អ្នកប្រាកដជាបានដឹងអំពីស្ថានភាពទីផ្សារអចលនទ្រព្យនូវរយៈពេលប៉ុន្មានឆ្នាំចុងក្រោយមកនេះហើយថាតើមានការផ្លាស់ប្តូរយ៉ាងយ៉ាងណាខ្លះមកហើយ។ ដូច្នោះហើយឥឡូវនេះខ្ញុំនឹងលើកយកនូវចំណុចខ្លះដែលទាក់ទងទៅនឹងស្ថានភាពអចលនទ្រព្យនៅក្នុងឆ្នាំ 2025 ខាងមុខ។ បើយោងទៅតាមប្រសាសន៍របស់លោក ហាក់ គីមថុង ដែលបានបង្ហាញពីការយល់ឃើញត្រួសៗទៅលើវិស័យអចលនទ្រព្យនាពេលខាងមុខនេះ៖
– អាចនឹងគ្រាន់បើជាងឆ្នាំ2024តិចតួច តែនៅតែលំបាក។
– នៅតែជាទីផ្សាររបស់អ្នកទិញ មានន័យថា អ្នកទិញមានអំណាចចចារបានច្រើន និងអាចទិញបានតម្លៃល្អ ហើយនេះក៏នៅតែជាឱកាសដ៏ល្អសម្រាប់អ្នកទិញទុកចំណេញរយៈពេលវែង និងអ្នកមានលុយសុទ្ធក្នុងដៃ ឬមានអ្នកមានលំហូរសាច់ប្រាក់ពីអាជីវកម្មរឹងមាំដែលអាចទទួលបានកម្ចៃ។
– ឆ្នាំនេះ នៅតែមិនមែនជាឆ្នាំដែលទិញបានចំណេញភ្លាមៗដូចមុនជំនាន់កូវីដនោះទេ ដែលទាមទារឲ្យអ្នកទិញត្រូវមានស្ថានភាពហិរញ្ញវត្ថុល្អ និងអាចទិញទុករយៈពេលយូរដើម្បីទទួលបានផលចំណេញ។ ហើយប្រជាជនយើងគួរតែស៊ាំនឹងស្ថានភាពនេះ ព្រោះការវិនិយោគអចលនវត្ថុដែលសុវត្ថិភាព គឺជាការវិនិយោគដែលផ្អែកលើកំណើនសេដ្ឋកិច្ចរឹងមាំ និងទន្ទឹងចាំយកផលក្នុងរយៈពេលយូរ (5ឆ្នាំឡើង) ជាជាងទីផ្សារដែលគេក្រឡុកតម្លៃ។ ប្រាកដណាស់ អាចនឹងមានតំបន់មួយចំនួនតូចដែលមានសន្ទុះ នឹងផ្តល់ចំណេញក្នុងរយៈពេលខ្លី តែក៏មានហានិភ័យខ្ពស់។
– ទីផ្សារទិញលក់ដីមានសន្ទុះល្អជាងទិញលក់ផ្ទះ។
– ទីផ្សារទិញលក់ខុនដូក្នុងស្រុកនឹងមានកំណើនខ្លះ ព្រោះអតិថិជនវ័យក្មេងចាប់ផ្តើមជ្រាបចូលក្នុងទីផ្សារ តែក៏មិនផុសផុលដែរ។
– ទីផ្សារផ្ទះរស់នៅនៅតែមាន តែមិនមែនទិញដើម្បីទុកចំណេញនោះទេ ឆ្នាំនេះ អ្នកទិញគឺភាគច្រើននឹងទិញដើម្បីបំពេញតម្រូវការរស់នៅ និងភាពចាំបាច់ប្រើប្រាស់ ហើយអតិថិជននឹងគិតល្អិតល្អន់មុននឹងទិញ គិតលើគុណភាព គិតលើបរិយាកាសរស់នៅ និងផាសុកភាព។ ដូចនេះម្ចាស់គម្រោងបុរីដែលអាចផ្តល់ទំនុកចិត្ត និងគុណភាពសំណង់និងការរស់នៅ គឺមានអាទិភាពខ្ពស់។
-ទីផ្សារជួលអាចនឹងមានសន្ទុះល្អជាងឆ្នាំ2024
– ទីផ្សារនឹងល្អប្រសើរជាងហ្នឹង ប្រសិនបើរាជរដ្ឋាភិបាលលូកដៃចូលជួយគាំទ្រ ជាពិសេសគឺជួយជម្រុញក្នុងវិស័យធនាគារ និងគោលនយោបាយការពារអតិថិជនបន្ថែម។ យើងក៏ចាប់ផ្តើមឃើញសកម្មភាពបែបនេះបណ្តើរៗផងដែរក្នុងត្រីមាសចុងក្រោយនេះ។
– ការបញ្ចុះអាត្រាការប្រាក់របស់ធនាគារកណ្តាលអាមេរិច អាចនឹងជះឥទ្ធិពលវិជ្ជមានលើទីផ្សារហិរញ្ញវត្ថុ និងវិនិយោគដែលនឹងជួយទីផ្សារអចលនវត្ថុបានខ្លះ តែក៏មិនអាចជួយឲ្យវាមានភាពផុសផុលនោះដែរ។ ប៉ុន្តែវាជាផ្នែកមួយជម្រុញឲ្យមានកំណើតលំហូរសាច់ប្រាក់ចូលក្នុងប្រព័ន្ធសេដ្ឋកិច្ចឲ្យកាន់តែប្រសើរ។
ជាទូទៅការទស្សន៍ទាយផ្នែកសេដ្ឋកិច្ច ដូចជាទីផ្សារអចលនវត្ថុជាដើមគឺផ្អែកលើទិន្នន័យ និងស្ថានភាពបច្ចុប្បន្ន និងទំនោរសម្រាប់ថ្ងៃអនាគត ដែលវាអាចមានការប្រែប្រួលបានដោយកត្តាផ្សេងៗដូចជាវិបត្តិដែលមិនមានការរំពឹងទុកដូចជាកូវីដ បញ្ហាសេដ្ឋកិច្ចក្រៅប្រទេស សង្គ្រាម ទំនុកចិត្តទីផ្សារ ។ល។ ដែលខ្ញុំសង្ឃឹមថា ប្រជាជនយើង ត្រូវចំណាយពេលឲ្យបានច្រើនក្នុងការតាមដាន និងសិក្សាស្វែងយល់មុននឹងវិនិយោគអ្វីមួយជាជាងធ្វើតាមគេតាមឯងដោយមិនមានចំណេះដឹងមូលដ្ឋាន នាំឲ្យមានហានិភ័យខ្ពស់ ដោយសារតែការលោភលន់ និងមិនមានចំណេះដឹងរឹងមាំ។
