បើទោះបីជាស្ថានភាពកូវិត ១៩ បានស្ងប់ស្ងាត់ទៅយ៉ាងណាក្ដី តែសម្រាប់សេដ្ឋកិច្ចវិញ នៅតែមិនទាន់ដំណើរការបានល្អប្រសើរនៅឡើយទេ ដូច្នេះការគ្រប់គ្រងហិរញ្ញវត្ថុនៅតែជារឿងសំខាន់សម្រាប់បុគ្គល និងគ្រួសារនីមួយៗដដែល។ ថាតើគួរធ្វើយ៉ាងណាដើម្បីចាត់ចែងធនធានហិរញ្ញវ្ថុផ្ទាល់ខ្លួនឱ្យបានល្អ និងមានប្រសិទ្ធិភាព? លោក ង៉ែត ជូ ជាអ្នកជំនាញហិរញ្ញវត្ថុ និងវិនិយោគ បានបង្ហើបពីក្បួរចាត់ចែងលុយតាមអទិភាព ៤យ៉ាងសំខាន់ៗដូចខាងក្រោម៖
អាទិភាពទី១៖ បំពេញតម្រូវការចាំបាច់សំរាប់ការរស់នៅប្រចាំថ្ងៃរបស់គ្រួសារ
ជាការពិត ចំពោះការចំណាយប្រចាំថ្ងៃ ជាតម្រូវចាំបាច់ណាស់សម្រាប់គ្រួសាររបស់អ្នកទៅលើ ថ្លៃទឹកភ្លើង ហ្គាស ម្ហូបអាហារ ការធ្វើដំណើរ ថ្លៃសិក្សារបស់កូនៗ និងថ្លៃថែទាំសុខភាព ឬការព្យាបាលផ្សេងៗសម្រាប់សមាជិកគ្រួសារទាំងមូល។
អាទិភាពទី២៖ មើលថែអាជីវកម្ម និងបុគ្គលិកឱ្យបានល្អ
ប្រសិនបើអ្នកជាម្ចាស់អាជីវកម្ម គួរបំពេញតម្រូវការក្នុងការគ្រប់គ្រងអាជីវកម្មឱ្យមានស្ថិរភាព និងបើកប្រាក់ខែជូនបុគ្គលិកគ្រប់រូបអោយបានទៀងទាត់។ ព្រោះបុគ្គលិកគ្រប់រូបតែងតែផ្ញើរវាសនានឹងការងាររបស់ខ្លួនតាមរយៈការរកចំណូលប្រចាំខែ ដើម្បីផ្គត់ផ្គង់ជីវភាពគ្រួសារ និងបំពេញកាតព្វកិច្ចសងបំណុលនានា។
អាទិភាពទី៣៖ បំពេញកាតព្វកិច្ចបំណុល
លោកបានបន្តថា ត្រូវសងត្រឡប់ចំពោះប្រាក់កម្ចី និងបង់ការប្រាក់ជូនម្ចាស់បំណុលឱ្យបានទៀងទាត់ និងទាន់ពេលវេលា ប្រសិនបើអ្នកនៅមានលទ្ធភាពផ្នែកហិរញ្ញវត្ថុបន្ទាប់ពីការបំពេញកាតព្វកិច្ចដែលជាអាទិភាពទី១ និងអាទិភាពទី២រួចមក។
អាទិភាពទី៤៖ ចាប់យកឱកាសវិនិយោគ
អ្នកជំនាញវិនិយោគបានបន្ថែមថា “អ្នកគួរឆ្លៀតឱកាសលៃលកវិនិយោគលើអចលនទ្រព្យ អាជីវកម្មនានា ឬភាគហ៊ុននៃអាជីវកម្មដែលចុះបញ្ជីនៅផ្សារហ៊ុន ហើយមានសក្តានុពលអាចបានផលចំណេញខ្ពស់នាពេលអនាគត”។
គួរបញ្ចាក់ផងដែរថា ការឆ្លៀតឱកាសវិនិយោគក្នុងគ្រាដ៏លំបាកនេះមានអត្ថប្រយោជន៍ចម្បងៗពីរយ៉ាងគឺ ឱកាសរកប្រាក់ចំណេញបានច្រើន និងជាការចូលរួមចំណែកស្តារ និងជំរុញស្ថានភាពសេដ្ឋកិច្ចឱ្យមានភាពប្រសើរឡើងវិញនាពេលដ៏ខ្លីខាងមុខ។
