កំហឹងគឺជាអារម្មណ៍ធម្មជាតិរបស់មនុស្ស ប៉ុន្តែប្រសិនបើអ្នកអនុញ្ញាតឱ្យវា «កាន់ចង្កូត» ជីវិតរបស់អ្នក វានឹងដឹកអ្នកទៅរកផ្លូវវិនាសជាមិនខាន។ មនុស្សដែលខ្លាំងពិតប្រាកដ មិនមែនជាមនុស្សដែលមិនចេះខឹងនោះទេ ប៉ុន្តែគឺជាមនុស្សដែលចេះគ្រប់គ្រងកំហឹង មិនឱ្យកំហឹងមកគ្រប់គ្រងខ្លួនឯងបាន។ ខាងក្រោមនេះគឺជាហេតុផល និងវិធីសាស្ត្រដើម្បីកុំឱ្យកំហឹងដឹកមុខអ្នក៖
១. កំហឹងគឺជាភាពឆ្កួតមួយពេល៖ ក្នុងអំឡុងពេលខឹង អ្នកអាចនឹងនិយាយពាក្យសម្តីមួយឃ្លាដែលធ្វើឱ្យអ្នកសោកស្តាយពេញមួយជីវិត ឬអាចធ្វើឱ្យទំនាក់ទំនងដែលកសាងរាប់សិបឆ្នាំ អាចត្រូវបានបំផ្លាញត្រឹមតែ ១ នាទីនៃកំហឹង។ ដូច្នេះ ហាមដាច់ខាតធ្វើការសម្រេចចិត្ត ឬនិយាយស្តីនៅពេលដែលអ្នកកំពុងក្ដៅក្រហាយ។
២. អ្នកគឺជាជនរងគ្រោះទីមួយ៖ ការចងកំហឹង ឬព្យាបាទអ្នកដទៃ ប្រៀបដូចជាការ «ផឹកថ្នាំពុលខ្លួនឯង តែសង្ឃឹមឱ្យអ្នកដទៃស្លាប់»។ មុននឹងកំហឹងទៅធ្វើឱ្យគេឈឺចាប់ វាបានដុតបំផ្លាញសេចក្ដីសុខ និងសុខភាពរបស់អ្នករួចជាស្រេចទៅហើយ។ ដូចនេះការដោះលែងកំហឹង មិនមែនធ្វើដើម្បីអ្នកដទៃទេ តែគឺដើម្បី ដោះលែងខ្លួនឯងឱ្យមានសេរីភាព។
៣. វិធីពន្លត់ភ្លើងកំហឹង៖ នៅពេលខឹងខ្លាំង ចូរប្រើច្បាប់ រាប់ ១ ដល់ ១០ និងដកដង្ហើមវែងៗដើម្បីទប់ស្មារតី។ បើនៅតែមិនបាត់ ចូរដើរចេញ ទៅរកកន្លែងស្ងាត់សិន។ បន្ទាប់មក ចូរសួរខ្លួនឯងថា «តើរឿងនេះនៅសំខាន់ទេនៅពេលក្រោយ?» បើមិនសំខាន់ទេ កុំចំណាយកម្លាំងចិត្តខឹងនាំឱ្យខាតបង់ក្ដីសុខអី។
សូមចងចាំពាក្យមួយឃ្លាថា «អ្នកដែលអាចយកឈ្នះសត្រូវរាប់ម៉ឺននាក់នៅក្នុងសមរភូមិ មិនខ្លាំងស្មើនឹងអ្នកដែលយកឈ្នះចិត្តខឹងរបស់ខ្លួនឯងតែម្នាក់នោះទេ»។ ចូររៀនធ្វើជាម្ចាស់នៃអារម្មណ៍ខ្លួនឯង ព្រោះបើអ្នកគ្រប់គ្រងវាបាន អ្នកនឹងគ្រប់គ្រងស្ថានការណ៍បានទាំងអស់។
