ក្នុងនាមជាម្ចាស់អាជីវកម្មខ្នាតតូចឬមធ្យមនៅកម្ពុជា ការបង្កើនការលក់ដោយមិនចំណាយថវិកាច្រើន គឺជាក្តីស្រមៃរបស់មនុស្សគ្រប់គ្នា។ បើទោះជាអ្នកមិនមានក្រុមការងារផ្នែកលក់ធំក៏ដោយ ក៏អ្នកនៅតែអាចបង្កើតប្រព័ន្ធលក់មួយដែលមានប្រសិទ្ធភាពខ្ពស់បាន។ ខាងក្រោមនេះជាយុទ្ធសាស្ត្រសំខាន់ៗដែលអ្នកអាចអនុវត្តភ្លាមៗដើម្បីជំរុញការលក់របស់អ្នក។
១. ស្វែងយល់ពីអតិថិជនរបស់អ្នកឲ្យបានច្បាស់
មុននឹងលក់ អ្នកត្រូវដឹងថាអ្នកកំពុងលក់ឲ្យនរណា។ នេះមិនមែនត្រឹមតែដឹងថាពួកគេជាអ្នកណា អាយុប៉ុន្មាន ឬភេទអ្វីនោះទេ តែអ្នកត្រូវយល់ពីបញ្ហាដែលពួកគេកំពុងជួប តម្រូវការរបស់ពួកគេ និងហេតុផលដែលធ្វើឲ្យពួកគេសម្រេចចិត្តទិញ។ ព្រោះថានៅពេលអ្នកយល់ច្បាស់ពីពួកគេ អ្នកនឹងអាចកែសម្រួលសារលក់របស់អ្នកឲ្យត្រូវនឹងតម្រូវការរបស់ពួកគេបាន។
២. ផ្ដោតលើការកសាងទំនាក់ទំនង មិនមែនគ្រាន់តែលក់
- ក្លាយជាអ្នកផ្ដល់ដំណោះស្រាយ: ជំនួសឲ្យការនិយាយតែពីផលិតផលរបស់អ្នក ចូរចាប់ផ្ដើមដោយសួរពីបញ្ហាឬតម្រូវការរបស់អតិថិជន។ បន្ទាប់មកបង្ហាញពីរបៀបដែលផលិតផលឬសេវាកម្មរបស់អ្នកអាចដោះស្រាយបញ្ហាទាំងនោះបាន។
- បម្រើសេវាកម្មអតិថិជនដោយបេះដូង: ការលក់មិនបញ្ចប់ត្រឹមពេលដែលអតិថិជនបង់លុយនោះទេ។ តែត្រូវតាមដានពួកគេក្រោយពេលលក់ ដោះស្រាយរាល់ចម្ងល់ ឬបញ្ហាដែលកើតឡើង។ សេវាកម្មល្អនឹងធ្វើឲ្យអតិថិជនក្លាយជាអ្នកផ្សព្វផ្សាយដោយស្ម័គ្រចិត្ត។
៣. ប្រើប្រាស់បណ្ដាញសង្គមឲ្យអស់ពីលទ្ធភាពដោយឥតគិតថ្លៃ
- បង្កើត Content ដែលមានតម្លៃ: ជំនួសឲ្យការផុសរូបលក់រាយរាល់ថ្ងៃ ចូរចែករំលែកចំណេះដឹង ព័ត៌មាន ឬគន្លឹះដែលពាក់ព័ន្ធនឹងអាជីវកម្មរបស់អ្នក។ ឧទាហរណ៍៖ ប្រសិនបើអ្នកលក់សម្លៀកបំពាក់ អ្នកអាចចែករំលែកគន្លឹះ mix & match ឲ្យទាន់សម័យ។
- ធ្វើអន្តរកម្មជាមួយអ្នកតាមដាន: ឆ្លើយតប Comment និងសាររបស់ពួកគេឲ្យបានលឿន។ ការទំនាក់ទំនងនេះនឹងជួយឲ្យពួកគេមានអារម្មណ៍ស្និទ្ធស្នាលជាមួយអ្នក។
៤. កុំមើលរំលងការលក់ដោយពាក្យសម្ដី
ការលក់ដោយពាក្យសម្ដីគឺជាយុទ្ធសាស្ត្រដ៏មានប្រសិទ្ធភាពបំផុត។ អតិថិជនដែលពេញចិត្តនឹងក្លាយជាអ្នកផ្សព្វផ្សាយឲ្យអ្នកដោយឥតគិតថ្លៃ។
- លើកទឹកចិត្តឲ្យមានការផ្តល់មតិ: បន្ទាប់ពីការទិញ សូមសុំឲ្យអតិថិជនជួយសរសេរមតិយោបល់ឬផ្ដល់ Feedback លើទំព័រ Facebook ឬ Google My Business របស់អ្នក។ មតិយោបល់វិជ្ជមាននឹងបង្កើតទំនុកចិត្តដល់អតិថិជនថ្មី។
- បង្កើតប្រព័ន្ធ Referral: ផ្ដល់ការបញ្ចុះតម្លៃឬអំណោយតូចមួយសម្រាប់អតិថិជនដែលបានណែនាំមិត្តភ័ក្ដិឬក្រុមគ្រួសាររបស់ពួកគេឲ្យមកទិញពីអ្នក។
សរុបមក ក្នុងនាមជាម្ចាស់អាជីវកម្មខ្នាតតូច សូមចាប់ផ្ដើមដោយការយល់ដឹងពីអតិថិជនរបស់អ្នកឲ្យបានច្បាស់ ផ្ដោតលើការកសាងទំនាក់ទំនង និងប្រើប្រាស់បណ្ដាញសង្គមឲ្យមានប្រសិទ្ធភាព។ យុទ្ធសាស្ត្រទាំងនេះនឹងជួយអ្នកបង្កើនការលក់បានយ៉ាងគំហុកដោយមិនចាំបាច់ចំណាយលើការផ្សាយពាណិជ្ជកម្មឡើយ។
