ប្រតិភូដែលជាថ្នាក់នាំសមាគមន៍អ្នកវាយតម្លៃ និងភ្នាក់ងារអចលនវត្ថុកម្ពុជា (Cambodian Valuers And Estate Agents Association ហៅកាត់ថា CVEA ) ដឹកនាំដោយលោក សន សៀបដែលជាប្រធានសមាគមន៍ ធ្វើដំណើរទៅចូលរួមសមាជប្រចាំឆ្នាំរបស់សមាគមន៍អ្នកវាយតម្លៃអាស៊ាន (AVA) ដែលនឹងប្រារព្ធធ្វើនៅថ្ងៃទី 18 – 20 ខែកញ្ញា ឆ្នាំ 2023 នៅប្រទេសម៉ាឡេស៊ី។
សមាគមន៍អ្នកវាយតម្លៃអាស៊ានបានបង្កើតឡើងតាំងពីឆ្នាំ1981 ដែលមានគោលបំណងលើកកម្ពស់ និងពង្រឹងវិស័យហិរញ្ញវត្ថុតាមរយៈការវាយតម្លៃនៅបណ្តាប្រទេសអាស៊ានមានស្តង់ដារខ្ពស់។ លោក សន សៀបដែលជាប្រធានសមាគមបានលើកឡើងថា ការចូលរួមប្រជុំជាប្រចាំឆ្នាំនេះគឺដើម្បីផ្លាស់ប្តូរបទពិសោធន៍គ្នាទៅវិញទៅមករវាងសមាជិកអ្នកជំនាញនៅក្នុងវិស័យវាយតម្លៃនៃបណ្តាប្រទេសអាស៊ាន និងវិស័យអចលនវត្ថុ ក៏ដូចជាបណ្តាប្រទេសអភិវឌ្ឍផ្សេងៗទៀត និងពាំនាំនូវស្តង់ដារវាយតម្លៃអន្តរជាតិដើម្បីអភិវឌ្ឍវិស័យភ្នាក់ងារវាយតម្លៃឲ្យកាន់តែមានការប្រកួតប្រជែងខ្ពស់ជាលក្ខណៈអន្តរជាតិ ព្រមទាំងផ្សព្វផ្សាយឱកាសផ្សេងៗនៅក្នុងវិស័យអចលនវត្ថុ និងការវិនិយោគនៅកម្ពុជាផងដែរ។
លោក ឧកញ៉ា ចេង ខេង សមាជិកក្រុមប្រឹក្សាភិបាលនៃសមាគមន៍CVEA និងជាប្រធានក្រុមហ៊ុនវាយតម្លៃអចលនទ្រព្យ CPL បានលើកឡើងថា វាគឺជាមោទនភាពមួយដែលយើងក្នុងនាមតំណាងឲ្យកម្ពុជាធ្វើការរួបរួមជាមួយបណ្តាសមាគន៍នៅតំបន់អាស៊ានដើម្បីលើកកម្ពស់ស្តង់ដារវាយតម្លៃនៅកម្ពុជាឲ្យកាន់តែមានការប្រកួតប្រជែងខ្ពស់។ វាក៏ជាឱកាសសម្រាប់យើងសម្រាប់យើងរៀនសូត្រពីបទពិសោធន៍ថ្មីៗ និងល្អៗ ចំណុចខ្លាំងពីក្រៅប្រទេសរបស់បណ្តាប្រទេសទាំងនោះ ដើម្បីយកមកអភិវឌ្ឍវិស័យវាយតម្លៃ និងវិស័យអចលនវត្ថុនៅកម្ពុជា។ លោកក៏បានបន្តថា មានតែការរួបរួមទេដែលធ្វើឲ្យវិស័យអចលនវត្ថុនៅប្រទេសយើង និងក្នុងតំបន់អាស៊ានកាន់តែមានការប្រកួតប្រជែងទាំងក្នុងតំបន់ និងលើសកលលោក។
នៅក្នុងកិច្ចប្រជុំនេះ លោក សេង សុភ័ក្រ្ត អនុប្រធានប្រតិបត្តិនៃសមាគអ្នកវាយតម្លៃ និងភ្នាក់ងារអចលនវត្ថុកម្ពុជា និងធ្វើជាអ្នកតំណាងសមាគម និងកម្ពុជា នឹងធ្វើការចែករំលែកបទពិសោធន៍ពីឥទ្ធិពលនៃផលប៉ះពាល់របស់បរិស្ថានមកលើវិស័យវាយតម្លៃអចលនវត្ថុដោយសារតែពិភពលោកបច្ចុប្បន្នកំពុងតែយកចិត្តទុកដាក់ខ្ពស់ និងមានការព្រួយបារម្ភអំពីការប្រែប្រួលអាកាសធាតុ។
ជាមួយគ្នានេះដែរ លោក ស៊ា ឆៃលីន ដែលជាសមាជិកគណៈកម្មការសមាគមធរុកិច្ចនៃសមាគមCVEA ក៏នឹងធ្វើបទបង្ហាញស្តីអំពីស្ថានភាពសេដ្ឋកិច្ច និងទីផ្សារអចលនវត្ថុរបស់កម្ពុជានៅឆ្នាំ២០២៣នេះ និងលើកឡើងអំពីសក្តានុពលក្នុងការវិនិយោគក្នុងវិស័យអចលនវត្ថុនៅកម្ពុជាដើម្បីចែករំលែកនៅក្នុងកិច្ចប្រជុំប្រចាំឆ្នាំនេះផងដែរ។
