បន្ទាប់ពីរលកយក្សស៊ូណាមិឆ្នាំ 2011 ប្រទេសជប៉ុនមិនត្រឹមតែធ្វើការកសាងហេដ្ឋារចនាសម្ព័ន្ធឡើងវិញប៉ុណ្ណោះទេ ប៉ុន្តែថែមទាំងបានគូសវាសឡើងវិញពីរបៀបការពារប្រជាជនរបស់ខ្លួន បើគ្រោះមហន្តរាយបែបនេះកើតឡើងម្តងទៀត។ ជាលទ្ធផលនៃការគូសវាសគឺ “មហាកំផែងស៊ូណាមិ” ដ៏ធំដែលលាតសន្ធឹងប្រវែង 395 គីឡូម៉ែត្រ និងកម្ពស់រហូតដល់ 12.5 ម៉ែត្រ។
មហាកំផែងនេះរចនាឡើង ដើម្បីការពារតំបន់ដែលងាយប៉ះទង្គិចខ្លាំង ដូចជានៅទីប្រជុំជនដែលនៅតាមឆ្នេរសមុទ្រពីគ្រោះមហន្តរាយនាពេលអនាគត ហើយត្រូវបានគេមើលឃើញថានេះជាសញ្ញាដ៏រឹងមាំក្នុងការការពារ។
យ៉ាងណាមិញ បន្ទាប់ពីសាងសង់មហាកំផែងដ៏ធំមួយនេះហើយ ជប៉ុនបានបន្តពង្រឹងសុវត្ថិភាពបន្ថែមទៀត ដោយការដាំដើមឈើចំនួន 9 លានដើមនៅតាមច្រាំងដើម្បីបង្កើតជារបាំងធម្មជាតិក្បែរជញ្ជាំងបេតុងនៃមហាកំផែង។
ដោយរួមបញ្ចូលគ្នានូវជញ្ជាំងបេតុងដ៏ធំ និងដើមឈើរាប់លានដើម ប្រទេសជប៉ុនបង្ហាញពីរបៀបដែលបច្ចេកវិទ្យា និងធម្មជាតិអាចធ្វើការរួមគ្នាក្នុងការផ្តល់នូវការការពារដ៏រឹងមាំប្រឆាំងនឹងការខូចខាតពីគ្រោះមហន្តរាយ។
