅលើសម្ភារៈអ្វីខ្លះ? ដូចជា សម្លៀកបំពាក់ ការញ៉ាំអាហារខាងក្រៅ មើលកុន ឬអាហារសម្រន់ផ្សេងៗ…។

បន្ទាប់ពីដឹងខ្ទង់ចំណាយរបស់ខ្លួនអ្នកហើយ សាកល្បងយកប្រាក់ចំណូល ដក ជាមួយនឹងប្រាក់ចំណាយរបស់អ្នកលោហ៍មើល។ ប្រសិនបើចំណូលរបស់អ្នកច្រើនជាងការចំណាយ នោះអ្នកនឹងមានលុយសល់ខ្លះដើម្បីសន្សំបាន ប៉ុន្តែបើការចាយវាយរបស់អ្នកច្រើនលើសលប់ពេក អ្នកគួរតែកាត់បន្ថយការចាយវាយទៅលើសម្ភារៈមិនចាំបាច់ខ្លះ ដើម្បីអាចសល់លុយមួយចំនួនទុកសន្សំខ្លះ។ ដូចនេះបន្ទាប់ពីធ្វើការវាយតម្លៃស្ថានភាពហិរញ្ញវត្ថុរបស់អ្នកហើយ អ្នកគួរតែកំណត់គោលដៅថា តើខ្ញុំត្រូវសន្សំលុយប៉ុន្មានក្នុងមួយខែ? ហើយសន្សំដោយវិធីណា? សន្សំតាមកូនជ្រូកឬតាមគណនីសន្សំ?

២. កំណត់គោលដៅ SMART ក្នុងការសន្សំ

ការកំណត់គោលដៅបែប SMART នេះនឹងជួយអ្នកឲ្យអាចសម្រេចបាននូវគោលដៅនៃផែនការសន្សំរបស់អ្នកបាន ហើយយុទ្ធសាស្ត្រ SMART នេះដែរ គឺអាចយកមកអនុវត្តបានទាំងក្នុងគោលដៅជីវិតរបស់អ្នក ទាំងក្នុងអាជីវកម្ម ផែនការហិរញ្ញវត្ថុ និងការងាររបស់អ្នក។

*ដែលគោលដៅ SMART នេះរួមមាន៖

Speacific(ច្បាស់លាស់) :: អ្នកត្រូវតែកំណត់គោលដៅជាក់លាក់មួយ កុំឲ្យវាមើលទៅទូទៅពេក ឬទូលំទូលាយពេក ព្រោះវាអាចធ្វើឲ្យអ្នកពិបាកក្នុងការវាស់ស្ទង់។

EX: នៅក្នុងខែនេះ ខ្ញុំនឹងសន្សំលុយឲ្យបាន $200។

Measurable (ភាពដែលអាចវាស់វែងបាន) : ដើម្បីឲ្យការសន្សំរបស់អ្នកមានប្រសិទ្ធភាព អ្នកគប្បីកំណត់នូវរយៈពេលណាមួយដែលអ្នកគិតថាអ្នកនឹងអាចសម្រេចវាបាន។

EX: ខ្ញុំត្រូវតែសន្សំលុយចំនួន $200 នេះក្នុងរយៈពេល១ខែឬ៤សប្ដាហ៍។

Attainable(អាចសម្រេចបាន) : តើអ្នកបានធ្វើទៅតាមគោលការណ៍ដែលអ្នកខ្លួនឯងបានកំណត់ដែរឬអត់? ដែលថាត្រូវតែសន្សំឲ្យបាន $200 ក្នុង១ខែឬ៤សប្ដាហ៍នេះ?

EX: ខ្ញុំត្រូវតាមដានពីការដាក់សន្សំរបស់ខ្ញុំជារៀងរាល់ខែកុំឲ្យខាន ដើម្បីឲ្យប្រាកដចិត្តថា ខ្ញុំពិតជាបានដាក់លុយចូលទៅក្នុងកូនជ្រូក ឬទៅក្នុងគណនីសន្សំទៅតាមការកំណត់ពិតមែន។

Realistic(ភាពជាក់ស្ដែង) : ប្រាក់សន្សំដែលអ្នកគ្រោងនឹងសន្សំនោះ វាក៏អាស្រ័យទៅលើស្ថានភាពជាក់នៃប្រាក់ចំណូលរបស់អ្នកផងដែរ។

EX: ខ្ញុំចង់សន្សំលុយចំនួន $200/1ខែ ដូចនេះប្រាក់ខែរបស់ខ្ញុំគួរតែ $400 ឬ $500 ឡើងទើបអាចទប់ជាប់បាន ប៉ុន្តែប្រសិនបើប្រាក់ខែអ្នកបានត្រឹមតែ $250 នោះគោលដៅរបស់អ្នកមិនសមស្របជាមួយនឹងភាពពិតជាក់ស្ដែងរបស់អ្នកទេ។

Time(ពេលវេលា) : អ្នកត្រូវតែដឹងថាពេលណា អ្នកចង់សន្សំ ហើយចង់សន្សំដល់ថ្ងៃណា (ដឹងពីថ្ងៃចាបផ្ដើម និងថ្ងៃបញ្ចប់)។

EX: ខ្ញុំបានចាប់ផ្ដើមសន្សំនៅដើមខែមករាឆ្នាំ២០២២ និងត្រូវបញ្ចប់នៅដើមខែមករាឆ្នាំ២០២៣វិញ។

៣. បង្កើតជា Spreadsheet ដើម្បីតាមដានពីការចាយវាយប្រចាំថ្ងៃ

ការបង្កើតជាតារាងចំណាយ នឹងជួយតាមដានអំពីសកម្មភាពនៃការចាយវាយប្រចាំថ្ងៃរបស់អ្នក ថាតើថ្ងៃនេះអ្នកបានចំណាយលុយទាំងនោះទៅលើសម្ភារៈអ្វីខ្លះ? ក្នុងមួយថ្ងៃអ្នកទទួលបានចំណូលប៉ុន្មាន និងចាយទៅវិញអស់ប៉ុន្មាន?ជាដើម។

ពេលខ្លះអ្នកចេះតែចាយវាយទៅតាមអារម្មណ៍ នឹកឃើញចង់ទិញរបស់អ្វីក៏ទិញ ទោះបីជាគ្មានតម្រូវការក៏ដោយ ហើយអ្នកក៏មិនសូវជាចាប់អារម្មណ៍គិតថា នៅក្នុងមួយថ្ងៃអ្នកបានចំណាយអស់ប៉ុន្មាននោះដែរ។

នៅពេលដែលអ្នកចាប់ផ្ដើមតាមដានអំពីហិរញ្ញវត្ថុរបស់អ្នក កំណត់ពីការចាយវាយ និងដឹងអំពីការចំណាយក្នុងមួយថ្ងៃៗរបស់អ្នក នោះអ្នកនឹងដឹងថាក្នុងមួយខែៗអ្នកតែងតែចំណាយអស់ប៉ុន្មាន ដើម្បីយកមកប្រៀបធៀបជាមួយនឹងប្រាកខែរបស់អ្នក ថាវាអាចផ្គត់ផ្គង់គ្រប់គ្រាន់ដែរឬទេ?

ដូចនេះ ចាប់ពីថ្ងៃនេះតទៅ អ្នកគប្បីធ្វើឲ្យខ្លួនឯងមានទម្លាប់ល្អក្នុងការចាយវាយ និងចាយវាយទៅលើរបស់ណាដែលត្រូវការនិងមានប្រយោជន៍បានហើយ។

ពាណិជ្ជកម្ម

តើគួរចាប់ផ្ដើមរកស៊ីម្នាក់ឯង ឬចូលហ៊ុនគ្នារកស៊ី?

Sann Thaven

ការដែលមានអាជីវកម្មមួយជាកម្មសិទ្ធិផ្ទាល់ខ្លួន វាជារឿងដែលមនុស្សភាគច្រើនប្រាថ្នាចង់បាន ប៉ុន្តែទោះបីជាយ៉ាងណាការធ្វើអាជីវកម្មក៏ទាមទារឱ្យមានអ្នកជួយជ្រោមជ្រែងច្រើនដែរ ដើម្បីមានលទ្ធភាពពង្រីកសាខា ក៏ដូចជាអាចដំណើរការអាជីវកម្មនោះឱ្យកាន់តែរីកចម្រើនទៅមុខជានិរន្ត។

ដូច្នេះច្បាស់ជាមានសំណួរមួយចោទឡើងថា តើគួរចាប់ផ្ដើមរកស៊ីម្នាក់ឯង ឬចូលហ៊ុនគ្នារកស៊ី? ដើម្បីសម្រាយចម្ងល់មួយនេះ អ្នកអាចឈ្វេងយល់លម្អិតបន្ថែមអំពីស្ថានភាពនៃការរកស៊ីម្នាក់ឯង និងការចូលហ៊ុនគ្នារកស៊ី។ បន្ទាប់មកចាប់ផ្ដើមគិតពិចារណាម្ដងទៀត ថាតើគួរសម្រេចចិត្តបែបណា?

1. ការចាប់ផ្ដើមរកស៊ីម្នាក់ឯង

នៅពេលដែលអ្នកសម្រេចចិត្តរកស៊ីម្នាក់ឯង អ្វីដែលអ្នកអាចទទួលបានរួមមាន៖

អ្នកមានភាពឯករាជ្យលើការគ្រប់គ្រងទាំងមូលនៅក្នុងអាជីវកម្មរបស់អ្នក
អ្នកទទួលបានប្រាក់ចំណេញតែម្នាក់ឯង
អាចបត់បែន និងសម្រេចចិត្តបានលឿន
មានឱកាសក្នុងការបង្កើតអ្វីថ្មីៗទៅតាមសេចក្ដីប្រាថ្នារបស់អ្នក
អាចសម្រេចបាននូវគោលបំណងក្នុងក្ដីស្រមៃ
មានឱកាសរៀននូវជំនាញថ្មីៗ ដើម្បីធ្វើឱ្យខ្លួនឯងកាន់តែរីកចម្រើន
ការពេញចិត្តផ្ទាល់ខ្លួន ដោយអាចបញ្ចូលគំនិតច្នៃប្រឌិតដើម្បីកែលម្អក្នុងអាជីវកម្ម

ប៉ុន្តែទោះបីជាយ៉ាងណា ក៏ការចាប់ផ្ដើមរកស៊ីម្នាក់ឯងអាចទទួលរងនូវផលអវិជ្ជមានដូចជា៖

ហានិភ័យលើហិរញ្ញវត្ថុ ដោយមានការខ្វះទុនជាដើម
មានភាពស្រ្តេសច្រើន ដោយមានកិច្ចការ តួនាទី ទំនួលខុសត្រូវជាច្រើនដែលត្រូវរ៉ាប់រង
ត្រូវលះបង់ពេលវេលាផ្ទាល់ខ្លួនច្រើន ដើម្បីសម្រុកធ្វើសកម្មភាពក្នុងការឆាប់សម្រេចគោលដៅអាជីវកម្ម
អាជីវកម្មអាចរីកចម្រើនយឺត និងមិនអាចដំណើរការបានវែងឆ្ងាយឡើយ

2. ការចូលហ៊ុនគ្នារកស៊ី

ប្រសិនបើអ្នកពិបាកក្នុងការចាប់ផ្ដើមរកស៊ីម្នាក់ឯង ដូច្នេះអ្នកអាចស្វែងរកដៃគូដែលអាចទុកចិត្តបាន ដើម្បីចូលហ៊ុនគ្នាក្នុងការចាប់ផ្ដើម។ ហើយការចូលហ៊ុនគ្នារកស៊ី វានឹងនាំផលវិជ្ជមានត្រឡប់មកវិញ ដូចជា៖

អាចដំណើរអាជីវកម្មបានលឿន ព្រោះមានធនធានច្រើន ព្រមទាំងមានជំនាញដែលអាចបំពេញបន្ថែមឱ្យគ្នាបាន
ធ្វើឱ្យការសម្រេចចិត្តកាន់តែល្អ ហើយត្រឹមត្រូវ
មានដើមទុនគ្រប់គ្រាន់ដើម្បីចាប់ផ្ដើម
ឱកាសពង្រីកអាជីវកម្មបានកាន់តែធំនិងអនាគតវែងឆ្ងាយ

ក្រៅពីនេះ ក៏អាចទទួលនូវផលវិបាកមួយចំនួនដែរ ដូចជា៖

ភាពមិនចុះសម្រុងគ្នា និងជម្លោះផ្ទៃក្នុង ដូចជាគំនិតផ្ទុយគ្នា ច្រណែនគ្នា ចង់ឈ្នះរៀងខ្លួន និងការបែងចែកតួនាទី ទំនួលខុសត្រូវ និងភាគលាភមិនបានត្រឹមត្រូវជាដើម
ជ្រើសរើសដៃគូខុស ពិបាកក្នុងការធ្វើអាជីវកម្មជាមួយគ្នាដើម្បីសម្រេចបាននូវគោលដៅធំ

ពាណិជ្ជកម្ម

1...383940...84 Page 39 of 84

1. បង្វឹកក្រុមការងារឱ្យខ្លាំង

2. ពង្រឹងលើការផ្ដល់សេវាកម្មឱ្យល្អ

3. ផ្ដល់នូវបរិយាកាសដ៏ល្អ

4. ធ្វើឱ្យម្ហូបអាហារមានរសជាតិឆ្ញាញ់ និងមានអត្ថន័យ

លក្ខណៈពិសេសរបស់ក្រុមហ៊ុនវីរៈប៊ុនថាំ

1. មាន App ផ្ទាល់របស់ក្រុមហ៊ុន

2. ធ្វើការដោយមានគោលដៅរួម

3. ផ្ដោតលើគុណភាព

4. ទំនួលខុសត្រូវ

គោលគំនិតចម្បងមុននឹងអាចបង្កើតផែនការអាជីវកម្មបាន

ផ្នែកសំខាន់ៗក្នុងផែនការអាជីវកម្ម

1. ការសង្ខេបនៃការប្រតិបត្តិនៅក្នុងក្រុមហ៊ុន

2. ទិដ្ឋភាពទូទៅរបស់ក្រុមហ៊ុន

3. ផលិតផល និងសេវាកម្ម

4. ការវិភាគទីផ្សារ

5. យុទ្ធសាស្ត្រ​ទីផ្សារ

6. ការរៀបចំនិងការគ្រប់គ្រង

7. ការព្យាករណ៍ហិរញ្ញវត្ថុ

ហេតុអ្វីត្រូវធ្វើ Market Research មុនចាប់ផ្ដើមអាជីវកម្ម?

1. អាចកំណត់អត្តសញ្ញាណអតិថិជនសក្ដានុពល

2. បានស្គាល់អតិថិជនដែលមានស្រាប់

3. កំណត់គោលដៅជាក់ស្តែងសម្រាប់អាជីវកម្មរបស់អ្នក

4. អាចបង្កើតឱកាសពង្រីកអាជីវកម្មរបស់អ្នក

5. កាត់បន្ថយហានិភ័យនៃភាពបរាជ័យ

6. យល់ដឹងពីការប្រកួតប្រជែងរបស់អ្នក

មុនពេលស្រាវជ្រាវទីផ្សារ តើយើងត្រូវធ្វើអ្វីខ្លះ?

1. កំណត់គោលបំណងនៃការស្រាវជ្រាវទីផ្សាររបស់អ្នក

2. សិក្សាពីប្រភេទនៃការស្រាវជ្រាវទីផ្សារ

3. បង្កើតសំណួរដែលអ្នកចង់ដឹងបន្ថែមក្នុងវិស័យរបស់អ្នក

មិនអាច

អាច

1. ចាប់ផ្ដើមសិក្សាពីលំហូរសាច់ប្រាក់ និងផលប៉ះពាល់របស់វា

2. ប្រៀបធៀបរវាងការលក់ និងលំហូរសាច់ប្រាក់

3. ធ្វើការព្យាករណ៍សាច់ប្រាក់ប្រចាំសប្តាហ៍

4. បន្តធ្វើបច្ចុប្បន្នភាពការព្យាករណ៍ 13 សប្តាហ៍

5. កាត់បន្ថយថ្លៃដើមអថេរ

6. ស្វែងរកហិរញ្ញប្បទាន

7. បង្កើតឧបករណ៍ព្យាករណ៍ផ្ទាល់ខ្លួន

១. ប្រើយុទ្ធសាស្ត្រឲ្យបានត្រឹមត្រូវ

២. សេវាកម្មល្អ

៣. ការបំពេញចិត្តអតិថិជន

៤. បុគ្គលិកលក់យល់ច្បាស់ពីព័ត៌មានរបស់ផលិតផល

រឿងរ៉ាវជីវិតរបស់ Tim Cook

ជីវិតធ្វើការនៅក្រុមហ៊ុន Apple

ហេតុអ្វី Tim Cook ជោគជ័យ?

តើ Content Writer ធ្វើអ្វីខ្លះ?

ប្រភេទនៃ Content Writing

គុណប្រយោជន៍របស់ Content Writer ដែលជួយនៅក្នុងអាជីវកម្ម

1. បង្កើនការយល់ដឹងអំពីម៉ាកយីហោរបស់អ្នក

2. បំប្លែងអ្នកប្រើប្រាស់ឱ្យទិញផលិតផល ឬចុះឈ្មោះ

3. ធ្វើឱ្យអតិថិជនមានបទពិសោធន៍កាន់តែប្រសើរ

4. យល់ពីអតិថិជនគោលដៅបានកាន់តែច្បាស់

5. បង្កើនចំណេះដឹងដល់អ្នក

1. ផ្លាស់ប្ដូរ​ Content និង Ads របស់អ្នក

2. សាកល្បងគន្លឹះថ្មី ដោយកុំរំពឹងលើការ Boost រហូតពេក

១. វិនិយោគលើការសិក្សា

២. វិនិយោគលើការអាន និងការស្ដាប់ឲ្យបានច្រើន

២. វិនិយោគលើសុខភាព

៣. វិនិយោគលើទំនាក់ទំនង

៤. វិនិយោគលើការធ្វើដំណើរកំសាន្ត

ដើមហេតុនៃការកកើត Blockchain

តើ Blockchain ជាអ្វី?

ហេតុអ្វីបានជា blockchain មានសារៈសំខាន់?

តើ Blockchain ដំណើរការយ៉ាងដូចម្តេច?

តើ Blockchain ត្រូវបានប្រើប្រាស់យ៉ាងដូចម្តេច?

តើខ្ញុំត្រូវអភិវឌ្ឍខ្លួនឯងតាមរបៀបណា? គួរចាប់ផ្ដើមពីណាទៅណាទៅ?

អ្នកកាន់តែស្រាវជ្រាវ អ្នកនឹងទទួលបាននូវព័ត៌មាន និងមានចំណេះដឹងច្រើន

សមាសធាតុនៃម៉ាកយីហោដ៏រឹងមាំ

1. ធ្វើឱ្យដូចជាអ្នកមានវិជ្ជាជីវៈខ្ពស់ (Be Professional)

2. ធ្វើការស្រាវជ្រាវរបស់អ្នក

3. ផ្ដល់ជូននូវឯកសារហិរញ្ញវត្ថុជាក់លាក់

4. ផ្តល់ព័ត៌មានលម្អិត

5. សន្មត់លើអ្វីដែលនឹងអាចកើតមាន

១. វាយតម្លៃផ្នែកហិរញ្ញវត្ថុរបស់អ្នក

២. កំណត់គោលដៅ SMART ក្នុងការសន្សំ

៣. បង្កើតជា Spreadsheet ដើម្បីតាមដានពីការចាយវាយប្រចាំថ្ងៃ

1. ការចាប់ផ្ដើមរកស៊ីម្នាក់ឯង

2. ការចូលហ៊ុនគ្នារកស៊ី

5. យុទ្ធសាស្ត្រទីផ្សារ

1. ផ្លាស់ប្ដូរ Content និង Ads របស់អ្នក