Facebook ដែលអ្នកទាំងអស់គ្នាតែងតែស្គាល់ថាជាវេទិកាសម្រាប់បង្កើតឬភ្ជាប់ទំនាក់ទំនងផ្ទាល់ខ្លួនជាមួយអ្នកដទៃនោះ ឥឡូវនេះកំពុងតែបានប្រែក្លាយទៅជាឧបករណ៍ដ៏មានសក្តានុពលនៅក្នុងការធ្វើទីផ្សារនាពេលបច្ចុប្បន្ន។ នៅក្នុងបរិបទដែលពោរពេញទៅដោយការប្រកួតប្រជែងដ៏ស្វិតស្វាញមួយនេះប្រសិនបើអ្នកមិនព្រមទទួលយកនូវការផ្លាស់ប្តូរឬមិនព្រមបត់បែនឲ្យស្រមទៅតាមទំនោររបស់អតិថិជនទេនោះអាជីវកម្មរបស់អ្នកអាចនឹងត្រូវបានមើលរំលងដែលជាហានិភ័យមួយសម្រាប់អាជីវកម្ម។ អាស្រ័យហេតុនេះហើយការធ្វើទីផ្សារតាមបណ្តាញសង្គមគឺជាកត្តាដែលសំខាន់ខ្លាំងណាស់អាជីវកម្ម។
តើមានយុទ្ធសាស្ត្រទីផ្សារណាខ្លះដែលអ្នកគួរតែអនុវត្តន៍នៅលើបណ្តាញសង្គម Facebook?
១. រៀបចំគេហទំព័រអាជីវកម្ម( Facebook Business Page) របស់អ្នកឲ្យមានលក្ខណៈស្តង់ដាត្រឹមត្រូវ
គេហទំព័រអាជីវកម្មដែលអ្នកបានបង្កើតនោះគឺតំណាងឲ្យអាជីវកម្មរបស់អ្នកដែលចង់បង្ហាញទៅកាន់អតិថិជននៅតាមបណ្តាញសង្គម ។ ការរៀបចំគេហទំព័រអាជីវកម្មរបស់អ្នករៀបចំឲ្យមានមានរបៀបរៀបរយត្រឹមត្រូវនិងគួរឲ្យទាក់ទាញគឺជាផ្នែកមួយនៃការបង្កើននូវទំនុកចិត្តពីអតិថិជនក៏ដូចជាកសាងនូវកេរ្តិ៍ឈ្មោះនៃអាជីវកម្មរបស់អ្នកផងដែរ។ ម្យ៉ាងវិញទៀតនៅពេលដែលអតិថិជនចង់ដឹងបន្ថែមអំពីអ្នកពួកគេគ្រាន់តែចូលទៅកាន់គេហទំព័រអាជីវកម្មរបស់អ្នកនោះពួកគេនឹងរកឃើញព័ត៌មានផ្សេងៗដែលទាក់ទងនឹងអ្នកបានយ៉ាងងាយស្រួល។ យ៉ាងណាមិញអ្នកគួរតែបំពេញនូវព័ត៌មានសំខាន់ៗដូចជា
– ផ្លាស់ប្តូរនូវ Profile Picture ដោយដាក់នូវ Logo របស់អ្នក និង Cover Photo គួរតែជារូបភាព
ដែលទាក់ទងទៅនឹងអាជីវកម្មរបស់អ្នក
– ការពិពណ៌នាខ្លីអំពីអាជីវកម្មរបស់អ្នក
– បង្នើតនូវ Username ដើម្បីឲ្យអតិថិជនឆាប់រក Page របស់អ្នកឃើញ
– លេខទូរស័ព្ទ
– អាស័យដ្ឋានរួមជាមួយនឹង Google Map
– ម៉ោងដែលអាជីវកម្មរបស់អ្នកបើកដំណើរការ
– Email និង Website ( បើមាន)
២ .មាតិកា (Content) ដែលអ្នកគួរតែបង្កើត
ប្រសិនបើអ្នកចង់ឲ្យអតិថិជនបានស្គាស់អំពីអាជីវកម្មរបស់អ្នកពិតណាស់អ្វីដែលអ្នកត្រូវធ្វើនោះគឺជាការបង្ហាញឲ្យពួកគេបានឃើញតាមរយៈរូបភាពនិងវីដេអូ។ ជាក់ស្តែងប្រសិនបើអ្នកជាម្ចាស់អាជីវកម្មហាងកាហ្វេមាតិកា(Content) ដែលអ្នកគួរតែបង្ហាញទៅកាន់អតិថិជនអាចជា
– រូបភាពឬវីដេអូដ៏គួរឲ្យទាក់ទាញនៃ កាហ្វេ ភេសជ្ជៈ និង អាហារដែលមាននៅក្នុងហាងរបស់អ្នក
– រូបភាពដែលបង្ហាញអំពីបរិយាកាសនៅក្នុងហាង
– វីដេអូដែលបង្ហាញអំពីសកម្មភាពរបស់បុគ្គលិក
– វីដេអូសម្ភាសន៍អំពីចំណាប់អារម្មណ៍របស់អតិថិជនដែលនៅក្នុងហាង
– រូបភាពឬវីដេអូដែលបង្កើនចំណេះដឹងសម្រាប់អតិថិជន(ឧទាហរណ៍ដូចជារបៀបឆុងកាង
កាហ្វេយ៉ាងណាឲ្យបានត្រឹមត្រូវ ជាដើម)
ក្រៅពីនេះអ្នកក៏អាចធ្វើការសហការជាមួយ Influencers ដើម្បីឲ្យពួកគេបង្កើតជាវីដេអូណែនាំនិងផ្សព្វផ្សាយ អំពីហាងរបស់អ្នកទៅកាន់អ្នកគាំទ្ររបស់ពួកគេផងដែរ ។
៣. បង្កើតជាល្បែងកម្សាន្តងាយៗ(Contest)
អ្នកប្រហែលជាធ្លាប់ឃើញហើយថាហាងកាហ្វេល្បីៗដូចជា Starbuck ជាដើមតែងតែបង្កើតជាល្បែងកម្សាន្តងាយៗ(Contest)ឬ Giveaway សម្រាប់អតិថិជនចូលរួមលេងដើម្បីទទួលបានរង្វាន់ឬក៏វត្ថុអនុស្សាវរីយ៍ផ្សេងៗដោយមានលក្ខណ្ឌនៃការលេងមួយចំនួនដូចជា Like page រួចធ្វើការShare ដោយ Tag មិត្តភក្តិរបស់អ្នកឲ្យបាន ៥នាក់ ជាដើម។ នេះគឺជាវីធីសាស្ត្រដ៏មានប្រសិទ្ធិភាពក្នុងការភ្ជាប់ទំនាក់ទំនង( Engage)និងធ្វើឲ្យអតិថិជនកាន់តែមានអារម្មណ៍ល្អជាមួយនឹងអាជីវកម្មរបស់អ្នកផងដែរ ។ លើសពីនេះទៅទៀតវាក៏ជាយុទ្ធសាស្ត្រមួយដែលអាចជួយបង្កើននូវកេរ្តិ៍ឈ្មោះនៃអាជីវកម្មរបស់អ្នកឲ្យមានអ្នកស្គាល់ច្រើនកាន់ជាងមុនផងដែរ។
៤ .ការប្រើប្រាស់ Messenger Chatbot
Facebook បានបន្ថែមនូវមុខងារដែលមានប្រយោជន៍និងកាន់តែមានភាពងាយស្រួលជាច្រើនសម្រាប់ជួយសម្រួលដល់អាជីវកម្ម ។ ជាក់ស្តែងអ្នកក៏អាចប្រើប្រាស់ Messenger Chatbot ដែលមានមុខងារឆ្លើយតបសារដោយស្វ័យប្រវត្តិសម្រាប់អ្នកដែលអាចជួយសម្រួលដល់ការបម្រើសេវាកម្មអតិថិជនឲ្យកាន់តែមានភាពងាយស្រួលមួយកម្រិតទៀត។ ម្យ៉ាងវិញទៀតអ្នកអាចកត់ចំណាំនូវសំនួរដែលអតិថិជនភាគច្រើនតែងតែសួរមកកាន់អ្នកហើយដាក់សំណួររួមនិងចម្លើយទាំងនោះទៅក្នុង Chatbot ។ ដូច្នេះនៅពេលដែលអតិថិជន Chat មកសួរ ពួកគេនឹងទទួលបានចម្លើយក៏ដូចជាព័ត៌មានផ្សេងៗពីអាជីវកម្មរបស់អ្នកដោយអ្នកមិនចាំបាច់ចំណាយពេលវេលាដើម្បីឆ្លើយនូវសំនួរដដែលៗទាំងនោះ។ លើសពីនេះទៅទៀតសម្រាប់មា្ចស់អាជីវកម្មហាងកាហ្វេឬអាហារដ្ឋានអ្នកក៏អាចប្រើ Messenger Chatbot ដើម្បីរៀបចំជាបញ្ជីមុខម្ហូបឬភេសជ្ជៈសម្រាប់អតិថិជនដែលបញ្ជាទិញតាមរយៈ Facebook អាចកម្មង់ អាហារឬភេសជ្ជៈទៅតាមចំណង់ចំណូលចិត្តប្រកបដោយភាពភាពងាយស្រួល៕
